“All Mankind Is One”

Kanang maong ulohan gigamit diha sa usa ka kapitulo sa librong The Discoverers sa pagpahayag sa konklusyon nga naabot sa dihang si Christopher Columbus ug ang uban nakakita nga ang mga netibo sa mga nasod sa Amerika dili mga mangtas ni mga luog nga maoy pagtuo sa mga Uropanhon nga maoy maengkuwentro sa mga eksplorador niadtong panahona. Si Columbus gikutlo nga nagtaho:

“Diha niining mga islaha wala akoy nakitang dili-tawhanong pagkamangtas, sumala sa gidahom sa kadaghanan, sa kasukwahi, taliwala niining mga tawhana tinamod ang maayong pamostura.” Kining “mga Indiyan” maoy “maayog barog, ambongan kaayog mga lawas ug matahom ug mga panagway.” Siya miingon usab:

“Sila prangka kaayo ug mahinatagon sa tanan nilang nabatonan, nga walay makatuo niini nga wala makakita; bahin sa mga butang nga ilang nabatonan, kon pangayoon kini gikan nila, dili gayod sila mobalibad; sa kasukwahi, dapiton ka nila sa pag-ambit niini ug mopakitag dakong gugma ingon nga daw ang ilang mga kasingkasing miuban niini, ug sila tagbaw sa bisan unsang gamayng butang nga ihatag kanila, bililhon man kini o walay bili.”—Panid 626, 628.

Bisag nakurat ang mga Uropanhon sa pagkaplag nga ang pisikal nga katahom ug kalulot ug gugma gipabanaag sa tanang tawo, kini dili unta angay ikahibulong. Kining mga hiyasa nabatonan na sa unang tawo, nga gihimo sa dagway ug sa larawan sa Diyos. Ang nadiskobrehan ni Columbus dugang nagpasiugda lamang sa pagkatinuod ug sa pagkatukma sa asoy sa Bibliya bahin sa paglalang gikan sa usa ka orihinal nga tawo nga kaniya ang tanan migula. (Genesis 1:26-28; 10:32) Sama gayod kini sa gipatin-aw ni apostol Pablo sa 1,400 ka tuig nga milabay sa wala pa makataak si Columbus sa mga nasod sa Amerika: “Gikan sa usa ka tawo iyang gibuhat ang tanang rasa sa katawhan ug gipapuyo sa tanang dapit sa yuta.” Sa pagkamatuod, ang tanang katawhan usa ra.—Buhat 17:6, Today’s English Version.