“Maluloton ang Akong Yugo ug Gaan ang Akong Luwan”
“Isangon ang akong yugo diha kaninyo ug pagkat-on gikan kanako.”—MATEO 11:29.
1, 2. (a) Unsay imong naagian sa kinabuhi nga naghatag kanimog kahayahay? (b) Unsay kinahanglang himoon sa usa aron makabaton ug kahayahay nga gisaad ni Jesus?
ANG bugnawng pagkaligo human sa usa ka mainit ug alangaang nga adlaw, o usa ka hinanok nga pagkatulog sa kagabhion human sa dugay ug kapoy nga biyahe—ay, pagkahayahay! Ingon usab niana sa dihang mahaw-as ang usa ka mabug-at nga palas-anon o sa dihang ang mga sala ug kalapasan mapasaylo. (Proverbio 25:25; Buhat 3:19) Ang kahayahay nga nahatag sa maong makapalipayng mga okasyon mopalagsik kanato, ug kita mapabaskog sa pagbuhat pa ug dugang.
2 Ang tanan nga mibating nabug-atan ug gikapoy makaduol kang Jesus, kay mao gayod kanay iyang gisaad kanila—kahayahay. Hinunoa, aron makakaplag ug kahayahay nga gitinguha kaayo, adunay usa ka butang nga kinahanglang andam ang usa sa pagbuhat. “Isangon ang akong yugo diha kaninyo ug pagkat-on gikan kanako,” miingon si Jesus, “ug makakaplag kamog kahayahay alang sa inyong mga kalag.” (Mateo 11:29) Unsa kini nga yugo? Sa unsang paagi mohatag kinig kahayahay?
Usa ka Malulot nga Yugo
3. (a) Unsang matanga sa mga yugo ang gigamit sa panahon sa Bibliya? (b) Unsang mahulagwayong kahulogan ang nalangkit sa yugo?
3 Nagpuyo sa usa ka katilingban nga nagpanguma, si Jesus ug ang iyang mga mamiminaw pamilyar kaayo sa yugo. Sa paninugdan, ang yugo maoy usa ka taas nga kahoy nga adunay duha ka pakulob nga kurba sa masigkakilid nga isaklob diha sa mga tangkugo sa usa ka parisan nga hayop nga igguguyod, kasagaran baka, nga isangon kanilang duha sa pagguyod sa usa ka daro, karomata, o uban pang karga. (1 Samuel 6:7) Ang mga yugo alang sa tawo gigamit usab. Kini maoy yanong tag-as nga mga kahoy o sanglay nga isang-ay sa abaga nga sab-itag karga ang masigkakilid. Pinaagi niini, madaog sa mga mamumuo ang mabug-at nga mga luwan. (Jeremias 27:2; 28:10, 13) Sanglit nalangkit kini sa mga palas-anon ug trabaho, ang yugo kasagarang gigamit sa mahulagwayong paagi sa Bibliya sa pagsimbolo sa pagmando ug paggahom.—Deuteronomio 28:48; 1 Hari 12:4; Buhat 15:10.
4. Unsay gisimbolohan sa yugo nga gitanyag ni Jesus niadtong moduol kaniya?
4 Nan, unsang yugo nga gidapit ni Jesus kadtong moduol kaniya nga isangon kanila aron makapahayahay? Hinumdomi nga siya miingon: “Isangon ang akong yugo diha kaninyo ug pagkat-on gikan kanako.” (Mateo 11:29) Ang usa ka tumutuon maoy usa ka disipulo. Busa, ang pagsangon sa yugo ni Jesus yanong nagkahulogan nga mahimong iyang disipulo. (Filipos 4:3) Apan, kini nagkinahanglan ug labaw pa kay sa pagkahibalo lamang sa iyang mga pagtulon-an. Kini nagkinahanglag mga buhat nga nahiuyon niana—pagbuhat sa buluhaton nga iyang gihimo ug magkinabuhi sa paagi sa iyang pagkinabuhi. (1 Corinto 11:1; 1 Pedro 2:21) Kini nagkinahanglag kinabubut-ong pagpasakop sa iyang awtoridad ug niadtong iyang gisaligan sa awtoridad. (Efeso 5:21; Hebreohanon 13:17) Kini nagkahulogan sa pagkahimong usa ka dedikado, bawtismadong Kristohanon, dawaton ang tanang mga pribilehiyo ug mga responsibilidad nga nagauban sa maong dedikasyon. Mao kana ang yugo nga gitanyag ni Jesus sa tanan nga moduol kaniya alang sa kahupayan ug kahayahay. Andam ka ba sa pagdawat niana?—Juan 8:31, 32.
5. Nganong dili usa ka mapintas nga kasinatian ang pagsangon sa yugo ni Jesus?
5 Aron makabatog kahayahay pinaagi sa pagsangon sa yugo—dili ba panagkasumpaki kana? Sa pagkatinuod dili, sanglit si Jesus miingon nga ang iyang yugo “maluloton.” Kining pulonga adunay kahulogan nga malumo, makapahimuot, maangayon. (Mateo 11:30; Lucas 5:39; Roma 2:4; 1 Pedro 2:3) Sanglit usa ka propesyonal nga karpentero, dakog kalagmitan nga si Jesus nakahimog mga daro ug mga yugo, ug nahibalo siya kon unsaon pagporma sa yugo nga motakdo aron daghang trabaho ang mahimo nga komportable kutob sa maarangan. Tingalig butangan niya ang mga yugo ug panapton o panit. Daghan ang ginahimo nianang paagiha aron dili kini magbag-id, o magnusnos, sa liog pag-ayo. Sa samang paagi, ang mahulagwayong yugo nga gitanyag ni Jesus maoy “malulot.” Bisan pag ang pagkahimong usa ka disipulo niya naglakip ug pipila ka obligasyon ug mga responsibilidad, kini dili usa ka mapintas o malupigon nga kasinatian kondili usa nga makapahayahay. Ang kasugoan sa iyang Langitnong Amahan, si Jehova, dili usab mabug-at.—Deuteronomio 30:11; 1 Juan 5:3.
6. Unsay gipasabot ni Jesus sa dihang siya miingon: “Isangon ang akong yugo diha kaninyo”?
6 Adunay lain pang butang nga nagpahimo sa yugo ni Jesus nga “maluloton,” o sayon nga pas-anon. Sa dihang siya miingon: “Isangon ang akong yugo diha kaninyo,” mahimong usa sa duha ka butang ang iyang gipasabot. Kon maoy anaa sa iyang hunahuna ang dobleng yugo, sa ato pa, ang matang sa yugo nga nagkonektar sa duha ka hayop sa pagguyod sa luwan, nan iyang gidapit kita nga magpasangon sa mao ra nga yugo uban kaniya. Pagkadako kana nga panalangin—nga makauban si Jesus sa atong kiliran sa dungan nga pagguyod sa atong palas-anon! Sa laing bahin, kon ang anaa sa hunahuna ni Jesus mao ang yugo nga gigamit sa kasagarang mamumuo, nan siya nagtanyag kanato ug paagi diin mapas-an nato ang bisan unsang luwan nga mas masayon o mas magaan-gaan. Bisan hain niini, ang iyang yugo maoy usa ka tuboran sa matuod nga kahayahay tungod kay siya nagpasalig kanato: “Kay ako malumog-buot ug mapaubsanon sa kasingkasing.”
7, 8. Unsang kasaypanan ang nahimo sa uban kon mobati sila nga giipit?
7 Nan, unsay angay natong buhaton kon bation nato nga ang luwan sa mga problema sa kinabuhi nga atong ginapas-an dili na maagwanta ug nga kita nasobrahan na sa kalisod? Ang pipila tingali sayop sa pagtuo nga ang yugo sa pagkahimong disipulo ni Jesu-Kristo lisod kaayo o daghan kaayog gipangayo, bisan pag ang mga alatubangon sa adlaw-adlaw nga kinabuhi mao ang nagpabug-at kanila. Ang ubang mga indibiduwal niana nga kahimtang mohunong sa pagtambong sa Kristohanong mga tigom, o moundang sila sa pagpakigbahin sa ministeryo, tingali mibati nga makabaton sila ug pipila ka kahupayan. Apan, hinunoa, kana maoy usa ka seryoso nga sayop.
8 Kita nalipay nga ang yugo nga gitanyag ni Jesus “maluloton.” Kon dili nato kini ipahilunag maayo, kini makapangos. Kon mao kinahanglang susihon natog maayo ang yugo diha sa atong mga abaga. Kon, sa usa ka hinungdan, ang yugo nagkinahanglan nang ayohon o wala mapasibog maayo, ang paggamit niana dili lamang magkinahanglan ug dugang paningkamot sa atong bahin kondili mopahinabog pila ka kasakit ingong resulta. Sa laing pagkasulti, kon ang teokratikanhong mga buluhaton daw usa na ka palas-anon kanato, kinahanglang atong susihon kon kini ba atong ginadumala sa hustong paagi. Unsay atong motibo sa pagbuhat sa atong ginabuhat? Kita ba hustong pagkaandam sa dihang kita motambong sa mga tigom? Kita ba andam sa pisikal ug mental sa dihang kita nagapakigbahin sa pag-alagad sa kanataran? Kita ba adunay suod ug maayong relasyon sa uban diha sa kongregasyon? Ug, labaw sa tanan, komosta ang atong personal nga relasyon kang Jehova nga Diyos ug sa iyang Anak, si Jesu-Kristo?
9. Nganong ang Kristohanong yugo dili gayod angay mahimong usa ka dili-madaog nga palas-anon?
9 Sa dihang bug-os-kasingkasing natong dawaton ang yugo nga gitanyag ni Jesus ug nakakat-on sa pagdala niini sa hustong paagi, walay katarongan nga mahimo kining daw usa ka dili na madaog nga palas-anon. Sa pagkatinuod, kon atong handurawon ang kahimtang—si Jesus ilalom sa mao ra nga yugo kanato—dili kita malisdan sa pagkakita kon kinsa gayod ang nagdala sa kinabug-atang bahin sa palas-anon. Sama kini sa usa ka gamayng bata nga nagsandig sa kaptanan sa iyang stroller, nga nagtuo nga siya ang nagtulod niini, apan ang tinuod, siyempre, ang ginikanan ang naghimo niini. Ingong usa ka mahigugmaong Amahan, si Jehova nga Diyos nahibalo kaayo sa atong mga limitasyon ug mga kahuyangan, ug siya mosanong sa atong mga panginahanglan pinaagi kang Jesu-Kristo. “Ang Diyos bug-os nga magahatag sa tanan ninyong panginahanglan kutob sa sukod sa iyang bahandi diha sa himaya pinaagi ni Kristo Jesus,” miingon si Pablo.—Filipos 4:19; itandi ang Isaias 65:24.
10. Unsa ang eksperyensiya sa usa nga seryosong midawat sa pagkadisipulo?
10 Daghang dedikadong mga Kristohanon nakaapresyar niini pinaagi sa kaugalingong kasinatian. Anaa, pananglitan, si Jenny, nga nakakita nga ang pag-alagad ingong usa ka oksilyare payunir matag bulan ug nagtrabaho nga bug-os panahon sa makatensiyon nga sekular nga trabaho nagpit-os niya pag-ayo. Apan, siya mibati nga ang buluhatong payunir aktuwal nga nakatabang kaniya sa pagpabiling timbang. Ang pagtabang sa mga tawo nga makakat-on sa kamatuoran sa Bibliya ug pagkakita kanila nga nagbag-o sa ilang mga kinabuhi aron makabaton sa pag-uyon sa Diyos—kini nakahatag kaniyag dakong kalipay sa iyang puliking kinabuhi. Siya kinasingkasing nga miuyon sa mga pulong sa proverbio nga nag-ingon: “Ang panalangin ni Jehova—kini nagapadato, ug siya wala magdugang ug kasakit uban niana.”—Proverbio 10:22.
Usa ka Gaan nga Luwan
11, 12. Unsay buot ipasabot ni Jesus sa dihang siya miingon: “Gaan ang akong luwan”?
11 Dugang pa sa pagsaad kanato ug “maluloton” nga yugo, si Jesus nagpasalig kanato: “Gaan ang akong luwan.” Ang “maluloton” nga luwan nagpahimo na sa trabaho nga mas masayon; kon ang luwan mapagaan usab, ang trabaho tinuod nga makapalipay. Apan, unsay anaa sa hunahuna ni Jesus nianang mga pulonga?
12 Palandonga kon unsay buhaton sa usa ka mag-uuma kon buot niya nga buhaton sa iyang mga hayop ang laing mga trabaho, ingnon ta gikan sa pagdaro sa uma ngadto sa pagguyod ug karomata. Iyang kuhaon una ang daro ug unya itaod ang karomata. Dili gayod makataronganon kon iyang itaod ug dungan ang daro ug ang karomata diha sa mga hayop. Sa susama, si Jesus wala magsulti sa mga tawo sa pagbutang sa iyang luwan ibabaw sa usa nga ila nang gipas-an. Siya miingon sa iyang mga tinun-an: “Walay sulugoon sa balay nga mahimong ulipon sa duha ka agalon.” (Lucas 16:13) Busa, si Jesus nagtanyag sa mga tawo ug kapilian. Buot ba silang magpadayon sa pagpas-an sa mabug-at nga luwan nga ila nang gipas-an, o ila ba kining ibutang ug dawaton ang iyang gitanyag? Si Jesus mihatag kanilag mahigugmaong pasibot: “Gaan ang akong luwan.”
13. Unsang luwan ang gipas-an sa mga tawo sa mga adlaw ni Jesus, ug uban sa unsang resulta?
13 Sa mga adlaw ni Jesus, ang mga tawo nagbaguod na sa mabug-at nga luwan nga gihatag kanila sa malupigong mga magmamandong Romano ug sa pormalistiko, maut nga relihiyosong mga lider. (Mateo 23:23) Sa usa ka pagsulay sa pagkuha sa yugo sa Roma, ang pila ka mga tawo misulay sa paghimog ilang kaugalingong mga kausaban. Sila nalangkit sa mga pakigsangka sa politika, nga misangpot lamang sa malaglagong kataposan. (Buhat 5:36, 37) Ang uban nangamas pag-ayo sa pagpauswag sa ilang kahimtang pinaagi sa sobrang pagpalangkit sa materyalistikong mga paningkamot. (Mateo 19:21, 22; Lucas 14:18-20) Sa dihang gitanyagan sila ni Jesus ug dalan sa kahupayan pinaagi sa pagdapit kanila nga mahimong iyang mga disipulo, dili tanan andam sa pagdawat. Sila nagpanuko sa pagbutang sa luwan nga ilang gipas-an, bisag mabug-at, ug sa pagpas-an sa iyang luwan. (Lucas 9:59-62) Pagkadakong kasaypanan!
14. Sa unsang paagi ang mga kabalaka sa kinabuhi ug materyal nga mga tinguha nagpabug-at kanato?
14 Kon kita dili mag-amping, mahimo usab nato ang samang kasaypanan karon. Ang pagkahimong disipulo ni Jesus magpahigawas kanato sa pagpangagpas sa mao ra gihapong mga tumong ug mga sukdanan sama sa ginahimo sa mga tawo sa kalibotan. Bisag kinahanglan gihapong mangamas kita sa pagtrabaho aron mabatonan ang adlaw-adlawng mga kinahanglanon, dili nato himoon kining mga butanga nga mahimong sentro sa atong kinabuhi. Bisan pa, ang mga kabalaka sa kinabuhi ug ang tentasyon sa materyal nga kaharuhay mahimong adunay gamhanang paghawid kanato. Kon atong tugotan kini, ang maong mga tinguha makatuok pa sa kamatuoran nga maikagon natong gidawat. (Mateo 13:22) Kita malinga kaayo sa pagtagana niining mga tinguhaa nga sa ingon ang atong Kristohanong mga responsibilidad mahimong makalaayng mga obligasyon nga himoon na lamang nato kini sa dinalidali ug minakina nga paagi. Siyempre dili gayod kita makalaom nga mobatig bisan unsang kahayahay gikan sa atong pag-alagad sa Diyos kon kini himoon sa ingon niana nga espiritu.
15. Unsang pasidaan ang gihatag ni Jesus bahin sa materyal nga mga tinguha?
15 Si Jesus miingon nga ang kinabuhing may katagbawan modangat, dili pinaagi sa pagpaningkamot sa pagtagana sa atong mga kagustohan, kondili sa pagtino sa mas hinungdanong mga butang sa kinabuhi. “Hunong na sa pagkabalaka bahin sa inyong mga kalag kon unsay inyong kan-on o unsay inyong imnon, o bahin sa inyong mga lawas kon unsay inyong isul-ob,” siya mitambag. “Dili ba ang kalag labaw nga bililhon kay sa pagkaon ug ang lawas kay sa bisti?” Unya iyang gipunting ang mga langgam sa langit ug miingon: “Wala sila magapugas ug binhi o magaani o magatigom ngadto sa mga balay-tipiganan; sa gihapon gipakaon sila sa inyong langitnong Amahan.” Naghisgot sa mga lirio sa kapatagan, siya miingon: “Wala sila magabudlay, ni magakalinyas; apan ako magaingon kaninyo nga bisan si Solomon sa tanan niyang himaya wala masul-obig ingon sa usa niini.”—Mateo 6:25-29.
16. Unsa ang gipakita sa eksperyensiya bahin sa mga epekto sa materyal nga mga pangagpas?
16 May makat-onan ba kita gikan niining simpleng pagtulon-an? Kasagaran nang kasinatian nga kon mas maningkamot ang tawo sa pagpauswag sa iyang kahimtang sa kinabuhi sa materyal nga paagi, mas mosamot siyag kagumon sa kalibotanong mga pangagpas ug mahimong mas mabug-at ang palas-anon sa iyang abaga. Ang kalibotan puno sa mga negosyante kinsa nagbayad sa ilang materyal nga mga kalamposan ug bungkag nga mga pamilya, gun-ob nga mga kaminyoon, dili-maayong mga panglawas, ug daghan pa. (Lucas 9:25; 1 Timoteo 6:9, 10) Ang nakadaog ug premyong Nobel nga si Albert Einstein kas-a miingon: “Ang mga kabtangan, gawasnong kalamposan, publisidad, kaluho—alang kanako kini wala gayoy kapuslanan. Nagtuo ako nga ang usa ka simple ug walay pagkasalingkapawng paagi sa kinabuhi mao ang labing maayo alang sa tanan.” Kini nagpalanog lamang sa simpleng tambag ni apostol Pablo: “Maoy usa ka dakong ganansiya, kining diyosnong pagkamahinalaron uban ang pagkatagbaw sa kaugalingon.”—1 Timoteo 6:6.
17. Unsang matanga sa pagkinabuhi ang girekomendar sa Bibliya?
17 Adunay usa ka hinungdanong bahin nga dili nato angay kalimtan. Bisan pag “ang usa ka simple ug walay pagkasalingkapawng paagi sa kinabuhi” adunay daghang bentaha, kini dili gihapon mohatag ug katagbawan. Adunay daghan kansang paagi sa pagkinabuhi maoy simple tungod sa dili-kalikayang mga sirkumstansiya, bisan pa sila dili gihapon kontento o malipayon. Ang Bibliya wala mag-agda kanato nga atong isalikway ang pagkalipay sa materyal ug magkinabuhi samag usa ka ermitanyo. Ang gihatagag pasiugda mao ang diyosnong pagkamahinalaron, dili ang pagkatagbaw sa kaugalingon. Diha lamang nato mabatonan ang “dakong ganansiya” kon atong ilangkob ang duha. Unsa nga ganansiya? Sa unahan pa nianang sulata, gipakita ni Pablo nga kadtong “magpahimutang sa ilang paglaom, dili sa walay-kasegurohang bahandi, apan sa Diyos,” “maampingong magatipig alang sa ilang kaugalingon ug usa ka maayong patukoranan alang sa umalabot, aron nga sila makagunit nga hugot sa tinuod nga kinabuhi.”—1 Timoteo 6:17-19.
18. (a) Sa unsang paagi ang usa makakita ug matuod nga kahayahay? (b) Sa unsang paagi pagalantawon nato ang mga kausaban nga atong pagahimoon?
18 Kita makabaton ug kahayahay kon magtuon kita sa pagbutang sa atong personal mabug-at nga luwan nga tingalig atong ginapas-an ug pas-anon ang gaan nga luwan nga gitanyag ni Jesus. Daghan niadtong nag-organisar pag-usab sa ilang mga kinabuhi aron sila makapakigbahin sa bug-os pa diha sa pag-alagad sa Gingharian nakakita sa dalan padulong sa kinabuhi nga may kalipay ug katagbawan. Sa pagkamatuod, nagkinahanglag pagtuo ug kaisog aron ang usa makahimo nianang lihoka, ug tingali may mga babag ang maagian. Apan ang Bibliya nagpahinumdom kanato: “Siya nga nagpaniid sa hangin dili makapugas; ug siya nga nagtan-aw sa mga panganod dili makaani.” (Ecclesiastes 11:4) Daghang butang sa pagkamatuod dili malisod sa dihang makadesisyon kita nga himoon kini. Daw ang kinalisorang bahin mao ang atong paghimog desisyon. Mahimong mapahago nato ang atong kaugalingon tungod sa pagpakigbisog o sa pagsalikway sa malisod nga buluhaton. Kon andamon nato ang atong mga hunahuna ug dawaton ang hagit, basin matingala kita sa pagkakita nga pagkadako diay kini nga panalangin. Ang salmista nag-awhag: “Tilawi ug tan-awa nga si Jehova maayo, Oh kamo nga katawhan.”—Salmo 34:8; 1 Pedro 1:13.
“Kahayahay Alang sa Inyong mga Kalag”
19. (a) Unsay atong mapaabot samtang ang mga kahimtang sa kalibotan padayon nga nagakadaot? (b) Samtang ilalom sa yugo ni Jesus, bahin sa unsa nga kita makasalig?
19 Gipahinumdoman ni apostol Pablo ang unang-siglong mga disipulo: “Kita kinahanglang mosulod sa gingharian sa Diyos pinaagi sa daghang kasakitan.” (Buhat 14:22) Matuod gihapon kana karon. Samtang ang mga kahimtang sa kalibotan padayon nga nagakadaot, ang mga pag-ipit nga modangat sa tanan nga determinadong magkinabuhi sa pagkamatarong ug diyosnong pagkamahinalaron mosamot pa. (2 Timoteo 3:12; Pinadayag 13:16, 17) Bisan pa, bation nato ang gibati ni Pablo sa dihang siya miingon: “Kami ginapiit sa tanang paagi, apan dili hagip-ot nga dili na makalihok; kami nalibog, apan dili bug-os nga walay kalingkawasan; kami ginalutos, apan wala biyaing nag-ungaw sa kapildihan; kami nangatumba, apan wala malaglag.” Ang katarongan mao nga kita makasalig kang Jesu-Kristo nga mohatag kanato ug kusog nga labaw sa kasarangan. (2 Corinto 4:7-9) Pinaagi sa pagdawat sa yugo sa pagkadisipulo sa bug-os-kasingkasing, kita makatagamtam sa katumanan sa saad ni Jesus: “Makakaplag kamog kahayahay alang sa inyong mga kalag.”—Mateo 11:29.
Makapatin-aw Ka Ba?
◻ Unsa ang malulot nga yugo ang gitanyag ni Jesus?
◻ Unsay angay natong himoon kon bation nato nga ang atong yugo nagakabug-at?
◻ Unsay buot ipasabot ni Jesus sa dihang siya miingon: “Gaan ang akong luwan”?
◻ Sa unsang paagi makaseguro kita nga magpabiling gaan ang atong luwan?