Walay-Kataposang Kalipay ang Naghulat sa Diyosnong mga Maghahatag
“Gihigugma gayod sa Diyos ang kalibotan nga tungod niana iyang gihatag ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing dayon.”—Juan 3:16.
1, 2. (a) Kinsa ang labing dakong Maghahatag, ug unsa ang iyang labing dakong gasa sa katawhan? (b) Sa paghatag sa iyang labing dakong gasa, unsang hiyas ang gipakita sa Diyos?
SI Jehova nga Diyos mao ang labing dakong Maghahatag sa tanan. Mahitungod kaniya, ang Maglalalang sa langit ug sa yuta, nga ang Kristohanong tinun-ang Santiago misulat: “Ang tanang maayo ug hingpit nga gasa nagagikan sa kahitas-an, gikan sa Amahan sa langitnong mga kahayag kang kinsa walay pagkausab sa pagkabalhin sa landong.” (Santiago 1:17) Si Jehova mao usab ang Maghahatag sa labing dakong gasa nga nahatag sukad. Mahitungod sa iyang labing dakong gasa sa katawhan, kini ang ginaingon: “Gihigugma gayod sa Diyos ang kalibotan nga tungod niana iyang gihatag ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing dayon.”—Juan 3:16.
2 Ang misulti niadtong mga pulonga walay lain kondili ang bugtong Anak sa Diyos mismo. Ang usa ka bugtong anak sa usa ka amahan siyempre mao ang makapabili ug mahigugma sa maong amahan ingon nga iyang tuboran sa kinabuhi ug sa tanang maayong butang nga gitagana alang sa iyang kalipayan sa kinabuhi. Apan ang gugma sa Diyos wala ipakita diha lamang sa iyang Anak. Ang pagpaabot sa maong gasa ngadto sa uban niyang mga linalang nagapadayag sa pagpakita sa Diyos sa gugma diha sa usa ka talagsaong sukod. (Itandi ang Roma 5:8-10.) Labi pa kining masabtan dihang atong susihon kon unsa gayoy kahulogan sa pulong “gihatag” niining kontekstoha.
Ang Paggasa sa Diyos “sa Anak nga Iyang Hinigugma”
3. Gawas ‘sa Anak nga iyang hinigugma,’ kinsa pa ang nagapahimulos sa gugma sa langitnong Amahan?
3 Diha sa usa ka wala-ipadayag nga yugto sa panahon, gitagamtam sa Diyos ang personal nga pag-ubanay niining bugtong nga Anak—“ang Anak nga Iyang hinigugma”—sa langitnong gingharian. (Colosas 1:13) Sulod niadtong panahona, midako ang gugma ug pagmahal sa Amahan ug Anak sa usag usa nga walay sama sa paghigugmaay nilang duha. Ang ubang mga linalang nga gibuhat sa Diyos pinaagi sa iyang bugtong Anak gihigugma usab ingong mga sakop sa balaang pamilya ni Jehova. Busa, ang gugma maoy naghari ibabaw sa tibuok pamilya sa Diyos. Tukma ang pagkaingon diha sa balaang Kasulatan nga ang “Diyos gugma.” (1 Juan 4:8) Ang balaang pamilya sa ingon, gilangkoban niadtong gihigugma sa Amahan, si Jehova nga Diyos.
4. Sa unsang paagi ang paghatag sa Diyos sa iyang Anak nalangkit ug labaw pa kay sa kapildihan sa personal nga pag-ubanay, ug alang kang kinsa?
4 Suod kaayo ang relasyon ni Jehova ug sa iyang panganay nga Anak nga ang paghikaw nila sa maong suod nga pag-ubanay maoy dako kaayong kapildihan. (Colosas 1:15) Apan ang ‘paghatag’ niini nga bugtong Anak nagkahulogan ug labaw pa kay sa paghikaw sa Diyos sa iyang kaugalingon sa personal nga pag-ubanay uban ‘sa Anak nga iyang hinigugma.’ Kini miabot pa gani sa sukod sa pagtugot ni Jehova sa iyang Anak nga makaagom ug kamatayon ug busa temporaryo nga nawala sa paglungtad ingong usa ka sakop sa unibersohanong pamilya sa Diyos. Kadto maoy usa ka kamatayon alang niadtong wala gayod mahimong mga sakop sa panimalay sa Diyos. Wala nay labaw pa nga gasa ang mahatag ni Jehova nga Diyos alang sa nagkinahanglang katawhan kay sa iyang bugtong Anak, diin siya gipaila usab sa Kasulatan ingon nga mao “ang sinugdanan sa binuhat sa Diyos.”—Pinadayag 3:14.
5. (a) Unsay kahimtang sa mga anak ni Adan, ug unsay gikinahanglan sa hustisya sa Diyos sa bahin sa usa sa Iyang matinumanong mga anak? (b) Unsay gikinahanglan sa labing dakong gasa sa Diyos sa iyang bahin?
5 Ang unang tawhanong magtiayon, si Adan ug Eva, napakyas sa pagpabilin sa ilang dapit ingong sakop sa pamilya sa Diyos. Mao kana ang kahimtang nga ilang gipaagom sa ilang kaugalingon human nga giabog sa tanaman sa Eden tungod sa pagpakasala batok sa Diyos. Dili lamang nga sila dili na sakop sa pamilya sa Diyos kondili sila nailalom usab sa sentensiya sa kamatayon. Busa, ang suliran dili kay sa pagpasig-uli lamang sa ilang mga anak ngadto sa pag-uyon sa Diyos ingong mga sakop sa iyang pamilya kondili sa pagkuha usab gikan kanila sa balaang sentensiya sa kamatayon. Sumala sa paglihok sa balaang hustisya, kini nagkinahanglan nga usa sa matinumanong mga Anak ni Jehova nga Diyos ang moagom ug kamatayon ingong kapuli, o usa ka lukat. Busa, ang dakong pangutana mao: Ang usa nga pilion andam ba nga moagom sa maong pangpuli nga kamatayon alang sa makasasalang katawhan? Dugang pa, ang pagpatungha niini nagkinahanglan ug usa ka milagro sa Labing Makagagahom nga Diyos. Kini nagkinahanglan usab ug usa ka pasundayag sa gugma sa Diyos sa usa ka dili-matumbasang sukod.—Roma 8:32.
6. Sa unsang paagi ang Anak sa Diyos nakaabot sa mga panginahanglan sa kahimtang nga nalangkit ang makasasalang katawhan, ug unsay iyang giingon niining bahina?
6 Ang bugtong Anak ni Jehova nga Diyos lamang ang nakaabot sa linain nga mga panginahanglan sa situwasyon nga nalangkit sa makasasalang katawhan. Siya maoy usa ka larawan sa iyang langitnong Amahan sa pagpakitag pagmahal sa mga sakop sa binuhat sa Diyos nga pamilya nga walay sama kaniya taliwala sa mga anak sa Diyos. Sanglit ang tanang ubang intelehenting mga linalang gibuhat sa Diyos pinaagi kaniya, siyempre ang iyang pagmahal alang kanila dako gayod. Dugang pa, ang gugma mao ang nangibabawng hiyas sa bugtong Anak ni Jehova, si Jesu-Kristo, tungod kay “siya mao ang larawan sa himaya [sa Diyos] ug ang tukmang hulad sa iyang kaugalingon.” (Hebreohanon 1:3) Sa pagpakita sa iyang pagkaandam sa pagpasundayag niini nga gugma sa labing dakong sukod pinaagi sa paghatag sa iyang kinabuhi alang sa makasasalang katawhan, gisultihan ni Jesus ang iyang 12 ka apostol: “Ang Anak sa tawo mianhi, dili aron pagaalagaran, kondili sa pag-alagad ug sa paghatag sa iyang kinabuhi ingon nga lukat alang sa daghan.”—Marcos 10:45; tan-awa usab ang Juan 15:13.
7, 8. (a) Unsay motibo ni Jehova sa pagpadala kang Jesu-Kristo ngadto sa kalibotan sa katawhan? (b) Unsang matanga sa misyon nga gipadala sa Diyos ang iyang bugtong Anak?
7 Si Jehova nga Diyos adunay linain nga katarongan sa pagpadala kang Jesus dinhi ning timawang kalibotan sa katawhan. Ang balaang gugma mao ang nagtukmod niini, kay si Jesus mismo miingon: “Gihigugma gayod sa Diyos ang kalibotan nga tungod niana iyang gihatag ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing dayon. Kay gipadala sa Diyos ang iyang Anak nganhi sa kalibotan, dili aron ang kalibotan iyang pagahukman sa silot, kondili aron ang kalibotan maluwas pinaagi kaniya.”—Juan 3:16, 17.
8 Kadto maoy usa ka misyon sa kaluwasan nga mahigugmaong gipadala ni Jehova ang iyang bugtong Anak. Wala ipadala sa Diyos ang iyang Anak dinhi aron pagahukman ang kalibotan. Kon gipadala pa ang Anak sa Diyos sa misyon sa paghukom, ang palaabuton sa tanang katawhan wala gayod untay paglaom. Ang mabug-at nga hukom nga ipakanaog ni Jesu-Kristo diha sa tawhanong panimalay maoy pagkatinunglo unta sa kamatayon. (Roma 5:12) Busa, pinaagi niining tagsaong pasundayag sa balaang gugma, gitimbangan sa Diyos ang sentensiya nga kamatayon nga maoy gikinahanglan sa bug-os nga hustisya.
9. Unsay gibati ni salmistang David bahin sa pagpanghatag ni Jehova?
9 Diha sa tanang butang, gipakita ug gipasundayag ni Jehova nga Diyos ang gugma ingon nga nangibabaw nga bahin sa iyang kinaiya. Ug tukmang ikaingon nga mahigugmaong nagahatag ang Diyos sa iyang matinumanong mga magsisimba dinhi sa yuta ug daghan kaayong maayong butang. Mao kanay gibati ni salmistang David bahin niining butanga sa dihang siya miingon sa Diyos: “Oh pagkadako sa imong kaayo, nga gitagana mo sa mga magakahadlok kanimo! Nga gihatag mo alang kanila nga nagadangop kanimo, sa atubangan sa mga anak nga lalaki sa tawo.” (Salmo 31:19) Sa panahon sa pagkahari ni David sa ibabaw sa nasod sa Israel—oo, sa tibuok niyang kinabuhi ingong usa ka sakop sa maong nasod nga ilabinang gipili sa Diyos—siya masubsob nga nakasinati sa kaayo ni Jehova. Ug nakita ni David nga kini dagaya kaayo.
Ang Kapildihan sa Israel sa Usa ka Dakong Gasa Gikan sa Diyos
10. Nganong ang karaang Israel dili sama sa ubang nasod sa yuta?
10 Sa pagkabaton kang Jehova ingong iyang Diyos, ang karaang Israel dili sama sa ubang nasod sa yuta. Pinaagi ni propetang Moises ingong tigpataliwala, gidala ni Jehova ang mga kaliwat ni Abraham, Isaac, ug Jacob ngadto sa usa ka relasyon sa pakigtugon uban kaniya. Siya walay gipakiglabotang bisan unsa nga nasod sumala niini nga sumbanan. Busa, ang dinasig nga salmista nakaingon: “Ginapakita niya ang iyang pulong kang Jacob, ang iyang kabalaoran ug ang iyang tulomanon kang Israel. Wala niya buhata ang ingon niini sa bisan unsa nga nasod; ug mahitungod sa iyang hudisyal nga mga desisyon, sila wala mahibalo niana. Dayega ninyo si Jah, kamo nga katawhan!”—Salmo 147:19, 20.
11. Hangtod kanus-a nagpahimulos ang Israel sa iyang pinaboran nga posisyon uban sa Diyos, ug sa unsang paagi gipahayag ni Jesus ang kausaban sa ilang relasyon?
11 Ang nasod sa kinaiyanhong Israel nagpadayon niining pinaboran nga relasyon uban sa Diyos hangtod nga gisalikway niini si Jesu-Kristo ingon nga Mesiyas sa tuig 33 sa atong Komung Panahon. Kadto maoy usa gayod ka makasubong adlaw alang sa Israel sa dihang si Jesus mituaw niini: “Jerusalem, Jerusalem, nga nagapatay sa mga propeta ug nagabato sa mga sinugo nganha kanimo,—sa makadaghan gipangandoy ko ang pagtigom unta sa imong mga anak, maingon sa himungaan nga nagatigom sa iyang mga piso ilalom sa iyang mga pako! Apan nagadumili kamo. Tan-awa! Mabiniyaan sa hingpit ang imong balay.” (Mateo 23:37, 38) Ang mga pulong ni Jesus nagpakita nga ang nasod sa Israel, bisan pa nga gipaboran ni Jehova niadto, napildihan sa usa ka linain nga gasa gikan sa Diyos. Sa unsang paagi?
12. Kinsa ang ‘mga anak sa Jerusalem,’ ug unsa untay kahulogan sa pagtigom ni Jesus kanila?
12 Pinaagi sa paggamit sa terminong “mga anak,” ang gipunting ni Jesus mao lamang ang kinaiyanhon sirkunsadong mga Hudiyo nga nagpuyo sa Jerusalem ug naghawas sa tibuok nasod sa Israel. Aron matigom ni Jesus ang ‘mga anak sa Jerusalem’ kinahanglan nga iyang dad-on ang maong “mga anak” sa usa ka bag-ong pakigtugon uban sa Diyos, uban kaniya nga moalagad ingong Tigpataliwala ni Jehova ug niining kinaiyanhong mga Hudiyo. (Jeremias 31:31-34) Kini mosangpot unta ug kapasayloan sa mga sala, kay mao kana ang sukod sa gugma sa Diyos. (Itandi ang Malakias 1:2.) Usa unta kini ka dako kaayo nga gasa.
13. Ang pagsalikway sa Israel sa Anak sa Diyos misangpot ug unsang kapildihan, apan nganong ang kalipay sa Diyos wala mokunhod?
13 Nahiuyon uban sa iyang matagnaong Pulong, si Jehova naghulat ug igong panahon sa wala ipaabot ngadto sa dili mga Hudiyo ang gasa sa pagkahimong mga mag-aambit sa bag-ong pakigtugon. Apan pinaagi sa pagsalikway sa iyang kaugalingong Anak, ang Mesiyas, ang nasod sa kinaiyanhong Israel napildihan niining dakong gasa. Sa ingon gitimbangan ni Jehova ang pagsalikway sa iyang Anak pinaagi sa pagpaabot niini nga gasa ngadto sa mga tawo nga dili sakop sa Hudiyohanon nga nasod. Nianang paagiha, ang kalipay ni Jehova ingong Dakong Maghahatag nagpadayon nga wala gayod mokunhod.
Ang Kalipay sa Paghatag
14. Nganong si Jesu-Kristo mao ang labing malipayong linalang sa tibuok uniberso?
14 Si Jehova maoy “malipayon nga Diyos.” (1 Timoteo 1:11) Ang paghatag ngadto sa uban maoy usa ka butang nga makalipay kaniya. Ug sa unang siglo K.P., ang iyang bugtong Anak miingon: “Adunay dakong kalipay ang paghatag kay sa pagdawat.” (Buhat 20:35) Nahiuyon niining prinsipyoha, si Jesus nahimong ang labing malipayong linalang sa Maglalalang sa tibuok uniberso. Sa unsang paagi? Aw, sunod kang Jehova nga Diyos mismo, si Jesu-Kristo nakahatag sa labing dakong gasa sa tanan pinaagi sa paghalad sa iyang kinabuhi alang sa kaayohan sa katawhan. Sa pagkatinuod, siya mao ‘ang malipayong Manggagahom.’ (1 Timoteo 6:15) Busa si Jesus maoy panig-ingnan sa iyang gipamulong nga may dako nga kalipay ang paghatag.
15. Bahin sa unsa nga si Jehova dili gayod matapos nga mahimong usa ka panig-ingnan, ug sa unsang paagi ang iyang intelehenting mga linalang makasinati ug usa ka sukod sa iyang kalipay?
15 Pinaagi ni Jesu-Kristo, si Jehova nga Diyos dili gayod mapakyas nga mahimong usa ka mahinatagong Maghahatag sa tanan niyang intelehenting mga linalang ug mao kanunay ang ilang labing maayong panig-ingnan sa paghatag. Sama nga malipay ang Diyos sa paghatag ug maayong mga gasa sa uban, sa ingon iyang gibutangan ug espiritu sa pagkamahinatagon ang mga kasingkasing sa iyang intelehenting mga linalang sa yuta. Nianang paagiha ilang gipabanaag ug gisundog ang iyang kinaiya ug nakasinatig usa ka sukod sa iyang kalipay. (Genesis 1:26; Efeso 5:1) Sa tukma, gisultihan ni Jesus ang iyang mga sumusunod: “Bansaya ang pagpanghatag, ug kamo pagahatagan. Ang takos nga pinaugdo, dinasok ug tinantan, ug magaawas, igabutang ra unya diha sa inyong sabakan. Kay ang takos nga inyong igahatag, mao usab unya ang takos nga inyong pagadawaton.”—Lucas 6:38.
16. Unsa nga pagpanghatag ang gihisgotan ni Jesus diha sa Lucas 6:38?
16 Si Jesus naghatag sa iyang mga tinun-an ug labing maayong sulondan sa paghimo sa pagpanghatag nga usa ka batasan. Siya miingon nga may maayong pagsanong niini nga pagpanghatag sa kabahin sa mga dumadawat. Diha sa Lucas 6:38, si Jesus wala maghisgot sa paghatag lamang ug materyal nga mga gasa. Wala niya sugoa ang iyang mga tinun-an sa pagsubay ug usa ka dalan nga mopahimo kanilang kabos sa materyal. Hinunoa, iyang gitudloan sila ug usa ka dalan nga mohatag kanila ug usa ka espirituwal nga katagbawan.
Walay Kataposang Kalipay Tino
17. Unsang katingalahang mga gasa ang gihatag sa Diyos diha sa iyang mga Saksi niining kataposang mga adlaw?
17 Pagkakatingalahang gasa ang gihatag ni Jehova, ang Ulo sa tanang kalalangan, sa iyang mga Saksi niining kataposang mga adlaw! Kita iyang gihatagan ug maayong balita sa iyang Gingharian. Atong nabatonan ang dakong pribilehiyo sa pagkahimong mga magwawali sa natukod nga Gingharian sa Diyos diha sa mga kamot sa iyang nagamandong Anak, si Jesu-Kristo. (Mateo 24:14; Marcos 13:10) Sanglit gihimong tigpahayag nga mga Saksi sa Labing Hataas nga Diyos maoy usa ka gasa nga dili ikatandi, ug ang labing maayo nga atong mabansay ang pagpanghatag ingong pagsundog sa Diyos mao ang pagpaambit sa balita sa Gingharian ngadto sa uban sa dili pa moabot ang kataposan niining daotang sistema sa mga butang.
18. Ingong mga Saksi ni Jehova, unsay atong ihatag sa uban?
18 Gihisgotan ni apostol Pablo ang mga kalisod nga iyang naagoman sa dihang nagwali sa mensahe sa Gingharian ngadto sa uban. (2 Corinto 11:23-27) Ginaagoman sa modernong-adlaw nga mga Saksi ni Jehova usab ang mga kalisod ug gihiklin ang personal nga mga kagustohan diha sa usa ka paningkamot sa paghatag sa uban sa paglaom sa Gingharian. Tingali dili kaayo kita gustong moduaw sa mga pultahan sa mga tawo, ilabina kon kita maulawon. Apan ingong mga sumusunod ni Kristo, dili kita makalikay, o kaha makahiklin, sa pribilehiyo sa paghatag ug espirituwal nga mga butang sa uban pinaagi sa pagsangyaw sa “maayong balita sa gingharian.” (Mateo 24:14) Kinahanglan magbaton kita ug sama nga tinamdan ni Jesus. Sa dihang nag-atubang ug kamatayon, siya miampo: “Amahan ko, . . . dili sumala sa akong pagbuot, kondili sa imo.” (Mateo 26:39) Kon bahin sa paghatag sa uban sa maayong balita sa Gingharian, kinahanglang buhaton sa mga alagad ni Jehova ang kabubut-on sa Diyos, dili ang ilang kaugalingon nga kabubut-on—ang iyang kagustohan, dili sa kon unsay ilang kagustohan.
19.Kinsa ang mga Maghuhupot sa “dayong mga puloy-anan,” ug sa unsang paagi sila mahimo natong mga higala?
19 Ang maong pagpanghatag nagkinahanglan sa atong panahon ug kahinguhaan, apan pinaagi sa pagkahimong diyosnong mga maghahatag, kita makaseguro nga ang atong kalipay mahimong walay kataposan. Ngano? Tungod kay si Jesus miingon: “Pangita kamog mga higala alang sa inyong kaugalingon pinaagi sa malimbongon nga bahandi [“kalibotanong bahandi,” New International Version], aron nga inigkahurot na niini, kamo ilang pagadawaton ngadto sa dayong mga puloy-anan.” (Lucas 16:9) Maoy atong himoong tumong ang paggamit sa “malimbongon nga bahandi” aron mahimong higala uban sa mga Maghuhupot sa “dayong mga puloy-anan.” Ingon nga Maglalalang, si Jehova mao ang tag-iya sa tanang mga butang, ug ang iyang panganay nga Anak nakaambit sa maong pagkatag-iya ingong Manununod sa tanang butang. (Salmo 50:10-12; Hebreohanon 1:1, 2) Aron ilang mahimong mga higala, kinahanglang atong gamiton ang atong mga bahandi sa usa ka paagi nga mosangpot sa ilang pag-uyon. Kini nag-apil sa pagbaton ug hustong tinamdan sa paggamit sa materyal nga mga butang alang sa kaayohan sa uban. (Itandi ang Mateo 6:3, 4; 2 Corinto 9:7.) Atong magamit ang salapi sa maayong paagi aron mapalig-on ang atong panaghigala uban kang Jehova nga Diyos ug ni Jesu-Kristo. Pananglitan, atong mahimo kini pinaagi sa malipayong paggamit sa atong nabatonan sa pagtabang sa mga tawo nga tinuod nga nanginahanglan ug sa paggamit sa atong kahinguhaan sa pagpalambo sa intereses sa Gingharian sa Diyos.—Proverbio 19:17; Mateo 6:33.
20. (a) Nganong makaagak si Jehova ug si Jesus kanato ngadto sa “dayong mga puloy-anan,” ug hain man kining mga dapita? (b) Unsang pribilehiyo ang atong mabatonan hangtod sa kahangtoran?
20 Tungod sa ilang pagkadili-mamatay, si Jehova nga Diyos ug si Jesu-Kristo mahimong atong mga Higala sa walay kataposan ug moagak kanato ngadto sa “dayong mga puloy-anan.” Malangit man uban sa tanang balaang mga manulonda o dinhi ning yutaa diha sa napasig-uling Paraiso. (Lucas 23:43) Ang mahigugmaong gasa sa Diyos nga si Jesu-Kristo maoy nagpaposible niing tanan. (Juan 3:16) Ug gamiton ni Jehova nga Diyos si Jesus aron padayong makahatag sa tanang kalalangan, alang sa Iyang kaugalingon talagsaong kalipay. Gani, hangtod sa kahangtoran kita makabaton sa pribilehiyo sa paghatag ubos sa unibersohanong pagkasoberano ni Jehova nga Diyos ug sa pagkahari sa iyang bugtong Anak, ang atong Ginoo ug Manluluwas, si Jesu-Kristo. Kini mosangpot ug walay kataposang kalipay alang sa tanang diyosnong mga maghahatag.
Nahinumdom Ka Ba?
◻ Unsay gikinahanglan sa labing dakong gasa sa Diyos sa iyang bahin?
◻ Unsang matanga sa misyon nga gipadala sa Diyos ang iyang Anak?
◻ Kinsa ang labing malipayong linalang sa tibuok uniberso, ug ngano?
◻ Sa unsang paagi ang diyosnong mga maghahatag makasinati ug walay kataposang kalipay?
[Hulagway sa panid 10]
Ikaw ba nagapabili sa paggasa sa Diyos sa iyang Anak ingong usa ka halad lukat?
[Hulagway sa panid 12]
Giuna mo ba pagpangita ang Gingharian sa Diyos pinaagi sa pagsangyaw sa maayong balita ug sa pagsuportar sa buluhaton pinaagi sa imong mga kahinguhaan?