“Hinaot ang Kalinaw Magauban Kaninyo”

“Si Jesus mitungha ug mitindog sa ilang taliwala ug miingon kanila: ‘Hinaot ang kalinaw magauban kaninyo.’”—JUAN 20:19.

1. Nganong ang mga paningkamot sa tawo sa pagpatunghag kalinaw seguradong mapakyas?

“ANG tibuok kalibotan anaa sa gahom sa usa nga daotan.” (1 Juan 5:19) Tinuod kini sa mga adlaw ni Juan, ug labi pang makita kini karon, uban sa makalilisang nga pag-uswag sa personal nga kapintasan, terorismo, mga gubat, ug pagkadunot. Ang dinasig nga pulong ni Juan nagpakita usab nga imposibleng makab-ot ang bisan unsang paglaom sa kalinaw sa kalibotan pinaagi sa paningkamot sa tawo, bisan pa sa mga paningkamot sa papa, sa mga lider sa nasod, ug sa HK. Ngano? “‘Wala gayoy kalinaw,’ miingon ang akong Diyos, ‘alang sa daotan.’”—Isaias 57:21.

2. Unsay kahulogan sa pulong “kalinaw,” ilabina sa Hebreohanon ug Grego?

² Apan, ang pulong “kalinaw” mahimong nagkahulogan ug usa ka butang gawas sa pagkawalay gubat. Ang kalinaw mahimong magkahulogan usab sa “mental kun espirituwal nga kahimtang nga gitiman-an sa kagawasan gikan sa makatugaw kun makapabalakang mga hunahuna o mga emosyon: pagkakalmado sa hunahuna ug kasingkasing.” Apan, ang Hebreohanong pulong alang sa “kalinaw” (sha·lohmʹ) ug ang Gregong pulong (ei·reʹne) dunay mas halapad nga kahulogan. Nagkahulogan usab sila ug kaayohan, sama sa mga pulong sa panamilit, “Lumakaw ka sa kalinaw.” (1 Samuel 1:17; 29:7; Lucas 7:50; 8:48) Kini makatabang kanato sa pagsabot sa mahigugmaong pagtagad ni Jesus alang sa iyang mga disipulo sa panahon sa malisod nga yugto nga nagalibot sa iyang kamatayon.

3. Sa unsang paagi gipakita ni Jesus ang maidlot nga kabalaka alang sa iyang mga disipulo human nga siya gibanhaw, ug unsa ang epekto?

³ Si Jesus namatay sa Biyernes, Nisan 14, sa tuig 33 K.P. Sa Dominggo, Nisan 16, siya gibanhaw. Sanglit, sa tanang panahon, maidlot nga nabalaka sa kaayohan sa iyang mga disipulo, iyang gipangita sila. Diin niya sila nakita? Diha sila sa tinakpang mga lawak “tungod sa kahadlok sa mga Hudiyo.” Busa, sila nabalaka, nangahadlok. Apan si Jesus miingon: “Hinaot ang kalinaw magauban kaninyo.” (Juan 20:21, 26) Sa ulahi, sanglit napalig-on sa balaang espiritu, maayo na ang ilang lakat. Maisogon nilang gihimo ang ilang tinudlong-buluhaton sa pagsangyaw, daghan ang natabangan nga makabaton sa diyosnong kalinaw.

Diyosnong Kalinaw Karon

4. Sa unsang paagi mapatunhay sa katawhan ni Jehova ang kalinaw sa hunahuna ug kasingkasing niining kritikal nga panahon?

⁴ Kita nagkinabuhi sa panahon sa kataposan, sa “kritikal nga panahon nga malisod sagubangon.” (2 Timoteo 3:1) Ang mangangabayo nga gitagna diha sa Pinadayag nga nangabayo sa kalibotan—sumala sa imong makita gikan sa mga gubat, kakulangan sa kalan-on, ug kamatayon tungod sa sakit. (Pinadayag 6:3-8) Naapektohan usab ang katawhan ni Jehova sa mga kahimtang sa ilang palibot. Busa sa unsang paagi mapatunhay nimo ang diyosnong kalinaw sa hunahuna ug kasingkasing? Pinaagi sa pagpasuod sa dakong Tuboran sa paglipay ug kalinaw. Sumala sa gipakita sa nag-unang artikulo, nagkinahanglan kinig kanunayng pag-ampo ug pangamuyo. Nianang paagiha “ang kalinaw sa Diyos nga molabaw sa tanang hunahuna magabantay sa inyong mga kasingkasing ug sa inyong mga gahom sa panghunahuna pinaagi ni Kristo Jesus.”—Filipos 4:6, 7.

5. Nganong tino sa Pablo nga “ang kalinaw sa Diyos” makaamping sa atong mga kasingkasing?

⁵ Si apostol Pablo, kinsa misulat niadtong mga pulonga, nakaantos sa mga katalagman ug kalisdanan. Siya nabilanggo ug gilapdosan sa mga Hudiyo ug sa mga Romanhon. Siya gibato ug gibiyaan nga nag-ungaw sa kamatayon. Ang pagbiyahe niadtong panahona peligroso; makatulo nga siya nalunod, ug masubsob nga katalagman gumikan sa mga tulisan. Daghang higayong nagtukaw siya sa kagabhion ug kanunayng nag-antos sa katugnaw, kagutom, ug kauhaw. Bisan pa niining tanan, adlaw-adlaw nga gibati niya ang “kabalaka tungod sa mga kongregasyon.” (2 Corinto 11:24-28) Busa nahibalo si Pablo gikan sa iyang daghang mga eksperyensiya kon unsa ka bililhon “ang kalinaw sa Diyos” nga magabantay sa atong mga kasingkasing.

6. Nganong hinungdanong tukoron ug huptan ang mainit, suod nga bugkos uban sa atong Maglalalang?

⁶ “Ang kalinaw sa Diyos” mahimong ikahubit ingong pagbati sa pagkamalinawon ug kahilom, nagapakita sa maayong relasyon sa Diyos. Bililhon usab kini alang sa mga Kristohanon, ilabina kon magaatubang sila ug paglutos o kasakit. Ngano? Buweno, kitang tanan dili-hingpit; busa, dihang tugawon sa mga problema, kalisod, pagbatok, o nagkalainlaing matang sa kakulian, mahadlok dayon kita. Hayan kana motultol sa atong pagkapakyas sa paghupot sa atong integridad. Kini mohatag pasipala sa ngalan sa Diyos, mawad-an kita sa kahimuot ni Jehova, ug motultol sa pagkawala sa atong kinabuhing walay kataposan. Busa pagkahinungdanong maningkamot nga mahuptan “ang kalinaw sa Diyos” nga motabang kanato sa pag-atubang ning maong mga hagit nga malamposon. Kanang maong kalinaw sa tino maoy usa sa ‘maayong mga gasa ug hingpit nga mga regalo’ nga gihatag sa atong langitnong Amahan.—Santiago 1:17.

7, 8. (a) Diin gipasukad “ang kalinaw sa Diyos,” ug sa unsang paagi kini ‘molabaw sa tanang hunahuna’? (b) Sa unsang paagi ang maong kalinaw gipakita diha sa kaso sa usa ka Aprikanong igsoon?

⁷ Tingali nakakita kag pila ka tawo nga nakatigayon sa kinabuhi nga kalmado ug masaligon. Sa kasagaran tungod kini sa kinaiyanhong katakos, impluwensiya sa pamilya, bahandi, edukasyon, o ubang mga butang. “Ang kalinaw sa Diyos” lahi kaayo. Wala kini ipasukad sa maayong mga kahimtang, ni resulta kini gikan sa tawhanong katakos kun pangatarongan. Nagatubod kini gikan sa Diyos ug “molabaw sa tanang hunahuna.” Ang hubad ni J. B. Phillips sa Filipos 4:7 mao nga “ang kalinaw sa Diyos . . . nagalabaw sa tawhanong pagsabot.” Mahibulong ang mga tawo sa kalibotan sa paagi sa pag-atubang sa mga Kristohanon ug seryosong mga problema, pisikal nga kadaot, o bisan kamatayon.

⁸ Ang modernong pananglitan niini mao ang usa sa mga Saksi ni Jehova kinsa nagdumalag Kristohanong miting sa yuta sa Aprika nga diin ang mga Saksi, sa dakong bahin sa paghulhog sa lokal nga mga Katoliko, giakusar nga mga terorista. Sa kalit, mitungha ang mga kapolisan sa militar nga nagdalag mga bayoneta. Ilang gipapauli ang mga babaye ug mga bata apan misugod sa pagbun-og sa mga lalaki. Ang Saksi nakahinumdom: “Wala akoy pulong nga ikahubit sa paagi nga kami gitratar. Ang korporal nga nangulo bukas nga mipahayag nga kami bunalan hangtod nga mamatay. Giposposan akog kahoyng garote nga gumikan niadto nagsuka akog dugo sa ulahi sulod sa 90 ka adlaw. Apan nabalaka ako sa kinabuhi sa akong mga kauban. Diha sa pag-ampo mihangyo ako kang Jehova sa pagbantay sa ilang mga kinabuhi, nga iyang mga karnero,” diin ang tanan naluwas. Pagkamaayong pananglitan sa pagpabiling kalmado diha sa makalilisang nga kaaway ug sa mahigugmaong pagpakitag kabalaka sa uban! Oo, tubagon sa atong mahigugmaong Amahan ang mga hangyo sa iyang matinumanong mga alagad, hatagan sila sa iyang kalinaw. Ang usa sa naglibog nga sundalo niadtong hitaboa miingon nga ang Diyos sa mga Saksi “mao gayod ang matuod nga Diyos.”

9. Unsay epekto sa pagbasa sa Bibliya ug sa pagpalandong niana?

⁹ Niining malisod nga panahon, daghang Kristohanon dunay mga problema nga mobapati kanilag kaluya ug mawad-ag kasibot. Ang labing maayong paagi sa paghupot sa kalinaw sa hunahuna mao ang pagbasa sa Bibliya ug sa pagpalandong niana. Kini makahatag sa usa ug kusog ug determinasyon sa pagpadayon ug sa pagbarog nga malig-on. “Ang pulong sa Diyos buhi ug nagalihok nga gamhanan.”—Hebreohanon 4:12.

10. Sa unsang paagi usa ka panalangin nga makahinumdom sa mga teksto?

¹⁰ Apan, komosta kon makaatubang kitag kalisod dihang walay Bibliya nga mabatonan? Pananglitan, tingali kalit nga dakpon ang Kristohanon ug ibalhog sa bilanggoan nga walay Bibliya. Niana nga kahimtang, tinuod gayod nga panalangin nga makahinumdom sa mga teksto sama sa Filipos 4:6, 7; Proverbio 3:5, 6; 1 Pedro 5:6, 7; ug Salmo 23. Dili ba pabilhan nimog dako nga makahinumdom ug makapalandong sa maong mga teksto? Diha sa makalilisang nga kahimtang sa bilanggoan, daw sama kini nga si Jehova nagapakigsulti kanimo mismo. Ang Pulong sa Diyos makaayo sa nasakit nga mga hunahuna, makalig-on sa maluyang mga kasingkasing, ug mapulihan ang nasubong hunahuna ug kalinaw. (Tan-awa ang Salmo 119:165.) Oo, bililhon kaayo ang pagsilsil sa kasulatan diha sa atong mga hunahuna karon samtang kita may higayon pa sa pagbuhat niini.

11. Giunsa pagpakita sa usa ka igsoon sa Netherlands ang panginahanglan sa espirituwal nga pagkaon?

¹¹ Si Arthur Winkler maoy usa nga nagpabilig dako sa Bibliya, ilabina sa panahon sa okupasyon sa Nazi sa Netherlands, dihang gihimo sa mga Saksi ang ilang Kristohanong buluhaton sa tago. Gipangita sa Gestapo si Igsoong Winkler. Dihang nadakpan nila siya sa kataposan, naningkamot sila sa pagpakompromiso kaniya apan napakyas. Dayon ilang gikulata siya hangtod nga nawad-an sa panimuot. Dihang nalagpotan siyag ngipon, nalisa ang iyang ubos nga apapangig, ug bun-og na kaayo ang lawas, gibutang siya sa ngitngit nga selda. Apan, ang iyang guwardiya maluloy-on ug mahigalaon. Nangayo si Igsoong Winkler sa pagtultol ni Jehova diha sa pag-ampo. Dako usab kaayo ang iyang panginahanglan sa espirituwal nga pagkaon ug nangayog tabang sa guwardiya. Sa ulahi, mibukas ang pultahan sa selda, ug dihay Bibliya nga gilabay sa sulod. “Pagkadako nga kalipay kadto,” nakahinumdom si Igsoong Winkler, “sa pagtagamtam sa adlaw-adlaw sa matahom nga mga pulong sa kamatuoran . . . mibati ako nga napalig-on sa espirituwal.”a

Diyosnong Kalinaw Magabantay Kanimo

12. Nganong kinahanglang ampingan nato ang atong mga kasingkasing ug mga gahom sa panghunahuna?

¹² Si Jehova nagsaad nga ang iyang kalinaw “magabantay sa inyong mga kasingkasing ug sa inyong mga gahom sa panghunahuna.” (Filipos 4:7) Hinungdanon kaayo kini! Ang kasingkasing mao ang sentro sa motibo ug sa emosyon. Niining kataposang mga adlaw, ang atong mga kasingkasing dali nga maluya sa kahadlok ug kabalaka, o modani kanato sa paghimog daotan. Ang sumbanan sa kinabuhi sa katibuk-an tulin nga nagakadaot. Kinahanglang magbantay kita sa tanang panahon. Dugang pa sa panginahanglan ug malig-ong mga kasingkasing, kinahanglan nga ang atong “mga gahom sa panghunahuna” palig-onon ug giniyahan sa Diyos pinaagi sa iyang Pulong ug sa iyang kongregasyon.

13. Unsang mga kaayohan ang moresulta gikan sa pag-amping sa atong mga gahom sa panghunahuna?

¹³ Sumala kang W. E. Vine, ang Gregong pulong noʹe·ma (gihubad “mga gahom sa panghunahuna”) dunay ideya sa “katuyoan” o “paagi.” (An Expository Dictionary of New Testament Words) Busa, ang kalinaw sa Diyos makalig-on sa atong Kristohanong katuyoan ug magabantay kanato batok sa bisan unsang kiling sa pagpaluya o sa pagbag-o sa atong mga hunahuna nga walay maayong katarongan. Sa ingon ang pagkawala sa kadasig o mga problema dili makapahunong kanato. Pananglitan, kon nagplano na kita sa pag-alagad kang Jehova diha sa linain nga kapasidad, sama sa pagkahimong bug-os panahong ministro o sa pagbalhin aron makaalagad nga diin dako kaayo ang panginahanglan sa mga ministro, “ang kalinaw sa Diyos” maoy dakong tabang kanato sa pagpangagpas nianang tumonga. (Itandi sa Lucas 1:3; Buhat 15:36; 19:21; Roma 15:22-24; 28; 1 Tesalonica 2:1, 18.) Aron dugang mapalig-on ang inyong panghunahuna, paggugol ug igong panahon sa pagtuon sa Pulong sa Diyos ug sa Kristohanong pag-ubanay. Busa imong ginapakaon ang imong hunahuna ug kasingkasing sa mahinlo, makalig-ong mga kaisipan. Makahimo ka ba sa paggugol ug igong panahon sa paglangkit sa imong kaugalingon sa dinasig nga mga “gipamulong” sa Diyos? Angay bang hatagan nimo silag dugang pagtagad?

14. Unsang dinasig nga tambag nga kinahanglan natong patalinghogan, ug ngano?

¹⁴ Imong makita nga ang kasingkasing ug hunahuna, o mga gahom sa panghunahuna, nalangkit sa pagbaton ug sa pagpahimulos gikan sa “kalinaw sa Diyos.” Gipamatud-an kini diha sa tambag sa Diyos: “Anak ko, pagmatngon sa akong mga pulong. Ikiling mo ang imong igdulongog sa akong mga gipamulong. Ayaw sila pagbulaga gikan sa imong mga mata. Tipigi sila sa kinataliwad-an sa imong kasingkasing. Kay sila kinabuhi alang niadtong nanagpangita kanila ug kaayohan sa ilang tibuok nga unod. Labaw sa tanang butang nga pagaampingan, ampingi ang imong kasingkasing, kay gikan niini mao ang mga tuboran sa kinabuhi.”—Proverbio 4:20-23.

15. Unsay bahin ni Jesus sa atong pagkabaton ug “kalinaw sa Diyos”?

¹⁵ “Ang kalinaw sa Diyos” nga maoy resulta gikan sa mainit, suod nga bugkos uban kang Jehova magabantay sa atong mga kasingkasing ug mga gahom sa panghunahuna “pinaagi ni Kristo Jesus.” (Filipos 4:7) Unsa ang bahin ni Jesus niini? Si Pablo misaysay: “Hinaot magauban kaninyo ang dili-takos nga kalulot ug kalinaw gikan sa atong Diyos nga Amahan ug sa atong Ginoong Jesu-Kristo. Iyang gitugyan ang iyang kaugalingon alang sa atong mga sala aron nga luwason kita gikan sa presente daotang sistema sa mga butang sumala sa kabubut-on sa atong Diyos ug Amahan.” (Galacia 1:3, 4) Oo, mahigugmaong gitugyan ni Jesus ang iyang kinabuhi aron kita malukat. (Mateo 20:28) Busa “pinaagi ni Kristo Jesus” nga kita madawat ni Jehova ingong iyang dedikadong mga alagad ug makahimo sa pagtagamtam nianang diyosnong kalinaw nga makapanalipod kanato.

Mga Katalagman nga Makadaot sa Diyosnong Kalinaw

16. Unsang tambag ang gihatag ni Pablo nga makatabang kanato sa paghupot sa “kalinaw sa Diyos”?

¹⁶ Dihang madawat ug matagamtam ang kalinaw nga gikan sa Diyos, kinahanglang mag-amping gayod kita aron magpabilin kana kanato. Daghang butang ang makakuha sa Kristohanong kalinaw. Usa sa labing komun, ug sa tino mao ang labing peligroso, mao ang mga pangibog sa pagkabatan-on. Diha sa ikaduhang sulat ni Pablo ngadto kang Timoteo, kinsa niadtong panahona tingali anaa sa iyang sayong panuigong 30, iyang gilakip kining tambag: “Likayi ang mga pangibog nga iya sa kabatan-on, ug tinguhaa ang pagkamatarong, pagtuo, gugma, kalinaw, uban kanila nga nagasangpit sa Ginoo uban sa putli nga kasingkasing.”—2 Timoteo 2:22.

17. Unsay kasagarang nahitabo bahin sa tagana ni Jehova sa sekso?

¹⁷ Lakip niadtong mga pangibog mao ang gana sa sekso, nga dunay dungganong dapit sulod sa kaminyoon. Apan, sa tibuok nga kasaysayan, kining maong gana sayop nga ginapahayag diha sa sekso sa dili pa maminyo o sekso gawas sa kaminyoon, diin kining duha gikaligotgotan sa atong maalamong Maglalalang. (Hebreohanon 13:4; Genesis 34:1-3) Ang kapeligrohan sa pagpadala sa seksuwal nga imoralidad nagahulga sa mga Kristohanon karong panahona, mga batan-on ug mga tigulang. Niining kataposang mga adlaw sa dunot nga kalibotan, ang sekso alang sa kadaghanan nagkahulogan ug yanong lawasnong kailibgon, uban sa mga buhat nga komun taliwala sa mga homoseksuwal, lalaki ug babaye.—Roma 1:24-27.

18. Nganong ang mga kasingkasing sa pipila dili malig-on, ug unsay mosangpot niini?

¹⁸ Ang kamatuoran nga kita nagpuyo ning matanga sa atmospera nagapasiugda kon unsa ka bililhon nga kita makabaton ug malig-on, malahutayong mga kasingkasing nga debotado kang Jehova. Ang uban nga midawat sa balita sa Gingharian, nagtuo sa paninugdang mga kamatuoran sa Bibliya, ug regular nga nakig-uban sa katawhan ni Jehova wala makaugmad ug lalom nga pagpabili kang Jehova, sa iyang Pulong, ug sa iyang tibuok-kalibotang kongregasyon. Ang ilang mga kasingkasing dili pa malahutayon. Madala dayon sila sa “mga pangibog nga iya sa kabatan-on.” Ang pipila kanila tingali nakasukol sa mga tintasyon sa pagpakighilawas o panapaw, apan sila nahimo, sumala sa gipasidaan ni Pablo, nga “mga mahigugmaon sa kalingawan inay nga mga mahigugmaon sa Diyos.” (2 Timoteo 3:4) Mas taas ang ilang panahong gigugol sa pagtan-awg TV, sa pagbasag mga nobela, o sa pagpamati sa mayagawng musika kay sa personal nga pagtuon, sa Kristohanong mga tigom, o sa pag-alagad sa Gingharian. Kini moresultag espirituwal nga kaluya ug, sa ulahi, mahulog sa seryosong kasal-anan.

19. Unsay atong buhaton aron dili kita maanod?

¹⁹ Kini sila, sama sa usa ka sakayan nga walay angkla, nagakaanod sa sulog nga nagapaingon sa katalagman. Unsay angay nilang buhaton? Si Pablo mitambag: “Busa gikinahanglan diay nga magpakita kitag labi pa ka mainitong pagtagad sa mga butang nga atong nadungog, aron dili kita maanod.” (Hebreohanon 2:1) Busa kadtong nameligro angay “magpakitag labi pa ka mainitong pagtagad sa mga butang nga atong nadungog” sa pagtuon sa Pulong sa Diyos, sa pagpangandam sa Kristohanong mga tigom, ug sa pakigbahin sa mga kamatuoran sa Bibliya ngadto sa uban. Siyempre, masayon ang paghunahuna, ‘Maayo kanang tambaga, apan dili ingon niana ang akong kahimtang, busa dili kana aplikado kanako.’ Mas maalamon nga sersoyong magpalandong ang matag usa kanato sa dugang pagputli sa atong mga kasingkasing, sa kinaladmang mga hunahuna, ug mga pangibog ug “tinguhaon ang pagkamatarong, pagtuo, gugma, kalinaw, uban kanila nga nagasangpit sa Ginoo uban sa putli nga kasingkasing.” (2 Timoteo 2:22) Labaw sa tanan, mangayo gayod kita sa pagtultol sa Diyos ug sa makalig-ong tabang sa iyang espiritu.

20. Unsay angay buhaton sa usa ka tawong nakahimog dakong kasal-anan?

²⁰ Kon dunay mahimong sad-an sa seryosong kalapasan apan nagatago niini, sila sa matin-aw mawad-an sa pag-uyon ni Jehova ug “sa kalinaw sa Diyos” nga ilang nabatonan. Mawala usab kanila ang ilang kaugalingong kalinaw sa hunahuna. (Itandi ang 2 Samuel 24:10; Mateo 6:22, 23.) Nan, imong makita nganong bililhon nga ang tanang Kristohanon nga nahulog sa seryosong sala motug-an niana kang Jehova ug sa mahigugmaong mga ansiano, kinsa makahatag espirituwal nga pag-ayo. (Isaias 1:18, 19; 32:1, 2; Santiago 5:14, 15) Kon ang tawo nga nawad-an ug espirituwal nga pagkatimbang diha sa danlog nga dalan sa kasal-anan mangayog tabang gikan sa hamtong nga mga igsoon, wala siyay mga pagtulisok sa konsensiya o sa pagkawalay diyosnong kalinaw.

21. Unsa ang katarongan sa atong dakong pasalamat kang Jehova karon, ug unsa ang atong determinasyon?

²¹ Pagkadakong pribilehiyo nga mahimong usa sa dedikadong mga Saksi ni Jehova karong panahona! Ang atong tibuok nga palibot, kining satanasnong kalibotan nagakabungkag ug nagakalumpag. Mahanaw kini sa dili madugay. Daghang mga tawo ang “gipanguyapan tungod sa kalisang ug sa pagpaabot sa mga butang nga mahitabo sa yuta.” Apan kita makahangad sa atong mga ulo tungod kay kita nahibalo nga ang atong “kaluwasan haduol na.” (Lucas 21:25-28) Aron sa pagkakita kon unsa ka dako sa atong pagpasalamat kang Jehova sa iyang “kalinaw . . . nga molabaw sa tanang hunahuna,” himoon ta sa atong labing maarangan sa pag-alagad nga matinumanon sa “Diyos nga nagahatag ug kalinaw.”—Roma 15:33; 1 Corinto 15:58.

[Mga footnote]

Mga Punto Agig Repaso

◻ Sa unsang paagi “ang kalinaw sa Diyos” nagatabang kanato karong panahona, ug sa unsang paagi kini ‘molabaw sa tanang hunahuna’?

◻ Unsang mga butang ang makahimo kanato sa paghupot sa kalinaw sa hunahuna?

◻ Unsang malalangong kapeligrohan ang nagahulga sa daghang mga Kristohanon karong panahona, ug ngadto sa unsa kini motultol?

◻ Kon makahimog seryosong kasal-anan ang usa ka Kristohanon, unsa ang angay niyang buhaton?

[Kahon/Hulagway sa panid 18]

Iyang Nahibaloan Kini nga Tinuod

Sa panahon sa Gubat sa Kalibotan II gipadala ang bana ni Elsa Abt ngadto sa kampong konsentrasyon sa Sachsenhausen tungod sa iyang Kristohanong pagsangyaw. Dayon sa Mayo 1942, miabot ang Gestapo sa iyang balay, gikuha ang iyang gamayng anak nga babaye, ug gipatrabaho si Elsa ug nag-antos sa nagkalainlaing mga kampo. Siya mihatag niining personal nga pamatuod:

“Ang akong mga tuig diha sa mga kampong konsentrasyon sa Alemanya nakatudlo kanako ug tagsaong pagtulon-an. Kini mao ang bahin sa pagkadako sa tabang sa espiritu ni Jehova sa paglig-on kanimo sa panahong ikaw anaa sa grabeng pagsulay! Sa wala pa ako dakpa, nakabasa akog sulat gikan sa usa ka igsoong babaye nga nag-ingon nga ilalom sa grabeng pagsulay ang espiritu ni Jehova mohatag kanimog kalinaw. Sa hunahuna ko nga paghinobra kadtong iya. Apan dihang naagian ko mismo ang mga pagsulay, nahibaloan ko nga ang iyang gipamulong tinuod. Ingon gayod niana ang nahitabo. Lisod nga handurawon kana, kon ikaw wala pa makaagi niana. Apan tinuod gayod kanang nahitabo kanako. Si Jehova motabang.”

[Hulagway sa panid 16]

Si Pablo nakasinati nga ang kalinaw sa Diyos makabantay sa atong mga kasingkasing

[Hulagway sa panid 19]

Ikaw ba nameligro nga maanod sa espirituwal?