Kinsa ang Mahimong Inuyonan ni Jehova?

“Panlimbasogi ninyo ang inyong kaugalingong kaluwasan. . . ; kay ang Diyos mao ang usa nga, alang sa iyang kahimuot, nagapalihok sa sulod ninyo aron kamo magtinguha ug molihok.”​—FILIPOS 2:12, 13.

1, 2. Unsang situwasyona nga nakadawat si Jesus ug deklarasyon sa pag-uyon sa Diyos, ug nganong interesado kita niini?

KADTO maoy lisoanang punto sa kasaysayan. Si Juan Bawtista nagwali sa mensahe sa Diyos ug gituslob sa tubig ang mga mahinulsolon. Dayon dihay usa ka tawo nga miduol nga nailhan ni Juan nga matarong; siya mao si Jesus. Siya walay sala nga alang niini siya kinahanglang maghinulsol, apan siya mihangyo nga bawtismohan aron ‘matuman ang tibuok nga pagkamatarong.’​—Mateo 3:1-15.

² Human nga mapaubsanong misugot si Juan, ug mikawas si Jesus sa tubig, “ang kalangitan mibukas, ug iyang nakita nga mikunsad ingon sa salampati ang espiritu sa Diyos.” Dugang pa niana, “dihay tingog gikan sa langit nga nag-ingon: ‘Mao kini ang akong Anak, nga pinalangga, nga akong giuyonan.’” (Mateo 3:16, 17; Marcos 1:11) Pagkadako nga pahayag! Ang tanan malipay sa pagpahimuot sa usa ka tawo nga atong gitahod. (Buhat 6:3-6; 16:1, 2; Filipos 2:19-22; Mateo 25:21) Nan, handurawa, unsay imong bation kon ang labing gamhanang Diyos moingon, ‘Giuyonan ko ikaw!’

3. Unsay atong kabalak-an mahitungod sa pag-uyon sa Diyos?

³ Posible ba alang sa usa ka tawo nga mahimong inuyonan sa Diyos karong panahona? Pananglitan, tagda ang usa ka tawo nga ‘walay paglaom ug walay Diyos diha sa kalibota,’ nga “nahigawas gikan sa kinabuhi nga iya sa Diyos.” (Efeso 2:12; 4:18) Siya ba makalihok gikan nianang situwasyona ngadto sa binulahang kahimtang sa pagkahimong inuyonan ni Jehova? Kon mahimo, sa unsang paagi? Atong tan-awon.

Unsay Kahulogan sa Iyang mga Pulong?

4. (a) Unsa ang diwa sa Gregong pulong “inuyonan” diha sa deklarasyon sa Diyos? (b) Nganong ang kagamitan niining bahina ilabinang makaikag?

⁴ Ang mga rekord sa Ebanghelyo sa mga pulong sa Diyos “Akong giuyonan [Jesus]” nagagamit sa Gregong berbong eu·do·keʹo. (Mateo 3:17; Marcos 1:11; Lucas 3:22) Kini nagkahulogang “nahimuot pag-ayo, may maayong pagtamod, gikalipayan,” ug ang nombreng porma niini may diwa nga “maayong kabubut-on, kalipay, kahimuot, tinguha, pangibog.” Ang eu·do·keʹo dili limitado sa pagkabaton sa pag-uyon sa Diyos. Pananglitan, ang mga Kristohanon sa Macedonia ‘nalipay’ sa pakigbahin sa pinansiyal ngadto sa uban. (Roma 10:1; 15:26; 2 Corinto 5:8; 1 Tesalonica 2:8; 3:1) Dugang pa, ang pag-uyon nga nadawat ni Jesus gipamulong sa Diyos, dili sa tawo. Kining terminoha gigamit lamang maylabot kang Jesus human nga siya gibawtismohan. (Mateo 17:5; 2 Pedro 1:17) Makaikag, gigamit sa Lucas 2:52 ang usa ka lahi nga pulong​—khaʹris—​sa paghisgot bahin kang Jesus ingong walay-bawtismong batan-on, kinsa nakadawat sa “kahimuot” sa Diyos ug sa mga tawo.

5. (a) Sa unsang paagi makita nga ang mga tawong dili-hingpit mahimong inuyonan sa Diyos? (b) Kinsa ang “mga tawong maayo ug kabubut-on”?

⁵ Posible ba usab alang sa mga tawong dili-hingpit nga sama kanato nga makabaton sa pag-uyon sa Diyos? Makalipay, ang tubag maoy oo. Sa dihang natawo si Jesus, ang manulonda mipahayag: “Himaya sa Diyos sa kalangitan, ug sa yuta panagdait sa mga tawo nga maayo ug kabubut-on [eu·do·kiʹas].” (Lucas 2:14) Diha sa literal nga Grego, ang mga manulonda nanag-awit sa umaabot nga panalangin sa “mga tawo nga maayog panabot” o sa “mga tawo nga giuyonan sa Diyos.”a Si Propesor Hans Bietenhard misulat sa paggamit sa en an·throʹpois eu·do·kiʹas: “Ang pamulong nagpasabot sa mga tawo nga gikalipayan sa Diyos . . . Kita wala, hinunoa, naghisgot dinhi sa maayong kabubut-on sa mga tawo . . . Kita naghisgot dinhi sa soberano ug sa mapuangurong kabubut-on sa Diyos, nga nagapili ug katawhan alang sa kaluwasan.” Busa, sumala sa dugay nang gipatin-aw sa mga Saksi ni Jehova, ang Lucas 2:14 nagpaila nga pinaagi sa dedikasyon ug bawtismo, posible alang sa mga tawong dili-hingpit nga mahimong mga tawo nga maayog kabubut-on, mga tawo nga inuyonan sa Diyos!b

6. Unsa pay atong gikinahanglan aron mabatonan ang pag-uyon sa Diyos?

⁶ Imong masayran, hinunoa, kon unsa ka dako sa kalainan tali sa pagkahimong ‘mga kaaway sa Diyos nga ang mga hunahuna anaa sa mga daotang buhat’ ug sa pagkahimong inuyonan ingong mga kauban sa atong matarong ug maalamong Diyos. (Colosas 1:21; Salmo 15:1-5) Busa, bisan pa nga mahupayan ka kon makadungog nga ang mga tawo mahimong inuyonan, hayan gusto kang mahibalo kon unsay nalangkit. Dako kitag makat-onan bahin niini gikan sa miaging mga pakiglabot sa Diyos.

Iyang Giabiabi ang Katawhan

7. Unsay gipaila sa Exodo 12:38 mahitungod sa tinamdan sa Diyos?

⁷ Sa daghang mga siglo sa wala pa ipahayag ang Lucas 2:14, giabiabi na ni Jehova ang mga tawo sa pag-adto ug sa pagsimba kaniya. Sa pagkatinuod, ang Diyos eksklusibong nakiglabot sa nasod sa Israel, nga gipahinungod ngadto kaniya. (Exodo 19:5-8; 31:16, 17) Apan, hinumodomi nga sa dihang ang Israel mimartsa gawas sa pagkaulipon sa Ehipto, “ang nagkasagol nga panon sa katawhan miuban kanila.” (Exodo 12:38) Kini sila dili mga Israelinhon nga may pakiglabot sa katawhan sa Diyos ug nagpakakita sa mga hampak diha sa Ehipto nga karon mipili sa paglakaw uban sa Israel. Ang uban tingali nahimong bug-os nga mga kinabig.

8. Unsa ang duha ka matang sa mga dumuloong ang nagpuyo sa Israel, ug nganong dunay kalainan ang paagi sa pagtratar sa mga Israelinhon kanila?

⁸ Giila sa pakigtugon sa Kasugoan ang kahimtang sa mga dili-Israelinhon maylabot sa Diyos ug sa iyang katawhan. Ang ubang mga dumuloong mga lalin lang nga mipuyo sa yuta sa Israel, diin kinahanglang mosunod sila sa pasukaranang mga kasugoan, sama niadtong batok sa pagbuno ug sa pagsaulog sa Adlawng-igpapahulay. (Nehemias 13:16-21) Inay dawaton kining mga lalin ingong mga igsoon, mainampingon ang usa ka Israelinhon sa dihang makigsulti ug makig-atubang kanila, sanglit dili pa man sila bahin sa nasod sa Diyos. Pananglitan, samtang ang Israelinhon dili mahimong mopalit ug mokaon sa wala kapatuloi sa dugo nga karne sa mananap nga namatay sa iyang kaugalingon, ang mga dumuloong nga dil mga kinabig makahimo niini. (Deuteronomio 14:21; Ezekiel 4:14) Sa ulahi hayan ang uban niining mga lalin nga dumuloong misunod sa dalan sa ubang mga dumuloong nga nangahimong sirkunsadong mga kinabig. Diha lamang nga sila tratahon ingong mga igsoon diha sa tinuod nga pagsimba, nga may tulobagon sa pagsunod sa tibuok Kasugoan. (Levitico 16:29; 17:10; 19:33, 34; 24:22) Si Ruth, ang Moabita, ug si Naaman, ang sanlahong Sirianhon, dili mga Israelinhon nga gidawat sa Diyos.​—Mateo 1:5; Lucas 4:27.

9. Sa unsang paagi gipamatud-an ni Solomon ang tinamdan sa Diyos ngadto sa mga dumuloong?

⁹ Sa mga adlaw ni Haring Solomon, atong makita usab ang maabiabihong tinamdan sa Diyos alang sa mga dili-Israelinhon. Sa panahon sa inagurasyon sa templo, si Solomon miampo: “Alang sa mga dumuloong, nga dili bahin sa halayong yuta tungod sa imong ngalan . . . aron mag-ampo niini nga balay, hinaot nga mamatu ka gikan sa kalangitan, . . . aron ang tanang katawhan sa yuta makaila sa imong ngalan sa pagkahadlok kanimo ingon sa imong katawhang Israel.” (1 Hari 8:41-43) Oo, gidawat ni Jehova ang mga pag-ampo sa sinserong mga dumuloong nga nanagpangita kaniya. Tingali sila usab nakaka-on sa iyang mga kasugoan, nagpasakop sa buhat sa sirkunsisyon, ug nahimong dinawat nga mga sakop sa iyang binulahang katawhan.

10. Giunsa sa mga Hudiyo sa pagtratar ang Ethiopianhong eunoko, ug nganong nakahatag kaniyag kaayohan ang sirkunsisyon?

¹⁰ Ang usa ka tawo nga mihimo niini sa ulahi nga mga panahon mao ang tresurero ni Raynang Candace sa halayong Ethiopia. Lagmit, sa una niyang pagkadungog sa mga Hudiyo ug sa ilang pagsimba, ang iyang paagi sa kinabuhi o relihiyosong mga paagi dili-madawat ni Jehova. Busa ang mga Hudiyo nagpakitag diyutayng pagkamatugoton samtang kining dumuloong nga tawo sa ilang taliwala nagpatuon pa sa Kasugoan aron mahibalo sa mga kinahanglanon sa Diyos. Tataw nga miuswag siya ug mihimo sa gikinahanglang mga kausaban aron mahimong kuwalipikado alang sa sirkunsisyon. Ang Buhat 8:27 nagpadayag kanato nga “siya miadto sa Jerusalem aron sa pagsimba.” (Exodo 12:48, 49) Kini nagpaila nga siya niadtong panahona usa na ka bug-os nga kinabig. Busa siya anaa sa posisyon sa pagdawat sa Mesiyas ug nahimong iyang bawtismadong tinun-an, busa nahilinya sa mauswagong kabubut-on sa Diyos.

Ang mga Dili Magtuto ug ang Kristohanong Kongregasyon

11, 12. (a) Unsang dugang kausaban ang nahitabo sa dihang nabawtismohan ang Ethiopianhong eunoko? (b) Sa unsang paagi nahiuyon kini sa Filipos 2:12, 13?

¹¹ Gisultihan ni Jesus ang iyang mga sumusunod: “Busa panglakaw kamo ug himoa ninyong mga tinun-an ang tanang kanasoran, sa pagbawtismo kanila sa ngalan sa Amahan ug sa Anak ug sa balaang espiritu, ug sa pagtudlo kanila sa pagtuman sa tanang butang nga akong gisugo kaninyo.” (Mateo 28:19, 20) Ang Ethiopianhong kinabig nga bag-o lang gihisgotan may kahibalo bahin kang Jehova ug sa balaang espiritu. Busa sa gitabangan siya ni Filipe sa pagsabot ug sa pagdawat kang Jesus ingong mesiyanikong Anak sa Diyos, siya gibawtismohan. Busa siya kinahanglang mahimong inuyonang sakop sa katawhan ni Jehova nga nagsunod kang Kristo. Siyempre, siya may tulobagon sa Diyos, nga kinahanglan ‘motuman sa tanang butang nga gisugo’ alang sa mga Kristohanon. Apan uban niining maong tulobagon mao ang katingalahang palaabuton: kaluwasan!

¹² Sa ulahi, misulat si Pablo nga ang tanang mga Kristohanon kinahanglan ‘manlimbasog alang sa ilang kaluwasan uban ang kahadlok ug pagkurog.’ Apan, imposible ang pagbuhat niadto, “kay ang Diyos mao ang usa nga, alang sa iyang kahimuot [eu·do·kiʹas], nagapalihok sa sulod ninyo aron kamo magtinguha ug molihok.”​—Filipos 2:12, 13.

13. How would Christians have dealt with those who were not as quick to get baptized as the Ethiopian eunuch?

¹³ Dili tanan niadtong nakauban sa tinuod nga mga Kristohanon andam ug kuwalipikado sama niadtong Ethiopianhon nga milihok dayon aron mabawtismohan. Ang uban, nga dili mga Hudiyo o mga kinabig, diyutay ra o walay kahibalo bahin kang Jehova ug sa iyang mga dalan; ug wala usab matultoli ang ilang mga moral sa iyang mga sukdanan. Sa unsang paagi atubangon sila? Kinahanglan sundon sa mga Kristohanon ang pananglitan ni Jesus. Sa pagkatinuod siya wala gayod magdasig o nagpalabay sa sala. (Juan 5:14) Apan, siya matinugoton sa mga makasasala nga nadani kaniya ug nagtinguha sa paghimo sa ilang mga dalan nga mahilinya nianang sa Diyos.​—Lucas 15:1-7.

14, 15. Gawas pa sa dinihogang mga Kristohanon, unsang mga matang sa mga tawo ang tigtambongan sa mga tigom sa Corinto, ug sa unsang paagi nagkalahi sila bahin sa espirituwal nga kauswagan?

¹⁴ Nga kinahanglang matinuguton ang mga Kristohanon niadtong nagtuon pa mahitungod sa Diyos matin-aw sumala sa mga komento ni Pablo bahin sa mga tigom sa Corinto. Sa dihang naghisgot sa paggamit sa milagrosong mga gasa sa espiritu nga sa sinugdan maoy nagtimaan sa Kristiyanidad nga nakabaton sa panalangin sa Diyos, mihisgot si Pablo ug “mga magtututo” ug “mga dili-magtutuo.” (1 Corinto 14:22) Ang “mga magtutuo” mao kadto sila nga midawat kang Kristo ug gibawtismohan. (Buhat 8:13; 16:31-34) “Daghan niadtong mga taga Corinto nga nakadungog mituo ug gibawtismohan.”​—Buhat 18:8.

¹⁵ Sumala sa 1 Corinto 14:24, ang ‘mga dili-magtutuo o ordinaryong mga tawo’ mitambong usab sa mga tigom sa Corinto ug giabiabi didto.c Malagmit, nagkalahi ang ilang kauswagan sa pagtuon ug sa pagpadapat sa Pulong sa Diyos. Ang uban tingali nagpakasala pa. Hayan ang uban may igo nang pagtuo, mihimog pila ka kausaban sa ilang mga kinabuhi, ug, bisag wala pay bawtismo, misugod na sa pagsulti sa uban bahin sa ilang nakat-onan.

16. Sa unsang paagi kining mga tawhana nakabaton ug kaayohan bisan sa pagpakig-uban sa mga Kristohanon diha sa mga tigom sa kongregasyon?

¹⁶ Sa pagkatinuod, walay usa niining mga walay-bawtismo anaa “sa Ginoo.” (1 Corinto 7:39) Kon nalangkit ang ilang mga nangagi ug seryosong moral ug espirituwal nga kasal-anan, nan tingali milawig ug taas-taas nga panahon hangtod nga naabot nila ang mga sukdanan sa Diyos. Kasamtangan, basta dili lang nila daoton ang pagtuo ug ang kahinlo sa kongregasyon, sila dawaton. Ang ilang nakita ug nadungog sa mga tigom ‘nagbadlong kanila’ sa dihang ‘ang mga tinagoan sa ilang mga kasingkasing madayag.’​—1 Corinto 14:23-25; 2 Corinto 6:14.

Pagpabiling Inuyonan sa Diyos Alang sa Kaluwasan

17. Unsang katumanan sa Lucas 2:14 sa unang siglo?

¹⁷ Pinaagi sa publikong pagsangyaw sa bawtismadong mga Kristohanon sa unang siglo, libolibo ang nakadungog sa maayong balita. Nanagpanuo sila sa butang nga ilang nadungog, naghinulsol sa ilang nangaging dalan,ug gibawtismohan, nga “nagwali sa katilingban alang sa kaluwasan.” (Roma 10:10-15; Buhat 2:41-44; 5:14; Colosas 1:23) Walay duhaduha nga ang mga bawtismado niadtong panahona may pag-uyon ni Jehova, kay iyang gidihogan sila sa balaang espiritu, gisagop sila ingong espirituwal nga mga anak. Si apostol Pablo misulat: “Kita iyang gipiling daan aron mahimong iyang mga anak nga sinagop pinaagi ni Jesu-Kristo, sumala sa kahimuot [eu·do·kiʹan] sa iyang kabubut-on.” (Efeso 1:5) Busa, sulod niadtong sigloha ang gipanagna sa mga manulonda sa dihang natawo si Jesus natuman: “Panagdait sa mga tawo nga maayo ug kabubut-on [kun, mga tawo nga giuyonan sa Diyos].”​—Lucas 2:14.

18. Nganong dili ipakawalay-bili sa dinihogang mga Kristohanon ang ilang inuyonang baroganan sa Diyos?

¹⁸ Aron mahuptan kanang maong panagdait, kinahanglan nga ang “mga tawong maayo ug kabubut-on” “manlimbasog alang sa [ilang] kaluwasan uban ang kahadlok ug pagkurog.” (Filipos 2:12) Dili kadto sayon, kay dili man sila hingpit nga mga tawo. Sila makaatubang ug mga tentasyon ug mga pag-ipit sa paghimog daotan. Kon sila madala sa pagbuhat ug daotan, mawad-an sila sa pag-uyon sa Diyos. Busa, mahigugmaong naghikay si Jehova ug espirituwal nga mga magbalantay nga makatabang ug makapanalipod sa mga kongregasyon.​—1 Pedro 5:2, 3.

19, 20. Unsang mga tagan ang gihimo sa Diyos aron ang bawtismadong mga Kristohanon makapadayon nga mahimong iyang inuyonang mga alagad?

¹⁹ Angay isilsil sa mga ansiano sa kongregasyon ang tambag ni Pablo: “Kon ang usa ka tawo mahiligas ngadto sa kalapasan nga wala makapahibalo niana, kamo nga may espirituwal nga kuwalipikasyon mao ang magpahiuli kaniya uban ang espiritu sa kalumo, samtang nagabantay ikaw sa imong kaugalingon, kay basin ug ikaw matintal usab.” (Galacia 6:1) Sumala sa atong nasabtan, ang usa ka tawo nga mihimog importanteng lakang sa bawtismo dunay dakong tulobagon, nga tinuod usab diha sa mga dumuloong nga nahimong sirkunsadong kinabig sa Israel. Apan, kon makasala ang usa ka bawtismadong Kristohanon, siya makakaplag mahigugmaong tabang sulod sa kongregasyon.

²⁰ Ang grupo sa mga ansiano diha sa kongregasyon mohatag ug tabang sa usa ka tawo nga nahulog sa seryosong kalapasan. Si Judas misulat: “Padayon sa pagpakitag kaluoy sa pipila nga nagaduhaduha; luwasa sila pinaagi sa pagsakmit kanila gikan sa kalayo. Apan padayon sa pagpakitag kaluoy sa uban, inubanan sa kahadlok, nga pagadumtan ninyo bisan ang bisti nga nabuling sa unod.” (Judas 22, 23) Ang usa ka bawtismadong membro sa kongregasyon nga natabangan niining paagiha makapadayon sa pagtagamtam sa pag-uyon ni Jehova ug sa pakigdait nga gihisgotan sa manulonda sa dihang natawo si Jesus.

21, 22. Unsay mosangpot kon ang usa katawo mahimong dili-mahinulsolong makasasala, ug unsay buhaton sa maunongong mga sakop sa kongregasyon?

²¹ Bisag dili daghan, dihay mga higayon nga diin ang makasasala dili maghinulsol. Nan kinahanglang ipalagpot siya sa mga ansiano aron mapanalipdan ang kahinlo sa kongregasyon gikan sa kahugawan. Kana ang nahitabo sa usa ka bawtismadong tawo sa Corinto nga nagpadayon sa imoral nga relasyon. Gitambagan ni Pablo ang kongregasyon: “Ayaw na pagpakig-uban sa mga makihilawason, hinunoa wala ko ipasabot niini nga dili na gayod kamo magpakigharong sa mga makihilawason dinhi sa kalibotan o sa mga dalo ug mga tikasan, o mga tigsimbag mga diyosdiyos. Kay kon mao pa man, kinahanglang mamahawa kamo niining kalibotana. Hinunoa ako nagasulat kaninyo karon nga dili kamo magpakig-uban kang bisan kinsa nga nagapakaigsoon kon kana siya makihilawason o dalo, o tigsimbag mga diyosdiyos o tigpasipala o palahubog o tikasan, dili bisan na lang sa pagpakigsalo kaniya sa pangaon.”​—1 Corinto 5:9-11.

²² Sanglit ang usa ka tawo sa Corinto nakahimo na man ug hinungdanong lakang sa bawtismo, nahimong inuyonan sa Diyos ug usa ka membro sa kongregasyon, ang pagpalagpot kaniya maoy usa ka seryoso nga butang. Gipaila ni Pablo nga dili gayod magpakig-uban ang mga Kristohanon kaniya, kay iyang gisalikway ang iyang inuyonang baroganan sa Diyos. (Itandi ang 2 Juan 10, 11.) Si Pedro misulat mahitungod sa mga gipalagpot: “Kay alang kanila maayo pa lang unta hinoon nga wala sila mahibalo sa dalan sa pagkamatarong kay sa motalikod sila tapos nahibalo niini sa tukma ug motalikod gikan sa balaang sugo nga gitugyan kanila. Ang panultihon sa tinuod nga sanglitanan nahitabo kanila: ‘Gibalikan sa iro ang iyang kaugalingong suka.’”​—2 Pedro 2:21, 22.

23. Sa unang siglo, unsa ang katibuk-ang kahimtang taliwala sa mga Kristohanon aron padayong mahuptan ang pag-uyon sa Diyos?

²³ Dayag nga dili na makalantaw si Jehova sa maong mga indibiduwal nga inuyonan, kay sila gipalagpot tungod sa wala-hinulsoling daotang buhat. (Hebreohanon 10:38; itandi ang 1 Corinto 10:5.) Sa dayag, diyutay lamang ang napalagpot. Ang kadaghanan nga nakabaton sa “dili-takos nga kalulot ug pakigdait gikan sa Diyos” ug ‘gisagop ingong mga anak sumala sa kahimuot sa iyang kabubut-on’ nagpabiling matinumanon.​—Efeso 1:2, 5, 8-10.

24. Unsang bahin niining ulohana ang takos sa atong dugang pagtagad?

²⁴ Tinuod usab kana sa atong panahon. Atong tagdon, kon sa unsang paagi ang ‘mga dili-magtutuo o ordinaryong mga tawo’ matabangan aron mahimong inuyonan sa Diyos karong adlawa ug kon unsay mahimo sa pagtabang kanila kon sila makasala. Hisgotan sa sunod nga artikulo kining mga butanga.

[Mga footnote]

Nakahinumdom Ka Ba?

◻ Sumala sa Kasulatan, kanus-a ug sa unsang paagi ang mga tawo mahimong uyonan sa Diyos?

◻ Unsay tinamdan sa Diyos sa mga dumuloong nga anaa taliwala sa iyang katawhan, apan nganong kinahanglang timbangan sa mga Israelinhoin ang pag-amping ug pagkamatinugoton?

◻ Unsay atong mahukom gikan sa kamatuoran sa pagtambong sa “mga dili-magtutuo” sa Kristohanong mga tigom sa Corinto?

◻ Unsay tagana sa Diyos aron matabangan ang bawtismadong mga Kristohanon aron magpabiling iyang inuyonang mga alagad?