“Sagradong Pag-alagad Uban sa Inyong Gahom sa Pagpangatarongan”
“Ipresentar ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.”—ROMA 12:1.
1, 2. Sa unsang paagi ang pagtuon sa pag-aplikar sa mga prinsipyo sa Bibliya kaamgid sa paghanas sa usa ka bag-ong pinulongan?
NAKASULAY ka na bag tuon ug bag-ong pinulongan? Kon mao, ikaw sa walay duhaduha mouyon nga kini malisod. Gawas pa, daghan pa ang nalangkit kay sa pagtuon lamang ug bag-ong mga pulong. Ang larinong paggamit sa usa ka pinulongan nagkinahanglan usab sa pagbatid sa gramatika niini. Kinahanglang mahibalo ka kon sa unsang paagi ang mga pulong nalangkit sa usag usa ug kon sa unsang paagi kini matapo aron maporma ang kompletong mga hunahuna.
2 Kaamgid kini sa pagkuha nato ug kahibalo bahin sa Pulong sa Diyos. Daghan pa ang nalangkit kay sa pagtuon lamang sa piniling mga teksto sa Kasulatan. Kinahanglang atong tun-an usab ang gramatika sa Bibliya, sa mahulagwayong pagkasulti. Kinahanglang sabton nato kon sa unsang paagi ang mga kasulatan nalangkit sa usa ug usa ug kon sa unsang paagi kini magamit ingong mga prinsipyo nga mahimong maaplikar sa adlaw-adlaw nga pagkinabuhi. Sa ingon kita “mahimong bug-os makasarang, kompleto nga masinangkapan alang sa tanang maayong buhat.”—2 Timoteo 3:17.
3. Mahitungod sa pag-alagad sa Diyos, unsang kausaban ang nahitabo sa 33 K.P.?
3 Sa ilalom sa kahikayan sa kodigo sa Moisesnong Kasugoan, ang pagkamatinumanon mahimong ikapakita, sa dakong sukod, pinaagi sa istriktong pagtuman sa tin-awng pagkapadayag nga mga lagda. Apan, sa 33 K.P., gipanas ni Jehova ang Kasugoan, sa ingon ‘naglansang niini sa sakitanang estaka’ nga diha niini gipatay ang iyang Anak. (Colosas 2:13, 14) Human niadto, ang katawhan sa Diyos wala hatagi ug usa ka hataas nga listahan sa mga halad nga itanyag ug mga lagda nga pagasundon. Hinunoa, sila gisultihan: “Ipresentar ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.” (Roma 12:1) Oo, ang mga Kristohanon gidahom nga manlimbasog, uban sa ilang bug-os nga kasingkasing, kalag, hunahuna, ug kusog sa pag-alagad sa Diyos. (Marcos 12:30; itandi ang Salmo 110:3.) Apan unsay kahulogan sa pagtanyag ug “sagradong pag-alagad uban sa inyong gahom sa pagpangatarongan”?
4, 5. Unsay nalangkit sa pag-alagad kang Jehova uban sa atong gahom sa pagpangatarongan?
4 Ang mga pulong “gahom sa pagpangatarongan” gihubad gikan sa Gregong pulong nga lo·gi·kosʹ, nga nagkahulogang “makataronganon” o “intelihente.” Ang mga alagad sa Diyos gisugo sa paggamit sa ilang nabansay sa Bibliya nga konsensiya. Imbes ipasukad ang ilang mga desisyon sa daghang gitakda nang daan nga mga lagda, angay timbangon ug maayo sa mga Kristohanon ang mga prinsipyo sa Bibliya. Kinahanglang sabton nila ang “gramatika” sa Bibliya, o kon sa unsang paagi ang nagkalainlaing mga prinsipyo niini nalangkit sa usag usa. Sa ingon, sila makahimo ug timbang nga mga desisyon uban sa ilang gahom sa pagpangatarongan.
5 Kini ba nagkahulogan nga ang mga Kristohanon walay mga balaod? Dili gayod! Ang Kristohanon Gregong mga Kasulatan tin-awng nagdili sa idolatriya, seksuwal nga imoralidad, pagbuno, pagpamakak, espiritismo, pag-abuso sa paggamit sa dugo, ug uban pang nagkalainlaing mga sala. (Buhat 15:28, 29; 1 Corinto 6:9, 10; Pinadayag 21:8) Bisan pa, sa dakong sukod kay sa gikinahanglan sa mga Israelinhon, kinahanglang atong gamiton ang atong gahom sa pagpangatarongan sa pagtuon ug sa pagpadapat sa mga prinsipyo sa Bibliya. Sama gayod sa pagsabot ug usa ka bag-ong pinulongan, kini nagkinahanglag panahon ug paningkamot. Sa unsang paagi ang atong gahom sa pagpangatarongan maugmad?
Pag-ugmad sa Imong Gahom sa Pagpangatarongan
6. Unsay nalangkit sa pagtuon sa Bibliya?
6 Una, kinahanglang mahimo kitang maikagong mga estudyante sa Bibliya. Ang dinasig nga Pulong sa Diyos “mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong.” (2 Timoteo 3:16) Dili kita angay magdahom kanunay nga makita ang tubag sa usa ka problema diha sa usa ka bersikulo sa Bibliya. Hinunoa, kita kinahanglang mangatarongan sa pila ka mga kasulatan nga naghatag ug kahayag sa usa ka partikular nga situwasyon o problema. Kita kinahanglang magkugi sa pagsusi sa hunahuna sa Diyos sa maong butang. (Proverbio 2:3-5) Kita nagkinahanglan usab ug pagsabot, kay “ang tawo nga may pagsabot mao ang usa nga makabaton ug batid nga pagtultol.” (Proverbio 1:5) Ang usa ka tawong may pagsabot makabulag sa indibiduwal nga mga hinungdan sa usa ka butang ug niana masabtan ang ilang kalangkitan sa usag usa. Sama sa usa ka puzzle, iyang ipasibo ang tanang mga piraso aron iyang makita ang tibuok hulagway.
7. Sa unsang paagi ang mga ginikanan makapangatarongan sa mga prinsipyo sa Bibliya bahin sa disiplina?
7 Pananglitan, palandonga ang bahin sa pagkaginikanan. Ang Proverbio 13:24 nag-ingon nga ang amahan nga nagahigugma sa iyang anak “nagaatiman kaniya nga may disiplina.” Kon kini lamang nga kasulatan ang atong tagdon, kini nga teksto mahimong maaplikar sa sayop nga paagi sa pagpakamatarong sa mabangis, higpit nga silot. Apan, ang Colosas 3:21 naghatag ug timbang nga tambag: “Kamong mga amahan, ayaw palagota ang inyong mga anak aron sila dili magminghoy.” Ang mga ginikanan nga nagagamit sa ilang gahom sa pagpangatarongan ug sundon kini nga mga prinsipyo dili maghimo ug disiplina nga mahimong matawag nga “madagmalon.” Ilang tratahon ang ilang mga anak nga may pagmahal, pagsabot, ug dignidad. (Efeso 6:4) Busa, sa pagkaginikanan o sa bisan unsang uban pang butang nga nalangkit ang mga prinsipyo sa Bibliya, atong maugmad ang atong gahom sa pagpangatarongan pinaagi sa pagtimbang sa tanang nalangkit nga mga butang. Niining paagiha, atong masabtan ang “gramatika” sa mga prinsipyo sa Bibliya, kon unsa ang katuyoan sa Diyos ug kon sa unsang paagi kini tumanon.
8. Sa unsang paagi atong malikayan ang pagbaton ug istrikto, dogmatikong mga panghunahuna kon bahin sa kalingawan?
8 Ang ikaduhang paagi nga maugmad nato ang atong gahom sa pagpangatarongan mao ang paglikay sa pagbaton ug istrikto, dogmatiko nga mga hunahuna. Ang di-mapasiboon nga panghunahuna makababag sa pagtubo sa atong gahom sa pagpangatarongan. Palandonga ang bahin sa kalingawan. Ang Bibliya nag-ingon: “Ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Kini ba nagkahulogan nga ang tanang libro, sine, o programa sa telebisyon nga gihimo sa kalibotan daotan ug sataniko? Kana nga panghunahuna dili gayod makataronganon. Sa pagkamatuod, tingali ang pipila mopili sa bug-os nga paglikay sa telebisyon, mga sine, o sa kalibotanong mga basahon. Ilang katungod kana, ug dili sila angay sawayon tungod niini. Apan dili angay nga ilang pugson ang uban sa pagbaton ug samang istriktong baroganan. Ang Sosyedad nagpatik ug mga artikulo nga nagpadayag sa mga prinsipyo sa Bibliya nga makatabang kanato nga mahimong maalamon sa pagpili sa atong lulinghayaw o kalingawan. Ang paglapas niini nga mga giya ug ang pagladlad sa atong kaugalingon sa imoral nga panghunahuna, sa grabe nga kapintasan, o espiritismo nga makita diha sa kadaghanan sa kalingawan niining kalibotana dili gayod maalamon. Sa pagkamatuod, ang maalamon nga pagpili ug kalingawan nagkinahanglan nga gamiton nato ang atong gahom sa pagpangatarongan sa pag-aplikar sa mga prinsipyo sa Bibliya aron makabaton ug mahinlo nga konsensiya atubangan sa Diyos ug sa tawo.—1 Corinto 10:31-33.
9. Unsay kahulogan sa “bug-os mailahong pagpanabot”?
9 Ang kadaghanang kalingawan karon dili gayod angay alang sa mga Kristohanon.a Busa, angay natong bansayon ang atong mga kasingkasing sa ‘pagdumot sa daotan’ aron dili kita mahisama sa pipila sa unang siglong mga Kristohanon nga “nawad-an na sa tanang moral nga pagbati.” (Salmo 97:10; Efeso 4:17-19) Sa pagpangatarongan bahin nianang mga butanga, kinahanglan nato ang “tukma nga kahibalo ug bug-os mailahong pagpanabot.” (Filipos 1:9) Ang Gregong pulong nga gihubad ug “pagpanabot” nagkahulogan ug “sensitibong moral nga pag-ila.” Ang pulong nagpasabot sa literal nga mga igbalati sa tawo, sama sa panan-aw. Kon bahin sa kalingawan o sa bisan unsang uban pa nga butang nga nagkinahanglan ug personal nga desisyon, ang atong moral nga pagsabot kinahanglang isentro aron atong masabtan dili lamang ang klaro kaayo, dayag nga mga isyu kondili ang hanap usab nga mga isyu. Sa samang higayon, kinahanglang maglikay kita sa pag-aplikar sa mga prinsipyo sa Bibliya nga sobra ka di-makataronganon ug sa pag-insister nga himoon usab kini sa atong tanang igsoon.—Filipos 4:5.
10. Sa unsang paagi masabtan nato ang personalidad ni Jehova ingon sa gipabanaag sa Salmo 15?
10 Ang ikatulong paagi sa pag-ugmad sa atong gahom sa pagpangatarongan mao ang pagkahibalo sa kaisipan ni Jehova ug sa pagsilsil gayod niini diha sa atong mga kasingkasing. Diha sa iyang Pulong, gipadayag ni Jehova ang iyang personalidad ug mga sukdanan. Diha sa Salmo 15, pananglitan, mabasa nato ang bahin sa matang sa tawo nga ginadapit ni Jehova nga mahimong bisita sa iyang tabernakulo. Kanang matanga sa tawo nagbuhat ug pagkamatarong, nagsulti sa kamatuoran diha sa iyang kasingkasing, matinumanon sa iyang mga saad, ug dili pamentahaan ang uban sa hinakog nga paagi. Samtang magbasa niini nga salmo, pangutan-a ang imong kaugalingon, ‘Kini ba nga mga kinaiya naghubit kanako? Imbitahon ba kaha ako ni Jehova nga mahimong dinapit sa iyang tabernakulo?’ Ang atong mga gahom sa pagsabot mapalig-on samtang mahiuyon kita sa mga dalan ug kaisipan ni Jehova.—Proverbio 3:5, 6; Hebreohanon 5:14.
11. Sa unsang paagi ‘ginalabyan [sa mga Pariseo] ang hustisya ug ang gugma sa Diyos’?
11 Niini mismong bahina napakyas ang mga Pariseo. Ang mga Pariseo nahibalo sa teknikal nga gambalay sa Kasugoan apan dili makasabot sa “gramatika” niini. Sila makasitar ug hilabihan ka daghang detalye sa Kasugoan, apan sila napakyas sa pagsabot sa Personalidad sa likod niini. Gisultihan sila ni Jesus: “Kamo nagahatag sa ikanapulo sa yerbabuyna ug sa ruda ug sa tanang ubang mga utanon, apan inyong ginalabyan ang hustisya ug ang gugma sa Diyos!” (Lucas 11:42) Uban sa ilang higpit nga mga hunahuna ug matig-ang mga kasingkasing, ang mga Pariseo napakyas sa paggamit sa ilang gahom sa pagpangatarongan. Ang ilang nagkasumpaking mga pangatarongan nadayag sa dihang ilang gisaway ang mga tinun-an ni Jesus nga nangutlog uhay ug gikaon ang mga lugas sa Igpapahulay; apan, sa ulahi niana gihapong adlawa, sila walay gibating pagtulisok sa konsensiya sa dihang nagsabot sila sa pagpatay kang Jesus!—Mateo 12:1, 2, 14.
12. Sa unsang paagi kita labi pang mahiuyon kang Jehova ingong usa ka Persona?
12 Kita buot nga mahimong lahi gikan sa mga Pariseo. Ang atong kahibalo bahin sa Pulong sa Diyos angay motabang kanato nga mas mahiuyon kang Jehova ingong Persona. Sa unsang paagi atong mahimo kini? Human mabasa ang usa ka bahin sa Bibliya o sa pinasukad sa Bibliya nga literatura, ang pipila natabangan pinaagi sa pagpalandong sa mga pangutana nga sama niini, ‘Unsay gitudlo niining impormasyona kanako bahin kang Jehova ug sa iyang mga hiyas? Sa unsang paagi ikapasundayag ko ang mga hiyas ni Jehova diha sa akong mga pakiglabot sa uban?’ Ang pagpalandong niining maong mga pangutana magpaugmad sa atong gahom sa pagpangatarongan ug magpaarang kanato nga mahimong “mga tigsundog sa Diyos.”—Efeso 5:1.
Mga Ulipon sa Diyos ug ni Kristo, Dili sa mga Tawo
13. Sa unsang paagi milihok ang mga Pariseo nga samag moral nga mga diktador?
13 Angay tugotan sa mga ansiano kadtong ubos sa ilang pag-atiman sa paggamit sa ilang gahom sa pagpangatarongan. Ang mga sakop sa kongregasyon dili mga ulipon sa tawo. “Kon ako nagapahimuot pa gihapon sa mga tawo,” misulat si Pablo, “dili unta ako mahimong ulipon ni Kristo.” (Galacia 1:10; Colosas 3:23, 24) Sa kasukwahi, buot sa mga Pariseo nga ang mga tawo motuo nga mas hinungdanon ang pagbaton sa pag-uyon sa mga tawo kay sa pag-uyon sa Diyos. (Mateo 23:2-7; Juan 12:42, 43) Gitudlo sa mga Pariseo ang ilang kaugalingon nga mahimong moral nga mga diktador kinsa naghimog ilang kaugalingong mga lagda ug unya naghukom sa uban pinaagi sa kon unsa ka maayo ang ilang pagsunod. Kadtong nagsunod sa mga Pariseo nangaluya sa paggamit sa ilang pinasukad sa Bibliya nga konsensiya, sa ingon nahimong mga ulipon sa mga tawo.
14, 15. (a) Sa unsang paagi ikapakita sa mga ansiano ang ilang kaugalingon nga mga isigkamamumuo sa panon? (b) Sa unsang paagi atimanon sa mga ansiano ang problema bahin sa konsensiya?
14 Ang Kristohanong mga ansiano karon nahibalo nga ang panon dili gayod manubag kanila. Ang matag usa ka Kristohanon kinahanglang magpas-an sa iyang kaugalingong lulan. (Roma 14:4; 2 Corinto 1:24; Galacia 6:5) Angay gayod kini. Sa pagkamatuod, kon ang mga membro sa panon maoy mga ulipon pa sa mga tawo, nga nagsunod lamang tungod kay ginabantayan, unsay ilang himoon kon kadtong mga tawhana wala diha? Si Pablo may katarongan sa pagkalipay uban sa mga taga-Filipos: “Sa paagi nga kamo kanunay nagmasinugtanon, dili lamang sa panahong ako anaa, kundili labi pa gayod karon sa panahong ako wala diha, padayong panlimbasogi ang inyong kaugalingong kaluwasan uban ang kahadlok ug pagpangurog.” Sila tinuod gayod nga mga ulipon ni Kristo, ug dili kang Pablo.—Filipos 2:12.
15 Busa, kon bahin sa konsensiya, ang mga ansiano dili mohimog desisyon alang niadtong ubos sa ilang pag-atiman. Ilang ipatin-aw ang mga prinsipyo sa Bibliya nga nalangkit sa usa ka butang ug unya tugotan ang mga indibiduwal nga nalangkit sa paggamit sa ilang kaugalingong mga gahom sa pagpangatarongan sa paghimo ug desisyon. Usa kini ka mabug-at nga responsibilidad, apan usa nga angay pas-anon mismo sa indibiduwal.
16. Unsang sistema ang naglungtad sa Israel sa pag-atiman sa mga problema?
16 Palandonga ang panahon dihang migamit si Jehova ug mga maghuhukom sa pagtultol sa Israel. Ang Bibliya nag-ingon kanato: “Niadtong mga adlawa walay hari sa Israel. Ang tagsatagsa ka tawo naghimo sumala sa matarong sa iyang kaugalingong mga mata.” (Maghuhukom 21:25) Bisan pa si Jehova nagtagana ug paagi alang sa iyang katawhan aron makabaton ug pagtultol. Ang matag siyudad may mga tigulang nga lalaki nga makahatag ug hamtong nga tabang sa mga pangutana ug mga problema. Dugang pa, ang Levihanon nga mga saserdote naglihok ingong usa ka puwersa alang sa kaayohan pinaagi sa pagtudlo sa mga tawo sa mga kasugoan sa Diyos. Kon may malisod nga mga problemang motungha, ang hataas nga saserdote mangonsulta sa Diyos pinaagi sa Urim ug Thummim. Ang Insight on the Scriptures nagkomento: “Ang indibiduwal nga nagpahimulos niini nga mga tagana, nga nakabaton ug kahibalo sa kasugoan sa Diyos ug giaplikar kini, may maayo nga giya alang sa iyang konsensiya. Ang iyang paghimo sa ‘kon unsa ang matarong sa iyang kaugalingong mga mata’ sa mao nga kaso dili mosangpot ug daotan. Gitugotan ni Jehova ang mga tawo sa pagpakita ug mainandamon o di-mainandamon nga tinamdan ug dalan.”—Tomo 2, mga panid 162-3.b
17. Sa unsang paagi ikapakita sa mga ansiano nga nagtambag sila sumala sa mga sukdanan sa Diyos inay sa ilang kaugalingon?
17 Sama sa Israelinhong mga maghuhukom ug mga saserdote, ang mga ansiano sa kongregasyon nagtagana ug hamtong nga tabang sa mga problema ug naghatag ug hamili nga tambag. Usahay, sila gani ‘nagapamadlong, nagasaway, nagapanambag nga maawhagon, uban sa tanang hataas-nga-pailob ug arte sa pagpanudlo.’ (2 Timoteo 4:2) Gihimo nila kini sumala sa mga sukdanan sa Diyos, dili sa ilang kaugalingon. Pagkaepektibo niini kon ang mga ansiano magpakitag panig-ingnan ug maningkamot sa pag-abot sa mga kasingkasing!
18. Nganong ilabinang epektibo alang sa mga ansiano ang pag-abot sa mga kasingkasing?
18 Ang kasingkasing mao ang “makina” sa atong Kristohanong buluhaton. Busa ang Bibliya nag-ingon: “Gikan niini magagula ang mga tuboran sa kinabuhi.” (Proverbio 4:23) Ang mga ansiano nga nagapukaw sa mga kasingkasing makakaplag nga kadtong anaa sa kongregasyon matukmod sa paghimo kutob sa ilang maarangan sa pag-alagad sa Diyos. Mobuhat sila sa kinaugalingon, nga dili na kinahanglang palihokon pa sa uban. Si Jehova dili gusto ug napugos nga pagkamasinugtanon. Siya nagpangitag pagkamatinumanon nga nagatubod gikan sa kasingkasing nga puno sa gugma. Mapalig-on sa mga ansiano kanang ginatukmod sa kasingkasing nga pag-alagad pinaagi sa pagtabang sa sakop sa panon sa pag-ugmad sa ilang gahom sa pagpangatarongan.
Pag-ugmad sa “Kaisipan ni Kristo”
19, 20. Nganong importante nga ugmaron nato ang hunahuna ni Kristo?
19 Ingon sa nakita na, dili igo ang yanong pagkahibalo sa mga kasugoan sa Diyos. “Hatagi ako ug pagsabot,” nagpakiluoy ang salmista, “aron bantayan ko ang imong kasugoan ug tumanon ko kini uban sa bug-os ko nga kasingkasing.” (Salmo 119:34) Gipadayag ni Jehova diha sa iyang Pulong ang “kaisipan ni Kristo.” (1 Corinto 2:16) Ingong usa nga nag-alagad kang Jehova uban sa iyang gahom sa pagpangatarongan, si Jesus nagbilin kanato ug hingpit nga sulondan. Siya nakasabot sa mga kasugoan ug sa mga prinsipyo sa Diyos, ug walay sipyat nga giaplikar niya kini. Pinaagi sa pagtuon sa iyang sulondan, atong “bug-os masabtan . . . kon unsa ang gilapdon ug gitas-on ug gihabogon ug giladmon, ug aron mahibaloan ang gugma sa Kristo nga nagalabaw sa kahibalo.” (Efeso 3:17-19) Oo, ang atong matun-an gikan sa Bibliya bahin kang Jesus maoy labaw pa sa pagkahibalo lamang sa daghang kamatuoran; kini naghatag kanato ug matin-aw nga hulagway kon sama sa unsa si Jehova mismo.—Juan 14:9, 10.
20 Busa, samtang magtuon kita sa Pulong sa Diyos, atong masabtan ang kaisipan ni Jehova sa maong mga butang ug sa pag-abot ug timbang nga mga desisyon. Nagkinahanglan kini ug paningkamot. Kita kinahanglang mahimong kugihang mga estudyante sa Pulong sa Diyos, nga maghimo sa atong kaugalingon nga sensitibo sa personalidad ug sa mga sukdanan ni Jehova. Nagtuon kita ug bag-ong gramatika sa mahulagwayong pagkasulti. Apan, kadtong naghimo niini mosunod sa tambag ni Pablo nga “ipresentar ang [ilang] mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.”—Roma 12:1.
[Footnote]
a Walay labot niini ang kalingawan nga yawan-on, pornograpiko, o sadistiko ug kaundan, ingon man sa gitawag nga kalingawan sa pamilya nga nagpasiugdag malaw-ay o matinugoton nga mga ideya nga dili madawat sa mga Kristohanon.
b Gipatik sa Watchtower Bible and Tract Society of New York, Inc.
Unsay Imong Nakat-onan?
◻ Unsang kausaban bahin sa pag-alagad sa Diyos ang nahitabo sa 33 K.P.?
◻ Sa unsang paagi atong maugmad ang atong gahom sa pagpangatarongan?
◻ Sa unsang paagi matabangan sa mga ansiano kadtong sakop sa panon nga mahimong mga ulipon sa Diyos ug ni Kristo?
◻ Nganong angay natong ugmaron ang “kaisipan ni Kristo”?
[Hulagway sa panid 23]
Tabangan sa mga ansiano ang uban sa paggamit sa ilang gahom sa pagpangatarongan