LEKSIYON 56
Pagmentinar sa Panaghiusa sa Kongregasyon
Dihang kauban nato ang mga igsoon, mobati ta sama kang David, kinsa miingon: “Pagkamaayo ug pagkamakapalipay nga ang mga igsoon nag-uban nga may panaghiusa!” (Salmo 133:1) Ang atong panaghiusa dili kay basta nahitabo lang. Ang matag usa nato naay kinahanglang himoon aron mamentinar kini.
1. Unsay talagsaon sa katawhan sa Diyos?
Kon motambong kag tigom sa kongregasyon sa laing lugar, tingali dili nimo masabtan ang pinulongan, pero sa daghang paagi mobati kang komportable. Ngano? Tungod kay bisan asa, parehas ra nga mga publikasyon ang atong gigamit sa pagtuon sa Bibliya. Ug naningkamot ta nga magpakitag gugma sa usag usa. Bisan asa pa ta nagpuyo, kitang tanan ‘nagtawag sa ngalan ni Jehova ug nagkahiusa sa pag-alagad kaniya.’—Sofonias 3:9.
2. Unsay imong mahimo sa pagmentinar sa panaghiusa?
“Higugmaa pag-ayo ang usag usa nga kinasingkasing.” (1 Pedro 1:22) Unsaon nimo pagpadapat kini nga tambag? Imbes magpokus sa kahuyangan sa uban, paningkamot nga makita ang ilang maayong mga hiyas. Imbes makig-uban lang niadtong parehas nimog hilig, ilha pag dugang ang mga igsoon nga lahi nimog hilig o kagikan. Puwede pod tang maningkamot nga wad-on ang bisan unsang pagpihigpihig nga naa tingali nato.—Basaha ang 1 Pedro 2:17.a
3. Unsay imong himoon kon naa moy dili pagsinabtanay sa usa ka igsoon?
Nagkahiusa ta, pero dili ta hingpit. Usahay mapasakitan nato ang usag usa. Busa giingnan ta sa Pulong sa Diyos nga “padayon . . . nga magpinasayloay,” ug kini midugang: “Sama nga si Jehova kinasingkasing nga nagpasaylo kaninyo, kinahanglang buhaton sab ninyo kana.” (Basaha ang Colosas 3:13.) Kadaghan nato napasakitan si Jehova, pero iya tang gipasaylo. Busa gidahom niya nga pasayloon nato ang atong mga igsoon. Kon nahibaloan nimo nga naa kay napasakitan, paningkamot nga mabalik ang inyong maayong relasyon.—Basaha ang Mateo 5:23, 24.b
TUN-IG DUGANG
Paghunahunag mga paagi nga makatabang ka sa pagmentinar sa panaghiusa ug kalinaw sa kongregasyon.
Unsay imong himoon aron mabalik ang maayong relasyon?
4. Wad-a ang pagpihigpihig
Gusto natong higugmaon ang tanang igsoon. Pero maglisod tingali tag dawat sa tawo nga lahi kaayo nato. Unsay makatabang? Basaha ang Buhat 10:34, 35, ug dayon hisgoti kini nga mga pangutana:
Dawaton ni Jehova ingong iyang mga Saksi ang tanang klase sa tawo. Unsay angayng epekto niana sa imong panghunahuna niadtong lahi kanimo?
Unsa nga mga pagpihigpihig ang komon sa inyong lugar nga gusto nimong likayan?
Basaha ang 2 Corinto 6:11-13, ug dayon hisgoti kini nga pangutana:
Unsa kahay puwede nimong himoon aron mas masuod ka sa mga igsoon nga lahi kanimo?
5. Kinasingkasing nga magpasaylo ug makigdait
Kinasingkasing tang gipasaylo ni Jehova bisan pag dili nato siya kinahanglang pasayloon kay dili man siya makasala nato. Basaha ang Salmo 86:5, ug dayon hisgoti kini nga mga pangutana:
Unsa ka talagsaon ang pagpasaylo ni Jehova?
Nganong mapasalamaton ka sa iyang pagpasaylo?
Unsa nga mga situwasyon nga lisod tingaling mamentinar ang panaghiusa?
Unsaon nato pagsundog si Jehova aron magpabilin tang nahiusa sa mga igsoon? Basaha ang Proverbio 19:11, ug dayon hisgoti kini nga pangutana:
Kon naay makapalagot o makapasakit nimo, unsay puwede nimong himoon aron moarang-arang ang situwasyon?
Usahay makapasakit ta sa uban. Kon mahitabo na, unsay angay natong himoon? I-play ang VIDEO, ug dayon hisgoti ang mosunod nga pangutana:
Sa video, unsay gihimo sa sister aron mabalik ang maayong relasyon?
6. Paningkamoti nga makita ang maayo diha sa mga igsoon
Dihang makigsuod ta sa mga igsoon, mahibaloan nato ang ilang maayong mga hiyas ug ang ilang mga kahuyangan. Unsay atong himoon aron makapokus ta sa ilang maayong mga hiyas? I-play ang VIDEO, ug dayon hisgoti ang mosunod nga pangutana:
Unsay makatabang nga makita nimo ang maayong mga hiyas sa mga igsoon?
Si Jehova nagpokus sa atong maayong mga hiyas. Basaha ang 2 Cronicas 16:9a, ug dayon hisgoti kini nga pangutana:
Unsay imong gibati sa pagkahibalo nga si Jehova nagpokus sa imong maayong mga hiyas?
Bisan ang nindot nga diamante naay mga depekto, pero dako gihapon nig bili. Sa susama, ang tanang igsoon dili hingpit, pero bililhon sila kang Jehova
ANG UBAN MOINGON: “Pasayloon lang nako siya kon mangayo siyag pasaylo nako.”
Nganong angay nga andam tang mopasaylo sa uban?
SUMARYO
Makatabang ka sa pagmentinar sa panaghiusa sa kongregasyon pinaagi sa pagkamapinasayloon ug sa pagpakitag gugma sa tanang igsoon.
Review
Unsaon nimo pagwala ang pagpihigpihig?
Unsay imong himoon kon naa moy dili pagsinabtanay sa usa ka igsoon?
Nganong gusto nimong sundogon ang ehemplo ni Jehova sa pagpasaylo?
SUSIHA
Sayra kon sa unsang paagi ang usa sa mga ilustrasyon ni Jesus makatabang nato nga dili hukman ang uban.
Kinahanglan ba tang mangayog pasaylo kon mibati ta nga wala tay nahimong sayop?
“Pagpangayog Pasaylo—Usa ka Yawi sa Pagpakigdait” (Ang Bantayanang Torre, Nobyembre 1, 2002)
Tan-awa kon sa unsang paagi ang uban nakakat-on nga dili magmapihigon sa ilang pagtratar sa uban.
Sayra kon unsaon paghusay ang mga kabingkilan sa dili pa ni makaapektar sa kalinaw sa kongregasyon.
“Husaya ang Kabingkilan sa Mahigugmaong Paagi” (Ang Bantayanang Torre, Mayo 2016)