Mga Pangutana Gikan sa mga Magbabasa

Sumala sa Galacia 6:8, “siya kinsa nagapugas alang sa iyang unod moani ug pagkadunot gikan sa iyang unod, apan siya kinsa nagapugas alang sa espiritu moani ug kinabuhing walay-kataposan gikan sa espiritu.” Unsang “espiritu” ang gipasabot, ug sa unsang paagi kita sa ingon moani ug kinabuhi?

Ang Hebreohanon ug Gregong mga termino nga gihubad ug “espiritu” adunay nagkadaiyang mga kahulogan, sama sa: (1) aktibong puwersa sa Diyos, (2) puwersa sa kinabuhi diha sa mga tawo ug sa mga hayop, (3) nagatukmod nga puwersa sa hunahuna sa tawo, ug (4) usa ka espirituhanong persona, o manulonda. Ang una niini​—ang aktibong puwersa sa Diyos​—mao ang kahulogan nga atong makita diha sa Galacia 6:8.

Ingong impormasyon, matikdi ang Galacia 3:2, diin atong makita ang unang paggamit sa “espiritu” diha sa basahon sa Galacia. Si Pablo nangutana sa mga Kristohanon: “Gidawat ba ninyo ang espiritu gumikan sa mga buhat sa balaod o gumikan sa pagpaminaw pinaagi sa pagtuo?” Dayon, sa Galacia 3:5, iyang gilangkit kana nga “espiritu” uban sa paghimog gamhanang mga buhat. Busa ang “espiritu” nga gipunting niya mao ang balaang espiritu, ang dili makitang aktibong puwersa sa Diyos.

Sa ulahi, sa Galacia 5:16, gitandi ni Pablo ang espiritu ug ang unod. Atong mabasa: “Ako magaingon, Padayon sa paglakaw pinaagi sa espiritu ug kamo dili gayod makahimo ug unodnong tinguha.” Pinaagi sa paghisgot sa “unodnong tinguha” gipasabot niya ang makasasalang tawhanong unod. Busa, sa Galacia 5:19-23, gilista niya “ang mga buhat sa unod” nga nagtandi “sa bunga sa espiritu.”

Busa, sa Galacia 6:8, ang tawong “nagapugas alang sa iyang unod” mao gayod ang usa nga nagpaagak sa iyang kaugalingon sa makasasalang tawhanong mga pangibog, nga nagpatuyang “sa mga buhat sa unod.” Siya mahimong makasinatig makadunot nga mga epekto sa maong paggawi, ug kon siya dili magbag-o, siya tinong dili makabaton ug kinabuhi sulod o ilalom sa Gingharian sa Diyos.​—1 Corinto 6:9, 10.

Ingong debotadong mga Kristohanon kita angayng magtinguha sa ‘pagpugas alang sa espiritu sa Diyos.’ Kana maglakip sa pagkinabuhi sa paagi nga magtugot sa balaang espiritu nga libreng makalihok diha sa atong mga kinabuhi, magtabang kanato sa pagpasundayag sa mga bunga niini. Angayng ibutang nato kana sa hunahuna kon kita mohukom kon unsay basahon o unsang mga programa sa telebisyon ang tan-awon. Kita nagapugas alang sa espiritu samtang kita nagahatag ug pagtagad sa mga miting sa kongregasyon ug naningkamot sa pagpadapat sa tambag sa mga ansiano nga gitudlo-sa-espiritu.​—Buhat 20:28.

Makaiikag, ang Galacia 6:8 nagtapos nga may pasalig nga samtang kita nagapugas nga uyon sa balaang espiritu, kita mahilinya nga “moani ug kinabuhing walay-kataposan gikan sa espiritu.” Oo, pinasukad sa lukat ni Kristo, ang Diyos magahatag ug walay-kataposang kinabuhi pinaagi sa paglihok sa balaang espiritu.​—Mateo 19:29; 25:46; Juan 3:14-16; Roma 2:6, 7; Efeso 1:7.