“Pabilhi Ninyo ang Maong Matang sa mga Tawo”
“Ilha ninyo ang maong matang sa mga tawo.”—1 CORINTO 16:18.
1. Unsang matanga sa mga tawo ang gipabilhan ilabina ni apostol Pablo, ug unsay gisulat niya mahitungod sa usa nianang Kristohanon?
ANG maong matang sa mga tawo nga gipabilhan ilabina ni apostol Pablo mao kadtong mogugol sa ilang kusog nga walay pag-ukon-ukon alang kang Jehova ug sa ilang mga igsoon. Mahitungod sa usa nianang isigkamagbubuhat, si Pablo misulat: “Ihatag kaniya ang naandang pag-abiabi diha sa Ginoo uban ang bug-os nga kalipay; ug pabilhi ninyo ang maong matang sa mga tawo, kay tungod sa buluhaton sa Ginoo siya nahidangat sa pag-ungaw sa kamatayon, nga nagladlad sa iyang kalag sa kapeligrohan.”—Filipos 2:29, 30.
2. Kinsa ang angay natong hatagag linaing pagtagad, ug ngano?
2 Karong adlawa, sa kapin sa 55,000 ka kongregasyon sa mga Saksi ni Jehva, adunay daghang buotang Kristohanong lalaki nga angay natong pabilhan ilabina tungod sa ilang paghago taliwala sa ilang mga igsoon. Sa pagpakita nga angay natong pabilhan ang maong mga tawo, si Pablo mipahayag: “Nagahangyo kami kaninyo, mga igsoon, sa pagtamod niadtong nagahago sa inyong taliwala ug nagadumala kaninyo diha sa Ginoo ug nagamaymay kaninyo; ug sa paghatag kanila sa labaw sa kasagarang pagtagad diha sa gugma tungod sa ilang buluhaton. Magmakigdation sa usag usa.”—1 Tesalonica 5:12, 13.
3. (a) Unsay motabang nato nga magmakigdaiton sa usag usa? (b) Sa unsang bahin ang mga ansiano angay mohatag ug panig-ingnan?
3 Ang tukmang pagpabili sa tanan natong mga igsoong lalaki ug mga babaye, ug ilabina sa makugihon mga ansiano, pihong usa ka dakong hinungdan sa malinawong pagkinabuhi sulod sa atong mga kongregasyon. Niini, ingon man sa tanang bahin sa Kristohanong pagkinabuhi, ang mga ansiano angay mahimong “mga panig-ingnan sa panon.” (1 Pedro 5:2, 3) Ugaling, bisan tuod tukmang makadahom ang mga ansiano nga pabilhan sa mga igsoon tungod sa ilang paghago, sila angay usab mohatag ug panig-ingnan sa pagpakitag angay nga pagtagad sa usag usa.
“Pagpasidungog sa Usag Usa”
4, 5. (a) Unsay nagapakita nga gipabilhan ni apostol Pablo ang makugihong mga ansiano? (b) Unsay iyang gisulat ngadto sa mga Kristohanon sa Roma, ug nganong ang iyang mga pulong ilabinang mapadapat ngadto sa mga ansiano?
4 Si apostol Pablo mihatag ug maayong panig-ingnan niining bahina. Sumala sa atong nakita sa nag-unang artikulo, gipangita niya ang maayong mga butang diha sa iyang mga igsoong lalaki ug mga babaye. Ug dili lamang niya gidasig ang mga Kristohanon sa paghigugma ug pagtahod sa makugihong mga ansiano kondili gipakita usab niya ang angay nga pagpabili kanila sa iyang kaugalingon. Dayag iyang gipabilhan ang maong matang sa mga tawo.—Itandi ang Filipos 2:19-25, 29; Colosas 4:12, 13; Tito 1:4, 5.
5 Sa iyang sulat ngadto sa mga Kristohanon sa Roma, si Pablo misulat: “Sa inigsoong gugma magmabination sa usag usa. Sa pagpasidungog sa usag usa manguna. Ayaw kamo paglangaylangay. Magmadasigon sa espiritu. Magpaulipon kamo kang Jehova.” (Roma 12:10, 11) Tino, kanang mga pulong mapadapat ilabina sa Kristohanong mga ansiano. Sila, sa tanang Kristohanon, angay manguna sa pagpasidungog sa usag usa.
6. (a) Unsay angay likayan sa mga ansiano sa pagbuhat, ug ngano? (b) Sa unsang paagi ang mga ansiano makapauswag sa pagsalig sa kongregasyon diha sa enterong lawas sa mga ansiano?
6 Ang mga ansiano ilabina magbantay nga dili mopahayag sa matamayong mga pulong mahitungod sa isigkamatatan-aw. Walay usa ka ansiano ang nagbaton sa tanang Kristohanong hiyas sa kinalabwang sukod, kay ang tanan dili hingpit. Ang pipila molabaw sa pila ka hiyas, apan sila mas huyang sa uban. Kon ang mga ansiano dunay inigsoong gugma ug pagkamabination sa usag usa, dili nila tagdon ang mga kahuyangan sa usag usa. Sa ilang pagpakigsulti sa mga igsoon, ipadayag nila ang lig-ong mga hiyas sa ilang isigkaansiano. Pinaagi sa maong pagpanguna sa pagpasidungog sa usag usa, mapauswag nila ang pagsalig sa kongregasyon diha sa lawas sa mga ansiano sa katibuk-an.
Pag-usa sa Pagbuhat Ingon nga Usa ka Lawas
7. Unsay motabang sa mga ansiano sa pagbuhat nga nagkahiusa, ug sa unsang paagi ilang ipakita kini?
7 Tapos sa paghisgot sa “mga gasa sa mga lalaki” nga gihimo ni Kristo alang sa iyang kongregasyon sa yuta uban sa hunahuna nga ipasibo pag-usab ang mga igsoon ug alang sa ministeryal nga buluhaton, si apostol Pablo misulat: “Pinaagi sa gugma managtubo kita sa tanang butang ngadto kaniya nga mao ang ulo, si Kristo.” (Efeso 4:7-15) Ang pag-ila nga si Kristo mao ang aktibong Ulo sa kongregasyon, ug ang mga ansiano kinahanglang magpailalom sa iyang tuong kamot sa pagbulot-an, maoy usa ka butang makapahiusa sulod sa matag lawas sa mga ansiano. (Efeso 1:22; Colosas 1:18; Pinadayag 1:16, 20; 2:1) Ilang tinguhaon ang iyang pagtultol pinaagi sa balaang espiritu, sa mga prinsipyo sa Bibliya, ug sa pagpanguna nga gihatag sa Nagamandong Lawas sa “matinumanon ug maalamong ulipon nga matang.”—Mateo 24:45-47; Buhat 15:2, 28; 16:4, 5.
8. Unsay angay hinumdoman sa tanang ansiano, ug sa unsang paagi ilang ipakita ang pasidungog sa usag usa?
8 Ilhon sa mga ansiano nga si Kristo, pinaagi sa balaang espiritu, makatultol sa kaisipan ni bisan kinsang ansiano sa lawas sa mga ansiano sa pagtagana sa prinsipyo sa Bibliya nga gikinahanglan sa pagsagubang sa bisan unsang kahimtang o sa paghimog importanteng desisyon. (Buhat 15:6-15) Walay usa ka ansiano ang nagbaton sa monopoliya sa espiritu sulod sa lawas. Ipakita sa mga ansiano ang pasidungog sa usag usa pinaagi sa pagpamati pag-ayo kang bisan kinsang membro sa lawas nga magpahayag maylabot sa ulohan sa usa ka prinsipyo sa Bibliya o instruksiyon gikan sa Nagamandogn Lawas.
9. (a) Unsang espirituwal nga mga hiyas ang motabang sa usa ka magtatan-aw sa paglikay nga magharihari sa iyang isigkaansiano? (b) Sa unsang paagi ipakita sa usa ka ansiano nga siya “makataronganon,” ug sa unsang paagi gihatag sa unang-siglong nagamandong lawas ang panig-ingnan niining bahina?
9 Ang Kristohanong pagkamakasaranganon, kaaghop, ug pagkamapaubsanon mopugong ni bisan kinsang ansiano sa pagsulay sa pagharihari sa iyang mga igsoon ug pagpatuman sa iyang hunahuna. (Proverbio 11:2; Colosas 3:12) Ang usa ka Kristohanong magtatan-aw tingali may kusganon kaayo ug sinserong mga hunahuna sa usa ka butang. Apan kon iyang makita nga ang iyang kaubang mga ansiano may Kasulatanhon ug teokratikanhong mga katarongan sa pagpalahi kaniya, siya ‘magagawu ingon nga ubos’ ug magpakita nga siya “makataronganon” pinaagi sa pagpahiuyon ngadto sa hunahuna sa kinabag-an.a (Lucas 9:48; 1 Timoteo 3:3) Iyang sundon ang maayong panig-ingnan nga gihatag sa unang-siglong nagamandong lawas, kinsa, tapos sa Kasulatanhong panaghisgot, ug ilalom sa pagpanguna ni Kristo pinaagi sa balaang espiritu, nahidangat sa “bug-os nga pagkahiusa.”—Buhat 15:25.
10. (a) Unsay nagapamatuod nga ang pagkatudlo sa usa ka lawas sa mga ansiano sa matag kongregasyon maoy kahikayan nga gipasukad sa Bibliya? (b) Sa unsang paagi ang basahong Organisado sa Pagtuman sa Atong Ministeryo nagasaysay sa mga kaayohan niining kahikayana?
10 Ang pagkatudlo sa usa ka lawas sa mga ansiano diha sa matag kongregasyon aron sa pagpanguna gipasukad sa panig-ingnan nga gihatag sa sayong Kristohanong kongregasyon. (Filipos 1:1; 1 Timoteo 4:14; Tito 1:5; itandi ang potnot sa pulong “elders” diha sa Tito 1:5 sa The Jerusalem Bible.) Sa pagsuma sa kaalam niining kahikayana, ang librong Organisado sa Pagtuman sa Atong Ministeryo (panid 37) nagaingon: “Ang pila ka ansiano mahimong labaw ilado sa usa ka hiyas kay sa lain, samtang ang uban sa lawas molabaw sa mga hiyas nga niana mahuyang tingali ang uban. Nan ang epekto mao nga, sa malangkobong pagkasulti, sa katibuk-an, ang lawas mismo makabaton sa tanang maayong hiyas nga kinahanglan aron ipatuman ang tukmang pagdumala sa kongregasyon sa Diyos.”
Pagtinahoray Taliwala sa mga Lawas sa mga Ansiano
11, 12. (a) Nganong ang lawas sa mga ansiano labawg mahimo kay sa kon ang mga membro niini magalihok nga tinagsatagsa? (b) Sa unsang pagai si Kristo Jesus ug si apostol Pablo nakiglabot sa mga lawas sa mga ansiano, ug unsang tambag ang gihatag?
11 Busa, ang usa ka lawas sa ansiano maoy Kasulatanhong hugponh nga ang katibuk-an nagahawas sa labaw pa kay sa kasumahan sa mga bahin niini. Sa diha nga sila magtigom ug mag-ampo alang sa pagtultol ni Jehova pinaagi ni Kristo ug sa balaang espiritu, makahimo silag mga desisyon nga dili unya makab-ot kon sila nagkonsulta sa tinagsatagsa. Sa diha nga magtigom ang mga ansiano, ang ilang nagkadaiyang mga hiyas mag-impluwensiyahay sa usag usa mopatunghag mga resulta nga nagabanaag sa pagtultol ni Kristo sa mga butang.—Itandi ang Mateo 18:19, 20.
12 Nga si Kristo nakiglabot sa mga lawas sa mga ansiano sa ingon gipaila sa mga mensaheng iyang gipadala ngadto sa “pito ka bituon,” o “mga manulonda sa pito ka kongregasyon” sa Asia Minor. (Pinadayag 1:11, 20) Ang nahauna nianang mga mensahea gipadala ngadto sa kongregasyon sa Efeso pinaagi sa ‘manulonda’ niini, o lawas sa dinihogang mga magtatan-aw. Mga 40 ka tuig nga miagi, gipapanaw ni apostol Pablo ang lawas sa mga ansiano sa Efeso ngadto sa Mileto aron makigtagbo sa linain kaniya. Gipahinumdoman niya sila sa pagtagad sa ilang kaugalingon ug sa pag-atiman sa kongregasyon.—Buhat 20:17, 28.
13. Nganong ang mga ansiano angay mohatag ug pagtagad sa espiritu nga ilang ginapakita sulod sa ilang lokal nga lawas sa mga ansiano ug sa ilang tingod nga relasyon uban sa ubang mga lawas sa mga ansiano?
13 Ang mga lawas sa mga ansiano angay maghatag ug linaing pagtagad sa paghupot ug maayon, positibong espiritu sa ilang taliwala ug sulod sa ilang kongregasyon. (Buhat 20:30) Ingon nga ang usa ka Kristohanon magpadayag sa usa ka espiritu, ang mga lawas sa mga ansiano ug ang tibuok nga mga lawas sa mga ansiano ug ang tibuok nga mga kongregasyon makaugmad sa linaing espiritu. (Filipos 4:23; 2 Timoteo 4:22; Filemon 25) Mahitabo usahay nga ang mga ansiano nga nagatahod sa usag usa sulod sa ilang kongregasyon mismo magpadayag ug kakulang sa pakighiusa sa laing lawas sa mga ansiano. Sa mga siyudad diin ang ubay-ubay nga kongregasyon magtigom sa samang tigomanan, usahay maugmad ang usa ka matang sa pagkadili-magkauyon tali sa mga lawas sa mga ansiano mahitungod sa mga eskedyul sa tigom, mga utlanan sa teritoryo, mga instalasyon sa Kingdom Hall, ug uban pa. Ang samang mga prinsipyo sa pagkamakasaranganon, kaaghop, pagkamapaubsanon, ug pagkamakataronganon nga nagagahom sa mga ansiano sa matag lawas angay mogahom ang relasyon tali sa mga lawas sa mga ansiano. Mitambag si apostol Pablo: “Himoa nga ang tanang butang mahitabo nga makapalig-on.”—1 Corinto 14:26.
Tukmang Pagtahod sa mga Nagapanaw nga Magtatan-aw
14. Unsang ubang kategoriya sa mga ansiano ang takos nga pabilhan, ug ngano?
14 Ang laing gipasukad-sa-Bibliya nga kahikayan nga nagalihok taliwala sa mga kongregasyon sa mga Saksi ni Jehova mao ang padduaw niana sa regular sa nagabiyaheng mga ansiano, gitawag sirkito o distritong mga magtatan-aw. (Buhat 15:36; 16:4, 5) Kini sila, nga talagsaon, maoy “mga ansiano nga nagadumala sa maayong paagi.” Kay dili man ubos sa ubang ansiano, sila angay “pagaisipon nga takos sa dobleng kadungganan, ilabina kadtong nagahago sa pagpahayag ug pagpanudlo.”—1 Timoteo 5:17.
15. Unsang tambag ang gihatag ni apostol Juan mahitungod sa nagapanawng mga ebanghelista?
15 Sa iyang ikatulong sulat si apostol Jaun nagsaway kang Diotepres kay wala niya “dawata ang mga igsoon uban ang pagtahod.” (3Ju Bersikulo 10) Ang maong mga igsoon maoy nagpanaw nga mga Kristohanon, nga nanglakaw “alang sa ngalan [ni Jehova].” (3Ju Bersikulo 7) Sila lagmit gipadala ingong mga ebanghelista aron sa pagwali sa maayong balita ug paglig-on sa mga kongregasyon diha sa kalungsoran nga ilang giduaw. Gisugo ni Juan nga ang maong makugihong nagpanaw nga mga magwawali ‘palakton sa paagi nga takos sa Diyos.’ (3Ju Bersikulo 6) Ang apostol midugang: “Busa, kami may katungdanan sa pagdawat nga maabiabihon sa maong mga tawo, aron kami mahimong kaubang mga magbubuhat sa kamatuoran.” (3Ju Bersikulo 8) Sila pagadawaton uban ang pagtahod.
16. Sa unsang paagi ang tanang Kristohanon karong adlawa makasunod sa panig-ingnan ni Gayo sa “matinuohong buluhaton” nga iyang gihimo alang sa unang-siglong mga ebanghelista, ug nganong kini tukma?
16 Sa susama karong adlawa, ang nagapanawng mga magtatan-aw nga gipadala sa Nagamandong Lawas aron sa pagwali sa maayong balita ug pagtabang sa mga kongregasyon angayng dawaton nga maabiabihon ug uban ang pagtahod. Kining mga igsoong lalaki ug ilang mga asawa (kon sila minyo, ingon nga daghan kanila maoy ingon) kinabubut-ong mibiya sa pihong pinuy-anan. Sila nagabiyahe gikan sa usa ka dapit ngadto sa lain, nga kadaghanan nagasalig sa pagkamaabiabihon sa mga igsoon alang sa ilang pagkaon ug katre nga kahigdaan. Kang Gayo, kinsa mahigugmaong nagpasaka sa nagapanawng mga ebanghelista sa unang siglo K.P., si Juan misulat: “Hinigugma, ginabuhat mo ang usa ka matinuohon nga buluhaton sa imong ginabuhat alang sa mga igsoon, ug sa mga langyaw pa.” (3 Juan 5) Sa susama karong adlawa, kadtong nagapanaw ‘alang sa ngalan ni Jehova’ takos nga pabilhan ug pakitaag gugma ug pagtahod.
17. Sa unsang paagi ang mga ansiano sa kongregasyon magapakitag tukmang pagtahod alang sa nagaduawng mga hawas sa Nagamandong Lawas?
17 Ang mga ansiano, ilabina, angay magpakitag tukmang pagtahod niining nagaduaw nga mga hawas sa Nagamandong Lawas. Sila ginapadala ngadto sa mga kongregasyon tungod sa ilang espirituwal nga mga hiyas ug ilang kasinatian, nga kasagarang mas dako kay sa daghang lokal nga ansiano. Ang pila niining nagapanawng mga magtatan-aw tingali batan-on sa edad kay sa pila ka ansiano sa mga kongregasyon nga ilang ginaduaw. Apan kana dili balidong hinungdan sa dili paghatag kanilag tukmang pagtahod. Basin mobati sila nga kinahanglang paigoon ang pagdalidali sa lokal nga mga ansiano sa pagrekomendar sa usa ka igsoon ingong ministeryal nga alagad o ansiano, nga hinumdoman ang pasidaan ni Pablo kang Timoteo. (1 Timoteo 5:22) Bisan tuod ang nagaduaw nga magtatan-aw angay mohatag ug nahiangayng pagtagad sa mga argumentong gipahayag sa lokal nga mga ansiano, ang naulahi angay andam mamati kaniya ug makapahimulos sa iyang dakong kasinatian. Oo, angay nga ilang “pabilhan ang maong matang sa mga tawo.”—Filipos 2:29.
“Ilha ang Maong Matang sa mga Tawo”
18, 19. (a) Sa unsang paagi gipahayag ni Pablo ang iyang pagpabili sa iyang isigkamagbubuhat? (b) Unsang panig-ingnan ang nagapakita nga si Pablo wala maghambin ug kayugot batok sa iyang mga igsoon?
18 Sa iyang unang sulat ngadto sa mga taga-Corinto, si Pablo misulat: “Karon ako nagatambag kaninyo, mga igsoon: kamo nahibalo nga ang panimalay ni Stepanas mao ang unang mga bunga sa Akaya ug sila nangandam sa pag-alagad sa mga balaan. Hinaot kamo magpailalom kanunay sa maong matang sa mga tawo ug sa tanan nga nakigtambayayong ug nagahago. Apan ako nagkalipay tungod sa pagkaanaa ni Stepanas ug Fortunato ug ni Akayko, kay sila ang nagbakwi tungod sa pagkawala nimo dinhi. Kay sila nagpahayahay sa akong espiritu ug sa imoha. Busa ilha ang maong matang sa mga tawo.”—1 Corinto 16:15-18.
19 Pagkamaayo, pagkamahinatagon ang tinamdang nabatonan ni Pablo bahin sa iyang mga igsoon, nga ang pipila kanila dili kaayo ilado. Apan gimahal sila ni Pablo tungod kay sila “nakigtambayayong” ug “naghago” sa ilang paningkamot sa pag-alagad sa mga balaan. Gihatag usab ni Pablo ang hamiling panig-ingnan nga kalimtan ang mga nangagi. Bisan tuod si Juan Marcos nakapahiubos sa iyang buot sa iyang unang misyonaryong panaw, mainitong girekomendar siya ni Pablo sa ulahi ngadto sa kongregasyon sa Colosas. (Buhat 13:13; 15:37, 38; Colosas 4:10) Sa nabilanggo sa Roma, gihangyo ni Pablo nga moanha si Marcos tungod kay, sumala pa niya, “[si Marcos] mapuslanon kanako alang sa pag-alagad.” (2 Timoteo 4:11) Walay paghambin sa kayugot niana!
20. Sa unsang paagi ang mga Kristohanon sa katibuk-an, ug ilabina ang mga ansiano, magpakita nga sila nagapabili sa matinuohong mga magtatan-aw ug nga ilang “gipabilhan ang maong matang sa mga tawo”?
20 Karong adlawa taliwala sa katawhan sa Diyos, adunay daghang mahinalarong mga magtatan-aw si kinsa, sama kang Stepanas, nagaalagad sa ilang mga igsoon. Sa pagkamatuod, sila may mga depekto ug mga kahuyangan. Bisan pa niana, sila “nagatimbayayong” sa “matinumanon ug maalamong ulipon” ug sa Nagamandong Lawas niini, ug “nagahago” sa buluhatong pagwali ug pagtabang sa ilang mga igsoon. Angay kita ‘magpailalom sa atong kaugalingon nianang matanga sa mga tawo,’ nga pabilhan sila tungod sa ilang hiyas, nga dili mangita sa ilang mga kahuyangan. Ang mga ansiano angay manguna sa pagpakitag nahiangay nga pagpabili ug pagtahod sa ilang isigkaansiano. Ang mga ansiano angay makigtambayayong sa usag usa diha sa espiritu sa gugma ug panaghiusa. Ilhon sa tanan ang bili sa maong matinumanong mga igsoon ug “pabilhan ang maong matang sa mga tawo.”—Filipos 2:29.
[Footnote]
a Ang usa ka potnot sa New World Translation Reference Bible nagapailang ang pulong “makataronganon” sa 1 Timoteo 3:3 nagahubad sa usa ka Gregong pulong nga sa literal nagkahulogangn “mapahiuyonon.”
Mga Punto Alang sa Pagsubli
◻ Unsang matang sa mga tawo ang gipabilhan ilabina ni Pablo, ug kinsay takos sa atong linaing pagtagad karong adlawa?
◻ Sa unsang paagi ang mga ansiano angay magpakita nga sila nagapasidungog sa usag usa?
◻ Nganong ang lawas sa mga ansiano labawg mahimo kay sa kon ang mga membro niini magalihok sa tinagsatagsa?
◻ Sa unsang mga bahin nga ipakita sa usa ka lawas sa mga ansiano nga sila nagapasidungog sa laing lawas sa mga ansiano?
◻ Unsang kategoriya sa mga magtatan-aw ang takos nga pabilhan, ug sa unsang paagi ikapakita ang maong angay nga pagtahod?
[Hulagway sa panid 15]
Ang mga ansiano angay magpakitag tukmang pagpabili sa usag usa
[Hulagway sa panid 18]
Ipakit ang gugma ug pagtahod sa nagapanaw nga mga magtatan-aw