Gituman Nila ang Kabubut-on ni Jehova

Usa ka Maalamong Babaye Nagsanta sa Katalagman

USA ka maalamong babaye nga naminyo sa usa ka walay kapuslanan nga tawo​—mao kana ang kahimtang ni Abigail ug Nabal. Si Abigail “masinaboton kaayo ug maanyag ang panagway.” Sa kasukwahi, si Nabal “haras ug daotan ang iyang mga binuhatan.” (1 Samuel 25:3) Ang sugilanon bahin niining dili-maayong pagkaparis nga magtiayon naghimo sa ilang mga ngalan nga dili malimtan diha sa kasaysayan sa Bibliya. Tan-awon nato kon sa unsang paagi.

Usa ka Pabor nga Gibalewala

Maoy sa ika-11ng siglo W.K.P. nga si David gidihogan ingong umaabot nga hari sa Israel, apan inay magmando siya nagkalagiw. Ang nagmandong hari, si Saul, determinado nga patyon siya. Ingong resulta, si David napugos sa pagkinabuhi ingong kagiw. Siya ug ang mga 600 ka kauban ngadtongadto midangop sa kamingawan sa Paran, habagatan sa Juda ug ngadto sa kamingawan sa Sinai.​—1 Samuel 23:13; 25:1.

Samtang didto, nahibalag nila ang mga magbalantay nga gisuholan sa usa ka tawong ginganlag Nabal. Kining adunahang kaliwat ni Caleb may 3,000 ka karnero ug 1,000 ka kanding, ug siya nag-alot sa iyang karnero sa Carmel, usa ka siyudad habagatan sa Hebron ug tingali mga 40 kilometros gikan sa Paran.a Si David ug ang iyang mga tawo mitabang sa mga magbalantay ni Nabal sa pagbantay sa ilang mga panon batok sa mga kawatan nga naglaaglaag latas sa kamingawan.​—1 Samuel 25:14-16.

Sa kasamtangan, ang pag-alot sa mga karnero nagsugod sa Carmel. Kadto maoy masadyang okasyon, susama sa panahon sa pag-ani alang sa mag-uuma. Panahon usab kadto sa bukas nga pagkamanggihatagon, sa dihang ang mga tag-iya ug karnero magganti niadtong nagtrabaho alang kanila. Busa si David dili mapangahason sa dihang nagpadala siya ug napulo ka tawo sa siyudad sa Carmel aron mangayo kang Nabal ug pagkaon ingong bayad sa serbisyo nga ilang nahimo alang sa iyang mga panon.​—1 Samuel 25:4-9.

Ang sanong ni Nabal maoy pagdinawo gayod. “Kinsa si David?” siya nagbiaybiay. Unya, nga nagpasabot nga si David ug ang iyang mga tawo maoy mga layas lamang nga mga alagad, siya nangutana: “Kinahanglan ko ba diayng kuhaon ang akong tinapay ug ang akong tubig ug ang akong inihaw nga karne nga akong gipatay alang sa akong mga mag-aalot ug ihatag ko ba kini ngadto sa mga tawo nga wala gani ako mahibalo kon diin sila gikan?” Sa dihang nadungog kadto ni David, siya miingon ngadto sa iyang mga tawo: “Panagtakin kamo ang tagsatagsa ka tawo sa iyang espada!” Mga 400 ka tawo ang nag-andam sa ilang kaugalingon alang sa pakiggubat.​—1 Samuel 25:10-13.

Ang Pagkamasinaboton ni Abigail

Ang mabiaybiayong mga pulong ni Nabal nasayran sa iyang asawa, si Abigail. Lagmit dili kini ang unang higayon nga kinahanglan siyang mosalga ug molihok ingong tighusay alang kang Nabal. Bisan unsa pa man, si Abigail milihok dayon. Nga wala magsulti kang Nabal, siya nagkuha ug mga pagkaon​—lakip ang lima ka buok karnero ug daghang pagkaon​—ug miadto aron sa pagsugat kang David didto sa kamingawan.​—1 Samuel 25:18-20.

Sa dihang si Abigail nakakita kang David, miyukbo dayon siya sa iyang atubangan. “Ayaw itugot sa akong ginoo nga magtagad niining walay kapuslanan nga tawo nga si Nabal,” siya nangaliyupo kaniya. “Ug mahitungod niining gasa nga panalangin nga gidala sa imong sulugoon nga babaye sa akong ginoo, ipahatag gayod kini ngadto sa batan-ong mga lalaki nga nagasunod sa akong ginoo.” Siya midugang: “Hinaot kini [kahimtang maylabot kang Nabal] dili mahimong hinungdan sa kasakit o kapangdolan sa kasingkasing sa akong ginoo.” Ang Hebreohanong pulong nga gihubad dinhing “kasakit” nagpasabot ug pagsakit sa konsensiya. Busa si Abigail nagpasidaan kang David batok sa paghimog hinanaling aksiyon nga iyang basolan sa ulahi.​—1 Samuel 25:23-31.

Si David namati kang Abigail. “Bulahan ang imong pagkamaalamon, ug bulahan ikaw nga nagapugong kanako niining adlawa nga makasala sa dugo,” siya miingon kaniya. “Kon wala ka pa magdali aron ikaw mosugat kanako, sa walay duhaduha wala untay mahibilin kang Nabal hangtod sa pagbanagbanag sa kabuntagon bisan kinsa nga mangihi sa paril.”b​—1 Samuel 25:32-34.

Mga Pagtulon-an Alang Kanato

Kining maong asoy sa Bibliya nagpakita nga dili gayod sayop alang sa usa ka diyosnong babaye ang paghimog tukmang inisyatibo kon kana gikinahanglan. Si Abigail milihok nga supak sa kagustohan sa iyang bana, si Nabal, apan ang Bibliya wala magbadlong kaniya gumikan niini. Sa kasukwahi, kini nagdayeg kaniya ingong babaye nga masinaboton ug maalamon. Pinaagi sa paghimog inisyatibo niining malisod nga kahimtang, si Abigail nagluwas sa daghang kinabuhi.

Bisan tuod sa katibuk-an ang asawa angayng magpakita ug espiritu sa diyosnong pagkamapinasakopon, mahimong sa tukma mosupak siya sa iyang bana sa dihang nalangkit ang matarong nga mga prinsipyo. Siyempre, kinahanglang maningkamot siya nga huptan ang usa ka “malinawon ug malumong espiritu” ug dili angayng molihok nga independente tungod lamang sa kayugot, garbo, o pagkarebelyoso. (1 Pedro 3:4) Hinunoa, ang usa ka diyosnong asawa dili angayng mobating napugos sa paghimo sa bisan unsa nga iyang nasayran nga dili gayod maalamon o nasupak sa mga prinsipyo sa Bibliya. Sa pagkatinuod, ang talaan ni Abigail nagtanyag ug lig-ong katarongan batok niadtong moinsistir nga ang Bibliya naghulagway sa mga babaye ingong mga ulipon lamang.

Kining maong talaan nagtudlo usab kanato mahitungod sa pagpugong sa kaugalingon. Usahay, si David bug-os nga nagpasundayag niining maong hiyas. Pananglitan, siya midumili sa pagpatay sa mapanimaslong Haring Saul, bisan tuod siya adunay dakong kahigayonan sa paghimo niana ug ang kamatayon ni Saul magpahinabo untag kalinaw kang David. (1 Samuel 24:2-7) Sa kasukwahi, sa dihang mainsultohon siyang gisalikway ni Nabal, si David nawad-an sa iyang panimbang ug nanumpa nga manimalos. Kini maoy tin-awng pasidaan ngadto sa mga Kristohanon, kinsa naningkamot nga ‘kang bisan kinsa dili mobalos ug daotan sa daotan.’ Sa tanang kahimtang, angay nilang sundon ang tambag ni Pablo: “Kon posible, kutob sa nagaagad kaninyo, magmadaiton sa tanang tawo. Ayaw kamo pagpanimalos, mga hinigugma, apan hatagig dapit ang kapungot.”​—Roma 12:17-19.

[Mga footnote]

[Hulagway sa panid 15]

Si Abigail nagdalag mga gasa ngadto kang David