Pagkat-on Gikan sa Nangaging mga Kasaypanan
ANG moral nga balaod sa atong Maglalalang walay kataposan ug dili-mausab. Tungod niini nga katarongan ang prinsipyo nga makita diha sa Galacia 6:7 aplikado karong adlawa: “Bisan unsay ginapugas sa usa ka tawo, kini usab iyang anihon.” Matuod, ang usa ka tawo tingali dili modawat nga may tulubagon sa Diyos, apan ang lagda sa Diyos dili gayod mausab. Sa kataposan, walay tawo ang makalingkawas sa mga resulta sa iyang mga aksiyon.
Unsay ikasulti bahin sa usa ka tawo nga nagkinabuhi sa balikong kinabuhi unya nag-usab, nahimong usa ka alagad sa Diyos? Tingali iya gihapong antoson ang mga resulta sa iyang nangaging paagi sa kinabuhi. Apan, kini wala magpasabot nga wala siya pasayloa sa Diyos. Ang mananapawon nga relasyon ni Haring David uban kang Bath-sheba naghatag ug daghang katalagman sa iyang kinabuhi. Dili siya makalikay niini. Apan siya naghinulsol, ug siya gipasaylo sa Diyos.—2 Samuel 12:13-19; 13:1-31.
Nakabati ka ba sukad ug kalugda sa dihang nag-antos ka sa mga resulta sa kasaypanan nga imong nahimo? Kon lantawon sa hustong paagi, ang pagbatig pagbasol nagsilbing usa ka pahinumdom kanato sa ‘pagbantay nga dili kita moliso ngadto sa butang nga makadaot.’ (Job 36:21) Oo, ang pagbasol makatabang kanatong makalikay sa paghimo pag-usab sa sayop. Labawng hinungdanon, gigamit ni David ang eksperyensiyang nakuha gikan sa sala nga iyang nahimo nga mohatag ug kaayohan dili lamang sa iyang kaugalingon kondili sa uban usab. Siya nag-ingon: “Tudloan ko ang mga malapason sa imong mga dalan, aron ang mga makasasala mobalik nganha kanimo pag-usab.”—Salmo 51:13.
[Mga hulagway sa panid 4, 5]
Si David nakakat-on gikan sa iyang sala uban kang Bath-sheba