Pagpakitag Kristohanong Gugma Ngadto sa mga Tigulang
SI Samuel Johnson, usa ka awtor sa ika-18ng siglo, miasoy sa sugilanon sa usa ka batan-ong lalaki si kinsa, sa nagduaw ug mga higala, nalimot kon diin niya gikabutang ang iyang kalo. Wala kini magpatunghag komento. “Apan kon ang samang kalingahon nadiskobrehan pa diha sa usa ka lalaking tigulang,” si Johnson mipadayon, “ang mga tawo magpakibo sa ilang abaga ug moingon, ‘Siya malimtanon na.’”
Ang estorya ni Johnson nagpasundayag nga ang mga tigulang, tingali sama sa ubang minoriyang grupo, mapailalom sa dili-matarong nga pagklasipikar o pagtipo. Bisan pag ang pag-atiman sa mga tigulang maoy usa ka hagit, ang mga kaayohan maangkon sa tanang partido nga nalangkit. Unsa ang mga hagit ug mga ganti, ug nganong kining ulohana mag-apektar sa dugang ug dugang nga mga tawo?
Sumala sa mga estadistika, 6 porsiento sa populasyon sa kalibotan maoy 65 anyos o tigulang pa, ug sa ugmad nga kanasoran ang porsiento maoy doble. Sa Uropanhong Komunidad, nga nagtawag sa 1993 nga “Uropanhong Tuig sa mga Tigulang ug Panag-usa Tali sa mga Kaliwatan,” 1 ka tawo sa 3 maoy kapin sa 50 anyos. Didto, sama sa kadaghanang industriyalisadong kayutaan, tungod sa nagkadiyutayng pagpanganak ug nagtaas nga gitas-on sa kinabuhi ang dakong bahin sa populasyon maoy gulang na. Ang pag-atiman niadtong mga tigulang ubos sa maong mga kahimtang tin-aw nga dako kaayong trabaho. Pagkalahi sa kahimtang sa nangagi sa Oriente!
“Tipiganan sa Kahibalo”
Ang Handwörterbuch des Biblischen Altertums für gebildete Bibelleser (Handbook of Biblical Antiquity for Educated Readers of the Bible) mipunting nga sa karaang Oriente “ang mga tigulang giisip ingong mga magtitipig sa tradisyonal nga mga sukdanan sa kaalam ug mas taas nga kahibalo, nga tungod niana ang mga batan-on gitambagan nga makig-uban kanila ug magtuon gikan kanila.” Ang Smith’s Bible Dictionary nagsaysay: “Sa pribadong kinabuhi [ang mga tigulang] gitamod ingong mga tipiganan sa kahibalo . . . [Ang mga batan-on] nagtugot nga sila maoy unang mohatag sa ilang opinyon.”
Ang pagtahod sa mga tigulang gibanaag diha sa Moisesnong Kasugoan sa Levitico 19:32: “Atubangan sa buhok nga ubanon angay nga motindog ka, ug kinahanglang ipakita nimo ang kamahunahunaon alang sa pagkatawo sa usa ka lalaking tigulang.” Busa ang mga tigulang nag-okupar sa usa ka pribilehiyadong katungdanan sa katilingban ug giisip ingong bililhong katigayonan. Dayag kini ang pag-isip ni Ruth nga Moabihanon sa iyang Israelinhong ugangang-babaye, si Noemi.
Si Ruth hugot nga mihukom nga mokuyog kang Noemi ngadto sa Israel gikan sa Moab, nga human niadto namati pag-ayo sa tambag ni Noemi. Sa didto na sila sa Bethlehem, si Noemi nakapaniid nga ang kamot ni Jehova nagtultol sa mga kahikayan ug unya nagpahimatngon kang Ruth kon sa unsang paagi magagawi. (Ruth 2:20; 3:3, 4, 18) Ang kinabuhi ni Ruth naumol sa teokratikanhong paagi samtang siya nakatuon gikan sa may-kasinatiang si Noemi. Ang iyang ugangang-babaye nagpamatuod nga tipiganan sa kahibalo.
Sa susamang paagi, ang batan-ong Kristohanong mga babaye karong adlawa makabenepisyo pinaagi sa pagpakig-uban sa mga babayeng tigulang sa kongregasyon. Tingali ang usa ka igsoong babaye nagplanong magminyo o nagpakigbisog sa magahing personal nga suliran. Pagkamaalamon nga mangita sa tambag ug pagpaluyo sa usa ka hamtong tigulang nga igsoong babaye nga may kasinatian niining bahina!
Dugang pa, ang lawas sa mga ansiano makabenepisyo pinaagi sa pagpahimulos sa kasinatian sa mga tigulang sa ilang taliwala. Makakat-on kita gikan sa kapakyasan ni Lot sa pagbuhat niini. Ang panag-away nga naglangkit sa mga magbalantay sa kahayopan ni Abraham ug ni Lot nagkinahanglan sa usa ka desisyon nga mag-apektar sa tanan. Si Lot mihimog dili-maalamong pagpili. Pagkalabi pang maayo unta kon nangayo siya una sa tambag ni Abraham! Si Lot makadawat untag hamtong nga pagtultol ug makalingkawas ang iyang pamilya sa kagul-anan nga misangpot sa iyang dinaliang pagpili. (Genesis 13:7-13; 14:12; 19:4, 5, 9, 26, 29) Nagapamati ka ba pag-ayo sa ginasulti sa hamtong nga mga ansiano sa dili pa mahidangat sa imong kaugalingong panghukom bahin sa usa ka suliran?
Ang di-maihap nga mga tigulang adunay malungtarong kadasig alang sa buluhaton ni Jehova, sama kang Simeon ug Ana sa unang siglo. (Lucas 2:25, 36, 37) Usa ka timailhan sa pagtahod ug banaag sa mapinanggaong tinamdan ngadto sa mga tigulang ang paglangkit kanila sa mga kalihokan sa kongregasyon kutob sa itugot sa ilang kusog, bisan hangtod sa tigulang na kaayo. Tingali ang usa ka batan-on nagkinahanglag tabang sa pag-andam sa usa ka asaynment sa Tunghaan sa Teokratikanhong Ministeryo. Ang manggialamong ansiano mahimong maghinapos nga ang labing maayong magtutudlo mao ang usa ka tigulang nga membro sa kongregasyon, usa nga may lumo nga kaalam, maayong pamatasan, ug ikahatag nga panahon.
Hinuon, ang pag-atiman sa linaing mga panginahanglan sa mga tigulang naglangkit ug labaw pa. Daghan ang gihasol sa kamingaw, kahadlok sa krimen, ug mga suliran sa salapi. Dugang pa, sa dihang ang mga tigulang mahimong luya na, kining mga sulirana mapasamot sa luyang panglawas ug kapakyasan sa ilang nagkadiyutayng kusog. Sa ingon gikinahanglan nila ang labi pang dakong pagtagad. Unsay angay nga pagsanong sa tinagsatagsa ug sa kongregasyon sa katibuk-an?
“Managgawi sa Diyosnong Pagkamahinalaron”
Sa unang siglo, si Pablo ubos sa pagdasig misulat sa 1 Timoteo 5:4, 16: “Kon adunay babayeng balo nga may mga anak o mga apo, pakat-ona una kini sila nga managgawi sa diyosnong pagkamahinalaron diha sa ilang kaugalingong panimalay ug magpadayon pagbayad sa angay nga balos ngadto sa ilang mga ginikanan ug mga apohan, kay kini dalawaton sa panan-aw sa Diyos. Kon adunay magtutuong babaye nga may mga babayeng balo, paayodaha siya kanila, ug dili pabug-atan ang kongregasyon. Sa ingon kini makaayoda niadtong kinsa tinuod nga mga babayeng balo.” Ang pag-atiman sa tigulang maoy responsabilidad sa pamilya. Kon ang usa ka tigulang nga membro sa kongregasyon nagkinahanglag tabang human buhata sa pamilya ang tanang ilang maarangan sa pagtabang, ang responsabilidad nahiluna sa kongregasyon. Kining mga prinsipyoha wala mausob.
Unsay nakatabang sa mga Kristohanon sa pagpakitag Kristohanong gugma ngadto sa tigulang pinaagi sa pagpakitag diyosnong pagkamahinalaron diha sa ilang kaugalingong panimalay? Panid-i ang mosunod nga mga komento sa ubay-ubayng Saksi nga nakabatog kasinatian sa pag-atiman niadtong tigulang na.
Makanunayong Pagtagad sa Espirituwal nga mga Panginahanglan
“Ang paghisgot sa inadlaw nga teksto nga magkauban maoy usa ka bililhong tabang,” nahinumdom si Felix, kinsa mitabang sa iyang asawa sa pag-atiman sa iyang mga ugangan. “Ang personal nga mga kasinatian ug mga tingusbawan nalanggikit sa mga prinsipyo ni Jehova.” Sa pagkatinuod, sa pag-abaga sa hagit sa pag-atiman sa mga tigulang nga mga paryente, usa ka pangunang butang mao ang paghatag ug angayng pagtagad sa ilang espirituwal nga pagpalig-on. Kini makataronganon tungod sa mga pulong ni Jesus sa Mateo 5:3: “Malipayon kadtong mahunahunaon sa ilang espirituwal nga panginahanglan.” Ang inadlaw nga teksto madugangan sa programa sa pagbasa ug Bibliya, paghisgot sa binase-sa-Bibliyang mga basahon, ug sa pag-ampo. “Ang mga tigulang morag gusto sa usa ka sukod sa rutina,” mipahayag si Peter.
Oo, ang pagkamakanunayon hinungdanon sa espirituwal nga mga butang. Dili lamang sa espirituwal nga mga butang kondili sa matag-adlaw usab nga kinabuhi ang mga tigulang moangay ug rutina. Bisan kadtong may ginagmayng mga kaluyahon mahimong dasigon nga “mobangon ug mag-ilis ug angay nga sinina kada adlaw,” mipahayag si Ursula. Siyempre, buot natong likayan ang impresyon nga magadiktar sa mga tigulang. Si Doris miadmitir nga ang iyang maayog-tuyong paningkamot ikasubo nga subsob nahisalaag. “Nakahimo ako sa tanang matang sa mga sayop. Usa ka adlaw akong gihangyo ang akong amahan nga mag-ilis sa iyang kamisadentro adlaw-adlaw. Unya ang akong inahan nagpahinumdom kanako: ‘Siya ako pang bana!’”
Ang mga tigulang sa nangagi batan-on, apan ang pagpakita sa mga batan-on ug empatiya ug kasensitibo ngadto sa mga tigulang maoy lisod kaayong buluhaton. Bisan pa, kana ang yawi sa pagsabot sa ilang linaing mga panginahanglan. Ang pagkatigulang magdalag pagbati sa kapakyasan. Si Gerhard misaysay: “Ang akong ugangang-lalaki napikal sa iyang kaugalingon kay siya dili na makabuhat sa tanang butang nga sa nangagi iyang gibuhat. Ang pagdawat sa kahimtang makapaguol kaayo alang kaniya. Nausob ang iyang personalidad.”
Ubos sa nagakausob nga mga kahimtang, kasagarang ipahungaw sa usa ka tigulang ang pagbati sa kapakyasan pinaagi sa pagsaway sa uban, ilabina kadtong nagaatiman kaniya. Ang hinungdan yano. Ang ilang mahigugmaong pagtagad magpahinumdom kaniya sa iyang nagkawalang kusog. Unsay angay nga pagsanong nimo niining di-makataronganong pagsaway o reklamo?
Hinumdomi, ang maong negatibong mga pagbati wala magbanaag sa panghunahuna ni Jehova sa imong paningkamot. Magpadayon sa pagbuhat ug maayo, ug padayong hupti ang hinlong tanlag, bisan pag imong anihon ang panagsang di-makataronganong mga komento. (Itandi ang 1 Pedro 2:19.) Ang lokal nga kongregasyon makatanyag ug dakong pagpaluyo.
Kon Unsay Mahimo sa Kongregasyon
Daghang kongregasyon adunay katarongan nga dulot magmapasalamaton sa nangaging paghago sa atong minahal tigulang nga kaigsoonan. Sila tingali maoy nagpahimutang sa patukoranan alang sa kongregasyon, nga nagtukod niana gikan sa pila ra ka magmamantala mga dekada kanhi. Asa kaha ang kongregasyon kon wala pa ang ilang nangaging madasigong kalihokan ug, tingali, presenteng suportar sa salapi?
Sa dihang mahimong kinahanglanon ang labawng pag-atiman sa kaso sa usa ka tigulang nga magmamantala, ang mga paryente dili kinahanglang mag-inusara sa responsabilidad. Ang uban makatabang pinaagi sa pagkahimong maalayon, pagluto, paglimpiyo, pagsuroy sa tigulang, pagtanyag nga ihatod ngadto sa Kristohanong mga tigom, o yanong pagpakigsulti kaniya sa Kingdom Hall. Ang tanan makaduyog, bisan tuod makab-ot sa labing maayo ang kaepisyente ug rutina kon mahikay nga magkatakdo ang mga paningkamot.
Ang paghikay aron magkatakdo maoy butang nga hinumdoman sa mga ansiano sa dihang magaorganisar sa mga pagduaw sa magbalantay. Ang pila ka kongregasyon sulundan niining bahina, kay ginatino sa mga ansiano nga himoon ang regular nga mga pagduaw sa magbalantay sa mga tigulang ug mga luyahon, bisan kadtong maayong pagkaatiman sa ilang mga pamilya. Hinuon, mopatim-aw nga ang ubang kongregasyon kinahanglang mas makaamgo pa sa ilang obligasyon ngadto sa mga tigulang.
Usa ka matinumanong igsoong lalaki, nga kapin nag 80 anyos, giatiman sa iyang anak babaye ug iyang umagad, kinsa mibiya sa Bethel aron himoon kana. Bisan pa, ang mga pagduaw sa ubang membro sa kongregasyon hinungdanon gihapon alang kaniya. “Sa tigduaw ako sa masakiton,” ang igsoong lalaki nagmahay, “ako tig-ampo uban kanila. Apan wala pay miampo uban kanako.” Ang mahigugmaong pagtagad sa mga paryente wala magpahigawas sa mga ansiano gikan sa obligasyon sa ‘pagpastol sa panon sa Diyos nga gipaatiman kanila.’ (1 Pedro 5:2) Dugang pa, kadtong nagaatiman sa mga tigulang kinahanglang mapalig-on ug madasig sa pagpadayon sa ilang maayong buhat.
“Tigulang ug Matagbawon”
Si Alexander von Humboldt, usa ka Alemang siyentipiko sa ika-19 nga siglo, tigulang na sa dihang gisukna siya sa usa ka batan-ong babaye kon wala ba siya mapuol sa pagkatigulang. “Husto ka,” mitubag ang tawong makinaadmanon. “Apan kini lamang ang paagi nga mabuhig taas nga panahon.” Sa susama, daghang igsoong lalaki ug babaye karong adlawa ang naghatag ug maayong panig-ingnan sa pagdawat sa mga kalisdanan sa pagkatigulang agig balos sa kadungganan sa pagkinabuhig hataas nga kinabuhi. Kana nagbanaag sa tinamdan nga gipakita ni Abraham, Isaac, David, ug Job, kinsa “tigulang ug matagbawon.”—Genesis 25:8; 35:29; 1 Cronicas 23:1; Job 42:17.
Ang pagkatigulang nagdala sa hagit sa pagdawat ug tabang sa kahimut-anang paagi ug pagpahayag nga tim-os sa pasalamat. Ang kaalam nagkinahanglan nga ang matag usa moila sa mga limitasyon sa iyang kusog. Bisan pa, wala kana magtugyan sa tawong tigulang ngadto sa kawalay-kalihokan. Si Maria kapin nag 90 anyos, apan siya nagtambong gihapon sa mga tigom sa kongregasyon ug naghatag ug mga komento didto. Giunsa niya kana paghimo? “Dili na ako makabasa, apan mamati ako sa The Watchtower sa cassette. Daghan ang akong malimtan, apan sagad nga ako makahatag ug usa ka komento.” Sama kang Maria, ang pagkapuliki sa mga butang nga makapalig-on motabang sa usa ka tawo sa pagpabiling aktibo ug padayong maghupot sa Kristohanong personalidad.
Ubos sa Gingharian sa Diyos, ang pagkatigulang mawala na. Nianang panahona kadtong natigulang niining sistemaha ug tingali namatay pa mahimuot nga mahinumdom sa pag-atiman ug pagtagad nga gipakita kanila. Samtang mapasig-uli sa maong mga tigulang ang kinabuhi ug kalagsik, seguradong mobati silag dakong gugma kang Jehova ug dulot nga utang-kabubut-on alang niadtong miunong kanila panahon sa ilang mga pagsulay niining daang sistema.—Itandi ang Lucas 22:28.
Komosta kadtong nag-atiman sa mga tigulang karon? Dili na madugay, sa dihang bug-os nga magmando ang Gingharian sa yuta, sila mahinumdom uban sa kangaya ug kahupayan nga wala sila molikay sa ilang obligasyon kondili nagpakitag diyosnong pagkamahinalaron pinaagi sa pagpakitag Kristohanong gugma ngadto sa mga tigulang.—1 Timoteo 5:4.
[Kahon sa panid 30]
Pasalamatan sa mga Tigulang ang Inyong mga Pagduaw
Dakong kaayohan ang mahimo pinaagi sa pagplano sa usa ka pagduaw, tingali sa 15 minutos, sa usa ka tigulang human sa pagsangyaw. Apan labing maayo nga dili ipanalagma ang pagduaw, sumala sa gipakita sa mosunod nga kasinatian.
Si Brigitte ug Hannelore nagkauban sa pagsangyaw, nga nakigsulti sa usa ka lalaking tigulang diha sa iyang pultahan. Ang mga igsoong babaye nakigsulti kaniya sulod sa lima ka minutos una pa makahibalo nga siya diay Saksi usab ni Jehova, usa ka membro sa samang kongregasyon. Pagkamakauulaw! Apan ang kasinatian natapos sa positibong diwa. Si Hannelore mihimog dihadihang mga plano sa pagduaw sa igsoong lalaki ug pagtabang kaniya sa pagtambong sa mga tigom sa kongregasyon.
Nahibalo ka ba sa ngalan ug puy-anan sa matag tigulang nga magmamantala nga nagpuyo sa teritoryo diin ikaw nagsangyaw? Makahikay ka ba nga modaklit pagduaw? Lagmit nga kana pasalamatan pag-ayo.