SEALTIEL

[Nangutana (Nagpakisayod) sa Diyos].

Usa ka kaliwat ni Haring David ug katigulangan ni Jesus sa tribo ni Juda. Si Sealtiel gitawag nga anak nga lalaki ni Jehoiakin (Jeconias) ug gitawag usab nga anak nga lalaki ni Neri. Si Sealtiel ug ang iyang igsoong lalaki nga si Pedaia parehong gitawag nga amahan ni Gobernador Zorobabel nga nabuhi human sa pagkadestiyero.

Labot sa amahan ni Sealtiel: si Sealtiel gitala nga una sa mga anak nga lalaki nga natawo kang Jehoiakin sa panahon sa iyang pagkadestiyero. (1Cr 3:17; Mat 1:12) Kon si Sealtiel naminyo sa wala hinganli nga anak nga babaye ni Neri nga pinaagi kaniya gisubay ni Lucas ang talaan sa kagikan ni Jesus, tingali gitawag ni Lucas si Sealtiel ingong “anak ni Neri” sa pagkaagi nga siya maoy umagad nga lalaki ni Neri. Sama kini sa pagtawag ni Lucas sa ulahi kang Jose nga nangasawa kang Maria (dayag nga anak nga babaye ni Heli) ingong “anak ni Heli.”​—Luc 3:​23, 27.

Labot sa amahan ni Zorobabel: si Pedaia kas-a gipunting ingong amahan ni Zorobabel (1Cr 3:19), apan ang igsoong lalaki ni Pedaia nga si Sealtiel (1Cr 3:​17, 18) gipunting nga amahan ni Zorobabel diha sa tanang uban pang mga teksto. (Esd 3:​2, 8; 5:2; Neh 12:1; Hag 1:​1, 12, 14; 2:​2, 23; Mat 1:12; Luc 3:27) Kon si Pedaia namatay sa dihang bata pa ang iyang anak nga lalaki nga si Zorobabel, ang kinamagulangang igsoon ni Pedaia nga si Sealtiel lagmit mao ang nagpadako kang Zorobabel ingong iyang kaugalingong anak. O, kon si Sealtiel namatay nga walay anak ug si Pedaia nakigminyo sa nabiyudang asawa ni Sealtiel agig pagsunod sa kahikayan nga minyoan ang nabiyudang asawa sa igsoon, ang anak nga lalaki ni Pedaia pinaagi sa asawa ni Sealtiel mao ang legal nga manununod ni Sealtiel.