Ang Ipasabot sa mga Balita

Mga Komikero Alang Kang Kristo?

“Mga Komikero sa Ebanghelyo Nagapanaw” mao ang ulohan nga migula sa Church Times, usa ka mantalaan sa Church of England. Nagsibya kadto sa tinuig nga pagduaw sa Church Army Roadshow sa piniling kaligoanan sa dagat sa Inglaterra ug sa Wales. Natukod kapin sa usa ka gatos ka tuig lamang ingong partido sa Church of England, ang buluhaton sa Church Army mao ang pagsangyaw “taliwala sa mga sinalikway ug mga kriminal diha sa mga lugar sa kabos sa Westminster.”

Karong adlawa, ang mga lider sa Church Army nabalaka gihapon nga “angay hatagan ang ebanghelismo ug iyang hustong dapit.” Ang tumong sa ilang Pasundayag mao ang pagwali sa ebanghelyo sa “kinomedyang paagi ngadto sa mga tawo nga wala kaayoy kasinatian bahin sa Diyos, ug walay tinguha sa pagtambong ug serbisyo nga pagahimoon diha sa simbahan.” Naglaom ang “Mga Komikero sa Ebanghelyo” nga nagsul-ob ug mga besti sa komikero diha sa pasundayag sa dalan nga ang “ilang gipahinungod nga pagpakatawa sa labing menos makapahunong sa mga lumalabay ug mamati sa makadiyut,” matud pa sa Church Times.

Apan, bisag ang ilang mga sapot, pagpakatawa, ug libreng mga paburot nakadanig daghang mga bata, ang mga hamtong nahibulong kon unsay kalabotan niining paagiha sa pagsangyaw sa ebanghelyo nga gisugdan ni Jesu-Kristo.

Tinuod, si apostol Pablo misulat: “Kami nangahimo nga talan-awon sa kalibotan ... Kami mga buang tungod kang Kristo.” (1 Corinto 4:9, 10) Apan unsay anaa sa iyang hunahuna? Pagpakatawa ba “paghimog binuang” aron sa pagdani sa mga lumalabay? Dili. Giilustrar ni Pablo nga giisip sa kalibotan ang mga Kristohanon nga mga buang, nga “naladlad sa pagtamay ug pagpakaulaw sa katilingban,” nga maoy pagkapamulong niana sa The New International Dictionary of New Testament Theology, bahin sa ilang pagtuo ug mga pagtulon-an.

Kasukwahi sa “Mga Komikero sa Ebanghelyo,” sa Church Army, gitudloan ni Jesus ang mga tawo “ingon nga may awtoridad.” Ang iyang ministeryo kinasingkasing ug walay binuang. Sama sa iyang gisaysay: “Nagasulti ako sa ingon sumala sa gitudlo kanako sa Amahan.” Unsa ang resulta? “Daghan ang mituo kaniya.”—Mateo 7:29; John 8:28, 30.

“Palas-anon sa Konsensiya”

Si Eugene Stockwell, direktor sa Commission on World Mission and Evangelism sa World Council of Churches, dili pa dugay miadmiter sa salingkapawng papel nga gidula sa mga klero ug sa mga iglesya sa Kakristiyanohan sa panahon sa duha ka gubat sa kalibotan. “Bug-at kaayong palas-anon kini sa konsensiya alang sa mga Kristohanon nga duha ka dagkong mga gubat sa kalibotan ning sigloha ang gibuhian taliwala sa mga nasod nga dugay nang naghupot sa mga tradisyon sa Kristiyanidad sa ilang taliwala ug kansang mga pag-atake sa militar gipanalanginan sa mga lider sa mga iglesya sa Kakristiyanohan,” pahayag pa niya diha sa ekumenikal nga tigom sa Warsaw, Polandiya.

Si Stockwell midugang: “Ang Diyos mabinationg ginapahayag nga anaa sa kiliran sa gubat o sa lain.... Unya kitang mga Kristohanon motuo dayon sa serbisyo sa atong kabangisan.” Siya miingon nga ang Gubat sa Kalibotan II maoy “dakong ebidensiya sa atong kapakyasan ingong ‘Kristohanong nasod’ sa pagkinabuhi sumala sa atong pagtuo, usa ka pagtuo nga masubsob gipasundayag diha sa mga pulong ug tin-aw kaayong gilimod diha sa lihok.”

Apan kini bang “mabug-at nga palas-anon sa konsensiya” nakatabang sa gitawag nga mga Kristohanon ug sa ilang mga klero sa pagkakat-on sa pagtulon-an? Sumala sa Ecumenical Press Service, si Direktor Stockwell midawat: “Naghisgot kita bahin sa paghigugma sa atong mga kaaway, apan atong gipamatay sila. Naghisgot kita sa pagtahan sa atong pikas aping, apan nagsangkap kita ug daghang hinagiban. Naghisgot kita sa pakigdait nga labaw sa tanang pagsabot, apan kita nakigbahin sa gubat nga labaw sa tanang pagsabot. Naghisgot kita sa pagtuo sa Diyos apan nagsalig kita sa mga hinagiban sa kalaglagan.”

Ang nagasuportar sa gubat nga mga klero sa Kakristiyanohan ug ang ilang mga sumusunod sa dayag kaamgid sa “mga tawong tigsultig mga pulong nga walay hinungdan” sa panahon ni apostol Pablo. Mahitungod kanila, siya miingon: “Sila nagapahayag nga sila nanagpakaila sa Diyos, apan ilang gipanghimakak siya pinaagi sa ilang mga binuhatan.”—Tito 1:10, 16.

“Mapasipad-ong” Selyo

Niadtong Nobyembre 19, 1987, ang Postal Administration sa Habagatang Aprika nagplano sa pagpagawas ug upat ka selyo sa paghandom sa Bibliya. Ang usa sa mga selyo dunay mga ekspresyon “Ang Pulong sa Diyos” sa Grego ug “Ang Pulong ni Jehova” sa Hebreohanon. Dihay total nga 1,750,000 ka kopya ang giprinta niining selyoha.

Apan, sa wala pa moabot ang petsa sa pagpagawas niini, ang mga buhatan sa koreyo nakadawat ug telegrama nga nagsugo kanila sa pag-uli sa ilang suplay niining maong mga selyo. Ang katarongan? “Tungod kay nakit-ang mapasipad-on kadto sa ortodoksong Hudiyohanong komunidad,” mitaho ang The Star, usa ka mantalaan sa Johannesburg. Kini midugang: “Si Rabbi David Hazdan sa Johannesburg miingon nga ang tibuok ngalan sa Diyos nga giprinta diha sa selyo sagad gamiton lamang alang sa linaing relihiyosong mga okasyon.”

Tungod sa samang tradisyong Hudiyohanon nga naglikay ang daghang modernong mga maghuhubad sa Bibliya sa paggamit sa ngalang Jehova ug gipulihan kini ug mga titulo lamang, sama sa “Ginoo” o “Diyos.” Dili ikatingala nga miingon si Jesus bahin sa mga lider sa relihiyon sa iyang adlaw: “Inyong gipakawalay bili ang pulong sa Diyos tungod sa inyong tradisyon”!—Mateo 15:6.