Kinsa ang Gianak Pag-usab?

ANG tanan bang mga tawong buotan moadto sa langit? Mao kanay gihunahuna sa daghan, apan si Jesu-Kristo wala mouyon. Gisultihan ang Hudiyohanong magmamando nga si Nicodemo, nga tagong miduol kaniya sa gabii, si Jesus miingon: “Walay tawo ang nakasaka ngadto sa langit.”​—Juan 3:13.

Bisan pa, gipadayag ni Jesus kang Nicodemo nga moabot ang panahon nga adunay pipila ka tawo nga makabatog higayon sa pagsulod sa Gingharian sa langit. Mahitungod kanila si Jesus miingon: “Gawas kon ang tawo igaanak sa tubig ug sa espiritu, siya dili makasulod sa gingharian sa Diyos. Ang gianak sa unod, unod man, ug ang gianak sa espiritu, espiritu man. Ayaw ikahibulong ang akong pag-ingon kanimo, Kinahanglan nga igaanak kamo pag-usab.” Apan si Nicodemo natingala kon sa unsang paagi ang usa mahimong igaanak pag-usab.​—Juan 3:1-9.

Tingali ikaw natingala usab kon unsa ang buot ipasabot ni Jesus. Mahimo kaha nga ikapadapat ang iyang mga pulong ngadto sa kalit nga mga eksperyensiya sa pagkakabig sa pagtuo nga giangkon sa daghan kinsa mibati nga sila napuno sa balaang espiritu sa Diyos?

Mga Emosyon ug ang Hunahuna

Ang uban miingon nga aron matino kon ang tawo gianak pag-usab, ang hinungdanon mao ang pagbati sa gahom sa espiritu. Apan, ang atong kasingkasing ug hunahuna mahimong mopahisalaag kanato, ilabina kon impluwensiyahan sa kusganong emosyon.​—Jeremias 17:9.

Si William Sargant, tigdukiduki sa mga epekto sa emosyon diha sa hunahuna, mihisgot sa panginahanglan sa “pagbantay batok sa mga pagtuo nga nabatonan diha sa mga kahimtang sa pagkapukaw sa emosyon samtang ang atong mga utok basin nagabudhi kanato.” Sumala pa kang Sargant, ang usa pa ka pananglitan mao ang epekto sa revivalist nga pagsangyaw ug sa mga hulga sa silot sa impiyernong kalayo. Kinsay dili gustong igaanak pag-usab aron makaadto sa langit kon ang kapilian lamang mao ang walay kataposang kasakit? Si Sargant miingon nga ubos sa maong emosyonal nga kabug-at, “ang katarongan gipadaplin, ang kompiyuter sa normal nga utok temporaryong gipahunong sa pag-andar, ug ang bag-ong mga ideya ug mga pagtuo gidawat nga walay pagduhaduha.”​—The Mind Possessed.

Busa, unsaon sa pagtino sa usa kon ang pagtuo labot sa pagkahimong gianak pag-usab “gidawat nga walay pagduhaduha”? Ang dalan sa matuod nga kaalam kinahanglang tinultolan sa tanang butang nga gisulat sa balaang espiritu sa Diyos sa mga magsusulat sa Bibliya. Ang mga Kristohanon ginadasig sa pagsimba sa Diyos ‘uban sa ilang gahom sa katarongan’ ug kinahanglang tinoon nila nga ang ilang gituohan tinuod.​—Roma 12:1, 2; 1 Tesalonica 5:21.

Ang pagkagianak pag-usab nagabukas sa usa sa labing dakong mga pribilehiyo nga gikahatag sukad ngadto sa mga tawo. Kini nalangkit sa tinuod talagsaong kaugmaran sa katumanan sa katuyoan sa Diyos. Samtang tinuod kining tanan, ang mga pangutanang sama niini mobangon: Kinsa ang mga gianak pag-usab? Sa unsang paagi kini nahitabo? Unsa ang palaabutong gihatag sa maong mga indibiduwal? Ug sila lang ba ang maluwas?

[Hulagway sa panid 3]

Si Nicodemo natingala kon sa unsang paagi ang usa mahimong igaanak pag-usab