Kinabuhi ug Ministeryo ni Jesus

Ang Estorya sa Anak nga Nawala

ANG mga Pariseo nagsaway kang Jesus tungod sa pagpakig-uban sa iladong mga makasasala, ug sa pagtubag bag-o pa siyang natapos sa pag-asoy sa mga sambingay mahitungod sa pagkakaplag sa usa ka karnero nga nawala ug sa drakma nga nawala. Karon siya nagpadayon sa laing sambingay, nga mahitungod sa usa ka mahigugmaong amahan ug sa iyang pagtagad sa duha niya ka anak, nga ang matag usa kanila may grabeng mga kasaypanan.

Nahauna, anaa ang manghod nga anak lalaki, ang pangunang karakter sa sambingay. Gikuha niya ang iyang panulondon, nga walay pag-ukon-ukon gihatag kaniya sa iyang amahan. Unya siya mipahawa sa balay ug nalangkit sa imoral kaayong paagi sa kinabuhi. Apan pamati samtang giasoy ni Jesus ang estorya, ug tan-awa kon makatino ka kon kinsa ang gituyong hawasan sa mga karakter.

“Ang usa ka tawo,” misugod si Jesus, “may duha ka anak lalaki. Ug ang manghod kanila miingon ngadto sa iyang amahan, ‘Amahan, ihatag kanako ang bahin sa katigayonan nga maoy akong bahin.’ Unya [ang amahan] nagbahin sa iyang katigayonan ngadto kanila.” Unsay gibuhat sa manghod nga anak sa iyang nadawat?

“Sa ulahi,” misaysay si Jesus, “wala dangtig daghang adlaw, ang manghod nga anak lalaki naghipos sa tanang kabtangan ug miadto sa halayo kaayong yuta, ug didto giusik-usikan ang iyang katigayonan pinaagi sa pagkinabuhing mapatuyangon.” Ang kamatuoran mao, iyang gigasto ang iyang salapi sa pagpuyo kauban sa mga bigaon. Tapos niadto miabot ang mga panahong lisod, sumala sa gipadayon sa pag-asoy ni Jesus:

“Sa dihang nagasto na niya ang tanan, miabot ang usa ka dako kaayong gutom niadtong tibuok nga yuta, ug siya misugod sa pagbati sa kawalad-on. Siya miadto gani ug mikapyot sa usa sa mga lungsoranon niadtong yutaa, ug siya gipaadto niya sa iyang mga kaumahan sa paglawog sa mga baboy. Ug siya nangandoy sa pagbusog sa iyang kaugalingon sa mga bunga sa biyatilis nga gikaon sa mga baboy, ug walay naghatag kaniyag bisan unsa.”

Pagkamakauulaw nga mapugos sa paglawog sa mga baboy, sanglit ang maong mga hayop mahugaw sumala sa Kasugoan! Apan ang nakapasakit sa anak lalaki mao ang makapakutoy nga gutom nga iya ganing gitinguha nga mabusog sa pagkaon nga gipakaon sa mga baboy. Tungod sa iyang grabeng kalisdanan, si Jesus miingon, “siya naulian sa iyang panimuot.”

Sa pagpadayon sa iyang estorya, si Jesus misaysay: “Siya miingon [sa iyang kaugalingon], ‘Pagkadaghan ba ang mga tawong sinuholan sa akong amahan nga dagaya sa tinapay, samtang ako nagakamatay dinhi sa gutom! Motindog ug moadto ako sa akong amahan ug moingon kaniya: “Amahan, ako nakasala batok sa langit ug batok kanimo. Ako dili na takos nga tawgon nga imong anak. Himoa na lamang ako nga usa sa imong mga tawong sinuholan.”’ Busa siya mitindog ug miadto sa iyang amahan.”

Aniay butang nga palandongon: Kon ang iyang amahan mitalikod kaniya ug masuk-anong misinggit kaniya sa iyang pagpahawa sa balay, lagmit ang anak lalaki dili magmabug-os sa hunahuna kon unsay iyang pagabuhaton. Basin siya mohukom sa pagpauli ug mosulay sa pagpangitag trabaho sa laing dapit sa iyang kaugalingong yuta aron siya dili makaatubang sa iyang amahan. Ugaling, walay ingong hunahuna ang misulod sa iyang kaisipan. Ang iyang pinuy-anan mao ang buot niyang adtoan!

Tin-aw, ang amahan sa sambingay ni Jesus nagahawas sa atong mahigugmaon, maluluy-ong langitnong Amahan, si Jehova nga Diyos. Ug tingali mailhan mo usab nga ang nawala, o mausikon, nga anak nagahawas sa iladong mga makasasala. Ang mga Pariseo, nga gipakigsultihan ni Jesus, sa nangagi nagsaway kang Jesus tungod sa pagpakigsalo nianang mga tawhana mismo.

Apan kinsa bay gihawasan sa magulang nga anak lalaki? Ug unsang kapadapatan ang nabatonan sa sambingay ni Jesus sa atong ika-20ng siglo? Ang atong sunod nga isyu niining magasina motubag niining mga pangutanaha sa dihang hisgotan niini ang nahibilin sa estorya ni Jesus mahitungod sa anak nga nawala apan nakaplagan ra. Lucas 15:11-20, 30; Levitico 11:7, 8.

◆ Kinsay gisuginlan ni Jesus sa maong sambingay, o estorya, ug ngano?

◆ Kinsa ang pangunang karakter sa estorya, ug unsay nahitabo kaniya?

◆ Kinsay gihawasan sa amahan ug sa manghod nga anak lalaki?

◆ Unsang impormasyon ang atong madahom sa sunod isyu niining magasina?