Ang Hunahuna sa Bibliya

Bawtismo—Alang sa mga Masuso?

“DIHANG ako nanganak pa,” matud sa usa ka ginikanan, “akong gidali ang pagpabawtismo kanila. . . . Usahay ako maghunahuna kon husto ba ang akong gibuhat.” Ngano? Duha sa iyang tulo ka anak nagsalikway sa iyang pagtuo.

Ingong usa ka ginikanan ikaw tingali naghambin sa susamang mga pagduhaduha bahin sa pagpasakop sa usa ka masuso ngadto sa imong relihiyon. Kon mao, lagmit ikaw nahibalo nga ang mga pangulo sa iglesya—samang Katoliko ug Protestante—walay nahimo sa paghupay sa imong hunahuna. Sila nagapadako sa pagkamaduhaduhaon pinaagi sa paglalis mahitungod sa pagbawtismo sa masuso. Ang mga repormador nagatawag niini nga usa ka bilin sa patuotuo sa edad media. Bisan pa niana, ang mga tradisyonalista nagatawag sa paghikaw sa bawtismo nga “mangil-ad alang sa Kristohanong pagbati.”

Sa pagpangatarongan sa ingon, ang mga pangulo sa iglesya yanong “naghimo sa mga pahayag sa emosyon ingong kapuli sa makataronganong argumento.” (Infant Baptism and the Covenant of Grace, nga sinulat ni Paul K. Jewett) Nan, diin ka makalantaw alang sa awtoritatibong mga tubag sa imong mga pangutana mahitungod sa bawtismo sa masuso? Kining mga tubaga kinahanglang pangitaon diha sa Pulong sa Diyos.

Gitugyan sa Impiyerno?

Ang mga tigbawtismo sa masuso sa kinadak-ang bahin naningkamot sa pagpasukad sa ilang baroganan diha sa mga pulong ni Jesus sa Juan 3:5: “Gawas kon ang tawo igaanak sa tubig ug sa espiritu, siya dili makasulod sa gingharian sa Diyos.” Sila nangatarongan nga sanglit ang bawtismo sa tubig maoy usa ka kinahanglanon sa pagsulod sa langit, ang mga masuso kinahanglang bawtismohan sa paglikay sa pag-antos sa kalayonhong impiyerno—o pagpabilin sa limbo.a

Ugaling lamang, ang Bibliya nagaingon nga “ang mga patay . . . walay nahibaloan nga bisan unsa.” (Ecclesiastes 9:5; itandi ang Salmo 146:4.) Sanglit ang mga patay walay nahibaloan, sila dili arang makasinatig pag-antos. Busa, ang mga ginikanan dili kinahanglang mahadlok sa makahadlok nga sangpotanan kon dili nila pabawtismohan ang ilang mga masuso.

Bisan pa niana, anaa ang kabalaka nga ang mga dili-bawtismado dili makasulod sa langit. Apan, kini wala magkahulogan nga sila dili maluwas. Si Jesus miingon: “Ug ako adunay ubang mga karnero, nga dili iya niining [langitnong] torila.” (Juan 10:16) Dinhi, ug sa usa ka sambingay nga nahitala sa Mateo 25:31-46, gipaila ni Jesus nga adunay mga maluwas nga dili moadto sa langit. Asa sila moadto? Gisultihan ni Jesus ang mamumuhat ug daotan nga gilansang tapad niya: “Ikaw magauban kanako sa Paraiso.”—Lucas 23:43.

Kadto bang mamumuhat ug daotan “gianak sa tubig” pinaagi sa bawtismo? Dayag wala, ug ang langit sa ingon sirado alang kaniya. Nan, diin ba diay ang “Paraiso”? Hinumdomi nga gibutang sa Diyos ang orihinal nga magtiayon sa yutan-ong paraiso, uban ang kalaomang mabuhi dinha sa walay kataposan. (Genesis 1:28; 2:8) Si Adan ug Eva, hinunoa, mipalabi sa pagrebelde ug gipagawas sa ilang matahom tanamang puy-anan. Ang yutan-ong Paraiso ba nawala sa walay kataposan? Wala, kay ang Kasulatan nagatin-aw nga ang Diyos sa kataposan magpasig-uli sa Paraiso sa yuta. (Mateo 5:5; 6:9, 10; Efeso 1:9-11; Pinadayag 21:1-5) Ug maoy niining yutan-ong Paraiso nga ang kadaghanan niadtong namatay—apil ang mga masuso—sa kataposan pagabanhawon.—Juan 5:28, 29.

Kinahanglan bang ang usa ka indibiduwal bawtismado aron makaambit niining yutan-ong pagkabanhaw? Dili gayod kinahanglan. Daghan ang namatay nga walay espirituwal nga kahibalo. (Itandi ang Jonas 4:11.) Sanglit sila wala gayod makabatog higayon nga makakat-on bahin sa Diyos, sila wala gayod makapahinungod sa ilang kaugalingon ngadto kaniya. Kadto ba sila nawala na sa walay kataposan? Wala, kay si apostol Pablo miingon: “Adunay pagkabanhaw sa mga matarong ug sa mga dili matarong.” (Buhat 24:15) Pihong naapil nianang banhawon nga panon mao unya ang mga masuso. Busa, ang mga pangangkon nga kinahanglan ang bawtismo aron maluwas ang mga masuso bug-os walay pasikaranan.

Pagtuli ug Bawtismo

Ugaling, ang mga nagapabor sa bawtismo sa masuso nagapunting nga ang mga masuso sa Israel gituli dayon tapos sa pag-anak. (Genesis 17:12) Sila nangatarongan nga ang bawtismo nagpuli sa pagtuli ingong paagi sa pagluwas sa mga masuso.

Bisan pa niana, ang pagtuli nagsilbi bang paagi sa kaluwasan? Wala, kadto usa ka makitang “ilhanan sa pakigtugon” nga gihimo sa Diyos uban kang Abraham. (Genesis 17:11) Dugang pa, ang mga lalaki lamang ang gituli. Kon ang bawtismo motumbas sa pagtuli, dili ba makataronganon nga dili bawtismohan ang babayeng mga masuso? Tin-aw, ang pagtumbas dili angay. Pagahinumdoman usab nga ang Kasulatan tinong nagsugo sa Hudiyong mga ginikanan sa paghimo sa pagtuli sa ilang mga anak lalaki. Kon nalangkit ang kaluwasan, nganong walay samang sugo sa Kristohanong mga ginikanan bahin sa bawtismo?

Matuod, si Jesus miingon: “Pasagdi nga ang mga bata moduol kanako . . . kay ang gingharian sa Diyos iya sa mga ingon kanila.” (Marcos 10:14) Apan si Jesus wala mag-ingon nga ang langit puy-an sa mga bata. Makaiikag, ang Protestanteng teologo si A. Campbell miingon mahitungod sa langitnong Gingharian: “Kini dili malangkoban sa mga bata, kondili niadtong sama kanila sa pagkamalinawon, pagkamapaubsanon ug pagkaaghop.”

Ang mga Anak sa Usa ka Magtutuo Maoy “Balaan”

Gisugo ni Jesus ang iyang mga sumusunod nga “panlakaw . . . ug paghimog mga tinun-an [o, mga tinudloan] sa katawhan sa tanang nasod, nga magabawtismo kanila.” (Mateo 28:19) Busa kadtong edaran na nga mahimong mga tinun-an, o mga tinudloan, ang pagabawtismohan. Busa, ang matuod nga mga Kristohanon karong adlawa naningkamot o nagabansay—dili magabawtismo—sa ilang mga anak sukad sa pagkabata. (2 Timoteo 3:15) Samtang ang mga anak matutoon “sa disiplina ug pagdumala sa kaisipan ni Jehova,” ilang maugmad ang ilang kaugalingong pagtuo.—Efeso 6:4.

Kasamtangan, ang mga ginikanan dili kinahanglang mahadlok nga ang walay-kataposang kaayohan sa ilang mga bata mameligro kon sila dili bawtismado. Sa 1 Corinto 7:14 si apostol Pablo nagahatag ug pasalig nga ang mga anak sa Kristohanong ginikanan maoy “balaan.” Kini dili tungod sa ilang pagkaagom sa pormalistikong rituwal kondili tungod kay ang Diyos maluluy-ong nagahatag ug mahinlong baroganan ngadto kanila—samtang labing menos usa sa ilang mga ginikanan nagapabiling matinumanon ingong Kristohanon.

Ang matinumanong panig-ingnan sa mga ginikanan, uban sa Biblikanhong pagbansay nga madawat sa ilang mga anak, sa igong panahon magdasig sa mga batan-on sa paghimog pagpahinungod sa ilang kaugalingon ngadto sa Diyos ug pagpasimbolo niini pinaagi sa bawtismo. Ang ilang mapabilhon nga mga kasingkasing nagatukmod kanila sa pagpadayon pinaagi sa paghatag ug ‘balaang pag-alagad uban sa ilang gahom sa pangatarongan.’ (Roma 12:1) Kini mga butang yanong dili mabuhat sa usa ka gamitoyng masuso.

[Mga footnote]