Mga Batan-on nga Adunay Seguradong Kaugmaon

“SAMA ka makalilisang ug ka ngilngig sa bisan unsa [nga kaso sa pagpanglugos]”​—mao kana ang paghubit sa krimen sa usa ka huwes nga nagdumala sa usa ka di pa dugayng kaso. Usa ka grupo sa walo ka tin-edyer, nga nag-edad ug gikan sa 14 ngadto sa 18 anyos, mibanhig sa usa ka babayeng turista sa sulod nga dapit sa siyudad sa London, nagsublisubli paglugos kaniya, ug unya naglabay kaniya ngadto sa duol nga kanal bisan tuod matod niya dili siya makamaong molangoy. Masabot, ang inahan sa usa sa mga tin-edyer mipahayag nga naluya siya sa iyang nakita sa mga balita sa TV bahin sa gibuhat sa iyang anak lalaki.

Ikasubo, kining maong hitabo nagbanaag kon unsay nagakahitabo sa katilingban karong adlawa. Ang kaluog nahimong maoy lagda, sa kriminal man nga kalihokan, panag-away diha sa panimalay, o sa etnikong mga panagbangi sa kayutaan sa Balkan, sentral ug kasadpang Aprika, ug bisan asa. Ang mga batan-on nagtubo taliwala sa maong mga kahimtang, o sila subsob nga makabati bahin niana. Nan, dili ikahibulong nga daghan ang nahimong matig-a, “walay kinaiyanhong pagbati,” ug “walay pagpugong-sa-kaugalingon.”​—2 Timoteo 3:3.

“Mabangis”

Sa dihang ang Kristohanong apostol nga si Pablo misulat sa iyang ikaduhang sulat ngadto sa iyang kaubang ansiyano nga si Timoteo, ang Roma mao ang nagamandong gahom sa kalibotan. Ang pagkamadagmalon ug pagkasalbahis maoy kaylap sa Romanhong mga dulaanan. Bisan pa niana, mipasidaan si Pablo nga sa umaabot, ang mga panahon mahimong “lisod sagubangon.” (2 Timoteo 3:1) Makaiikag, ang Gregong pulong nga nagbatbat niining mga panahona nga “lisod sagubangon” naglakip sa hunahuna nga kini “mabangis.” Ang usa ka hitabo panahon sa yutan-ong ministeryo ni Jesus kapin sa 30 ka tuig una pa niana nagpakita kon unsay nagpaluyo sa pipila sa pagkamananapon sa iyang panahon.

Bag-o pa lang miabot si Jesus lulan sa sakayan sa sidlakang baybayon sa Dagat sa Galilea. Pagkawas niya sa baybayon, duha ka lalaki ang miharong kaniya. Ang ilang nagkalamukat nga panagway ug pagsinggit nagpatin-aw nga may diperensiya gayod sila. Sila “talagsaon kabangis,” sa pagkatinuod, hingyawaan.a Ang ilang gisinggit naggikan sa daotang mga espiritu nga nagkontrolar sa ilang mapintas nga mga lihok. “Unsay labot namo kanimo, Anak sa Diyos?” naninggit ang mga lalaki. “Mianhi ka ba dinhi sa pagsakit kanamo sa dili pa ang tinudlong panahon?” Ang daotang mga espiritu nga naggahom sa duha nasayod kaayo nga ang Diyos nagtakda na ug panahon sa pagpahamtang sa iyang paghukom sa mga demonyo. Magkahulogan kini sa ilang walay kataposang kalaglagan. Apan hangtod nianang panahona ilang ipakita ang ilang labaw-tawhanong mga katakos sa pagpahinabo ug mabangis nga kapintasan. Ang milagrosong aksiyon lamang ni Jesus sa pagpagawas sa maong mga demonyo ang nagdalag kahupayan sa duha ka lalaki.​—Mateo 8:​28-32; Judas 6.

Sa dihang ang mga tawo karong adlawa, lakip ang mga batan-on, molihok sa binuang nga paagi, maayong hinumdoman nato ang maong hitabo. Ngano? Tungod kay niining ika-20ng siglo, kita nag-atubang sa susamang kapeligrohan, sumala sa gipatin-aw sa kataposang basahon sa Bibliya, ang Pinadayag: “Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:12) Matikdi, palihog, nga kining maong pagpakaulaw kang Satanas dinuyogan sa “dakong kasuko” tungod kay siya nahibalo nga mubo na lamang ang iyang panahon.

Giatake

Sumala sa gihisgotan kanunay sa mga panid niining magasina, sa tuig 1914 gientrono si Kristo Jesus ingong Hari sa Gingharian sa Diyos sa langit. Milihok dayon si Jesus batok sa pangunang kaaway sa Diyos, si Satanas. Busa, ang Yawa ug ang iyang mga demonyo gipapahawa gikan sa langit, ug sila karon nagsentro sa ilang pagtagad niining yuta. (Pinadayag 12:​7-9) Sanglit ang iyang natad sa impluwensiya gikutohan pag-ayo, si Satanas “nagasuroysuroy sama sa usa ka leyon nga nagangulob, nga nagapangita ug usa nga matukob.” (1 Pedro 5:8) Kinsay sayon nga matukob niya? Dili ba masabot nga ilabina kadtong nakulangan sa kasinatian sa kinabuhi ug tawhanong mga relasyon? Ang mga batan-on karong adlawa sa ingon maoy gipuntirya sa Yawa. Pinaagi sa kadaghanan sa ilang musika ug sa gipangitang lulinghayaw, nahulog sila sa mga kamot niining dili makita malipatlipatong tigmaniobra.​—Efeso 6:​11, 12.

Bisan sa dihang ang mga batan-on maningkamot nga magmalamposon ang ilang kinabuhi, nababagan gihapon ang ilang pag-uswag. Sukad sa kataposan sa Gubat sa Kalibotan II, ang mga tawo sa daghang nasod nga naggubatay kanhi naningkamot sa pagbalos pinaagi sa pagtanyag sa ilang mga pamilya ug maluhong estilo sa kinabuhi. Ang materyal nga mga kabtangan, walay-pugong nga lulinghayaw, ug kalingawan nahimong pangunang mga tumong. Ingong sangpotanan, daghan ang nag-antos. “Silang kinsa determinadong madato,” gipasidan-an ni Pablo si Timoteo, “mangahulog sa tentasyon ug sa lit-ag ug sa daghang binuang ug makadaot nga mga tinguha . . . Kay ang gugma sa salapi maoy usa ka gamot sa tanang matang sa makadaot nga mga butang, ug sa pagpangab-ot niini nga gugma ang pipila . . . nagtusaktusak sa ilang kaugalingon sa daghang kasakit.” (1 Timoteo 6:​9, 10) Sa katibuk-an, makaplagan nato ang katawhan sa materyalistikong katilingban karon nga natusaktusak sa ekonomikanhon, pinansiyal, ug emosyonal nga mga kasakit. Lakip kanila ang daghang batan-on, mga biktima niining taktika sa pangunang kaaway sa Diyos.

Apan, ikalipay nga adunay maayong balita. Ug kini naglangkit sa mga batan-on, kadtong adunay seguradong kaugmaon sa ilang unahan. Sa unsang paagi kini mahitabo?

Pangita ug Ikaw Makakaplag

Daghang batan-on ang adunay hamiling mga mithi. Gisalikway nila ang nagakadaot nga mga sukdanan nga kasagaran taliwala sa mga hamtong. Giayran nila ang inhustisya ug dili-mabinationg tinamdan sa uhaw sa gahom nga mga politiko ug mga negosyante. Kon ikaw batan-on, tingali mao kini ang imong gibati.

Tagda si Cedric, usa ka ulitawo nga magbayente anyos na, kansang kasinatian dili talagsaon.b Sa bata pa, daghan siyag gikahadlokan, lakip ang kahadlok sa kamatayon. Siya nahibulong kon unsay katuyoan sa kinabuhi. Kay wala makakaplag ug mga tubag sa iyang mga pangutana sa pag-edad niyag 15 anyos, gitugyan niya ang iyang kaugalingon sa pagpalandong mahitungod sa kinabuhi kauban sa ubang mahandurawong mga batan-on. “Magyupyop kami ug dope ug magyampungad nga mag-estoryahanay sulod sa daghang oras,” siya nahinumdom. “Bation nimong ang tanan naghunahuna nga sama sa imong gihunahuna, apan walay nakabaton sa mga tubag.”

Si Cedric, sama sa daghang batan-on, nagtinguha sa paukyab. Ang paggamit lamang ug droga wala magtagbaw kaniya. Sa wala madugay nalangkit siya sa pagpangawat ug pagpayuhot ug mga droga. Sa gihapon nangita siya ug bag-ong mga paukyab. Misugod siya sa pagpangawat alang sa gipedidong mga butang. “Nalingaw ako sa pagbuhat niini,” siya miangkon. “Apan dili ako mangawat ug butang gikan sa ordinaryong tawo. Kon mangawat ko ug kotse, biyaan nako kana sa maayong kahimtang. Kon akong lungkabon ang usa ka negosyo, buhaton lamang nako kana kon ako nahibalo nga kana may madawat sa insyurans. Nakatabang kana kanako sa pagpakamatarong sa akong gibuhat.” Ingon sa madahom tingali nimo, sa kataposan nabilanggo si Cedric.

Nahinumdom si Cedric: “Si Mark, usa ka kaubang binilanggo, nakigsulti kanako. Nakamatikod nga ako adunay dakong krus nga gipatik sa akong bukton, gipangutana niya ako kon nganong nakabaton ako niana. Siya naghunahuna nga hinungdanon gayod kana kanako sa relihiyosong paagi.” Duha ka semana sa ulahi, si Mark naghatag kang Cedric ug kopya sa librong Ikaw Mabuhing Walay Kataposan sa Paraiso sa Yuta.c “‘Ikaw Mabuhing Walay Kataposan’​—kanang pipila ka pulong nakaapektar dayon kanako. Mao kanay kanunay namong hisgotan, apan wala gayod namo matugkad kana.” Human sa daghang panaghisgot kauban sa usa sa mga Saksi ni Jehova nga miduaw sa bilanggoan, si Cedric nakaamgo nga ang iyang gitinguha mahimong makab-ot​—apan sa paagi lamang nga iya sa Diyos.

“Sa dihang mihunong na ako sa pagpakig-uban sa akong kanhing mga higala, kusog ang akong pag-uswag,” matod ni Cedric. Ang iyang pag-uswag sa pagsabot ug kalipay dili sayon. “Naningkamot pa gihapon ako niana,” siya miingon. “Kinahanglang magmabinantayon ako sa paagi nga ako maghunahuna.” Oo, si Cedric nakasabot karon nga ang pagkamahandurawon nagtultol kaniya ngadto sa bitik sa Yawa, nga naghunahuna nga ang iyang mga tumong makab-ot lamang pinaagi sa pag-apil sa mga kalihokan nga nasentro sa paukyab.

Ikalipay, si Cedric dugay nang nakagawas sa bilanggoan, ug siya nakapahimulos sa kanunayng pakig-uban sa uban nga nakakaplag kon unsay ilang gipangita. Siya karon usa na sa mga Saksi ni Jehova ug nakig-ambit sa ilang paglaom nga mabuhi sa Paraiso dinhi sa yuta. Nagalaom usab siya sa kataposan sa satanikong impluwensiya sa tanang matang niini.

Siyempre, dili lamang ang mga batan-on sama kang Cedric ang adunay seguradong kaugmaon; ang uban gimatuto sa diyosnong mga ginikanan, nga nagsilsil diha sa ilang mga anak sa gugma sa kamatuoran sa Bibliya.

Diyosnong Pagbansay Adunay Ganti

“Bansaya ang bata sumala sa dalan alang kaniya; bisan kon siya matigulang na dili siya mobiya niana,” misulat ang maalamong Haring Solomon sa kakaraanan. (Proverbio 22:6) Kini napamatud-ang matuod sa kaso sa daghang bug-os-kalag nga mga batan-on nga mipili sa pagsunod sa sukdanan sa Bibliya.

Si Sheila, Gordon, ug Sarah mihimo niini. Nahinumdoman nila nga gipakaimportante kaayo sa ilang mga ginikanan ang pagsugot sa sugo ni Kristo nga ‘manglakaw ug maghimog mga tinun-an’ pinaagi sa pagsangyaw sa maayong balita sa Gingharian. (Mateo 24:​14; 28:​19, 20) “Sa bisan unsang desisyon nga kinahanglang himoon, si Mama ug ako moingon sa usag usa, ‘Sa unsang paagi mag-apektar kini sa buluhatong pagsangyaw?’” nahinumdom si Sheila. “Among gihunong ang daghang proyekto ingong sangpotanan niining maong pangatarongan,” siya miangkon, nga midugang, “apan pagkadakong mga panalangin ang among nabatonan!” Bisan sa kataposan sa tibuok nga mga adlawng pagduaw sa kabalayan sa mga tawo dala ang maayong balita, si Sheila ug ang iyang inahan magbaktas sa pagpauli nga manganta. “Tugob ang akong kangaya,” siya miingon. “Gibati nako kana karon.”

Si Gordon nahinumdom sa daghang makalingaw nga mga Sabado sa gabii. “Gidapit ako sa mga panimalay sa mga ansiyano sa kongregasyon, diin diha kamiy mabungahong mga pasulit ug mga panaghisgot. Gidasig kami sa pagsag-ulo ug mga bersikulo gikan sa Bibliya, dagayang pagpakigsulti bahin sa Kasulatanhong mga ulohan, pag-asoy ug mga kasinatian sa pagsangyaw, ug pagkahibalo kon sa unsang paagi ang buluhaton sa Gingharian nagauswag,” nahinumdom si Gordon. “Kining tanang butang nakatabang kanako sa pagpahiluna ug maayong patukoranan ug sa pag-ugmad sa gugma alang kang Jehova nga Diyos.”

Si Sarah adunay malipayong mga handomanan sa mga gabii nga gigugol uban sa nagaduawng mga Saksi. “Dungan kaming mangaon. Unya sa pagtapos sa adlaw, nagtugtog kami sa piano, nga duyogan kadtong nagaawit ug mga awit bahin sa Gingharian sa Diyos. Ang musika nakatabang gayod kanamo pag-ayo, ilabina panahon sa among pagtungha, tungod kay nagtugot kini kanamo sa paghimo sa mga butang nga tingob ingong pamilya.”

Siyempre, dili ang tanang batan-on nga naningkamot sa pagpahimuot kang Jehova ang adunay maayong mga kahimtang sa pamilya. Bisan pa niana, ang suod nga pakig-uban sa ubang Saksing mga pamilya sa kongregasyon naghatag kanila ug kasegurohan ug usa ka pagbati sa kasuod.

Pabilhi ang Seguradong Patukoranan Alang sa Umaabot

Ang mga batan-on karon adunay kapilian. Sila makapadayon uban niining daotang kalibotan samtang kini nagapadulong ngadto sa kalaglagan sa umaabot nga “dakong kasakitan” nga gitagna ni Jesus. O sila “makasalig sa Diyos mismo ug . . . magtuman sa iyang kaugalingong mga sugo,” ingon sa giawit sa inspiradong salmistang Asap. Ang pagsugot sa Diyos manalipod kanila nga mahimong “usa ka kaliwatan nga gahian ug masukihon, usa ka kaliwatan nga wala mag-andam sa ilang kasingkasing ug kansang espiritu dili kasaligan sa Diyos.”​—Mateo 24:​21; Salmo 78:​6-8.

Sa kapin sa 80,000 ka kongregasyon sa mga Saksi ni Jehova sa tibuok kalibotan, makaplagan nimo ang daghang batan-on nga madayeg nimo. Gituman nila ang tambag ni Pablo ngadto sa batan-ong Timoteo nga “magbuhat sa maayo, nga magmadato sa maayong mga buhat, nga magmahinatagon, andam sa pagpaambit, nga maampingong magatipig alang sa ilang kaugalingon ug usa ka maayong patukoranan alang sa umalabot.” Ingong resulta, sila karon ‘nakagunit nga hugot sa tinuod nga kinabuhi.’ (1 Timoteo 6:​18, 19) Pagsusi ug dugang bahin niining tinuod nga mga Kristohanon pinaagi sa pagtambong sa ilang mga tigom. Unya ikaw usab makabaton sa paglaom sa usa ka seguradong kaugmaon.

[Mga footnote]

[Hulagway sa panid 7]

Ang daotang mga espiritu maoy nagpaluyo sa “talagsaon kabangis” nga mga tawo nga giayo ni Jesus

[Hulagway sa panid 8]

Pagtukod “ug usa ka maayong patukoranan alang sa umalabot”