Hinaot Ilhon ni Jehova nga Maayo ang Imong Rekord

“Hinumdomi . . . ako tungod niini, Oh akong Diyos . . . Hinumdomi ako, Oh akong Diyos, hangtod sa kahangtoran.”​—NEHEMIAS 13:22, 31.

1. Unsay makatabang niadtong dedikado sa Diyos sa paghatag ug maayong rekord kang Jehova?

NABATONAN sa mga alagad ni Jehova ang tanang tabang nga gikinahanglan aron makahimo ug maayong rekord kaniya. Ngano? Tungod kay sila adunay suod nga relasyon sa Diyos ingong bahin sa iyang yutan-ong organisasyon. Iyang gipadayag ang iyang mga katuyoan ngadto kanila, ug siya nakahatag kanila ug tabang ug espirituwal nga pagsabot pinaagi sa iyang balaang espiritu. (Salmo 51:11; 119:105; 1 Corinto 2:10-13) Tungod niining talagsaon nga mga kahimtang, mahigugmaong nanawag si Jehova sa iyang yutan-ong mga alagad sa paghatag kaniya ug rekord sa ilang kaugalingon kon unsa sila ug sa ilang nahimo pinaagi sa iyang kusog ug uban sa tabang sa iyang balaang espiritu.

2. (a) Sa unsang mga paagi si Nehemias nakahatag ug maayong rekord sa iyang kaugalingon ngadto sa Diyos? (b) Unsang pangaliyupo nga gitapos ni Nehemias ang basahon sa Bibliya nga nagdala sa iyang ngalan?

² Ang usa ka tawo nga nakahimog maayong rekord sa kaugalingon ngadto sa Diyos mao si Nehemias, ang tigdalag kopa sa Persianhong Haring Artajerjes (Longimanus). (Nehemias 2:1) Si Nehemias nahimong gobernador sa mga Hudiyo ug nagtukod pag-usab sa kuta sa Jerusalem bisan pa atubangan sa mga kaaway ug mga kapeligrohan. Uban sa kasibot alang sa matuod nga pagsimba, iyang gipatuman ang Kasugoan sa Diyos ug nagpakitag kabalaka sa dinaogdaog. (Nehemias 5:14-19) Giawhag ni Nehemias ang mga Levihanon sa pagputli sa ilang kaugalingon sa regular, sa pagbantay sa mga ganghaan, ug sa pagbalaan sa adlawng Igpapahulay. Busa siya nakaampo: “Hinumdomi, usab, ako tungod niini, Oh akong Diyos, ug kaluy-i ako sumala sa kadagaya sa imong mahigugmaong-kalulot.” Nahiangay, usab, gitapos ni Nehemias ang iyang dinasig-sa-Diyos nga basahon uban sa pangaliyupo: “Hinumdomi ako, Oh akong Diyos, hangtod sa kahangtoran.”​—Nehemias 13:22, 31.

3. (a) Unsaon mo sa paghubit ang usa ka tawo nga nagahimo ug maayo? (b) Ang pagpalandong sa dalan ni Nehemias motukmod kanato sa pagpatugbaw ug unsang mga pangutana?

³ Maligdong ang tawo nga nagabuhat ug maayo ug nagahimog matarong nga mga buhat nga makaayo sa uban. Ingon nianang matanga sa tawo si Nehemias. Siya may matinahurong kahadlok sa Diyos ug dakong kasibot sa matuod nga pagsimba. Dugang pa, mapasalamaton siya sa iyang mga pribilehiyo sa pag-alagad sa Diyos ug may maayong rekord sa iyang kaugalingon kang Jehova. Sa magpalandong sa iyang dalan kita makapangutana sa atong kaugalingon, ‘Sa unsang paagi gilantaw ko ang hinatag-sa-Diyos nga mga pribilehiyo ug mga responsibilidad? Unsang matang sa rekord ang gihatag ko sa akong kaugalingon ngadto kang Jehova nga Diyos ug kang Jesu-Kristo?’

Kahibalo Maghimo Kanatong May-Tulubagon

4. Unsang sugo ang gihatag ni Jesus sa iyang mga sumusunod, ug unsay gihimo niadtong “sa husto nahimutang alang sa kinabuhing walay-kataposan”?

⁴ Si Jesus naghatag sa iyang mga sumusunod niini nga sugo: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila . . . , nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Kinahanglan nga maghimo ug mga tinun-an pinaagi sa pagtudlo kanila. Busa kadtong natudloan ug kinsa “sa husto nahimutang alang sa kinabuhing walay-kataposan” mahimong bawtismohan, sama sa gihimo ni Jesus. (Buhat 13:48; Marcos 1:9-11) Ang ilang tinguha sa pagtuman sa tanang butang nga iyang gisugo magagikan sa kasingkasing. Makaabot sila hangtod sa punto sa pagpahinungod pinaagi sa pagkuha ug pagpadapat sa tukmang kahibalo sa Pulong sa Diyos.​—Juan 17:3.

5, 6. Sa unsang paagi sabton nato ang Santiago 4:17? Iilustrar ang aplikasyon niini.

⁵ Sa mas magkalalom ang atong kahibalo sa Kasulatan, mas malig-on ang pundasyon sa atong pagtuo. Sa samang higayon, ang atong pagkamay-tulubagon sa Diyos mahimong mas dako. Ang Santiago 4:17 nag-ingon: “Kon ang usa mahibalo sa pagbuhat sa kon unsay maayo apan wala magabuhat niini, kini usa ka sala alang kaniya.” Kining pulonga dayag nga maoy paghinapos sa bag-o pa nga gipamulong sa tinun-ang si Santiago bahin sa pagpanghambog imbes bug-os nga magasalig sa Diyos. Kon ang usa tawo nahibalo nga siya walay mahimong butang nga malungtaron nga walay tabang ni Jehova apan dili molihok sumala niana, kini usa ka sala. Apan ang mga pulong ni Santiago ikapadapat usab sa mga sala sa pagkapakyas sa pagbuhat. Diha sa sambingay ni Jesus sa mga karnero ug sa mga kanding, pananglitan, ang mga kanding gihukman, dili tungod sa daotang mga buhat, kondili sa kapakyasan sa pagtabang sa mga igsoon ni Kristo.​—Mateo 25:41-46.

⁶ Usa ka tawo nga gidumalahan sa mga Saksi ni Jehova ug pagtuon sa Bibliya wala mouswag sa espirituwal, tingali tungod kay siya wala mohunong sa pagpanabako, bisan pag siya nahibalo nga kinahanglang mohunong siya. Gihangyo siya sa usa ka ansiyano sa pagbasa sa Santiago 4:17. Human mikomento bahin sa kahulogan niini nga teksto, ang ansiyano miingon: “Bisag wala ka pay bawtismo, ikaw may-tulubagon ug kinahanglang modawat sa bug-os nga responsibilidad sa imong desisyon.” Makapalipay, ang tawo misanong, mihunong sa pagpanabako, ug wala madugay nahimong kuwalipikado sa bawtismo agig simbolo sa iyang pagpahinungod kang Jehova nga Diyos.

May-Tulubagon sa Atong Ministeryo

7. Unsa ang usa ka paagi sa pagpakita sa atong pasalamat alang sa “mismong kahibalo sa Diyos”?

⁷ Ang atong kinasingkasing nga tinguha angay nga mao ang pagpahimuot sa atong Maglalalang. Usa ka paagi sa pagpakita sa atong pagpasalamat sa “mismong kahibalo sa Diyos” mao ang pagtuman sa sugo sa paghimog mga tinun-an sa iyang Anak, si Jesu-Kristo. Kini maoy usa usab ka paagi sa pagpakita sa atong gugma sa Diyos ug sa atong silingan. (Proverbio 2:1-5; Mateo 22:35-40) Oo, ang atong kahibalo sa Diyos naghimo kanato nga may-tulubagon kaniya, ug kinahanglang atong isipon ang atong isigkatawo ingong posibleng mahimong mga tinun-an.

8. Nganong makaingon kita nga gibati ni Pablo nga manubag siya sa Diyos sa iyang ministeryo?

⁸ Si apostol Pablo nahibalo nga ang bug-os kasingkasing nga pagdawat ug pagsugot sa maayong balita mosangpot ug kaluwasan, samtang ang pagsalikway niana mohatag ug kalaglagan. (2 Tesalonica 1:6-8) Busa siya mibati nga may-tulubagon kang Jehova sa iyang ministeryo. Sa pagkamatuod, si Pablo ug ang iyang mga kauban nagpabili pag-ayo sa ilang ministeryo nga tungod niana naglikay pa sila sa paghatag ug impresyon nga sila may nakuhang pinansiyal nga ganansiya gikan niana. Dugang pa, ang kasingkasing ni Pablo nagtukmod kaniya sa pag-ingon: “Kon, karon, akong ginapahayag ang maayong balita, dili kini katarongan alang kanako nga manghambog, kay ang panginahanglan gikapatong ibabaw kanako. Sa pagkatinuod, alaot ako kon wala ko ipahayag ang maayong balita!”​—1 Corinto 9:11-16.

9. Unsang dakong utang ang kinahanglang pagabayran sa tanang Kristohanon?

⁹ Sanglit kita maoy dedikadong mga alagad ni Jehova, ang ‘panginahanglan gikapatong ibabaw kanato sa pagpahayag sa maayong balita.’ Atong katungdanan ang pagsangyaw sa mensahe sa Gingharian. Atong gidawat kana nga responsibilidad sa dihang atong gipahinungod ang atong kaugalingon ngadto sa Diyos. (Itandi ang Lucas 9:23, 24.) Dugang pa, kita adunay utang nga pagabayran. Si Pablo nag-ingon: “Ngadto sa mga Griego ug mga Barbaro, sa mga maalamon ug sa mga walay-salabotan ako utangan: busa adunay kaikag sa akong bahin nga ipahayag ang maayong balita usab kaninyo diha sa Roma.” (Roma 1:14, 15) Si Pablo utangan tungod kay siya nahibalo nga iyang katungdanan ang pagsangyaw aron ang mga tawo makabati sa maayong balita ug maluwas. (1 Timoteo 1:12-16; 2:3, 4) Busa siya naghago aron sa pagtuman sa gisugo kaniya ug sa pagbayad sa iyang utang ngadto sa isigkatawo. Ingong mga Kristohanon, kita usab adunay ingon niana nga utang nga pagabayran. Ang pagsangyaw sa Gingharian usab maoy pangunang paagi sa pagpasundayag sa gugma alang sa Diyos, sa iyang Anak, ug sa atong mga silingan.​—Lucas 10:25-28.

10. Pinaagi sa pagbuhat ug unsa nga gipadako sa uban ang ilang ministeryo?

¹⁰ Ang usa ka paagi aron makabaton ug maayong rekord sa Diyos mao ang paggamit sa atong mga katakos sa pagpadako sa atong ministeryo. Sa pag-ilustrar: Sa katuigang dili pa dugay dihay nagpanon nga mga tawo sa daghang nasodnong mga grupo ngadto sa Britanya. Aron maabot ang maong mga tawo sa maayong balita, kapin sa 800 ka payunir (bug-os-panahong mga magsasangyaw sa Gingharian) ug ginatos pang ubang mga Saksi ang nagtuon ug lainlaing mga pinulongan. Kini miresulta ug maayong pagdasig sa ministeryo. Miingon ang usa ka payunir nga nagtudlo sa usa ka klase nga Ininsek: “Wala gayod ako magtuo nga makatudlo ako sa akong pinulongan ngadto sa ubang mga Saksi, aron sila makapakigbahin sa kamatuoran sa uban niining paagiha. Pagkamakapatagbaw kaayo kini!” Makapadako ka ba sa imong ministeryo sa samang paagi?

11. Unsay miresulta sa dihang usa ka Kristohanon nagpamatuod sa impormal nga paagi?

¹¹ Malagmit, buhaton sa matag usa kanato ang atong maarangan sa pagluwas sa usa ka tawong hapit nang malumos. Ang mga alagad ni Jehova sama ka maikagon sa paggamit sa ilang mga katakos sa pagpamatuod sa matag higayon. Usa ka Saksi dili pa dugay nakatapad ug usa ka babaye diha sa bus ug nakigsulti kaniya bahin sa Kasulatan. Nalipay sa iyang nadunggan, ang babaye nagpatugbaw ug daghang pangutana. Sa hapit nang manaog ang Saksi sa bus, gihangyo siya sa babaye sa pag-uban hinuon kaniya ngadto sa iyang balay, kay daghan pa siya ug mga pangutana. Ang Saksi misugot. Ang resulta? Nasugdan ang usa ka pagtuon sa Bibliya, ug sa milabay ang unom ka bulan ang babaye nahimong usa ka dili-bawtismadong magmamantala sa Gingharian. Wala magdugay siya nagdumala ug unom ka pagtuon sa Bibliya sa balay sa iyang kaugalingon. Pagkamakapalipay nga ganti sa paggamit sa katakos sa usa diha sa pag-alagad sa Gingharian!

12.Sa unsang paagi ang atong mga katakos ingong mga ministro epektibong magamit diha sa pag-alagad sa kanataran?

¹² Ang atong mga katakos ingong mga ministro epektibong magamit sa kanataran pinaagi sa paggamit sa mga publikasyon nga sama sa 192-panid nga librong Kahibalo nga Motultol sa Kinabuhing Walay Kataposan. Sa pagka-Abril 1996, giaprobahan sa Writing Committee sa Nagamandong Lawas sa mga Saksi ni Jehova ang pagpatik sa librong Kahibalo sa kapin sa 140 ka pinulongan, ug sa maong panahon 30,500,000 ka kopya niini ang napatik na sa 111 ka pinulongan. Kining libroha gisulat nga ang tumong mao ang pagtabang sa mga estudyante sa Bibliya nga makakat-on ug igo bahin sa Pulong ug sa mga katuyoan sa Diyos aron magpahinungod kang Jehova ug magpabawtismo. Sanglit dili dumalahan sa mga magmamantala sa Gingharian ug pagtuon sa Bibliya ang mao gihapong estudyante sa daghang tuig, sila makadumala ug mga pagtuon sa daghan pang tawo o makapadako sa ilang pagpakigbahin sa balay-ug-balay nga buluhaton ug sa ubang mga matang sa ministeryo. (Buhat 5:42; 20:20, 21) Nahibalo sa ilang tulubagon sa Diyos, ilang ginahatagan ug pagtagad ang mga pasidaan sa Diyos. (Ezequiel 33:7-9) Apan ang ilang pangunang katuyoan mao ang pagpasidungog kang Jehova ug sa pagtabang ug daghan kutob sa maarangan aron makakat-on bahin sa maayong balita sa mubo nga panahong nahibilin alang niining daotang sistema sa mga butang.

Paghimo ug Maayong Rekord Ingong mga Pamilya

13. Nganong ang diyosnong mga pamilya kinahanglang adunay regular pamilyahanong pagtuon sa Bibliya?

¹³ Ang matag indibiduwal ug pamilya nga nagadawat sa matuod nga Kristiyanidad manubag sa Diyos ug busa angay nga ‘mouswag ngadto sa pagkahamtong’ ug mahimong “lig-on diha sa pagtuo.” (Hebreohanon 6:1-3; 1 Pedro 5:8, 9) Pananglitan, kadtong nakatuon na sa librong Kahibalo ug nabawtismohan kinahanglang magpahanas pa sa ilang kahibalo sa Kasulatan pinaagi sa regular nga pagtambong sa mga tigom maingon man sa pagbasa sa Bibliya ug ubang Kristohanong mga publikasyon. Ang diyosnong mga pamilya angay usab nga adunay regular nga pagtuon sa pamilya, tungod kay usa kana ka hinungdanong paagi aron makapabiling ‘magtukaw, magbarog nga malig-on diha sa pagtuo, magpakalalaki, magmakusganon.’ (1 Corinto 16:13) Kon ikaw ang ulo sa panimalay, ikaw ilabina ang manubag sa Diyos sa pagtino nga ang imong pamilya maayong-pagkapakaon sa espirituwal. Sama nga ang sustansiyadong pisikal nga pagkaon makaamot sa maayong panglawas, sa ingon ang dagaya ug regular nga espirituwal nga pagkaon gikinahanglan aron ikaw ug ang imong pamilya magpabiling ‘mahimsog sa pagtuo.’​—Tito 1:13.

14. Unsay miresulta gikan sa pagpamatuod sa natudloan-ug-maayo nga batang babaye nga Israelinhon?

¹⁴ Kon adunay kabataan sa imong panimalay, ilhon sa Diyos nga maayo ang imong rekord tungod sa paghatag kanila ug maayong espirituwal nga instruksiyon. Ang maong pagpanudlo makahatag kanila ug kaayohan, sama nga nakahatag kinig kaayohan sa batang babaye nga Israelinhon nga nabihag sa mga Siryanhon sa mga adlaw sa manalagna sa Diyos nga si Eliseo. Siya nahimong sulugoon sa asawa sa usa ka sanlahong pangulo sa kasundalohan sa Siria, si Naaman. Bisag bata pa siya, iyang gisultihan ang iyang agalong babaye: “Kon ang akong ginoo atua lang unta sa atubangan sa manalagna nga atua sa Samaria! Nan mamaayo unta siya sa iyang sanla.” Tungod sa iyang pagpamatuod, miadto si Naaman sa Israel, sa kataposan misugot sa sugo ni Eliseo sa pagkaligo pito ka beses sa Subang Jordan, ug nahinlo sa sanla. Dugang pa, si Naaman nahimong magsisimba ni Jehova. Pagkadako gayod segurong kalipay ang nahatag niana sa gamayng batang babaye!​—2 Hari 5:1-3, 13-19.

15. Nganong hinungdanon nga hatagan sa mga ginikanan ang ilang mga anak ug maayong espirituwal nga pagbansay? Iilustrar.

¹⁵ Dili sayon ang pagpadako ug mahinadlokon-sa-Diyos nga mga anak niining kalibotan nga mangil-ad ug moral nga nahimutang sa gahom ni Satanas. (1 Juan 5:19) Apan, sukad sa pagkabata ni Timoteo, ang iyang apohang si Loida ug ang iyang inahan, si Eunice, malamposong nagtudlo kaniya sa Kasulatan. (2 Timoteo 1:5; 3:14, 15) Ang pagtuon sa Bibliya uban sa imong mga anak, pagdala kanila sa Kristohanong mga tigom sa regular, ug sa ulahi pagpauban kanila duyog kanimo sa pag-alagad tanan maoy bahin sa sumbanan sa pagbansay diin ikaw may-tulubagon sa Diyos. Usa ka Kristohanong babaye sa Wales, karon kapin na 80 ang edad, nahinumdom nga sa unang mga tuig sa 1920, gipauban siya sa iyang amahan sa dihang gibaktas niya ang 10 kilometros ngadto sa bukid (20 kilometros idabuwelta) sa pagpanagtag ug mga tract sa Bibliya ngadto sa mga taga-baryo sa sunod nga walog. “Niadtong panahona sa pagbaktas nga gisilsil sa akong amahan ang kamatuoran diha sa akong kasingkasing,” siya miingon nga mapasalamaton.

Mga Ansiyano Manubag—Sa Unsang Paagi?

16, 17. (a) Unsang mga pribilehiyo ang gitagamtam sa hamtong sa espirituwal nga mga tigulang nga lalaki sa karaang Israel? (b) Kon itandi sa kahimtang sa karaang Israel, nganong labaw pa ang gikinahanglan sa Kristohanong mga ansiyano karon?

¹⁶ “Ang pagkaubanon maoy purongpurong sa himaya kon kini makaplagan diha sa dalan sa pagkamatarong,” nag-ingon ang tawong maalamon nga si Solomon. (Proverbio 16:31) Apan dili pisikal nga edad lamang ang gikinahanglan sa usa ka tawo alang sa responsibilidad diha sa kongregasyon sa katawhan sa Diyos. Ang hamtong sa espirituwal nga tigulang nga mga lalaki sa karaang Israel nag-alagad ingong mga maghuhukom ug mga opisyal sa pagpahamtang sa hustisya ug pagpatunhay sa kalinaw, maayong kahusay, ug espirituwal nga kahimsog. (Deuteronomio 16:18-20) Bisag tinuod usab kini diha sa Kristohanong kongregasyon, labaw pa ang gikinahanglan sa mga ansiyano samtang nagkahiduol nang matapos kining sistema sa mga butang. Ngano?

¹⁷ Ang mga Israelinhon maoy ‘pinili nga katawhan’ nga giluwas sa Diyos gikan sa karaang Ehipto. Sanglit ilang nadawat ang Kasugoan pinaagi sa ilang tigpataliwala, si Moises, ang ilang mga kaliwatan natawo diha sa usa ka dedikadong nasod ug nahibalo sa mga balaod ni Jehova. (Deuteronomio 7:6, 11) Apan, walay tawo ang nahimugso sa ingon niini nga dedikadong nasod karon, ug pipila lamang ang nagdako diha sa diyosnong mga pamilya nga nahibalo pag-ayo sa kamatuoran sa Kasulatan. Ilabina kadtong mao pay “paglakaw diha sa kamatuoran” nagkinahanglag pagtudlo kon unsaon sa pagkinabuhi sumala sa mga prinsipyo sa Kasulatan. (3 Juan 4) Busa pagkadakong responsibilidad ang napatong diha sa mga abaga sa matinumanong mga ansiyano samtang ilang ‘huptan ang sumbanan sa makapahimsog nga mga pulong’ ug tabangan ang katawhan ni Jehova!​—2 Timoteo 1:13, 14.

18. Unsang matanga sa tabang nga kinahanglang andam ang mga ansiyano sa kongregasyon sa paghatag, ug ngano?

¹⁸ Ang usa ka gamayng bata nga nagtuon sa paglakaw mahimong mapandol ug matumba. Siya mobati nga walay kasegurohan ug nagkinahanglag tabang ug pagsalig sa ginikanan. Ang usa ka tawo nga nagpahinungod kang Jehova samang mapandol o mahulog sa espirituwal. Nakita bisan ni apostol Pablo nga gikinahanglan gayod ang paningkamot sa pagbuhat sa matarong o maayo sa panan-aw sa Diyos. (Roma 7:21-25) Ang mga magbalantay sa panon sa Diyos kinahanglang mohatag ug mahigugmaong tabang sa mga Kristohanon nga nakasala apan tinuod nga mahinulsolon. Sa dihang giduaw sa mga ansiyano ang usa ka dedikadong babaye nga nakahimog dako nga sala, siya miingon sa presensiya sa iyang dedikadong bana: “Nahibalo ako nga palagpoton ninyo ako!” Apan siya mihilak sa dihang gisultihan nga ang mga ansiyano buot mahibalo kon unsang tabang ang gikinahanglan aron mapasig-uli ang pamilya sa espirituwal. Nahibalo nga sila manubag, ang mga ansiyano malipayon sa pagtabang sa usa ka naghinulsol nga isigkamagtutuo.​—Hebreohanon 13:17.

Padayon sa Paghimog Maayong Rekord

19. Sa unsang paagi makapadayon kita sa paghimog maayong rekord sa atong kaugalingon ngadto sa Diyos?

¹⁹ Ang mga ansiyano sa kongregasyon ug ang tanang ubang mga alagad sa Diyos kinahanglang magpadayon sa paghimog maayong rekord mismo ngadto kang Jehova. Posible kini kon kita magmaunongon sa Pulong sa Diyos ug motuman sa iyang kabubut-on. (Proverbio 3:5, 6; Roma 12:1, 2, 9) Kita ilabinang gustong mohimo ug maayo ngadto sa atong isigkamagtutuo. (Galacia 6:10) Apan, ang alanihon dako gihapon, ug ang mga mag-aani nagpabiling diyutay. (Mateo 9:37, 38) Busa buhaton nato ang maayo ngadto sa uban pinaagi sa makugihong pagwali sa mensahe sa Gingharian. Ilhon ni Jehova nga maayo ang atong rekord kon atong tumanon ang atong pagpahinungod, buhaton ang iyang kabubut-on, ug matinumanong magwali sa maayong balita.

20. Unsay atong makat-onan gikan sa pagpalandong sa dalan ni Nehemias?

²⁰ Busa kita magpadayon nga adunay daghang buluhaton alang sa buluhaton sa Ginoo. (1 Corinto 15:58) Ug maayo nga atong palandongon si Nehemias, kinsa nagtukod pag-usab sa kuta sa Jerusalem, nagpatuman sa Kasugoan sa Diyos, ug madasigong nagpasiugda sa matuod nga pagsimba. Siya miampo nga hinumdoman unta siya ni Jehova nga Diyos alang sa maayo nga iyang nahimo. Hinaot nga mapamatud-an ka nga sama ka debotado kang Jehova, ug hinaot nga ilhon niya nga maayo ang imong rekord.

Unsay Imong mga Tubag?

◻ Unsang panig-ingnan ang gipakita ni Nehemias?

◻ Nganong ang kahibalo naghimo kanato nga may-tulubagon sa Diyos?

◻ Sa unsang paagi makahimo kita ug maayong rekord ngadto kang Jehova diha sa atong ministeryo?

◻ Unsay mahimo sa mga pamilya sa paghatag ug maayong rekord ngadto sa Diyos?

◻ Sa unsang paagi ang Kristohanong mga ansiyano manubag?

[Hulagway sa panid 18]

Sama kang Pablo, kita makahimog maayong rekord sa Diyos ingong mga magwawali sa Gingharian

[Hulagway sa panid 19]

Ang imo bang mga anak malig-on sa pagtuo sama sa gamayng batang babaye nga Israelinhon sa panimalay ni Naaman?