Tagamtama ang “Tinuod nga Kinabuhi”

SI Jehova nga Diyos naghatag sa tawo ug kaamgohan labot sa walay kataposan. (Ecclesiastes 3:11) Kini nagpabati sa tawo nga walay gahom atubangan sa kamatayon apan, sa samang panahon, nagpukaw diha kanila ug dakong tinguha nga mabuhi sa walay kataposan.

Ang Bibliya, ang dinasig nga Pulong sa Diyos, naghatag kanato ug dakong paglaom. (2 Timoteo 3:16) Si Jehova, nga mao ang diwa sa gugma, dili mahitabong naghimo sa tawo nga may katakos sa pagsabot sa ideya bahin sa walay kataposan ug dayon hukman siya nga mabuhi sa pipila lamang ka tuig. Ang paglalang kanato nga pagasakiton tungod sa atong kahimtang maoy sa yano sukwahi sa personalidad sa Diyos. Kita wala lalanga nga samag “walay-pangatarungang mga hayop nga kinaiyanhong gipanganak aron dakpon ug laglagon.”​—2 Pedro 2:12.

Sa paglalang kang Adan ug Eva nga adunay usa ka kinaiyanhong pagbati labot sa walay kataposan, si Jehova nga Diyos naghimog usa ka butang nga “maayo kaayo”; iyang gihimo sila nga may posibilidad nga mabuhi sa walay kataposan. (Genesis 1:31) Apan ikasubo, giabusohan sa unang magtiayon ang ilang kagawasan sa pagpili, gisupak ang tin-awng pagdili gikan sa Maglalalang ug nawad-an sa ilang orihinal nga kahingpitan. Tungod niini, sila namatay, nga nakapasa sa pagkadili-hingpit ug kamatayon ngadto sa ilang mga anak.​—Genesis 2:17; 3:1-24; Roma 5:12.

Ang Bibliya wala magpadayag ug misteryo labot sa katuyoan sa kinabuhi ug kon unsay kahulogan sa kamatayon. Kini nag-ingon nga sa kamatayon “walay buluhaton ni lalang ni kahibalo ni kaalam” ug nga ang patay “dili mahibalo sa bisan unsa.” (Ecclesiastes 9:5, 10) Sa laing pagkasulti, ang patay maoy patay. Ang doktrina nga dili-mamatay ang kalag dili Biblikanhon, busa wala gayoy misteryo nga pagasulbaron bahin sa kahimtang sa mga patay.​—Genesis 3:19; Salmo 146:4; Ecclesiastes 3:19, 20; Ezequiel 18:4.a

Ang Diyos adunay katuyoan; wala niya lalanga ang yuta “alang lamang sa walay kapuslanan.” Iyang gihimo kini “aron pagapuy-an” sa mga tawong hingpit sa paraiso nga mga kahimtang, ug wala usba sa Diyos ang iyang katuyoan. (Isaias 45:18; Malaquias 3:6) Aron matuman kini, iyang gipadala ang iyang Anak dinhi sa yuta. Pinaagi sa pagpabiling matinumanon hangtod sa kamatayon, si Jesu-Kristo nagtagana sa paagi sa paglukat sa katawhan gikan sa sala ug kamatayon. Sa pagkamatuod, si Jesus nag-ingon: “Gihigugma pag-ayo sa Diyos ang kalibotan mao nga iyang gihatag ang iyang bugtong nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.”​—Juan 3:16.

Sa dugay na kaayong panahon kanhi, ang Diyos nagsaad nga siya maghimo ug “bag-ong mga langit ug usa ka bag-ong yuta.” (Isaias 65:17; 2 Pedro 3:13) Kana naglangkit sa iyang pagpili ug usa ka limitadong pundok sa matinumanong mga Kristohanon alang sa kinabuhi sa langit. Uban kang Jesu-Kristo, sila mahimong pundok sa pangkagamhanan. Ang Bibliya naghisgot niini ingong “ang gingharian sa mga langit,” o “gingharian sa Diyos,” nga maoy magdumala sa “mga butang sa yuta.” (Mateo 4:17; 12:28; Efeso 1:10; Pinadayag 5:9, 10; 14:1, 3) Human sa paglaglag sa tanang pagkawalay-diyos sa atong kalibotan ug sa paghinlo niini, ang Diyos magpatunghag usa ka matarong bag-ong tawhanong katilingban, o “bag-ong yuta.” Kini naglakip sa mga tawo nga panalipdan sa Diyos latas sa haduol nga kalaglagan niining daotang sistema sa mga butang. (Mateo 24:3, 7-14, 21; Pinadayag 7:9, 13, 14) Sila pagaduyogan niadtong pagabanhawon pinaagi sa gisaad nga pagkabanhaw.​—Juan 5:28, 29; Buhat 24:15.

Ang “Tinuod nga Kinabuhi” Unya

Sa paglig-on sa kulbahinam nga paghubit sa kinabuhi sa umaabot nga Paraisong yuta, ang Diyos nag-ingon: “Tan-awa! Ginabag-o ko ang tanang butang.” (Pinadayag 21:5) Imposible gayod nga matugkad sa tawhanong hunahuna ang katingalahang mga buhat nga himoon sa Diyos alang sa katawhan. Ang Diyos maglalang ug tibuok-kalibotang paraiso, nga sinundog gikan sa Eden. (Lucas 23:43) Sama sa Eden, ang katahom ug kaanindot sa kolor, tingog, ug panglami dagaya unya. Ang kakabos ug kakulang sa pagkaon mawala na, kay bahin nianang panahona ang Bibliya nag-ingon: “Ang kanhing mga butang mitaliwan na.” (Pinadayag 21:4; Salmo 72:16) Wala na unyay moingon, “May sakit ako,” kay ang balatian wagtangon sa walay kataposan. (Isaias 33:24) Oo, ang tanang hinungdan sa kasakit mahanaw, lakip ang dugay nang kaaway sa tawo, ang kamatayon. (1 Corinto 15:26) Diha sa usa ka katingalahang panan-awon sa “bag-ong yuta,” ang bag-ong tawhanong katilingban ubos sa pagmando ni Kristo, si apostol Juan nakadungog ug tingog nga nag-ingon: “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.” Unsa pay labaw nga makahatag kahupayan ug kalipay kay sa katumanan niining saad sa Diyos?

Sa naghubit sa umaabot nga kinabuhi, gipasiugda sa Bibliya ilabina ang mga kahimtang nga magtagbaw sa moral ug espirituwal nga mga tingusbawan sa tawo. Ang tanang makataronganong mga tinguha nga sa kawang gipanglimbasogan sa tawo hangtod karon bug-os unya nga mabatonan. (Mateo 6:10) Lakip niini mao ang pagtinguhag hustisya, nga wala gihapon makab-ot tungod kay ang tawo kanunay gisakit sa mapintas nga mga daogdaogan nga nagharihari sa mahuyang. (Ecclesiastes 8:9) Ang salmista matagnaong nagsulat ilalom sa pagmando ni Kristo: “Sa iyang mga adlaw ang matul-id molambo, ug dagaya ang pakigdait.”​—Salmo 72:7, The New Jerusalem Bible.

Ang panag-angay maoy laing tingusbawan nga niini daghan ang nagsakripisyo. Diha sa “paglalang pag-usab,” wagtangon sa Diyos ang pagpihig. (Mateo 19:28) Tagamtamon sa tanan ang samang dignidad. Kini dili panag-angay nga gipahamtang sa pipila ka mabangis nga rehimen sa pangkagamhanan. Sa kasukwahi, ang mga hinungdan sa pagpihig pagawagtangon, lakip ang kahakog ug garbo nga nag-agak sa mga tawo sa pagmando ibabaw sa uban o sa pagtigom ug hilabihan ka daghang kabtangan. Si Isaias nagtagna: “Sila magatukod ug mga balay ug magapuyo niini; ug sila gayod magatanom ug kaparasan ug magakaon sa bunga niini. Sila dili magatukod ug lain ang magapuyo; sila dili magatanom ug lain ang magakaon.”​—Isaias 65:21, 22.

Pagkadako sa pag-antos sa tawo tungod sa pag-ulag dugo sa personal ug katibuk-ang panaggubat! Kini nagpadayon gikan sa pagpatay kang Abel ngadto sa mga gubat sa presenteng panahon. Pagkadugay nang nangandoy ug nagpaabot ang mga tawo, nga daw kawang, aron matukod ang pakigdait! Sa ipasig-uling Paraiso, ang tanang tawo mahimong makigdaiton ug maaghop; sila “makakaplag sa ilang tugob nga kalipay diha sa kadagaya sa pakigdait.”​—Salmo 37:11.

Ang Isaias 11:9 nag-ingon: “Ang yuta mapuno sa kahibalo bahin kang Jehova ingon sa mga tubig nga nagatabon sa dagat.” Tungod sa napanunod nga pagkadili-hingpit, lakip sa ubang mga butang, imposible nga atong bug-os nga masabtan karon ang gilapdon niadtong mga pulonga. Kon sa unsang paagi ang hingpit nga kahibalo sa Diyos magpahiusa kanato uban kaniya ug kon sa unsang paagi kana mosangpot ug bug-os nga kalipay, kana atong pagakat-onon pa. Apan kay ang Kasulatan nagpahibalo kanato nga si Jehova maoy usa ka Diyos nga katingalahan sa gahom, kaalam, hustisya, ug gugma, kita makatino nga iyang patalinghogan ang tanang pag-ampo nga ipahayag sa mga molupyo sa “bag-ong yuta.”

“Ang Tinuod nga Kinabuhi” Segurado Gayod​—Hawiri Kana!

Alang sa kadaghanan, ang kinabuhing walay kataposan diha sa usa ka mas maayong kalibotan maoy usa lamang ka damgo o usa ka ilusyon. Apan, alang niadtong tinuod nga adunay pagtuo sa saad sa Bibliya, kining paglaoma segurado gayod. Sama kini sa usa ka angkla alang sa ilang mga kinabuhi. (Hebreohanon 6:19) Sama nga ang angkla naghawid sa barko ug nagpugong niana nga dili malambalamba, ang paglaom nga kinabuhing walay kataposan maghimo sa mga tawo nga malig-on ug masaligon ug magpaarang kanila sa pagsagubang sa grabeng mga kalisdanan sa kinabuhi ug bisan sa pagbuntog niini.

Kita makapaneguro nga tumanon sa Diyos ang iyang mga saad. Siya naghatag pa gani ug pasalig pinaagi sa pagbungat ug usa ka panumpa, usa ka dili-mausab nga panaad. Si apostol Pablo nagsulat: “Ang Diyos, sa diha nga iyang gihimong katuyoan nga ipasundayag nga mas dagaya ngadto sa mga manununod sa saad ang pagkadili-mausab sa iyang gimbut-an, nangilabot uban ang usa ka panumpa, aron nga, pinaagi sa duha ka dili-mausab nga butang nga niini imposible sa Diyos nga mamakak, kita . . . makabaton ug kusganong pagdasig nga mangupot sa paglaom nga gipahimutang atubangan kanato.” (Hebreohanon 6:17, 18) Ang “duha ka dili-mausab nga butang” nga dili gayod mahimong ipakawang sa Diyos mao ang iyang saad ug iyang panumpa, nga niana atong gipasukad ang atong mga pagdahom.

Ang pagtuo sa mga saad sa Diyos naghatag ug dakong kahupayan ug espirituwal nga kalig-on. Si Josue, usa ka lider sa katawhang Israel, adunay ingon niana nga pagtuo. Sa dihang gihatag ni Josue ang iyang pakigpulong sa pagpanamilit ngadto sa mga Israelinhon, siya tigulang ug nahibalo nga siya hapit nang mamatay. Bisan pa niana, siya nagpakitag kalig-on ug dili-mabungkag nga pagkamaunongon, nga nagagikan sa bug-os nga pagsalig sa mga saad sa Diyos. Human sa pag-ingon nga siya moadto “sa dalan sa tibuok kayutaan,” ang dalan nga nagtultol sa tanang tawo ngadto sa kamatayon, si Josue miingon: “Kamo nahibalo sa bug-os ninyong mga kasingkasing ug sa bug-os ninyong mga kalag nga walay usa ka butang nga nakawang sa tanang maayong mga pulong nga gisulti ni Jehova nga inyong Diyos. Kining tanan natuman diha kaninyo. Walay usa ka pulong niana nga nakawang.” Oo, tulo ka higayong gisubli ni Josue nga ang Diyos motuman gayod kanunay sa tanan niyang mga saad.​—Josue 23:14.

Ikaw usab makabaton sa samang pagtuo sa saad sa Diyos sa usa ka bag-ong kalibotan nga pagatukoron sa dili madugay. Pinaagi sa kinasingkasing nga pagtuon sa Bibliya, imong masabtan kon kinsa si Jehova ug kon nganong siya takos sa imong bug-os nga pagsalig. (Pinadayag 4:11) Si Abraham, Sara, Isaac, Jacob, ug ubang mga matinumanon sa karaan adunay dili-mabungkag nga pagtuo, nga gipasukad sa ilang suod nga kahibalo sa matuod nga Diyos, si Jehova. Sila nagpabiling malig-on sa paglaom, bisan pa sa kamatuoran nga sila “wala makabaton sa katumanan sa mga saad” samtang sila buhi pa. Apan, “ilang nakita kini sa halayo ug nanaghangop niini.”​—Hebreohanon 11:13.

Kay nakasabot sa mga tagna sa Bibliya, ato karong makita ang pagsingabot sa “dakong adlaw sa Diyos nga Labing-Gamhanan,” nga nianang panahona ang yuta pagahinloan sa tanang pagkadaotan. (Pinadayag 16:14, 16) Sama sa matinumanong mga tawo sa karaan, kita kinahanglang magpabiling masaligon sa pagpaabot sa umaabot nga mga hitabo, nga tinukmod sa pagtuo maingon man sa gugma alang sa Diyos ug sa “tinuod nga kinabuhi.” Ang pagkaduol sa bag-ong kalibotan nagtagana ug malig-ong panukmod alang niadtong nagpasundayag ug pagtuo kang Jehova ug nga nahigugma kaniya. Ang maong pagtuo ug gugma kinahanglang ugmaron aron makabaton sa pabor ug panalipod sa Diyos panahon sa iyang dakong adlaw, nga haduol na.​—Sofonias 2:3; 2 Tesalonica 1:3; Hebreohanon 10:37-39.

Busa, ikaw ba nahigugma sa kinabuhi? Ug labi pa ba gayod nimong gitinguha ang “tinuod nga kinabuhi”​—kinabuhi ingong usa ka inuyonang alagad sa Diyos, nga may palaabotong usa ka malipayong umaabot, oo, nga anaa sa hunahuna ang kinabuhing walay kataposan? Kon mao kanay imong gipangita, sunda ang tambag ni apostol Pablo, kinsa nagsulat nga angay natong ‘ipahimutang ang atong paglaom, dili sa walay-kasegurohang bahandi, kondili sa Diyos.’ Si Pablo nagpadayon: “Magmadato sa maayong mga buhat,” nga nagpasidungog sa Diyos, aron “makagunit nga hugot sa tinuod nga kinabuhi.”​—1 Timoteo 6:17-19.

Pinaagi sa pagdawat sa tanyag sa usa ka pagtuon sa Bibliya uban sa mga Saksi ni Jehova, ikaw makabaton ug kahibalo nga “nagkahulogan ug kinabuhing walay-kataposan.” (Juan 17:3) Sa mahigugmaon, ang Bibliya nagrekord niining inamahang imbitasyon ngadto sa tanan: “Anak ko, ayaw kalimti ang akong kasugoan, ug pabantayi sa imong kasingkasing ang akong mga sugo, kay ang kadugayon sa mga adlaw ug mga tuig sa kinabuhi ug pakigdait igadugang kanimo.”​—Proverbio 3:1, 2.

[Footnote]