Mga Pangutana Gikan sa mga Magbabasa

◼ Haom ba ang paghisgot bahin sa usa ka umaabot nga “bag-ong kalibotan”?

Kining pangutanaha tukmang ipangutana, sanglit ang Gregong pulong nga kasagarang hubarong “kalibotan,” koʹsmos, sa panguna nagkahulogan katawhan, ug ang Diyos dili man mogamag usa ka bag-ong rasa sa katawhan. Dugang pa, sa Bibliya dili kita makakaplag sa ekspresyong kai·nosʹ koʹsmos (sa literal, “bag-ong kalibotan”).

Apan ang Biblikanhong paggamit sa koʹsmos nagatugot sa Kristohanon sa pagsulti bahin sa usa ka “bag-ong kalibotan” kon magatumong sa umaabot nga Paraiso nga ipasig-uli sa yuta. Ang The New International Dictionary of New Testament Theology nagasaysay: ‘Ang nombreng kosmos sa sinugdan nagkahulogang tinukod, apan ilabina gayod kini nagkahulogang kahikayan.’ Ang maong diksiyonaryo nagadugang nga ang pulong may tinong mga kahulogan, sama sa “dayandayan ug adorno,” “ang pagpaigoigo sa kinabuhi diha sa tawhanong katilingban,” ug “ang mga pumuluyo sa yuta, ang katawhan.”

Sa Kristohanon Gregong Kasulatan, ang koʹsmos kadaghanan gigamit sa diwa nga tibuok tawhanong pamilya. Busa atong mabasa nga “ang tanan nakasala [nga mao, ang tanang dili-hingpit nga kaliwat ni Adan] ug nakabsan sa himaya sa Diyos.” (Roma 3:19, 23) Sa laing bahin, “Gihigugma pag-ayo sa Diyos ang kalibotan [koʹsmos] nga iyang gihatag ang iyang bugtong nga Anak, aron nga ang tagsatagsa nga motuo kaniya makabaton . . . sa kinabuhing walay kataposan.” (Juan 3:16) Oo, ang halad ni Kristo mabatonan sa tagsatagsa sa tawhanong pamilya nga motuo.

Kon kana mao lamang ang bugtong paggamit sa Bibliya sa koʹsmos, dili tukma ang pagsulti bahin sa nagsingabot nga “bag-ong kalibotan.” Ngano? Tungod kay ang pila sa katawhan makalabang-buhi sa umaabot nga dakong kasakitan. Unya kini sila magbatog higayon sa pagkinabuhi diha sa napasig-uling Paraiso. Busa ang Diyos dili maglalang sa usa ka bag-ong rasa sa mga tawo, usa ka bag-ong katawhan, usa ka bag-ong kalibotan sa katawhan. Bisan pa niana, ang Bibliya wala magagamit sa koʹsmos sa pagpasabot lamang sa tanang katawhan.

Pananglitan, usahay ang Gregong pulong nagkahulogan sa tanang tawo nga nahibulag sa Diyos. Ang Hebreohanon 11:7 nagaingon nga “tungod sa pagtuo si Noe . . . naghukom sa kalaglagan sa kalibotan [koʹsmos].” Dayag siya wala maghukom sa kalaglagan sa matag kataposang tawo, sa tanang katawhan; si Noe ug ang pito sa iyang pamilya naluwas sa Lunop. Sa susama, si Jesus miampo: “Ako nagahangyo, dili mahitungod sa kalibotan [koʹsmos], kondili mahitungod niadtong imong gihatag kanako. . . Ang kalibotan nagdumot kanila, tungod kay sila dili bahin sa kalibotan, maingon nga ako dili bahin sa kalibotan.”​—Juan 17:9, 14; itandi ang 2 Pedro 2:5; 3:6.

Hinuon, atong ibutang ang atong pagtagad sa lain pang kahulogan nga niana ang Bibliya nagagamit sa koʹsmos. Kini nagapasabot sa gambalay, kahikayan, o dominyo sa tawhanong kinabuhi.a Atong mahibalag ang maong paggamit diha sa komento ni Jesus: “Unsay kapuslanan alang sa usa ka tawo kon maangkon niya ang tibuok kalibotan [koʹsmos] apan mawad-an sa iyang kalag?” (Mateo 16:26) Tin-aw, si Kristo wala magtumong ngadto sa ‘pag-angkon sa tibuok kalibotan sa katawhan’ sa usa ka tawo, ni sa ‘tibuok kalibotan sa katawhan nga nahibulag sa Diyos.’ Dili ang katawhan ang mahimong maangkon sa usa ka tawong materyalistiko, kondili kon unsay nabatonan, ginabuhat, o ginahikay sa usa ka tawo. Kini matuod usab sa mga gipamulong ni apostol Pablo mahitungod sa ‘pagkamabalak-on sa mga butang sa kalibotan’ sa usa ka tawong minyo. Sa susama, ang usa ka Kristohanon angay dili ‘magagamit sa bug-os sa kalibotan.’​—1 Corinto 7:31-33.

Niining diwaa, ang koʹsmos may kahulogang susama nianang iya sa Gregong pulong ai·onʹ, nga mahubad nga “sistema sa mga butang” o “panahon.” (Tan-awa ang Aid to Bible Understanding, mga panid 1671-4.) Atong makaplagan nga sa pila ka kahimtang ang duha ka pulong mahimong bayloon. Palandonga ang duha ka pananglitan sa pagkasama tali sa koʹsmos ug ai·onʹ: (1) Si Pablo misulat nga siya gibiyaan ni Demas, kinsa “nahigugma sa presenteng sistema sa mg butang [ai·onʹ].” Apan si apostol Juan mitambag batok sa ‘paghigugma sa kalibotan [koʹsmos],’ nga niana nagagikan “ang tinguha sa unod ug ang tinguha sa mga mata ug ang pagpagawal sa pangabuhian sa usa.” (2 Timoteo 4:10; 1 Juan 2:15-17) (2) Ang Juan 12:31 nagahisgot sa “magmamando niining kalibotana [koʹsmos],” si kinsa ginapaila sa 2 Corinto 4:4 ingong “ang diyos niining sistema sa mga butang [ai·onʹ].”

Busa, ang koʹsmos, o “kalibotan,” magamit mahitungod sa tanang katawhan ingon man sa gambalay sa tawhanong dominyo. Tungod niana, kita haom ug uban ang samang katukma makahisgot sa umaabot nga “bag-ong sistema sa mga butang” o sa usa ka “bag-ong kalibotan.” Kini unya maoy usa ka bag-ong gambalay, kahikayan sa kalibotan, o dominyo sa tawhanong kinabuhi. Ang kadaghanang magapuyo sa napasig-uling yutan-ong Paraiso nakapuyo sa daang sistema sa mga butang. Apan sila nakalabang-buhi niana o nabanhaw. Busa sila unya maoy samang katawhan. Bisan pa niana, tungod sa pagkawala sa kalibotan sa katawhan nga nahibulag sa Diyos, ug tungod sa bag-ong paghikay, o kahikayan, nga gipasukad sa nagalungtad gipadayag nga kabubut-on sa Diyos, kanang napasig-uling Paraiso mao unyay usa ka bag-ong kalibotan.

[Mga footnote]

[Hulagway sa panid 31]

Ang matarong nga katawhan magpasig-uli sa Paraiso sa bag-ong kalibotan