PAGPASAGAD, DILI PAGPAKABANA

Kining mga pulonga nagkahulogang dili pagtagad; dili pagpanumbaling; dili pag-atiman (sa usa ka tawo o usa ka butang); pagkapakyas sa pagtuman o pagbuhat (sa mga sugo, katungdanan, ug uban pa). Kining mga pulonga mahimong magtumong sa pagkatinuyo sa maong kapakyasan, o sa dili lamang pagpakabana pinaagi sa pagkadili-matinagdanon o pagkadili-mainampingon.

Ang usa sa ubay-ubayng Hebreohanong mga termino nga nagkahulogang “pagpasagad” mao ang berbo nga pa·raʽʹ, nga sa literal nagkahulogang “magpadunghay.” (Num 5:18) Kini adunay diwa nga “magkalkag ang buhok” maylabot sa pisikal nga panagway (Lev 10:6), “magpatuyang” maylabot sa panggawi (Ex 32:25), ug “wala magpakabana” o “nagalikay” sa disiplina. (Pr 13:18; 15:32; itandi ang Ex 5:​4, diin kini gihubad nga “gipahunong.”) Ang laing pulong mao ang ʽa·zavʹ, nga sa literal nagkahulogang “biya; salikway.” (Deu 29:25; 1Ha 12:8) Busa, gidasig ni Nehemias ang matuod nga mga magsisimba nga dili “pasagdan” ang balay sa matuod nga Diyos. (Neh 10:39; itandi ang 13:11.) Ang laing Hebreohanong termino nga adunay ideya sa pagpasagad sa literal nagkahulogang “pagkaluag,” sama sa luag nga busogan.​—Jer 48:10; itandi ang Sal 78:57.

Ang Gregong pulong nga a·me·leʹo (gikan sa a, “wala,” ug meʹlo, “magpakabana”) adunay mas tinong ideya sa pagkawalay-kabalaka, pagkawalay-pagtagad, ug wala kaayoy ideya sa dili-tinuyong dili pagkaalinggat o dili pagkamatikod sa usa ka butang. Human hisgoti ang grabeng silot tungod sa paglapas sa Moisesnong Balaod, si apostol Pablo miingon: “Unsaon man nato pag-ikyas kon kita wala manumbaling [Gr., a·me·leʹsan·tes, “nga wala magtagad (sa)”] sa ingon kadako nga kaluwasan sa pagkaagi nga kini gisugdan pagsulti pinaagi sa atong Ginoo . . . samtang ang Diyos miduyog sa pagpamatuod?” Dinhi iyang gipakita dili ang bahin sa dili pagkaalinggat, kondili ang pagkawalay-pagpakabana, ang ‘pagkaanod’ (ber 1), ang paglapas sa pulong sa Diyos nga gisulti pinaagi sa iyang bugtong nga Anak.​—Heb 2:1-4, Int.

Gigamit ni Mateo ang usa ka porma niining Gregong pulong sa dihang nag-asoy sa sambingay ni Jesus bahin sa kombira sa kasal. Kadtong mga dinapit sa hari alang sa kombira sa kasal sa iyang anak wala mangabot. Ngano man? Dili tungod kay nakalimot, kondili, “sa walay pagpanumbaling sila nanglakaw, ang usa ngadto sa iyang uma, ang lain ngadto sa iyang patigayon.” Tungod kay wala manumbaling, sila giisip nga dili takos.​—Mat 22:​5, 8.

Ang batan-ong lalaki nga si Timoteo gihatagan ug mabug-at nga kaakohan ingong usa ka magtatan-aw sa Efeso. Si Pablo nagtambag kaniya: “Ayaw pasagdi [o, nga dili tagdon] ang gasa nga anaa kanimo nga gihatag kanimo pinaagi sa pagpanagna ug sa dihang ang lawas sa mga ansiyano nagpandong sa ilang mga kamot diha kanimo.” Gikinahanglan gayod ni Timoteo nga molihok nga madasigon aron malikayan ang pagkamapinasagdanon. Kinahanglan niyang hatagan ug bug-os nga pagtagad ang iyang pagbasa, hustong pagpanudlo, panggawi, pagtambag, ug panig-ingnan, nga magpakitag kabalaka pinaagi sa paghatag ug makanunayon ug wala-mabahin nga pagtagad. Kay kondili, siya dili makadawat ug ganti tungod sa pagkamapinasagdanon, tungod kay siya walay tinuod nga kabalaka sa pag-uyon nga gipakita sa Diyos kaniya.​—1Ti 4:11-16, Int.

Gikutlo ni Pablo ang mga pulong ni Jehova labot sa Israel diin Siya naghisgot bahin sa pakigsaad sa Balaod, nga nag-ingong “ang maong pakigsaad nako ilang gilapas, bisan tuod ako bana nga tag-iya nila.” (Jer 31:32) Puli sa mga pulong nga “bisan tuod ako bana nga tag-iya nila,” ang Septuagint mabasa: “ug ako mihunong sa pag-atiman kanila.” Kini sa walay duhaduha nagpatin-aw kon nganong ang pangutlo sa Hebreohanon 8:9 mabasa: “Kay wala sila magpabilin sa akong pakigsaad, mao nga ako mihunong sa pag-atiman [wala mabalaka] kanila.” Ang dili pagpakabana ni Jehova wala gayod magpasabot nga siya wala manumbaling o wala magtagad; hinunoa, siya nagpakitag dakong kabalaka sa iyang gipakigsaaran nga katawhan hangtod nga sila wala na manumbaling sa iyang pulong ug mirebelde kaniya. Nianang panahona lamang ug pinasukad niana nga siya “mihunong sa pag-atiman [Gr., e·meʹle·sa] kanila.”