Mga Amot Nga Makalipay sa Kasingkasing

SA KAHON sa ubos mao ang duha ka naandang sulat sa pagpatunghag salapi nga gipadala sa mga relihiyon sa Kakristiyanohan. Ikaw ba malipay niana? Dili gayod! Bisan pa niana, kinahanglan ang salapi sa daghang paagi karong adlawa sa pagtabang sa pagpasiugda sa pagsimba nga giuyonan sa Diyos. Busa sa unsang paagi mabatonan sa usa ka Kristohanong organisasyon ang gikinahanglang salapi aron mabuhat ang kabubut-on sa Diyos?

Ang usa ka tubag hikaplagan pinaagi sa pagsusi sa mga batasan sa unang-siglong Kristohanong kongregasyon ug sa mga pulong sa Magtutukod niini, si Jesu-Kristo. “Panghatag kamo, ug kamo pagahatagan,” mitambag si Jesus sa Lucas 6:38. “Ilang igabubo sa inyong sabakan ang maayong sukod, dinasok, tinantan ug nagaawas. Kay sa takos nga inyong ginahatag, sila magabalos sa paghatag kaninyo.” Alang sa mga igdulongog sa mamiminaw ni Jesus kaniadto kana daw haom kaayong ilustrasyon. Ang ilang bisteng Sidlakanhon may bulsa sa pagdala o pagtago sa mga butang. Ang pulong “sabakan,” o sa literal “dughan” (Grego, kolʹpos), nagatumong sa lungag nga maporma sa piniloan sa luag nga biste sa ibabaw sa bakos, ug nganha sa maong bulsabulsa ibubo sa mga tindero ang gitakos nga mga pinalit.

Pila ang negosyante ang magdasok una ug dayon magtantan sa mga pinalit aron masulod ang labing daghan ngadto sa lungag sa biste sa usa ka pumapalit, bisan sa punto nga magaawas? Diyutay ra kaayo, kon duna man! Ang mga Kristohanon, hinunoa, pinaagi sa pag-amot nga madagayaon sa mga buhat sa kaluoy ngadto niadtong nagkinahanglan pagabalosan nga madagayaon sa kaluoy. Ang sukod sa atong kaugalingong tinagdan sa uban, kon kaha madagayaon o tinihik, gamiton sa pagsukod sa butang atong anihon ingong balos, dili lamang gikan sa mga tawo, kondili, labi pang bililhon, gikan kang Jehova nga Diyos.​—Itandi ang 2 Corinto 9:6; Galacia 6:7.

Si Jesus, pinaagi sa madagayaong pag-amot sa iyang kaugalingon ug sa iyang mga nabatonan, nakasinati sa pagkatuman niining prinsipyoha. Siya mao ang personipikasyon sa pagkamanggihatagon. Sa madasigon ug sa kawalay-kahakog iyang giwali ang maayong balita sa Gingharian sa Diyos ngadto sa mga kabos. Siya wala magpabayad sa iyang mga pag-alagad ni magdahom nga siya suweldohan. Bisan pa niana siya wala gayod makulangi sa bisan unsa. Ang mga tawo nagsuportar kaniya nga madagayaon, kinabubut-on, diha sa iyang ministeryo.​—Lucas 7:22; 8:1-3.

Ang paghatag ni Jesus nagdasig sa uban​—kang Simon Pedro, Santiago, Juan, ug sa uban pa sa 12​—sa pagpakitag samang pagkamanggihatagon sa pagbiya sa tanang butang aron makig-ambit sa ministeryo. (Lucas 5:10, 11; 9:1-6) Kadtong matanga sa amot nagahatag sa samang mga sangpotanan karong adlawa. Ang mga Saksi ni Jehova nagahatag sa ilang panahon, kusog, ug katigayonan aron ang uban makadungog sa maayong balita sa Gingharian sa Diyos. Sa baylo, samtang ilang ipakita ang pagkamanggihatagon pinaagi sa pagwali, ang uban pa madasig sa pagpahayag sa pagkamanggihatagon pinaagi sa pagpakig-ambit uban kanila sa pagsangyaw sa maayong balita.​—Proverbio 11:25.

Hinuon, may butang pa nga idugang sa atong amot nga pagsangyaw nga makapalipay sa kasingkasing. Ang pag-amot ug salapi uban ang matarong nga motibo ug alang sa matarong nga mga hinungdan maoy bahin usab sa matuod nga pagsimba. (2 Corinto 9:9-14) Giunsa kini pagbuhat sa unang-siglong mga Kristohanon?

Kon Giunsa Pagbuhat Kini sa Unang mga Kristohanon

Sa unang adlaw sa pagkatawo sa Kristohanong kongregasyon sa tuig 33 K.P., ang ‘pagpakig-ambitay sa usag usa, sa pagpangaon, ug sa mga pag-ampo’ gihimo sa 3,000 bag-ong bawtismadong mga kinabig. Tungod sa unsang maayong hinungdan? Aron sila makahimo sa pagpauswag sa ilang bag-ong pagtuo pinaagi sa ‘pagpadayon sa paghalad sa ilang kaugalingon ngadto sa pagtulon-an sa mga apostol.’​—Buhat 2:41, 42.

Ang mga Hudiyo ug mga proselita nangabot sa Jerusalem nga nagplano sa pagpabilin sulod lamang sa panahon sa Piyesta sa Pentekostes. Apan kadtong nahimong mga Kristohanon buot magpabilin ug dugaydugay ug makakat-on sa dugang aron sa paglig-on sa ilang bag-ong pagtuo. Kadto mimugnag emerhensiyang suliran sa pagkaon ug puy-anan. Ang pipila sa mga bisita walay igong salapi nga dala, samtang ang uban may kapin. Busa may temporaryong pagtampohay ug pag-apod-apod sa materyal nga mga butang ngadto sa nagkinahanglan.​—Buhat 2:43-47.

Sa unsang paagi gidumala ang pagpakaon ug pagpapuyo kanila? Ang mga apostol, nga nag-alagad nga nagmandong lawas, naghikay sa pagtigom ug pag-apod-apod sa giamot nga mga butang. Busa, ang unang mga hulagway sa Kristohanong kongregasyon nagapadayag sa mga membro nga wala mag-isip sa ilang materyal nga mga butang ingong ilahang kaugalingon kondili butang pagagamiton sa kaayohan sa tibuok nga kongregasyon. (Buhat 2:44; 4:32) Dugang pa, “ang tanang nagbaton ug mga uma o mga balay nagbaligya kanila ug nagdala sa bili sa mga butang gibaligya ug kana ilang ibutang sa tiilan sa mga apostol. Sa baylo gihimo ang pag-apod-apod ngadto sa matag usa, sumala sa iyang gikinahanglan.”​—Buhat 4:34, 35.

Ang pagbaligya sa propiedad ug ang pag-ambitay sa tanan sa tanang butang maoy kinabubut-on gayod. Walay mausa ang gipugos sa pagbaligya o paghatag, ni kadto usa ka pagpasiugda sa kakabos. Ang ideya nga gipahayag dili kay gibaligya sa datong mga membro ang tanan nilang propiedad ug sa ingon nahimong kabos. Hinunoa, tungod sa kaluoy sa isigkamagtutuo ilalom sa kahimtang niadtong panahona, ilang gibaligya ang propiedad ug giamot ang tanang halin aron sa pagtagana kon unsay gikinahanglan sa pagpauswag sa intereses sa Gingharian.​—Itandi ang 2 Corinto 8:12-15.

Sa susama karong adlawa, ang mga indibiduwal nagpatitulo sa ilang propiedad ngadto sa Watch Tower Society o nagngalan niining organisasyona diha sa ilang mga testamento, sa ingon nagbutang sa katungod sa salapi nganha sa Nagamandong Lawas sa mga Saksi ni Jehova aron gamiton diin labing dako ang panginahanglan sa Gingharian. Kanang tanang paghatag nagabulig sa pagpakaylap sa espirituwal nga kahayag sama ra sa panahon sa Pentekostes. Walay mausa niana ang obligado.

Ang Pagkaregular Mao ang Yawi

Mga 20 ka tuig tapos sa Pentekostes sa 33 K.P., si apostol Pablo nagpahinumdom sa kongregasyon sa Corinto bahin sa panginahanglan sa amot. “Karon mahitungod sa pagtigom nga alang sa mga balaan, sumala sa akong gihatag nga mga sugo ngadto sa mga kongregasyon sa Galacia, buhata usab kana sa inyong kaugalingon,” siya misulat. Dayon siya midugang sa usa ka tambag: “Matag unang adlaw sa semana itugot nga ang matag usa kaninyo diha sa iyang kaugalingong balay may itagana sumala sa iya tingaling pag-uswag, aron inig-abot nako ang pagtigom dili unya himoon. Apan inig-abot ko dinha, si bisan kinsang mga lalaki ang inyong giuyonan pinaagi sa mga sulat, kini sila akong sugoon sa pagdala sa inyong malulutong gasa ngadto sa Jerusalem.” Ang hukom kon pilay ihatag daw nag-apil sa tibuok pamilya, dato o kabos, tungod kay kadto pagahimoon man sa ilang “kaugalingong balay.”​—1 Corinto 16:1-3.

Ang sugyot ni Pablo bahin sa paagi sa pag-amot ikapadapat sa mga membro sa kongregasyon karong adlawa. Sa unsang paagi? Ang pagkaregular mao ang yawi. Kon ang inyong kongregasyon nagabayad ug binulang abang ug mga gastos sa mentenasyon sa inyong tigomanan o sa Kingdom Hall, kinahanglan ang “pag-amot, nga dili kaayo bililhon ang kantidad, kondili ang pagkaregular nga may ipadaplin sa matag semana o bulan alang sa intereses sa Gingharian,” misulat ang sangang buhatan sa Peru. Madanihon ba kanimo kining ideyaha? Bisan ang mga bata matudloan sa pagpabili nga ang pagkaregular sa pag-amot maoy bahin sa ilang pagsimba.

Busa, kon himoon ang mga amot uban ang matarong nga motibo ug tungod sa matarong nga hinungdan, kana nagalipay sa kasingkasing sa Diyos ug sa tawo. Nagaingon ang 2 Corinto 9:7: “Pasagding ang matag usa mobuhat kon unsay gihukom niya sa iyang kasingkasing, nga dili magbagulbol o pinugos, kay ang Diyos nahigugma sa malipayong nagahatag.”

[Kahon sa panid 28]

Mga Paaging Gigamit sa Kakristiyanohan

“Ang Ginoo namulong kanako sa pagsulat kaninyo niining sulata . . . Ako dili mosulat kaninyo sa usa ka sulat nga sama niini alang sa bisan unsa sa kalibotan kon ang Diyos wala pa mamulong kanako sa pagsulat kaninyo niining sulata ug pagsulti kaninyo nga kon ikaw modali sa pagpadalag $20.00 sa pagtabang kanako karon siya manalangin kanimo ingon nga wala ka mapanalangini sukad masukad.”​—Porma nga sulat gikan sa usa ka Canadianong klerigo nga gipirmahan, “Inyong ministro ug Kauban.”

“Buksi kining Balaang Lanang Igdidihog, (ayaw usiki bisan usa ka tulo). Si Jesus ania niining lana sa pagtuo. Pangurus uban niini sa imong agtang, unya tungod sa pagtuo sumulod ka sa kuwarto nga ikaw ra ug kuhaa ang salaping imong nabatonan ug kurusi ang matag papel de bangko aron ayohon sa Diyos ang imong mga suliran sa salapi, ug padaghanon ang imong salapi sama diha sa Lucas 6:38 . . . Kon imong dihogan ang salaping imong nabatonan pinaagi niining balaang lanang igdidihog, dihogi ang matag papel de bangkong anaa nimo. Kurusi ang matag papel de bangko, unya, ang kinadak-ang papel de bangkong anaa nimo, kon kini $20.00, $10.00 o $5.00, kurusi kini sa lanang igdidihog ug ipadala kana ngadto sa buluhaton sa Diyos.”—Porma nga sulat gikan sa usa ka “reverendo” sa Tinipong Bansa nga pinirmahan, “Usa ka Propeta sa Diyos sa 30 anyos na.”

[Kahon sa panid 30]

Ang Paagi sa Pipila sa Pag-amot Ngadto sa Buluhaton sa Gingharian

◆ MGA GASA: Ang mga donasyong salapi ikapadalang direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang buhatan sa Sosyedad. Ikadonar usab ang propiedad. Ang mubong sulat nga nagapahayag nga kana kinabubut-ong donasyon angay magauban sa maong mga amot.

◆ KONDISYONAL NGA KAHIKAYAN SA DONASYON: Ang salapi, stocks, bonds, ug propiedad tingali ikahatag ngadto sa Watch Tower Society nga may probisyon nga engkasog may personal nga panginahanglan, ikahatag sa nagdonar ang abot niana. Kining paagiha nagalikay sa gastos ug mga pagkadili-piho sa pag-establisar sa pagkatinuod sa testamento, samtang nagaseguro nga madawat sa Sosyedad ang propiedad kon mahitabo ang kamatayon.

◆ SEGURO: Ang Watch Tower Society mahimong nganlan ingong benepisyaryo sa usa ka polisa sa seguro sa kinabuhi o life insurance. Ang Sosyedad mahimong himoong trustee sa tinigom nga salapi sa bangko. Sa bisan haing kaso, ang Sosyedad angay pahibaloon.

◆ MGA TESTAMENTO: Ang propiedad o salapi mahimong ipaeredar sa Watch Tower Society pinaagi sa legal hinimong testamento. Ang usa ka kopya angay ipadala ngadto sa Sosyedad.

Ang dugang impormasyon o tambag mahitungod niining mga butanga mabatonan pinaagi sa pagsulat sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang buhatan sa Sosyedad.

[Mga Letrato sa panid 31]

Mga paagi sa pag-apod-apod sa Nagamandong Lawas sa mga Saksi ni Jehova sa inyong mga amot sa pagpauswag sa intereses sa Gingharian sa miaging duha ka tuig:

Pagsuportar sa kapin sa 12,700 misyonaryo ug espesyal payunir

Pagtukod o pagpadako sa 40 ka pasilidad sa sangang buhatan

Pagtabang sa kapin sa 5,000 ka nagapanawng magtatan-aw ug ilang mga asawa

Pagpalit sa walo ka bag-ong kusog kaayong rotary presses

Pagsuportar sa kapin sa 8,400 ka Bethelites

Pagtabang sa mga biktima sa mga katalagman