“Tabangi ang Pagtuo Ko nga Nakulangan!”

“Ang amahan sa bata mituwaw nga nag-ingon: ‘May pagtuo ako! Tabangi ang pagtuo ko nga nakulangan!’”—MARCOS 9:24.

1. Unsay nagpahinabo sa usa ka amahan sa pagtuwaw, “Tabangi ang pagtuo ko nga nakulangan”?

ANG amahan sa batang gisudlag-demonyo nagbarog atubangan kang Jesu-Kristo. Pagkadako sa pangandoy sa maong tawo nga mamaayo ang iyang anak! Ang mga tinun-an ni Jesus nakulangan sa igong pagtuo sa pagpagawas sa demonyo, apan ang amahan mituwaw: “May pagtuo ako! Tabangi ang pagtuo ko nga nakulangan!” Pinaagi sa hinatag-sa-Diyos nga gahom, gipagawas dayon ni Jesus ang demonyo, walay duhaduha nakalig-on sa pagtuo sa amahan sa bata.​—Marcos 9:14-29.

2. Bahin sa pagtuo, unsang duha ka paagi nga ang mga Kristohanon dili maulaw?

² Sama sa malaomong amahan sa bata, ang maunongong alagad ni Jehova dili maulaw sa pag-ingon: “May pagtuo ako!” Ang mga tigbiaybiay hayan dili-modawat sa gahom sa Diyos, sa kamatinud-anon sa iyang Pulong, ug bisan sa iyang paglungtad. Apan ang matuod nga mga Kristohanon andam modawat nga sila may pagtuo kang Jehova nga Diyos. Bisan pa, sa dihang makigsulti nga pribado sa ilang langitnong Amahan diha sa pag-ampo, ang mao gihapong mga tawo tingali mangaliyopo: “Tabangi ang pagtuo ko nga nakulangan!” Kini buhaton usab nila nga walay kaulaw, nasayod nga bisan ang mga apostol ni Jesus-Kristo mihangyo: “Dugangi ang among pagtuo.”​—Lucas 17:5.

3. Unsay kahulogan bahin sa paagi sa paggamit ni Juan sa pulong “pagtuo” diha sa iyang Ebanghelyo, ug nganong kini tukma?

³ Ang Kristohanon Gregong Kasulatan ilabinang daghag ikasulti mahitungod sa pagtuo. Ngani, ang Ebanghelyo ni Juan migamit ug Gregong mga pulong nga nalangkit sa “pagtuo” kapin sa 40 porsiento nga mas subsob kay sa ubang tulo ka Ebanghelyo kun usahon. Gipasiugda ni Juan nga ang pagbatog pagtuo dili pa igo; ang pagpadayag niini mao ang hinungdanon. Misulat sa mga 98 K.P., iyang nakita ang makahilong mga gaway sa apostasiya nga nagapangab-ot sa paglaang sa mga Kristohanong huyang sa pagtuo. (Buhat 20:28-30; 2 Pedro 2:1-3; 1 Juan 2:18, 19) Busa hinungdanon ang pagpalihok sa pagtuo, sa paghatag ebidensiya niini pinaagi sa mga buhat sa diyosnong debosyon. Ang malisod nga mga panahon anaa sa unahan.

4. Nganong walay imposible niadtong may pagtuo?

⁴ Ang pagtuo makahimo sa mga Kristohanon sa pag-antos sa bisan unsang mga kalisdanan. Giingnan ni Jesus ang iyang mga tinun-an nga kon sila dunay “pagtuo ingon sa liso sa mustasa,” walay imposible alang kanila. (Mateo 17:20) Sa mao nga paagi, iyang gipasiugda ang gahom sa pagtuo, usa ka bunga sa balaang espiritu. Sa ingon gipasiugda ni Jesus, dili ang mahimo sa tawo, kondili ang mahimo sa espiritu sa Diyos, o ang mahimo sa aktibong puwersa. Dili padakoon niadtong gitultolan niini ang gagmayng mga kakulian ug mga suliran. Ang pagpadapat sa kaalam nga gihatag sa espiritu sa Diyos motabang nila nga huptan ang mga butang diha sa hustong panan-aw. Bisan ang mabug-at nga mga suliran mogaan dihang ipailalom sa nagapalig-ong gahom sa pagtuo.​—Mateo 21:21, 22; Marcos 11:22-24; Lucas 17:5, 6.

Pag-ampo nga ang Pagtuo Unta Dili Mapakyas

5-7. (a) Unsang mga pulong sa pasidaan mahitungod sa pagtuo ang gisulti ni Jesus sa dihang iyang gisugdan ang Memoryal? (b) Sa unsang paagi ang pagtuo ni Pedro nakaarang kaniya sa pagpalig-on sa iyang mga igsoon?

⁵ Sa 33 K.P., gisaulog ni Jesus ang Paskuwa uban sa iyang mga tinun-an sa kataposang higayon. Unya, human gipagawas si Judas Iscariote, iyang gisugdan ang selebrasyon sa Memoryal, nga nagaingon: “Ako mohimog pakigtugon uban kaninyo, maingon nga ang akong Amahan mihimog pakigtugon uban kanako, alang sa usa ka gingharian . . . Simon, Simon, tan-awa! Gipangayo kamo ni Satanas sa pagbaton kaninyo aron iya kamong alig-igon sama sa trigo. Apan nangamuyo ako alang kanimo aron dili maluya ang imong pagtuo; ug sa mahibalik na ikaw, lig-ona ang imong mga igsoon.”​—Lucas 22:28-32.

⁶ Si Jesus miampo nga ang pagtuo ni Simon Pedro dili maluya. Bisag si Pedro sa sobra-kamasaligon nanghambog nga dili gayod niya ilimod si Jesus, wala magdugay human niadto iyang gihimo kini sa tulo ka higayon. (Lucas 22:33, 34, 54-62) Sa pagkamatuod, uban ang gitagna nga pagsamad sa Magbalantay diha sa kamatayon, ang mga karnero nagkatibulaag. (Zacarias 13:7; Marcos 14:27) Hinunoa, sa dihang naulian si Pedro gikan sa iyang pagkahulog sa lit-ag sa kahadlok, iyang gilig-on ang iyang espirituwal nga mga igsoon. Iyang gihisgotan ang mahitungod sa pag-ilis sa di-matinumanong Judas Iscariote. Milihok ingong tigpamaba sa mga apostol sa Pentekostes 33 K.P., gigamit ni Pedro ang una sa “mga yawi” nga gihatag ni Jesus kaniya, nagbukas sa dalan alang sa mga Hudiyo nga mahimong mga membro sa Gingharian. (Mateo 16:19; Buhat 1:15–​2:41) Gipangayo ni Satanas ang mga apostol aron alig-igon sila sama sa trigo, apan gitino sa Diyos nga ang ilang pagtuo dili makawang.

⁷ Handurawa kon unsay gibati ni Pedro sa dihang iyang nadungog si Jesus nga miingon: “Ako nangamuyo alang kanimo nga ang imong pagtuo dili unta maluya.” Hunahunaa lamang! Ang iyang Ginoo ug Agalon miampo nga ang pagtuo ni Pedro dili unta makawang. Ug kini wala makawang, o maluya. Ngani, sa adlaw sa Pentekostes, si Pedro ug ang uban pa nahimong unang mga tawo nga gidihogan pinaagi sa balaang espiritu nga mahimong espirituwal nga mga anak sa Diyos, umaabot nga kaubang-manununod uban ni Kristo sa langitnong himaya. Uban sa balaang espiritu nga niadto nagalihok diha kanila sa sukod nga wala nila hiagii, sila makapasundayag sa mga bunga niini, lakip ang pagtuo, nga wala pa sukad ikapasundayag. Unsa ka kahibulongang tubag sa ilang pangamuyo: “Dugangi ang among pagtuo”!​—Lucas 17:5; Galacia 3:2, 22-26; 5:22, 23.

Pag-atubang sa mga Pagsulay sa Unahan Uban ang Pagtuo

8. Unsang tukma sa panahong pasidaan ang gihatag sa organisasyon kanato mahitungod sa katumanan sa 1 Tesalonica 5:3?

⁸ Ingong katumanan sa tagna sa Bibliya, sa dili madugay atong madunggan ang singgit “Kalinaw ug kasegurohan!” (1 Tesalonica 5:3) Masulayan ba niini ang atong pagtuo? Oo, kay kita mameligro nga dili makabantay sa daw kalamposan sa mga nasod sa pagpatungha sa kalinaw. Apan kita dili makig-ambit sa espiritu sa maong mga tigproklamar sa kalinaw kon atong ibutang sa hunahuna nga si Jehova nga Diyos wala mogamit ug bisan unsang mga ahensiya niining kalibotana aron makab-ot kanang tumonga. Duna siyay kaugalingong paagi sa pagpatunghag matuod nga kalinaw, ug kana pinaagi lamang sa iyang Gingharian ubos ni Jesu-Kristo. Busa, kon unsa may kalamposan sa mga nasod sa pagtukod ug kalinaw, kini kadiyut ra ug sa atubangan lamang. Sa pagtabang kanato nga makabantay niining bahina, “ang matinumanon ug maalamong ulipon” magpadayon sa pagmantala ug tukma sa panahong mga pasidaan aron ang mga alagad ni Jehova makabantay sa umaabot salingkapaw nga proklamasyon sa “Kalinaw ug kasegurohan” sa mga nasod niining daang sistema sa mga butang.​—Mateo 24:45-47.

9. Nganong ang kalaglagan sa Dakong Babilonya nagkinahanglag kadasig ug pagtuo sa atong bahin?

⁹ Ang pagsinggit ug “Kalinaw ug kasegurohan!” mao unyay signal alang sa “kalit nga kalaglagan” nga moabot diha sa Dakong Babilonya, ang imperyo sa kalibotan sa bakak nga relihiyon. (Pinadayag 17:1-6; 18:4, 5) Kini usab magasulay sa Kristohanong pagtuo. Uban sa pagkagun-ob sa bakak nga relihiyon, ang mga Saksi ni Jehova ba magpabiling malig-on sa pagtuo? Siyempre, sila magpabilin. Kining hitaboa​—nga wala dahoma ug di-masabtan sa kadaghanan sa mga tawo​—maoy dili iya sa tawo. Ang katawhan kinahanglang mahibalo nga sa pagkamatuod kini maoy paghukom ni Jehova, sa pagbalaan sa ngalan nga dugay nang gipasipalahan sa bakak nga relihiyon. Apan unsaon pagkasayod sa mga tawo gawas kon dunay mosulti niini ngadto kanila? Ug kinsa gawas sa mga Saksi ni Jehova ang pagadahomon nga maoy mosulti kanila niini?​—Itandi ang Ezekiel 35:14, 15; Roma 10:13-15.

10. Sa unsang paagi ang pag-atake ni Gog sa katawhan ni Jehova usa usab ka pagsulay sa pagtuo?

¹⁰ Ang dinihogang mga Saksi ni Jehova ug ang ilang mga kauban nga may yutan-ong paglaom adunay kaisog nga gikinahanglan sa pagsulti sa uban mahitungod sa nagakaduol nga pagpakanaog sa paghukom ni Jehova batok sa Dakong Babilonya ug sa nahibilin sa sistema sa mga butang ni Satanas. (2 Corinto 4:4) Sa iyang papel ingong Gog sa Magog, nga nagpasabot sa iya karong ubos nga posisyon, andamon ni Satanas ang iyang yutan-ong mga puwersa alang sa usa ka bug-os nga pag-atake sa katawhan sa Diyos. Ang pagtuo sa balaan mapanalipdanong gahom alang sa mga Saksi ni Jehova masulayan. Apan kita makatuo nga sumala sa gitagna sa Pulong sa Diyos, pagaluwason ni Jehova ang iyang katawhan.​—Ezekiel 38:16; 39:18-23.

11, 12. (a) Unsay nakapaseguro sa kaluwasan ni Noe ug sa iyang pamilya panahon sa Lunop? (b) Mahitungod sa unsa nga kita dili mabalaka sa panahon sa dakong kasakitan?

¹¹ Karong adlawa, kita wala gayod masayod kon unsaon ni Jehova sa pagpanalipod sa iyang katawhan sa panahon sa “dakong kasakitan,” apan kini dili katarongan nga magduhaduha nga iyang buhaton kana. (Mateo 24:21, 22) Ang situwasyon sa presenteng-adlaw nga mga alagad sa Diyos mahisama unya nianang kang Noe ug sa iyang pamilya mismo panahon sa Lunop. Nasirhan sulod sa arka uban sa nagliyoliyong mga tubig sa kalaglagan palibot nila, lagmit sila nalisang niini nga pasundayag sa balaang gahom ug dayag kinasingkasing nga nag-ampo. Walay gipakita sa Kasulatan nga sila nabalaka ug nangutana sa ilang kaugalingon: ‘May igo bang kalig-on ang Arka nga makasugakod sa malaglagong mga puwersa? Aduna ba kitay igong pagkaon hangtod matapos ang Lunop? Makalahutay ba kaha kita sa nausab nga mga kahimtang sa yuta human niana?’ Ang misunod nga mga hitabo nagpamatuod nga ang maong mga kabalaka walay pasikaranan.

¹² Aron mapaneguro ang ilang kaluwasan, gikinahanglan ni Noe ug sa iyang pamilya sa pagpadayag ug pagtuo. Kini nagkahulogan sa pagsunod sa mga instruksiyon ug sa mga pagtultol sa balaang espiritu sa Diyos. Sa panahon sa dakong kasakitan, ang pagsunod sa mga pagtultol sa balaang espiritu maoy sama kahinungdanon ug ang pagsugot sa mga instruksiyon ni Jehova pinaagi sa iyang organisasyon. Unya kita walay katarongang mabalaka ug mangutana: ‘Sa unsang paagi matagan-an ang atong espirituwal ug materyal nga panginahanglan? Unsa kahay tagana ang pagahimoon alang sa mga edaran o alang niadtong nagkinahanglag linain medikal nga pag-atiman o pagtambal? Sa unsang paagi himoon ni Jehova nga posible nga kita maluwas ngadto sa bag-ong kalibotan?’ Uban sa malig-ong pagtuo, itugyan sa tanang maunongong mga alagad ni Jehova ang tanang butang diha sa iyang makagahom nga mga kamot.​—Itandi ang Mateo 6:25-33.

13. Sa dihang magsugod na ang dakong kasakitan, nganong nagkinahanglan kita sa pagtuo nga sama kang Abraham?

¹³ Sa dihang mosugod na ang dakong kasakitan, walay duhaduha ang atong pagtuo sa Diyos dugang mapalig-on. Kon hunahunaon, atong makita nga si Jehova magatuman sa iyang gipamulong nga iyang pagabuhaton. Kita makakita unya sa iyang pagpahamtang sa paghukom uban sa atong kaugalingong mga mata! Apan kita ba sa personal may igong pagtuo nga samtang laglagon ni Jehova ang daotan, luwason sa Diyos ang iyang katawhan? Kita ba unya mahisama kang Abraham, kinsa may pagtuo nga ‘ang Maghuhukom sa tibuok nga yuta mobuhat sa matarong,’ dili molaglag sa matarong duyog sa daotan?​—Genesis 18:23, 25.

14. Unsang pangutana ang angay mopasusi kanato sa atong pagtuo ug magkugi sa pagpalig-on niini?

¹⁴ Pagkahinungdanon nga palig-onon nato ang atong pagtuo! Uban sa kataposan niining daotang sistema sa mga butang nga haduol na kaayo, tugotan nato nga ang espiritu sa Diyos mopalihok kanato ngadto “sa balaang mga buhat sa paggawi ug mga buhat sa diyosnong debosyon.” (2 Pedro 3:11-14) Unya dili kita mahasol sa panahon sa dakong kasakitan uban nianang makapatugaw nga mga hunahuna sama niini: ‘Ako ba takos nga modawat sa panalipod ni Jehova? May dako pa ba unta akong mahimo sa iyang pag-alagad? Nagkugi ba gayod ako sa pagsul-ob “sa bag-ong personalidad”? Ako ba ang matang sa tawo nga buot ni Jehova diha sa bag-ong kalibotan’? Ang maong ugdang nga mga pangutana angayng motukmod kanato sa pagsusi sa atong pagtuo ug maningkamot sa pagpalig-on niini karon dayon!​—Colosas 3:8-10.

Pagtuo nga Mopaayo Kanato

15. Unsay isulti usahay ni Jesus ngadto sa mga tawong iyang gipang-ayo, apan nganong kini wala mosuportar sa presenteng-adlaw nga pagpanambal pinaagig pagtuo?

¹⁵ Wala ilimiti ni Jesus ang iyang mga buhat sa pisikal nga pagpang-ayo diha sa mga tawong may pagtuo. (Juan 5:5-9, 13) Busa ang iyang kalihokan wala mosuportar sa dili-kasulatanhong doktrina sa pagpanambal pinaagig pagtuo. Tinuod, sultihan usahay ni Jesus ang tawong iyang gipang-ayo: “Ang imong pagtuo ang nakaayo kanimo.” (Mateo 9:22; Marcos 5:34; 10:52; Lucas 8:48; 17:19; 18:42) Apan sa pag-ingon niini, iyang gipunting sa yano ang dayag nga kamatuoran: Kon kadtong may mga balatian nakulangan sa pagtuo sa katakos ni Jesus sa pagpang-ayo, sila sa unang bahin dili unta moduol kang Jesus sa pagpatambal.

16. Unsang programa sa pagpang-ayo ang gidumala ni Kristo karon?

¹⁶ Karong adlawa, si Jesu-Kristo nagadumala ug usa ka programa sa espirituwal nga pagpang-ayo, ug kapin sa 4,000,000 ka indibiduwal ang anaa sa kahimtang sa pagbatog kaayohan niana. Ingong mga Saksi ni Jehova, ilang gitagamtam ang espirituwal nga kahimsog bisan pa sa tanan nilang pisikal nga mga kaluyahon. Ang dinihogang mga Kristohanon taliwala kanila adunay langitnong paglaom, ug sila ‘padayong nagatutok sa walay kataposang nga butang nga di-makita.’ (2 Corinto 4:16-18; 5:6, 7) Ug ang mga Kristohanon nga may yutan-ong paglaom nagapaabot sa kahibulongang mga buhat sa pisikal nga pagpang-ayo nga mahitabo sa bag-ong kalibotan sa Diyos.

17, 18. Unsang mga tagana ni Jehova ang gihubit sa Pinadayag 22:1, 2, ug nganong ang pagtuo gikinahanglan aron kita makabatog kaayohan gikan niana?

¹⁷ Gihisgotan ni apostol Juan ang mga tagana sa Diyos alang sa walay kataposang kinabuhi niining mga pulonga sa Pinadayag 22:1, 2: “Unya iyang gipakita kanako ang suba sa tubig nga nagahatag sa kinabuhi, nga matin-aw maorag kristal, nga nagagula gikan sa trono sa Diyos ug sa trono sa Kordero. Latas sa tunga sa halapad nga dalan. Ug diha sa masigkadaplin sa suba diha ang kahoy nga nagahatag sa kinabuhi nga may napulo ug duha ka matang sa mga bunga, nga nagapamunga matag bulan. Ug ang mga dahon sa kahoy maoy tambal alang sa pag-ayo sa kanasoran.” Ang “tubig sa kinabuhi” naglakip sa kamatuoran sa Pulong sa Diyos ug sa tanang ubang tagana ni Jehova aron mamaayo ang masinugtanong katawhan gikan sa sala ug kamatayon ug maghatag kanilag walay kataposang kinabuhi pinasukad sa halad lukat ni Jesus. (Efeso 5:26; 1 Juan 2:1, 2) Samtang dinhi sa yuta, ang 144,000 ka dinihogang mga sumusunod ni Jesus moinom sa tagana sa Diyos alang sa kinabuhi pinaagi ni Kristo ug gitawag “dagkong mga kahoy sa pagkamatarong.” (Isaias 61:1-3; Pinadayag 14:1-5) Sila namunga ug daghang espirituwal nga mga bunga sa yuta. Ingong mga binanhaw sa langit, sa panahon sa Usa ka Libo ka Tuig nga Pagmando ni Kristo, sila makigbahin sa pag-apod-apod sa mga tagana sa lukat nga magsilbing “pagpang-ayo sa kanasoran” gikan sa sala ug kamatayon.

¹⁸ Kon mas malig-on ang atong pagtuo niini nga mga tagana sa Diyos, mas dako ang atong pagkaandam sa pagsunod sa mga pagtultol sa iyang espiritu sa pag-ambit niini. Ang pisikal nga kahingpitan dayag nga moabot sama sa tawo nga mituo kang Kristo ug mihimog espirituwal nga pag-uswag. Bisag ang indibiduwal kahibulongang mamaayo gikan sa dagkong mga depekto sa lawas, siya inanayng pagadalhon ngadto sa kahingpitan samtang buhaton niya ang matarong. Siya regular makig-ambit sa tagana sa Diyos sa pagpang-ayo pinaagi sa halad ni Kristo. Busa ang pagtuo moimpluwensiya sa atong pagkaayo ug pagkahingpit diha sa pisikal nga paagi.

“Giluwas Pinaagi sa Pagtuo”

19. Nganong hinungdanon nga magpabiling malig-on sa pagtuo?

¹⁹ Hangtod ang banagbanag sa bag-ong kalibotan sa Diyos sa walay kataposan mopapha sa kangitngit sa presenteng daotang kalibotan, pagkahinungdanon nga ang mga alagad ni Jehova magpabiling malig-on sa pagtuo! Ang mga tawong “walay pagtuo” igatambog ngadto “sa linaw nga kalayo ug asupri,” ang ikaduhang kamatayon. Sa kinaulahian, kini mahitabo human sa kataposang pagsulay sa kataposan sa Usa ka Libo ka Tuig nga Pagmando ni Kristo. (Pinadayag 20:6-10; 21:8) Pagkadako sa panalangin unya ang mosangpot alang niadtong kinsa mopadayon sa pagpadayag ug pagtuo ug makalabang buhi sa pagtagamtam sa walay kataposang umaabot!

20. Sa unsang paagi ang 1 Corinto 13:13 may linaing kahulogan sa kataposan sa Usa ka Libo ka Tuig nga Pagmando ni Kristo?

²⁰ Unya kining mga pulonga ni Pablo sa 1 Corinto 13:13 mohatag linain nga kahulogan: “Ug karon magapabilin kining tulo: pagtuo, paglaom, ug gugma, apan ang labing dako niini mao ang gugma.” Dili na unya kita magkinahanglan pa ug pagtuo nga ang matagnaong saad sa Genesis 3:15 mamatuman o sa paglaom nga kini unya matuman. Kana mahitabo na unya. Ingong maghuhupot sa integridad, kita magpadayon sa paglaom kang Jehova, magpadayag ug pagtuo kaniya ug sa iyang Anak, ug higugmaon sila ingon nga mao ang nagpahinabo sa katumanan niining tagnaa. Dugang pa, ang halalom nga gugma ug kinasingkasing nga pasalamat alang sa atong kaluwasan mobugkos kanato ngadto sa Diyos diha sa dili-mabungkag nga debosyon hangtod sa kahangtoran.​—1 Pedro 1:8, 9.

21. Unsay angay natong buhaton karong adlawa aron “maluwas pinaagi sa pagtuo”?

²¹ Pinaagi sa iyang makitang organisasyon, si Jehova nakahimog kahibulongang mga tagana sa paglig-on sa pagtuo. Bug-os pahimusli ang tanan niini. Sa regular tambong ug pakigbahin sa mga tigom sa katawhan ni Jehova. (Hebreohanon 10:24, 25) Pagtuon nga masiboton sa iyang Pulong ug sa Kristohanong mga publikasyon. Pangamuyo kang Jehova alang sa iyang balaang espiritu. (Lucas 11:13) Sundoga ang pagtuo niadtong mapaubsanong nagapanguna sa kongregasyon. (Hebreohanon 13:7) Sukli ang kalibotanong mga tintasyon. (Mateo 6:9, 13) Oo, ug palaloma ang imong personal nga relasyon uban kang Jehova diha sa tanang paaging mahimo. Labaw sa tanan, padayon sa pagpadayag ug pagtuo. Unya ikaw malakip sa mga tawo nga nagapahimuot kang Jehova ug makabatog kaluwasan, kay si Pablo miingon: “Pinaagi . . . sa dili-takos nga kalulot, sa pagkamatuod, kamo ginaluwas pinaagi sa pagtuo; ug kini dili sa inyong kaugalingong kahimoan, kini maoy gasa sa Diyos.”​—Efeso 2:8.

Unsay Imong mga Tubag?

◻ Unsang mga pagsulay sa pagtuo ang anaa sa unahan kanato?

◻ Diha sa unsang duha ka paagi nga ang atong pagtuo mopaayo kanato?

◻ Sumala sa 1 Pedro 1:9, unsa ka dugay nga kinahanglang atong huptan ang pagtuo?

◻ Unsang mga tagana ang atong nabatonan sa paglig-on sa atong pagtuo?

[Hulagway sa panid 15]

Sama sa amahan kansang anak giayo ni Jesus, gibati ba nimo ang personal nga panginahanglan sa dugang pagtuo?

[Hulagway sa panid 17]

Ang pagtuo sama nianang kang Noe ug sa iyang pamilya kinahanglan aron maluwas sa “dakong kasakitan”