Usa ka Kadaogan Batok sa Daotan

GANONG kining patay nga iro magtunglo sa akong ginoong hari? Paadtoa ako, palihog, aron sa pagpunggot sa iyang ulo.” Kini nga hangyo naggikan kang Abisai, usa ka Israelinhong pangulo sa kasundalohan. Mao kadto ang iyang masuk-anong sanong sa dihang iyang nadunggan nga ang iyang ginoo, si Haring David, giabusohan sa usa ka Benjaminhon nga ginganlag Simei.​—2 Samuel 16:5-9.

Si Abisai minunot sa pilosopiya nga sagad gisagop karong adlawa​—ang prinsipyo sa pagpanimalos ginamit ang samang mga paagi. Oo, buot ni Abisai nga mag-antos si Simei tungod sa mga insulto nga iyang gihan-ok kang David.

Apan, unsay reaksiyon ni David? Gipugngan ni David si Abisai, nga nag-ingon: “Pasagdi siya.” Bisag inosente sa mga sumbong ni Simei, mapainubsanong gisuklan ni David ang tentasyon sa pagpanimalos. Hinunoa, iyang gitugyan ang butang sa mga kamot ni Jehova.​—2 Samuel 16:10-13.

Sa dihang si David nahibalik sa trono human sa pagkalagiw gikan sa dili-malamposong pag-alsa sa iyang anak, usa sa unang mitimbaya kaniya ug nangayog pasaylo mao si Simei. Buot na usab siyang patyon ni Abisai, apan si David wala gihapon motugot niana.​—2 Samuel 19:15-23.

Niining kahimtanga, si David napamatud-ang haom nga larawan ni Jesu-Kristo, nga bahin kaniya si apostol Pedro misulat: “Sa dihang siya gisultihag pasipala, wala siya mobalos sa pagsultig pasipala . . . kundili nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.”​—1 Pedro 2:23.

Karong adlawa, ang mga Kristohanon gitambagan nga ‘magmapainubsanon sa hunahuna, nga dili magabalos ug kadaot sa kadaot.’ (1 Pedro 3:8, 9) Pinaagi sa pagsunod sa dalan nga gipakita ni David ug ni Jesu-Kristo, kita usab makahimo nga ‘padayong daogon ang daotan pinaagi sa maayo.’​—Roma 12:17-21.