Gituman Nila ang Kabubut-on ni Jehova

Gipadala ni Jesus ang 70 ka Tinun-an

TINGHUNLAK kadto sa 32 K.P. Unom na lamang ka bulan ang nahibilin una pa ang kamatayon ni Jesus. Busa, aron mapadali ang buluhaton sa pagsangyaw ug mabansay pa ang pipila sa iyang mga sumusunod, iyang gitudlo ang 70 ka tinun-an ug “gipadala sila nga tinagduha nga una kaniya ngadto sa matag siyudad ug dapit nga didto siya mismo moadto.”​—Lucas 10:1.a

Gipadala ni Jesus ang iyang mga tinun-an “nga una kaniya” aron ang mga tawo mas daling makahukom kon sila ba uyon o batok sa Mesiyas sa dihang si Jesus mismo moabot sa ulahi. Apan nganong iyang gipadala sila nga “tinagduha”? Dayag, aron sila makadasig sa usag usa kon atubangon ug pagsupak.

Nagpasiugda sa pagkadinalian sa ilang buluhatong pagsangyaw, giingnan ni Jesus ang iyang mga sumusunod: “Ang anihon, sa pagkatinuod, dako, apan ang mga mamumuo diyutay. Busa pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.” (Lucas 10:2) Ang pagtandi sa usa ka pag-ani maoy tukma, kay ang bisan unsang kalangan sa panahon sa pag-ani mahimong motultol sa pagkausik sa hinungdanong mga abot. Sa susama, kon ang mga tinun-an magpasagad sa ilang asaynment sa pagsangyaw, ang bililhong mga kinabuhi mahimong mahanaw!​—Ezequiel 33:6.

Wala Mabaldang mga Ministro

Dugang pang gitudloan ni Jesus ang iyang mga tinun-an: “Ayaw pagdala ug puntil, ni puyo sa pagkaon, ni mga sandalyas, ug ayaw paggakos sa pagpangomosta ni bisan kinsa diha sa dalan.” (Lucas 10:4) Naandan na sa usa ka magpapanaw ang pagdala dili lamang sa puyo ug pagkaon apan usab sa ekstrang parisan nga sandalyas, kay mahimong mangahilis ang suylas ug mangabugto ang liston. Apan ang mga tinun-an ni Jesus dili angayng mabalaka sa maong mga butang. Hinunoa, sila angayng mosalig nga si Jehova moatiman kanila pinaagi sa kaubang mga Israelinhon, nga taliwala kanila ang pagkamaabiabihon maoy usa ka batasan.

Apan nganong giingnan man ni Jesus ang iyang mga tinun-an sa dili paggakos ni bisan kinsa sa pagpangomosta? Mahimo ba silang di magmabination, nga walay tahod? Dili gayod! Ang Gregong pulong nga a·spaʹzo·mai, nga nagpasabot ug paggakos sa pagpangomosta, mahimong magpasabot ug labaw pa kay sa matinahurong “komosta” o “maayong adlaw.” Mahimong maglakip usab kini sa naandang paghagkanay, paggaksanay, ug taas nga panaghisgot nga maoy mosunod sa dihang magkita ang duha ka managkaila. Usa ka komentarista miingon: “Ang mga timbaya tali sa mga taga-Sidlakan wala maglakip, sama sa atoa, ug diyutayng pagduko, o paglamano, apan gihimo pinaagig paggaksanay, ug mga pagyuko, ug bisan mga pagyukbo diha sa yuta. Kining tanan nagkinahanglag dakong panahon.” (Itandi ang 2 Hari 4:​29.) Busa gitabangan ni Jesus ang iyang mga sumusunod sa paglikay sa wala kinahanglana, bisan tuod naandan, nga mga kabaldahan.

Sa kataposan, giingnan ni Jesus ang iyang mga sumusunod nga sa dihang sila mosulod sa balay ug abiabihon, sila angayng ‘moestar nianang balaya, nga magakaon ug magainom sa mga butang nga ilang itagana.’ Apan kon sila mosulod sa usa ka siyudad ug wala kaayo abiabiha, sila angayng ‘mogula ngadto sa lapad nga mga dalan niini ug moingon, “Bisan ang abog nga nanapot sa among mga tiil gikan sa inyong siyudad among paphaon batok kaninyo.”’ (Lucas 10:​7, 10, 11) Ang pagpanarapo o pagtaktak sa abog sa tiil sa usa magpaila nga ang mga tinun-an malinawong mobiya sa di-madinawatong balay o siyudad hangtod nga ang mga sangpotanan sa ngadtongadto modangat gikan sa Diyos. Apan kadtong kinsa malulotong modawat sa mga tinun-an ni Jesus maghimo sa ilang kaugalingon nga mahilinya alang sa mga panalangin. Giingnan ni Jesus ang iyang mga apostol sa laing okasyon: “Siya nga nagadawat kaninyo nagadawat usab kanako, ug siya nga nagadawat kanako nagadawat usab kaniya nga nagpadala kanako. Ug si bisan kinsa nga magahatag sa usa niining mga gagmay ug usa lang ka kopa sa bugnawng tubig aron imnon tungod kay siya usa ka tinun-an, sultihan ko kamo sa pagkamatuod, dili gayod siya mawad-an sa iyang ganti.”​—Mateo 10:​40, 42.

Mga Pagtulon-an Alang Kanato

Ang buluhaton sa pagsangyaw sa maayong balita sa Gingharian sa Diyos ug paghimog mga tinun-an karon ginabuhat sa kapin ug 5,000,000 ka Saksi ni Jehova sa tibuok kalibotan. (Mateo 24:14; 28:​19, 20) Sila nakasabot nga dinalian ang ilang mensahe. Busa, ilang gigamit pag-ayo ang ilang panahon, nga maglikay sa mga kabaldahan nga magpugong kanila sa paghatag ug bug-os nga pagtagad sa ilang bililhong asaynment.

Ang mga Saksi ni Jehova maningkamot nga magmahigalaon sa tanan nilang ikahimamat. Bisan pa niana, dili sila basta moapil sa way kapuslanang tabitabi, ni makiglangkit sila sa mga debate bahin sa mga isyu sa katilingban o sa pakyas nga mga paningkamot niining kalibotana sa pagtul-id sa mga inhustisya. (Juan 17:16) Hinunoa, sila nagpunting sa ilang panaghisgot diha sa bugtong dumalayong sulbad sa mga suliran sa tawo​—ang Gingharian sa Diyos.

Kasagaran, ang mga Saksi ni Jehova nakitang magparespares sa pagbuhat. Dili kaha mas dako pa ang malampos kon ang matag usa kanila magbuhat nga mag-inusara? Tingali. Sa gihapon, ang mga Kristohanon karon nagaila sa kaayohan sa pagbuhat nga may kauban duyog sa isigkamagtutuo. Magtagana kinig usa ka sukod sa panalipod sa dihang magsangyaw sa peligrosong mga dapit. Ang pagbuhat nga may kauban makapaarang usab sa mga bag-ohan nga makabatog kaayohan gikan sa katakos sa mas hanas nga mga magmamantala sa maayong balita. Sa pagkatinuod, silang duha magkatampohay sa pagbayloay ug pagdasig.​—Proverbio 27:17.

Sa walay duhaduha, ang buluhaton sa pagsangyaw mao ang labing dinaliang buluhaton nga ginahimo niining “kataposang mga adlaw.” (2 Timoteo 3:1) Malipayon ang mga Saksi ni Jehova nga makabaton sa pagpaluyo sa tibuok kalibotang panag-igsoonay nga niana sila nagabuhat “kiliran sa kiliran alang sa pagtuo sa maayong balita.”​—Filipos 1:27.

[Mga footnote]