Unsa ang Katuyoan sa Tagna?

KADTONG nagaangkon nga ang ilang nagkadaiyang matang sa pagsimba maoy mga pinadayag gikan sa labaw-tawhanong mga tinubdan nagaila usab nga may maayo ug daotang labaw-kinaiyanhong mga gahom. Ang maong pag-ila nagapatungha niining mga pangutanaha: Ang matag usa ba sa maong mga matang sa pagsimba gipadayag gikan sa usa ka maayong tinubdan? O sila ba may daotang tinubdan? Hain niana ang gidasig sa matuod nga Diyos?

Ang Unang Relihiyon

Ang katawhan giila ingong usa ka pamilya, ug kini nahiuyon sa asoy sa Bibliya sa usa ka unang tawhanong magtiayon, si Adan ug si Eva. Si Jehova, ang Maglalalang, nagpaila sa iyang kaugalingon kanila. Iyang gipadayag kang Adan ug Eva ang ilang bahin diha sa iyang katuyoan ug ang ilang matuod nga relasyon kaniya. Gihimo sa Diyos si Adan nga iyang unang manalagna, nga responsable sa pagpasa sa balaang mga pinadayag ngadto sa iyang asawa ug sa kataposan ngadto sa ilang mga kaliwat, nga mao, ang tanang tawo.​—Genesis 1:27-30; 2:15-17.

Kadto mao ang bugtong relihiyon, ang bugtong matang sa pagsimba nga gipadayag ni Jehova nga Diyos. Kadto gipadayag sa pagkamasinugtanon ngadto sa kabubut-on sa Diyos. Wala kadto magkinahanglan sa mga rituwal, mga halad, mga halaran, o mga orakulo.

Mitungha ang Bakak nga Relihiyon

Ang unang masupakong “pinadayag” maoy gikan sa usa ka manulonda nga buot simbahon. Iyang gitanyag ang usa ka kapuli sa matuod nga relihiyon ug gihaylo si Adan ug si Eva sa pagduyog kaniya sa pag-alsa batok sa ilang Maglalalang. Kadto naghimo kaniyang Satanas, ang magsusupak ni Jehova. Ang iyang “tagna” nagpakaarong-ingnong nagtanyag sa pagbuot-sa-kaugalingon ug independensiya gikan sa Diyos. Hinunoa, kadto nagpahinabo sa pagkaulipon kang Satanas ug sa sala, nga nagdalag kamatayon.​—Genesis 3:1-19; Mateo 4:8-10; Roma 5:12.

Si Satanas sa kadugayan gikuyogan sa ubang rebelyosong manulonda, o mga demonyo. Walay duhaduha nga sila nagpasanay sa bakak relihiyosong mga pagtuo nga nakaamot ngadto sa pagdaot sa katawhan. Sa mga adlaw sa apo ni Adan si Enos, “nasugdan ang pagtawag sa ngalan ni Jehova.” Sumala sa Targum of Palestine, kadto gibuhat nga mapasipalahon sa bahin sa idolatrosong pagsimba niadtong panahona.​—Genesis 4:26; 6:1-8; 1 Pedro 3:19, 20; 2 Pedro 2:1-4.

Ang bakak nga relihiyon napapas sa Lunop sa adlaw ni Noe, nga ang nabilin lamang mao ang matuod nga matang sa pagsimba nga gituman sa manalagna ni Jehova, si Noe. (Genesis 1:5-9, 13; 7:23; 2 Pedro 2:5) Hinunoa, ang mga demonyo nagpabilin, ug nagpailaila pag-usab sa mini nga mga panagna ug relihiyosong mga pagtuo. Kadto nagpahayag nga ang mga kaliwat ni Noe nakapasuko kang Jehova tungod sa pagtukod sa siyudad sa Babel ingong sentro sa bakak nga pagsimba. Apan gilibog sa Diyos ang ilang pinulongan ug “gipatibulaag sila gikan didto sa tibuok nawong sa yuta.”​—Genesis 11:1-9.

Unsay ginatug-an niining tanan kanato? Kitang tanang mga kaliwat ni Noe ug ni Adan. Busa ang tanang kultura samag sinugdanan ug naghawid sa pila ka pagtuo sa Diyos ingong kabilin sa kahibalo nga nakalahutay gikan pa sa adlaw ni Noe. Apan ang maong paninugdang pagtuo nadaot tungod sa bakak relihiyosong mga ideya nga napanunod gikan niadtong mga katigulangan nga natibulaag gikan sa Babel (sa ulahi gipasig-uli ingong Babilonya) ngadto sa tanang bahin sa yuta. Kini makita sa samang mga patuotuo mahitungod sa mga espiritu sa mga patay, sa pagsimba sa katigulangan, ug sa pagbuhat sa astrolohiya, pagpanagna, ug pagdiwata.​—Daniel 2:1, 2.

Ang Katuyoan sa Tagna

Nagkahulogan ba kini nga ang mga relihiyon karong adlawa gipasukad lamang sa mga pagtuo nga napanunod gikan sa kagahapon? Dili. Si Satanas ug ang mga demonyo nagadasig gihapon sa bakak nga tagna sa paglimbong ug pagbahin sa katawhan, sa paglibog sa matuod nga mga pinadayag mahitungod sa Diyos, ug pagtukod sa bakak nga mga ideya ug mga relihiyon. (1 Timoteo 4:1; 1 Juan 4:1-3; Pinadayag 16:13-16) Ang Bibliya nagaingon: “Diha usab ang mini nga mga propeta sa taliwala sa katawhan, maingon nga sa taliwala ninyo aduna usab unyay mga mini nga mga magtutudlo. Kini sila mismo magapasulod sa hilom sa makadaot nga mga sekta.”​—2 Pedro 2:1.

Sa laing bahin, gitipigan ni Jehova ang matuod nga relihiyon nga gihatag sa Eden. Siya nagdugang ug impormasyon sa pagpauswag sa atong kahibalo bahin kaniya ug sa atong responsabilidad sa pagkatuman sa iyang katuyoan. Busa ang matuod nga mga tagna nagapahibalo sa kamatuoran mahitungod sa Diyos, sa iyang kabubut-on, ug sa iyang moral nga mga sukdanan. Sila nagatin-aw sa relasyon sa tawo ngadto kaniya aron ipasig-uli na usab ang katawhan sa iyang katuyoan, nga mosangpot sa bug-os nga kalamposan niini.​—Isaias 1:18-20; 2:1-5; 55:8-11.

Sa sinugdan sa pag-alsa sa tawo, si Jehova mipahayag sa usa ka tagna nga mihatag paglaom sa mga kaliwat ni Adan ug ni Eva. Iyang gipadayag nga aduna unyay usa ka manluluwas, usa ka “binhi,” nga maglaglag kang Satanas ug sa iyang kaliwat. (Genesis 3:15) Sa ulahi ang mga tagna miabag sa pag-ila niining gisaad nga “binhi,” o “dinihogang usa” sa Diyos, ug nagpadayag nga siya maoy motuman sa pangunang bahin sa pagkatuman sa mga katuyoan sa Diyos.​—Salmo 2:2; 45:7; Isaias 61:1.

Sa ingon ang usa ka pangunang katuyoan sa tagna mao ang pagpahibalo sa mga katuyoan sa Diyos ug sa “dinihogang usa,” o “Kristo,” nga pinaagi kaniya kana mamatuman. Sanglit kining pinili nga usa mao man si Jesus, ang manulonda ni Jehova miingon: “Simbaha ang Diyos, kay ang pagpanghimatuod kang Jesus mao ang nagadasig [o, mao ang espiritu sa] pagpanagna.” (Pinadayag 19:10) Duha ka kamatuoran ang gitin-aw sa maong pahayag. Nahauna, walay tinugyanan sa matuod nga tagna ang mangayo nga pagasimbahon tungod kay ang matuod nga pagsimba iya lamang kang Jehova nga Diyos. (Mateo 4:4; Juan 4:23, 24) Ikaduha, ang kinalabwang tumong sa tanang matuod nga tagna kinahanglang mao ang pagbutyag sa mga hitabo ug mga kamatuorang may kalabotan ni Jesus. Kini nagaila sa pasukaranang bahin nga gitudlo ni Jehova kaniya sa pagtuman sa Iyang katuyoan nga mao ang pagbalaan sa Iyang ngalan ug pagpasig-uli sa yuta ngadto sa tukmang dapit niini diha sa Iyang kahikayan sa mga butang.​—Juan 14:6; Colosas 1:19, 20.

Tungod niini, ang inspiradong mga mensahe gikan sa Diyos nagpunting sa panguna kang Jesus. Ang tibuok espiritu, o katuyoan sa maong matuod nga tagna mao ang pagpanghimatuod kaniya. Dugang pa, ang pagkatuman sa mga tagna diha kang Jesus nagatimaan nga silang tanan matuod. Kini ang hinungdan ang Bibliya nagaingong “ang kamatuoran miabot pinaagi kang Jesu-Kristo.” “Kay bisan unsa ka daghan ang mga saad sa Diyos, sila nangahimong Oo pinaagi kaniya.”​—Juan 1:17; 2 Corinto 1:20; Buhat 10:43; 28:23.

Nganong Ngadto sa mga Israelinhon?

Gisugdan ni Jehova ang iyang “pagpanghimatuod kang Jesus” pinaagi sa iyang tagna mahitungod sa gisaad nga “binhi.” Ang Diyos sa ulahi nagpadayag sa yutan-ong kagikanan sa “binhi” ingon nga pinaagi kang Noe, Sem, Abraham, Isaac (dili Ismael), ug Jacob. Kining mga tawhana nagpabiling maunongon sa matuod nga relihiyon, nga nagpamatuod nga sila matinumanong mga manalagna ni Jehova samtang ang tanang nasod nadaot tungod sa pagsimba sa bakak nga mga diyos. (Genesis 6:9; 22:15-18; Hebreohanon 11:8-10, 16) Ang kagikanan o linya nagpadayon latas sa mga kaliwat niining mga tawhana​—ang nasod sa Israel ug ilabina ang banay ni David, ang labing iladong hari sa Israel.​—2 Samuel 7:12-16.

Sa pagpakita nganong iyang gipili ang Israel, si Jehova miingon: “Dili tungod kay ikaw mao ang labing daghan sa tanang mga katawhan . . . [kondili] tungod kay iyang gibantayan ang gipanumpaang pahayag . . . ngadto sa inyong mga amahan,” si Abraham, Isaac, ug Jacob. (Deuteronomio 7:6-8; 29:13) Dayag, usa lamang ka nasod ang nakatagana sa kagikanan alang sa gisaad nga “binhi.” Bisan pa niana, ang matuod nga relihiyon dili limitado lamang sa mga Israelinhon. Bisan tuod ang mga pagpadayag sa kamatuoran wala ihatag ngadto sa ubang nasod, ang mga tinagsatagsa ka tawo gikan sa ilang taliwala makaduyog sa Israel sa pagsimba, ug ang pipila kanila naapil gani sa kagikanan sa “binhi.” (Numeros 9:14; Ruth 4:10-22; Mateo 1:5, 6) Ang separadong mga pagpadayag nga ihatag sumala sa nasodnon o rasanhong mga kagikanan makapahinabo lamang untag labawng relihiyosong pagbahinbahin, samtang maoy kabubut-on ni Jehova ang paghiusa na usab sa katawhan diha sa matuod nga pagsimba.​—Genesis 22:18; Efeso 1:8-10; 2:11-16.

Ang mga kinahanglanon managsama alang sa tanang rasa. Sanglit siya walay pagkausab sa iyang moral nga mga sukdanan ug katuyoan, ang iyang mga pagpakiglabot sa Israel nagpakita kon sa unsang paagi siya makiglabot sa susamang mga kahimtang sa bisan unsang panahon. (Malakias 3:6) Busa ang Israel nagsilbing usa ka modelo sa tanang nasod. Pinaagi niana gipasundayag sa Diyos ang mga kaayohan sa matuod nga pagsimba ug sa kabuangan sa bakak nga mga kulto. Samtang ang mga Israelinhon nagpabiling matinumanon kaniya, sila iyang gipanalipdan ug gipanalanginan. Sa miliso sila ngadto sa bakak nga mga diyos sa ubang kanasoran, sila gidaugdaog sa maong kanasoran, sumala gayod sa gipasidaan kanila ni Jehova.​—Deuteronomio 30:15-20; Daniel 9:2-14.

Ang Israel nagsilbi usab nga matagnaong modelo, ug si David nahimong matagnaong hulagway ni Jesus, kinsa nakapanunod sa tugon sa Gingharian sa Diyos uban kang David. (1 Cronicas 17:11, 14; Lucas 1:32) Ang Kasugoan nga gihatag sa Israel, uban ang mga halad niini ug pagkasaserdote, naglandong sa halad ni Jesus ug mipunting sa iyang langitnong Gingharian ug pagkasaserdote. Sa ingon ang Kasugoan nahimong usa ka “magtutultol ngadto kang Kristo.”​—Galacia 3:19, 24; Buhat 2:25-36; Hebreohanon 10:1-10; Pinadayag 20:4-6.

Ang Basahon sa Matuod nga Tagna

Kining bililhong impormasyon dili tukmang matipigan pinaagig binaba nga tradisyon o pinaagig separadong mga pagpadayag ngadto sa nagkalainlaing nasod. Ang labing maayong paagi sa pagtipig ug pagpasa ngadto sa tanang nasod mao ang sinulat nga talaan. Ug ang Bibliya nagatuman niining bahina. Kini lamang ang naundan sa dinasig nga mga pagpadayag sa Diyos ug nagatipig sa makasaysayanhon ug matagnaong asoy sa iyang mga pakiglabot sa mga tawo. Kini lamang ang nagapunting kang Jesu-Kristo ingong Tinugyanan sa Diyos alang sa kaluwasan ug naundan sa pangataposang mga tagna mahitungod sa umaabot nga pagkatuman sa Mesiyanikong buluhaton. Sa ingon kini ang kompletong dinasig nga sinulat nga Pulong sa Diyos.​—Roma 15:4; 1 Corinto 10:11; 2 Pedro 1:20, 21.

Sukad sa pagkakompleto sa Bibliya, kadtong nagpailailag bag-ong “mga tagna,” mga relihiyon, ug mga sekta dili mahimong inspirado sa Diyos. Ang matuod nga mga tagna wala ihatag aron sa pagpadayag ug bag-ong mga relihiyon. Sila naghupot sa bugtong matuod nga relihiyon nga alang sa atong panahon karon ug nagpaila sa umaabot nga pagkatuman sa katuyoan ni Jehova. Ang pagkatuman niana nagahatag pamatuod sa iyang talagsaong pagka-Diyos ug gahom, nga nagapakita nga siya lamang ang makatagna sa mga hitabo nga abanteg kasiglohan ug sa pagkatukma magpatuman kanila.​—Isaias 41:21-26; 46:9-11.

Busa ang tanang buot masinati sa matuod nga tagna ug magtuman sa matuod nga relihiyon kinahanglang modangop sa Bibliya. Kini mao ang basahon sa tagna sa Diyos​—ang iyang kompletong mensahe alang sa katawhan.​—2 Timoteo 3:16, 17.

[Mga Letrato sa panid 7]

Kagikanan sa gisaad nga “binhi”

Noe

Sem

Abraham

Isaac

Jacob

David

Jesus