Pagtukod sa Pagtuo nga Makabalhin sa mga Bukid

“NAGATUO ako; tabangi ako nga makabaton pa ug dugang pagtuo!” Mao kini ang mga pulong sa naguol nga amahan sa batang lalaki nga patolon nga gihisgotan sa nag-unang artikulo. (Marcos 9:24, The Living Bible) Tingali nagpabanaag usab kining mga pulonga sa imong mga pagbati. Kon mao, makasalig ka nga wala ka mag-inusara. Ang mga kahimtang sa kalibotan karon kiling sa pagpaluya sa pagtuo sa Diyos ug sa iyang Pulong. Ang ateyestikong pilosopiya, materyalismo, krisis sa mga iglesya, ug ang makalilisang nga pagdaghan sa kabangisan tanan kiling sa pagpaluya sa tinuod nga pagtuo. Nan, tukma, ang pangutana ni Jesu-Kristo, “Inig-abot sa Anak sa tawo sa yuta, makakaplag ba kaha siyag pagtuo dinhi sa yuta?”​—Lucas 18:8.

Sa usa ka okasyon, nangayo ang mga apostoles ni Jesus, “Dugangi ang among pagtuo.” Inay hatagan sila sa milagrosong paagi ug dugang pagtuo, siya miingon: “Kon kamo may pagtuo nga ingon ug liso sa mustasa, makaingon kamo niining kahoy nga sikomoro, ‘Paibot ug patanom ka diha sa lawod!’ ug kini mosugot kaninyo.” (Lucas 17:5, 6) Busa, sa unsang paagi makabaton kitag dugang pagtuo?

Pagtukod sa Pagtuo

Si apostol Pablo misulat: “Apan unsaon man . . . sa pagtuo kaniya nga wala gayod nila hidunggi? Ug unsaon man nila sa pagkadungog kon walay magwawali? . . . Busa ang pagtuo magaabot gikan sa butang nga madunggan. Ug ang butang nga madunggan magaabot pinaagi sa pagwali mahitungod kang Kristo.” (Roma 10:14-17) Nan, kon kita nagtinguhang makabaton ug dugang pagtuo, kinahanglang mamati ug mokuhag kitag kahibalo sa Kasulatan. Mao kana ang gihimo sa paralitiko nga gihisgotan sa sinugdan. Gitun-an siya sa mga Saksi ni Jehova sa Bibliya, nakabaton ug pagtuo, ug gipadapat ang iyang nakat-onan diha sa iyang adlaw-adlaw nga kinabuhi. Busa iyang nakit-an ang pagtuo nga makabalhin ug samag-bukid nga kababagan sa iyang kinabuhi.

Nagkinahanglag panahon ang pagtigom ug katuohang ebidensiya ingong basehanan sa pagtuo. (Hebreohanon 11:1) Ug kini nagkinahanglag pagkugi. Andam ka ba sa paggugol ug panahon ug maningkamot sa regular nga paagi aron matigom ang ebidensiya nga gikinahanglan sa paglig-on sa pagtuo?

“Mga Bloke” sa Pagtukod sa Pagtuo

Ang paagi sa pagtukod sa pagtuo kaamgid sa pagpatindog ug balay. Gani ang labing dagkong mga tinukod gilangkoban sa tagsatagsang mga bloke sa pagtukod. Ang matag bloke gipahimutang uban sa ginatos ka mga bloke nga mohatag kalig-on sa tinukod nga gikinahanglan aron makasagubang sa kusog nga mga bagyo maingon man sa kadaot sa paglabay sa panahon. Ang pagtuo, usab, gipasukad sa tagsatagsang “mga bloke” sa ebidensiya nga mainampingong gihan-ay nga nalangkit sa uban. Ang matag “bloke” sa ebidensiya makadugang sa ebidensiya nga naglungtad ang Diyos, nga siya mao ang Maglalalang sa tanang mga butang, ug nga siya adunay katuyoan nga nalangkit sa iyang tawhanong kalalangan. Unsa man gayod kining “mga bloke” sa pagtukod?

Una sa tanan, tan-awa ang imong kaugalingong lawas. Wala ba nimo nakita ang katuohang ebidensiya sa usa ka Maglalalang, pananglitan, diha sa imong katingalahang utok​—usa ka organo nga dili gayod masundog sa mga siyentipiko? Makapahayag ka ba sama sa salmista, “Makalilisang ug kahibulongan uyamot ang pagbuhat kanako”? (Salmo 139:14) Kon makahimo ka, nan ikaw adunay usa ka “bloke” nga niini imong matukod ang imong pagtuo.

May nakita ka bang dugang ebidensiya sa usa ka mahigugmaong Maglalalang diha sa walay-kinutobang mga klase ug katahom sa mga kahoy, mga tanom, ug mga bulak? Imo bang makita ang maong ebidensiya diha sa mananap, sa langgam, ug sa mga linalang sa tubig ug sa ilang pag-inagaray ug sa pagkahinungdanon nila alang sa katawhan? Kon andam kitang mamati, atong “madunggan” silang tanan nga manag-ingon, ‘Naglungtad ang Diyos!’​—Roma 1:20.

Bisan pa, ang pagtuo nga naglungtad ang Maglalalang dili pa igo. Aron makatubag sa mga pangutana mahitungod kaniya ug sa iyang mga katuyoan, nagkinahanglan kita ug kapahayagan gikan niining dili-makita, maalamon sa tanan nga Diyos. Ug aduna kita niana! Diin? Diha sa Bibliya. Apan, wala kini isipa sa kadaghanan nga kasaligang tuboran sa impormasyon sama sa makitang kalalangan sa atong palibot.

Apan, adunay daghang pamatuod, katuohang ebidensiya, nga ang Bibliya maoy usa ka libro nga dinasig sa Diyos. Pananglitan, ang pag-uyonay nga naglungtad sa mga magsusulat niini​—duolan sa 40 kanila, nagsulat sulod sa 16 ka siglo​—maoy ebidensiya sa usa ka Awtor, si Jehova nga Diyos. Sa makadaghang higayon, usab, ang mga nakaplagan sa tinuod nga siyensiya ug arkeolohiya nakapamatuod nga tinuod ug kasaligan ang Bibliya. Pananglitan, ang astronomong si Robert Jastrow misulat: “Nagkalainlaing ang mga detalye, apan ang hinungdanong mga elemento sa astronomikanhon ug sa biblikanhong mga asoy sa Genesis managsama: ang sunodsunod nga mga hitabo nga mitultol sa tawo nagsugod sa kalit ug sa madali nga paagi ug sa tinong yugto sa panahon, sa usa ka pangidlap sa kahayag ug enerhiya.”

Palandonga ang usa lamang ka pananglitan kon giunsa sa arkeolohiya sa paglig-on sa rekord sa Bibliya. Diha sa 2 Hari 18:13-15, atong mabasa: “Karon sa ikanapulo ug upat ka tuig ni Ezekias nga Hari, si Senacherib ang hari sa Asiria miadto batok sa tanang mga kinutaan nga mga siyudad sa Juda ug nailog sila.” Niadtong panahona “ang hari sa Asiria nagsilpi kang Ezekias nga hari sa Juda ug tulo ka gatos ka talento nga salapi ug katloan ka talento nga bulawan.” Sa paglig-on, sa panahon sa ika-19ng siglo ang arkeologong si A. H. Layard nakadiskobre nianang gitawag nga Prismo ni Haring Senacherib. Ang cuneiform nga teksto niini mabasa: “Mahitungod kang Ezekias nga Hudiyo, nga wala magpasakop sa akong yugo, 46 sa iyang malig-on, kinutaan nga siyudad, . . . akong nasikop ug nakuha. . . . Akong gidugangan ang daang buhis, ug gipanilngan siya ingong ilang bayad tuig-tuig, ug buhis . . . nga 30 ka talentong bulawan ug 800 ka talentong salapi.” Usa ka tagsaong kapanghimatuoran sa rekord sa Bibliya, nagkalahi lang sa kantidad sa buhis nga salapi!

Ubang “mga Bloke” sa Pagtukod sa Pagtuo

Ang tagsaon taliwala sa “mga bloke” sa pagtukod mao kadtong nahatag sa katumanan sa mga tagna sa Bibliya. Ang propesiya maoy usa ka panagna sa usa ka umaabot nga hitabo. Sa dihang nahitabo kana, nagtimaan kini nga tinuod ang gipanagna. Kining mga tagnaa dili na maabot sa katakos sa tawo, ug ang Bibliya tukmang miingon: “Tungod kay wala may propesiya nga miabot pinaagi sa kabubut-on sa tawo, hinunoa nanagpanulti ang mga tawo gikan sa Diyos sanglit minandoan man sila sa balaang espiritu.” (2 Pedro 1:21) Ang pagtan-aw sa pipila niining mga tagnaa sa Bibliya tinuod nga makalig-on sa pagtuo.

Sa mga 732 W.K.P., gitagna ni Isaias nga mapukan ang Babilonya sa mga kamot sa mga Medianhon ug sa mga Persianhon, ginganlan pa ngani ang magpupukan, si Siro. Sa pagkatagsaon, gihatag kining tagnaa sa mga 200 ka tuig sa wala pa mailog ni Siro ang Babilonya! Sa lakbit, gihisgotan sa tagna si Jehova ingong “ang Usa nga nagaingon sa kahiladman sa dagat, ‘Mamala ka; ug ako magapamala sa imong tanang mga suba.’” Gitagna nga ang Diyos maoy ‘moabli sa duha ka mga ganghaan sa atubangan ni Siro, aron ang mga ganghaan dili masirhan.’ “Pagadugmokon ko ang ganghaan nga tumbaga, ug putlon ko ang barra nga puthaw,” miingon si Jehova, “ug igahatag ko kanimo ang bahandi sa kangitngitan.” (Isaias 44:24–45:3) Sa unsang paagi natuman kining tagnaa?

Nahitabo kini sa gabii sa paghuboghubog sa Babilonya ug sa iyang mga prinsipe. Wala mamatikdi ug sa tabon sa gabii, puliking gipatipas sa sundalo ni Siro ang mga tubig sa Suba sa Euprates, nga nag-agos sa sentro sa siyudad. Tungod niini nakasulod ang mga sundalo sa Babilonya diha sa nahubsang suba. Ang mga ganghaan sa suba nakalimtang bukas sa panahon sa kombira. Busa, ang mga Medianhon ug ang mga Persianhon wala maglisod sa pag-ilog sa Babilonya ug sa mga bahandi niini. Natuman ang tagna ni Isaias sumala sa tanang mga detalye niini.

Nakita usab ni Jehova nga Diyos nga tukmang himoon si Jesu-Kristo nga dugokan sa daghang mga tagna sa pagtagna sa mga detalye sa iyang pagkatawo, sa iyang kinabuhi, ministeryo, ug kamatayon, ang pipila kanila gisulat sa mga siglo nga abanse. Pananglitan, gitagna nga siya matawo diha sa tribo ni Juda sa pamilya ni David (Genesis 49:10; Isaias 11:1, 2) ug sa lungsod sa Bethlehem. (Miquias 5:2) Ang usa ka suod nga higala dili-magmatinumanon ug mobudhi kaniya sa 30 ka buok nga salapi. (Salmo 41:9; Zacarias 11:12) Ripahon ang iyang mga besti. (Salmo 22:18) Siya duslakon, apan walay bukog niya nga mabali. (Zacarias 12:10; Salmo 34:20) Gitagna sa Daniel 9:24-27 ang pag-abot ni Jesus ingong Mesiyas, o Kristo, tapos sa 69 ka semana sa tuig, usa ka yugto sa 483 ka tuig gikan sa 455 W.K.P. hangtod sa bawtismo ni Jesus sa 29 K.P. Human sa katunga sa usa ka “semana” (3 1/2 ka tuig), sa 33 K.P. sa ulahi, si Jesus “gipatay” sumala sa gitagna. Ang ubang mga detalye sa tagna natuman usab.

Pipila lamang kini sa “mga bloke” nga magamit sa pagtukod sa pagtuo nga makabalhin sa mga bukid. Sa pagtigom kanilang tanan ug ibutang sila sa ilang dapit nagkinahanglan ug panahon, paningkamot, ug paglahutay. Apan nahimo kini. Si John, nga nagpuyo sa Santos, Brazil, makapatuod nga mahimo kini. Sa mga tuig nga milabay, wala siyay interes sa relihiyon, walay pagtuo sa Bibliya, apan nagtuo siya nga adunay Diyos. Misugot si John sa mga pagduaw sa usa sa mga Saksi ni Jehova. Ang senemanang diskusyon sa kataposan nakakombinsi kang John nga dili usa ka ordinaryong libro ang Bibliya, ug sa kataposan iyang “gidawat kini, dili ingong pulong sa mga tawo, kondili, ingon nga mao gayod sa pagkatinuod, ang pulong sa Diyos.” (1 Tesalonica 2:13) Nagkinahanglan kinig panahon, apan ang dugang mga pagtuon sa Bibliya nakatabang kang John sa pagsabot sa katuyoan sa Diyos sa katawhan. Sa kataposan, sa 1970 gibawtismohan siya ingong usa sa mga Saksi ni Jehova. Karon, ingong usa ka tinudlong ansiano sa kongregasyon, iyang gitabangan ang uban sa paglig-on ug sa paghupot sa ilang pagtuo.

Nagkinahanglan ka bag tabang sa paglig-on sa imong pagtuo? Kon mao, hinumdomi nga ang “pagtuo magaabot gikan sa butang nga madunggan. Ug sa baylo ang butang nga madunggan magaabot pinaagi sa pulong mahitungod kang Kristo.” (Roma 10:17) Kapin sa 3,000,000 ka mga Saksi ni Jehova makugihong nagapakaylap sa “pulong mahitungod kang Kristo” ug sa Gingharian sa Diyos sa kapin sa 200 ka yuta. Malipay sila sa pagtabang kanimo sa pagkakat-on ug dugang pa mahitungod sa Pulong sa Diyos pinaagi sa libreng mga panaghisgot sa Bibliya.

Makasalig ka nga ang panahon nga imong igugol sa pagpamati sa “butang nga madunggan” maoy maayong pagkagamit nga panahon. Makatabang kini kanimo sa paglig-on sa pagtuo nga makabalhin sa mga bukid. Kini, sa baylo, motultol sa kinabuhing dayon, “kay gihigugma gayod sa Diyos ang kalibotan nga tungod niana gihatag niya ang iyang bugtong Anak, aron ang tanan nga motuo kaniya dili malaglag kondili may kinabuhing dayon.”​—Juan 3:16.

[Kahon/Letrato sa panid 7]

“MGA BLOKE” sa Pagtukod sa Pagtuo

Pabilhi ang mga butang nga gihimo ni Jehova

Dawata ang Bibliya ingong Pulong sa Diyos

Tagda kon sa unsang paagi nakalig-on ang arkeolohiya

ug ang kasaysayan sa rekord sa Bibliya

Susiha ang katumanan sa mga tagna sa Bibliya