Nahinumdom Ka Ba?

Gipalandong ba nimog maayo ang dili pa dugayng mga isyu sa Ang Bantayanang Torre? Kon mao, makaplagan nimong makaiikag ang paghinumdom sa mosunod:

◻ Unsa ang pipila ka pangutana nga hayan isukna sa duha ka Kristohanon sa ilang kaugalingon una pa sila mosugod sa paghunahuna nga magminyo?

‘Segurado ba gayod ako sa iyang espirituwalidad ug debosyon sa Diyos? Ako bang malantaw ang pag-alagad sa Diyos uban kaniya sa tibuok nga kinabuhi? Nagkasuhitohay na ba kami pag-ayo sa among mga batasan? Masaligon ba ako nga kami magkauyonay sa dayon? Nagkasayranay na ba kami pag-ayo bahin sa kanhing mga lihok ug presenteng mga kahimtang sa usag usa?’​—8/15, panid 31.

◻ Unsay gipasabot ni Jesus sa dihang siya miingon ngadto sa iyang mga sumusunod: “Kamo mao ang asin sa yuta”? (Mateo 5:13)

Gipakita ni Jesus nga ang pagsangyaw sa iyang mga sumusunod ngadto sa uban bahin sa Gingharian sa Diyos adunay nagatipig, o nagaluwas ug kinabuhi, nga impluwensiya diha sa ilang mga mamiminaw. Sa pagkatinuod, kadtong magpadapat sa mga pulong ni Jesus mapanalipdan gikan sa moral ug espirituwal nga kadunotan diha sa kalibotan.​—8/15, panid 32.

◻ Sa unsang paagi ang mga managtrato makalikay sa lit-ag sa seksuwal nga imoralidad?

Kon ikaw makigdeyt, maalamong likayan nimo nga mag-inusara uban sa imong umaabot nga kapikas ilalom sa dili-angayng mga sirkumstansiya. Labing maayo nga magkalipay sa pagpakig-uban sa usag usa diha sa usa ka grupo o diha sa publikong mga dapit. Butangig mga limitasyon ang mga pasundayag sa pagmahal, nga ang matag usa magtahod sa pagbati ug tanlag sa usag usa.​—9/1, mga panid 17, 18.

◻ Unsa ang pagsabot?

Kini mao ang katakos sa pagsusi sa usa ka butang ug pag-ila kon unsay naglangkob niini pinaagi sa pagsabot sa mga kalangkitan tali sa mga bahin niini ug sa katibuk-an, sa ingon nakasabot sa diwa niini. (Proverbio 4:1)​—9/15, panid 13.

◻ Unsay gipangayo ni Jehova kanato karon?

Sa paninugdan, ang gipangayo ni Jehova kanato mao nga mamati sa Iyang Anak ug mosunod sa iyang panig-ingnan ug mga pagtulon-an. (Mateo 16:24; 1 Pedro 2:21)​—9/15, panid 22.

◻ Kinsa lamang ang makasinati ug kalinaw?

Sanglit si Jehova mao “ang Diyos nga nagahatag ug kalinaw,” ang kalinaw masinati lamang sa mga tawo nga nahigugma sa Diyos ug lalom nga nagtahod sa iyang matarong nga mga prinsipyo. (Roma 15:33)​—10/1, panid 11.

◻ Sa unsang paagi nabatonan ni Jose ang moral nga kalig-on sa pag-ingong dili sa asawa ni Potipar sa adlaw-adlaw?

Gipabilhan ni Jose ang iyang relasyon kang Jehova nga labaw pa kay sa iyang pagpabili sa lumalabayng mga kalipay. Dugang pa, bisan siya wala mailalom sa langitnong kodigo sa balaod, nasabtan pag-ayo ni Jose ang moral nga mga prinsipyo. (Genesis 39:9)​—10/1, panid 29.

◻ Unsa ka hinungdanon ang atong pagkaandam mopasaylo sa atong mga igsoon?

Ang atong palaaboton aron padayon nga makadawat sa kapasayloan sa Diyos sa dakong sukod nagadepende sa atong pagkaandam mopasaylo sa uban. (Mateo 6:12, 14; Lucas 11:4)​—10/15, panid 17.

◻ Unsang matanga sa mga sala ang gipunting sa Mateo 18:15-17, ug unsay nagpaila niana?

Ang mga sala nga gipasabot ni Jesus may pagkagrabe nga mahimo kining mosangpot sa paglantaw sa nakasala ‘ingong tawo sa kanasoran ug maniningil ug buhis.’ Ang mga Hudiyo dili makig-uban sa mga Hentil, ug sila naglikay sa mga maniningil ug buhis. Busa ang Mateo 18:15-17 nagtumong sa seryosong mga sala, dili lamang personal nga mga kasilo o kahiubos nga mapasaylo ug makalimtan. (Mateo 18:21, 22)​—10/15, panid 19.

◻ Unsay nalangkit sa tinuod nga paghigugma sa Pulong sa Diyos?

Ang paghigugma sa Pulong sa Diyos motultol sa usa sa pagkinabuhi nga kaharmonya sa mga kinahanglanon niini. (Salmo 119:97, 101, 105) Kini nagkinahanglan ug kanunayng pagpasibo sa hunahuna ug paagi sa pagkinabuhi sa usa ka tawo.​—11/1, panid 14.

◻ Kay daghan kaayo ang nadawat diha sa kamot ni Jehova, unsa sa baylo ang atong ikahatag sa labing bantogang Hari ug Maghahatag?

Ang Bibliya nagbutyag nga ang labing maayong gasa nga atong ikahatag kang Jehova mao ang “halad sa pagdayeg.” (Hebreohanon 13:15) Ngano? Tungod kay kini nga halad direktang nalangkit sa pagluwas ug kinabuhi, ang pangunang kabalaka ni Jehova niining panahon sa kataposan. (Ezequiel 18:23)​—11/1, panid 21.

◻ Unsay gipasabot ni Solomon sa dihang siya misulat: “Ang mga pulong sa mga maalamon sama sa mga suyak sa baka”? (Ecclesiastes 12:11)

Ang mga pulong niadtong nakabaton sa diyosnong kaalam magdasig sa mga magbabasa o mga mamiminaw sa pag-uswag nga nahiuyon sa maalamong mga pulong nga mabasa o madunggan.​—11/15, panid 21.

◻ Unsa ang diyosnong salabotan?

Kini mao ang katakos sa pag-ila sa husto ug sa sayop ug dayon sa pagpili sa hustong dalan. Ang pagtuon ug pagpadapat sa Pulong sa Diyos mohatag ug salabotan.​—11/15, panid 25.

◻ Kinahanglang timbangan sa unsa ang kaandam sa pagdawat ug mga kaakohan? (1 Timoteo 3:1)

Kini kinahanglang timbangan sa maayong panghukom. Kinahanglang walay usang modawat ug daghan kaayong asaynment nga siya mawad-an sa iyang kalipay diha sa pag-alagad kang Jehova. Dalayegon ang andam nga espiritu, apan ang pagkaandam kinahanglang magbanaag usab sa pagkamakasaranganon ug “pagkamabuot sa hunahuna.” (Tito 2:12; Pinadayag 3:15, 16)​—12/1, panid 28.

◻ Sa unsang paagi makab-ot ang hagit sa pagkaginikanan?

Ang Diyos nagtambag sa mga ginikanan nga mahimong mga panig-ingnan, kauban, kaestorya, ug mga magtutudlo. (Deuteronomio 6:6, 7)​—12/1, panid 32.