Iyang Naangkon ang Tinguha sa Iyang Kasingkasing

PANGANDOY ba sa imong kasingkasing nga makita nga magmando sa bug-os ang Mesiyanikong Gingharian sa tibuok yuta? Kon mao, ikaw nanganti ug nag-ampo alang sa gisaad nga yutan-ong mga panalangin ubos nianang langitnong Gingharian. Nan, magmapailobon kay “ang butang nga gitinguha maoy usa ka kahoy sa kinabuhi kon moabot.”​—Proverbio 13:12; Santiago 5:7, 8.

Mga 2,000 ka tuig kanhi, dihay nagpuyo sa Jerusalem nga “matarong ug masimbahon” nga tawong si Simeon. May pagtuo siya sa Mesiyanikong mga tagna ug mapailobong “naghulat sa paghupay sa Israel.”​—Lucas 2:25.

Mesiyanikong mga Tagna Naghatag Paglaom

Si Jehova mao ang responsable sa unang Mesiyanikong tagna​—usa nga naghatag paglaom sa makasasala ug himalatyong katawhan. Gitagna sa Diyos ang umaabot nga Binhi sa iyang “babaye,” o unibersohanong organisasyon.​—Genesis 3:15.

Kadto nga Usa naila ingong binhi ni Abraham, ug si Jacob nagtagna sa iyang pag-abot. (Genesis 22:17, 18; 49:10) Ang kahimayaan sa Gingharian sa Mesiyas gidayeg diha sa mga salmo. (Salmo 72:1-20) Si Isaias mitagna nga ang Binhi ipanganak sa usa ka ulay, ug si Miqueas nanagna nga ang pagpanganak mahitabo sa Bethlehem. (Isaias 7:14; Miqueas 5:2) Kini maoy pipila lamang sa daghang Mesiyanikong mga tagna.

Sa Gihapon Walay Mesiyas!

Palandonga ang nangagi, ug handurawa nga nagsingabot ang unang siglo K.P. Ang orihinal Mesiyanikong tagna sa Diyos maoy 4,000 ka tuig na. Ang mga Hudiyo nakasinatig pagkalaglag sa templo ni Jehova, sa pagkagun-ob sa ilang yutang-natawhan, sa pagkadestiyerog 70 ka tuig sa Babilonya, ug 500 pa ka tuig nga pagpasakop sa Hentil nga mga magmamando. Sa gihapon walay Mesiyas!

Ang mahadlokon-sa-Diyos nga mga Hudiyo nangandoy gayod sa pag-abot sa Mesiyas! Gikan kaniya magaagos ang mga panalangin ngadto kanila ug ngadto sa tanang nasod.

Usa ka Tawong Masimbahon

Taliwala sa masimbahong mga Hudiyo nga nangandoy ug nag-ampo sa pag-abot sa Mesiyas mao si Simeon, usa ka matinumanon edarang alagad ni Jehova nga nagpuyo sa kaulohang dakbayan sa Judea. Usa ka linaing butang ang nahitabo kang Simeon.

Gipakunsad sa Diyos ang iyang balaang espiritu kang Simeon ug gigantihan siyag usa ka pagpadayag. Si Simeon dili mamatay hangtod iyang makita ang Usa nga mahimong Mesiyas. Apan ang mga adlaw ug mga bulan milabay. Si Simeon nagkatigulang na ug dili makadahom nga mabuhi pa ug dugay. Ang saad ba kaniya sa Diyos matuman?

Usa ka adlaw (sa 2 W.K.P.), usa ka batan-ong magtiayon nga may dalang masuso miadto sa templo gikan sa Bethlehem. Gipadayag sa balaang espiritu kang Simeon nga kini mao ang dugay nang gipaabot nga adlaw. Miadto siya sa templo, diin iyang makita ang Usa nga gihisgotan sa mga manalagna diha sa ilang sinulat. Nagdali kutob sa mahimo sa tigulang niya nga lawas, iyang nakita si Jose, Maria, ug ang bata.

Uban sa dakong kalipay gikugos ni Simeon ang bata nga si Jesus! Kining Usa mahimong ang gisaad nga Mesiyas​—“ang Kristo ni Jehova.” Sa maong tigulang nga edad, si Simeon dili makalaom nga makakita sa pagtuman ni Jesus sa Iyang yutan-ong misyon. Apan, talagsaon nga makita siya ingong usa ka masuso. Ang Mesiyanikong mga tagna nagsugod na sa pagkatuman. Pagkadako sa kalipay ni Simeon! Karon kontento na siyang matulog sa kamatayon hangtod sa pagkabanhaw.​—Lucas 2:25-28.

Matagnaong mga Pulong ni Simeon

Samtang si Simeon nagpatugbaw sa iyang tingog sa pagdayeg kang Jehova, ato siyang madungog nga nag-ingon: “Karon, Soberanong Ginoo, ikaw nagapalakawng gawasnon sa imong ulipon diha sa kalinaw sumala sa imong pahayag; tungod kay nakita na sa akong mga mata ang imong galamiton sa pagluwas nga imong giandam diha sa panan-aw sa tanang katawhan, usa ka kahayag alang sa pagkuha sa tabil sa kanasoran ug usa ka himaya alang sa imong katawhan nga Israel.” Ang ama-ama ni Jesus, si Jose, ug Iyang inahan, si Maria, padayon nga nahibulong bahin niining mga pulonga.​—Lucas 2:29-33.

Ang panagway ni Simeon masanag samtang iyang gipanalanginan si Jose ug si Maria, nga dayag nga nanghinaot nga sila panalanginan ni Jehova sa pagtuman sa ilang mga responsabilidad ngadto sa bata. Unya ang nawong sa tigulang nahimong seryoso. Nagtumong sa iyang mga pulong kang Maria lamang, siya midugang: “Tan-awa! Kini siya gipahimutang alang sa pagkapukan ug pagbangon pag-usab sa daghan sa Israel ug ingong usa ka ilhanan nga pagabatokan ug sulti (oo, ang imo mismong kalag pagalapsan sa usa ka taas nga espada), aron nga ang mga pangatarongan sa daghang kasingkasing mabuksan.”​—Lucas 2:34, 35.

Ang Pahayag ni Simeon Ngadto Kang Maria

Handurawa kon unsa ang gibati ni Maria. Unsay buot ipasabot ni Simeon? Ang pila modawat kang Kristo ug pagabangonon gikan sa ilang napukan na nga kahimtang. Ugaling, ang uban magsalikway kaniya, mapandol kaniya, ug mapukan. Sumala sa gitagna, si Jesus napamatud-ang usa ka bato sa kapangdolan sa daghang Hudiyo. (Isaias 8:14; 28:16) Ang mga pulong ni Simeon wala magkahulogan nga ang tagsa-tagsa ka Israelinhon mahulog una sa pagkawalay-pagtuo ug unya mobangon sa pagtuo pinaagi sa pagdawat kang Jesus. Hinunoa, ang mga reaksiyon diha kaniya nagkadaiya sa lainlaing mga tawo, nga magbukas sa mga pangatarongan sa daghang kasingkasing ug magatultol ngadto sa paghukom kanila sa Diyos alang sa maayo o alang sa kadaotan. Alang sa mga di-magtutuo, siya mahimong usa ka ilhanan, o usa ka butang talamayon. Pinaagi sa pagtuo kaniya, ang uban bangonon gikan sa pagkahimong patay sa kalapasan ug sa mga sala ug modangat sa pagtagamtam ug matarong nga baroganan uban sa Diyos. Ang mga lihok sa mga tawo ngadto sa Mesiyas magpakita kon unsay anaa sa ilang mga kasingkasing.

Unsa may ipasabot sa mga pulong ni Simeon: “Ang imo mismong kalag pagalapsan sa usa ka taas nga espada”? Walay gipaila sa Kasulatan nga si Maria sa aktuwal gitusok sa espada. Apan, ang pagsalikway kang Jesus sa kadaghanan mohatag kaniyag kasakit. Ug pagkasakit kadto alang kang Maria nga nakita si Jesus nga gilansang sa usa ka estaka! Kini nahisama nga siya gitusok sa espada.

Gipadapat ni Simeon ang Mesiyanikong mga Tagna

Ang espiritu sa Diyos nagtukmod kang Simeon sa pagpadapat sa Mesiyanikong mga tagna diha kang Jesus. Si Simeon mahimo nang mamatay sa kalinaw, o kahilom, ‘tungod kay nakita na sa iyang mga mata ang galamiton sa Diyos sa pagluwas nga Iyang giandam diha sa panan-aw sa tanang katawhan, usa ka kahayag alang sa pagkuha sa tabil gikan sa kanasoran ug usa ka himaya alang sa Iyang katawhan nga Israel.’ (Lucas 2:30-32) Pagkahaom nga pagkapadapat kini diha sa matagnaong mga pulong ni Isaias!

Kadto nga manalagna nagtagna: “Ang himaya ni Jehova tino nga igapadayag, ug ang tanang unod dungan nga makakita niini.” “Ako [Jehova] usab naghatag kaninyo [sa Mesiyas] ingong usa ka kahayag sa kanasoran, aron ang akong kaluwasan moabot ngadto sa kinatumyan sa yuta.” (Isaias 40:5; 42:6; 49:6; 52:10) Ang Kristohanon Gregong Kasulatan ug ang pisikal nga mga panghitabo sukad nagpamatuod nga ang Mesiyas, si Jesu-Kristo, mao ang tinuod nga kahayag sa kanasoran, ang Usa nga magakuha sa tabil sa espirituwal nga kangitngit ug magdalag kaluwasan sa mga tawo.

Ang Pulong sa Diyos wala nay gihisgotan bahin sa edarang si Simeon. Tataw siya namatay una pa buksi ni Kristo ang dalan ngadto sa langitnong kinabuhi. Nan, sa dili madugay si Simeon pagabanhawon ngadto sa kinabuhi sa yuta. Pagkadako sa kalipay nga iya​—ug imo​—nga matagamtam diha sa bag-ong kalibotan ubos sa Mesiyanikong Gingharian sa Diyos!