SALAMIN

Ang madaladala nga mga salamin (Isa 3:23) niadtong karaang panahon usahay maoy gama sa pinasinaw nga bato, apan sagad kini maoy gama sa metal, sama sa bronse o tumbaga, ug sa ulahi maoy gama sa lata, plata, ug sa bulawan. Lagmit nga sukad lamang sa unang siglo K.P. nga gisugdan paggamit ang mga salamin nga gama sa bildo. Sanglit ang karaang mga salamin sagad ginama man sa tinunawng metal, kini kinahanglang pasinawon pag-ayo aron tin-aw ang aninag niini. Ang pinolbos nga mga bato gikan sa bolkan mahimong gamiton alang niini nga pagpasinaw, nga sa popanahon bagnosan kini ug espongha nga sagad gibitay diha sa salamin mismo. Bisan pa niana, ang karaang metal nga mga salamin dili sama katin-aw ug aninag kay sa bildong mga salamin karong adlawa. Busa si apostol Pablo haom nga makasulat: “Sa pagkakaron kita nagpakakita sa hanap nga dagway pinaagig metal nga salamin.”​—1Co 13:12.

Mahulagwayong Paggamit. Ang Kasulatan usahay maghisgot sa mga salamin sa mahulagwayon o sa masambingayong paagi. Sa Job 37:18 ang kalangitan gipakasama sa metal nga salamin, nga ang sinawng dagway niini mohatag ug hayag nga aninag. Ang tinun-ang si Santiago migamit sa salamin sa paghulagway sa pulong sa Diyos sa dihang nag-awhag sa mga tawo nga mahimong, dili lamang mga tigpaminaw sa pulong, kondili mahimong mga magtutuman niini. (San 1:22-25) Ug gipakita ni apostol Pablo nga ang mga Kristohanon ‘nagsumbalik-silaw samag mga salamin sa himaya ni Jehova’ diha sa ilang ministeryo.​—2Co 3:18; 4:1.