Haing Diyos ang Angay Nimong Simbahon?
NAHAUNA, kinsa ang usa ka Diyos nga mao lamang ang angay nga simbahon? Ang Bibliya nagatubag sa prangka kaayong paagi. Ang basahong Pinadayag nagapahayag: “Takos ikaw, Jehova, bisan ang among Diyos, sa pagdawat sa himaya ug dungog ug gahom, kay ikaw mao man ang naglalang sa tanang butang, ug tungod sa imong pagbulot-an milungtad ug nalalang sila.” (Pinadayag 4:11) Oo, si Jehova, ang Maglalalang, mao ang bugtong Diyos nga takos sa atong pagsimba. Ngano? Balikan nato ang maong pangutana sa taudtaod. Apan nahauna, hisgotan nato ang ubang mga diyos nga gisimba sa mga tawo.
Nagpaluyo sa Tanang Bakak nga mga Diyos
Bisan pag ang mga tawo nagaalagad ug daghang diyos, ang kamatuoran mao nga ang tanang pagsimba nga gihatag ngadto sa tanan nga mga diyos diha sa tanan nga nasod—gawas sa pagsimba nga gihatag kang Jehova, ang Maglalalang—nagaalagad sa katuyoan sa usa lang ka diyos. Sa unsang paagi? Basaha ang mga pulong ni apostol Pablo ngadto sa mga Kristohanon sa Corinto. Nianang siyudara daghang diyos ang gisimba, gikan sa mahilayon nga si Aprodita ngadto kang Aesculapius, ang ilang diyos sa panambal. Bisan pa niana, gipakita ni Pablo nga sa pagkamatuod aduna lamay usa ka makahahadlok nga gahom luyo nianang tanan nga mga diyos. Misulat siya: “Ang mga butang ginahalad sa mga nasod ilang ginahalad ngadto sa mga demonyo, ug dili ngadto sa Diyos.” (1 Corinto 10:20) Oo, ang paganong mga taga-Corinto nagsimbag mga demonyo.
Ang mga demonyo nagsugod sa pag-alsa o sa rebelyon. Ang una ug kinalabwan kanila mao ang manulondang linalang nga nagtental kang Eva sa paglapas sa kasugoan sa Diyos didto sa tanaman sa Eden. (Genesis 3:1-6; Juan 8:44) Sa pagbuhat niana, ang maong linalang mirebelde batok sa pagkasoberano sa Maglalalang. Human niadto, siya gitawag Satanas, nga nagkahulogang “Magsusupak.” Sa ulahi, miduyog kaniya sa pag-alsa ang ubang espiritung mga linalang. Sila usab nahimong mga demonyo, ug si Satanas gipaila ingong “ang punoan sa mga demonyo.” (Mateo 12:24, 26) Sa basahong Pinadayag, ang maong mga demonyo gitawag “mga manulonda” ni Satanas. (Pinadayag 12:7) Busa ang pagsimba sa mga demonyo sama ra sa pagsimba kang Satanas.
Si Satanas dako kaayog impluwensiya. Si apostol Juan miingon nga “ang tibuok nga kalibotan” nahiluna sa iyang gahom, ug si Pablo nagtawag kaniya “ang diyos niining sistema sa mga butang.” (1 Juan 5:19; 2 Corinto 4:4) Busa, ang pagsimba sa bisan unsang diyos gawas kang Jehova sa pagkamatuod maoy pagsimba kang Satanas. Labing menos, kini nagaalagad sa mga katuyoan ni Satanas tungod kay ang iyang tumong mao ang pagtental sa mga anak ni Adan ug Eva sa pagrebelde batok kang Jehova. Sanglit si Satanas “nagalimbong sa tibuok gipuy-an nga yuta,” tin-aw nga siya milampos sa kadaghanang mga kaso. (Pinadayag 12:9) Apan dili sa tanan. Aduna pay milyonmilyon nga naningkamot sa pagsimba kang Jehova. Ngano?
Ang mga Bunga sa Sayop nga Pagsimba
Sa usa ka butang, sila nahibalo nga ang pagsimba sa mga diyos gawas kang Jehova dakog bili kay sa buot nilang ibayad. Ang arkeolohikanhong mga pagkutkot sa karaang Cartago sa Amihanang Aprika nagpadayag sa lubnganan sa mga bata. Diha niana mao ang mga kalabera sa mga bata nga gihalad ngadto sa Penisyan nga diyos nga si Baal. Ang paghalad sa bata mao ang ngilngig nga bili nga gibayad sa maong mga taga-Cartago tungod sa pagsimba kang Baal. Ang Katolisismo sa Edad Media nangayo usab ug bayad sa dihang gipahinabo niana ang dili-masukod nga pag-antos diha sa uhaw-sa-dugong mga Krusada ug pintas nga mga Inkisisyon. Ang pagsimba sa Inca nga mga diyos sa una-Columbianhon nga Amerika naglangkit sa rituwal nga pagpatay sa libolibo.
Sa mas bag-ong mga panahon, ang lainlaing mga matang sa pagsimba naglangkit sa pinakyawng pagpamatay sa India, ug sila nakaamot sa grabeng politikanhong mga suliran sa Tungang Sidlakan ug sa Amihanang Irlandiya. Ang kawalay-kabangkaagan, patuotuo, ug kahadlok angay itala usab ingong bahin sa bili nga ibayad sa tawo tungod sa pagsimba sa iyang daghang mga diyos.
Nganong Angay Nimong Simbahon si Jehova nga Diyos?
Sa laing bahin, ang pagsimba kang Jehova magapatunghag mga kaayohan lamang. Sa usa ka butang, siya mao “ang Usa nga buhi hangtod sa kahangtoran, kinsa naglalang sa langit ug sa mga butang nga ania niini ug sa yuta ug sa mga butang nga ania niini ug sa dagat ug sa mga butang nga ania niini.” (Pinadayag 10:6) Busa, angay nga simbahon nato siya kay siya mao ang atong Maglalalang.
Dugang pa, angay nga simbahon nato si Jehova nga Diyos tungod kay ang iyang mga hiyas nagadapit kanato sa pagsimba kaniya. Si apostol Juan miingon nga “ang Diyos maoy gugma.” (1 Juan 4:8) Ang matinumanon nga tawo nga si Job miingon nga “Ang [Diyos] manggialamon sa kasingkasing ug kusgan sa gahom.” (Job 9:4) Si Moises miawit bahin kaniya: “Ang Bato, hingpit ang iyang mga buhat, kay ang tanan niyang dalan maoy hustisya. Usa ka Diyos nga matinumanon, nga kaniya walay inhustisya; matarong ug matul-id siya.” (Deuteronomio 32:4) Kinsay magpanuko sa pag-alagad sa maong Diyos?
Dugang pa, ang Bibliya nagaingon: “Ang diyosnong debosyon mapuslanon alang sa tanang butang, kay kini adunay saad sa kinabuhi karon ug nianang umaabot.” (1 Timoteo 4:8) Pagkamatuod kini! Buot ni Jehova kon unsay maayo alang sa katawhan. Gitagana niya ang yuta ingong matahom nga puy-anan alang sa iyang kalalangan, ug siya mihimog dagayang tagana aron ang kinabuhi mahimong makapahimuot. Bisan pa sa pagrebelde sa tawo, gipadayon ni Jehova ang pagsustento sa kinabuhi ibabaw niining yutaa, nga nagatagana sa tanang materyal nga kinahanglanon sa katawhan kay “siya nagapasubang sa iyang adlaw diha sa mga tawong daotan ug sa mga maayo ug nagapaulan diha sa mga tawong matarong ug mga dili-matarong.”—Mateo 5:45.
Apan ang “saad sa kinabuhi karon” molabaw pa. Ang pag-alagad sa Diyos maoy makapatagbaw ug makapatugob. Kini mao ang gilaraw nga atong pagabuhaton. Ug ang Diyos nagatabang niadtong matinumanong nagaalagad kaniya nga molampos sa kinabuhi. Pinaagi sa Bibliya, siya nagahatag ug giya sa mga tawong tagsaanon, mga magtiayon, mga anak—katawhan sa tanang kahimtang sa kinabuhi. Nagahatag siyag kasaligan, praktikal nga kaalam sa pagtabang diha sa tanang kahimtang aron kita makasolbar sa mga suliran sa kinabuhi ingong dili-hingpit nga mga tawo diha sa kalibotan nga ubos sa impluwensiya ni Satanas. Kon simbahon nato ang Diyos sa paagi nga makapahimuot kaniya, kita makapahimulos sa “kalinaw sa Diyos nga molabaw sa tanang hunahuna.”—Filipos 4:7.
Mamatikdan, usab, mao ang “saad sa kinabuhi . . . nga umaabot.” Giingnan ni Jesus ang Pariseong si Nicodemo: “Gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron ang matag usa nga magtuo kaniya dili unta malaglag kondili makabaton ug kinabuhing walay kataposan.” (Juan 3:16) Kinabuhing walay kataposan! Unsang diyos gawas kang Jehova ang makasaad sa maong butang ug unya makatuman sa iyang saad? Ang pangataposang kondisyon niadtong magadawat nianang dakong gasa gibatbat diha sa Pinadayag: “Pagapahiran sa [Diyos] ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.” (Pinadayag 21:4, 5) Sa pagkamatuod, ang mga kalaoman sa kinabuhi nga umaabot angay maghimo kanato nga buot moalagad kang Jehova!
Nan, haing Diyos ang angay natong simbahon? Si Jehova lamang, ang Maglalalang. Sa tanang mga diyos, kaniya lamang mapadapat ang mga pulong: “Dako ug kahibulongan ang imong mga buhat, Jehova nga Diyos, ang Makagagahom sa Tanan. Matarong ug matuod ang imong mga dalan, Hari sa walay kataposan. Kinsa bay dili mahadlok kanimo, Jehova, ug magahimaya sa imong ngalan, tungod kay ikaw lamang ang maunongon? Kay ang tanang nasod mangabot ug managsimba sa imong atubangan, tungod kay gikapadayag na man ang imong matarong nga mga hukom.” (Pinadayag 15:3, 4) Pagkamaalamon niadtong mosanong sa awhag sa salmista: “Oh umari kamo, simbahon nato ug yukboan siya; managluhod kita sa atubangan ni Jehova nga atong Magbubuhat”!—Salmo 95:6.
[Hulagway sa panid 6]
Pipila sa mga diyos nga nahaylo ni Satanas ang katawhan nga simbahon
[Hulagway sa panid 7]
Ang kalaoman sa kinabuhi nga umaabot angay maghimo kanato nga buot moalagad kang Jehova