Hanas nga mga Magtatambag—Panalangin sa Ilang mga Igsoon
“Ug ibalik ko ang mga maghuhukom sama sa una, ug ang mga magtatambag ingon sa sinugdan.”—ISAIAS 1:26.
1, 2. (a) Sa unsang paagi ang Proverbio 12:15 ug 19:20 nagpakita sa bili sa tambag? (b) Unsay unang gikinahanglan kon makadawat kitag tambag, ug unsang eksperyensiya ang nagpasundayag niini?
ANAK si Terri sa Kristohanong mga ginikanan. Sa eskuylahan may higala siya nga anaa usab “sa kamatuoran.” Apan, namatikdan ni Terri, dihang naghinapos sa pag-eskuyla sa elementarya nga dili madasigon ang iyang higala sa iyang pagtuo sama sa miagi. Samtang naghayskol sila, nahimong dili regular ang iyang higala sa Kristohanong mga miting ug misugod sa pagtan-aw sa sayop sa Watch Tower Society ug sa kongregasyon. Sinserong miampo si Terri alang sa iyang higala, ug iyang gitambagan siya sa tanang panahon sa pagpaningkamot sa pagpabiling malig-on ingong Kristohanon. Sa ulahi, nagantihan ang mga paningkamot ni Terri. Dihang miabot sila sa ikanapulong ang-ang, regular nang tigtambongan sa tigom ang iyang higala ug sa kataposan gibawtismohan. Pagkadako niini nga panalangin alang kaniya! Ug pagkadako nga ganti alang sa iyang maunongong higalang si Terri!
2 Sumala ning eksperyensiyaha, may makaduhaduha ba sa panginahanglan sa mga Kristohanon sa pagtambag sa usag usa sa mahigugmaon sa matag karon ug unya? Ang Bibliya nagdasig kanato: “Patalinghogi ang tambag ug dawata ang pahamatngon, aron ikaw mahimong manggialamon sa imong umaabot.” (Proverbio 19:20; 12:15) Gisunod sa higala ni Terri kanang tambaga. Apan komusta kon wala pa mabatoni ni Terri ang gugma, pagkamalahutayon, ug kaisog sa paghatag kaniyag tabang sa milabay ang mga tuig? Oo, aron kita “makapatalinghog sa tambag,” kinahanglang may magtatambag. Kinsa kini siya?
Tambag—Pinaagi ni Kinsa?
3. Kinsa ang gitagana ni Jehova sa paghatag tukmang tambag sa Kristohanong kongregasyon?
3 Misaad si Jehova nga Diyos sa paghatag sa iyang katawhan ug mga magtatambag sa atong panahon. Siya miingon: “Ibalik ko pag-usab kanimo . . . ang mga magtatambag sama sa sinugdan.” (Isaias 1:26) Natuman kining saara ilabina diha sa tinudlong mga ansiano sa Kristohanong kongregasyon. Ang pagtambag maoy usa ka porma sa pagpanudlo, ug ang mga ansiano “may katakos sa pagpanudlo.” (1 Timoteo 3:2) Tingali diha sa hunahuna ni Pablo ang mga ansiano dihang siya miingon: “Kon mahiligas ang usa ka tawo sa kalapasan nga wala siya makamatikod niana, kamo nga may espirituwal nga mga katakos mao ang magpahiuli kaniya uban sa espiritu sa kalumo.” (Galacia 6:1) Apan ang mga ansiano lang ba ang makahatag tambag?
4, 5. (a) Unsa ang pipila ka Kasulatanhong mga pananglitan ang nagpakita nga dili lamang ang mga ansiano ang makahatag tambag? (b) Unsa ang malarawanon modernong adlawng mga kahimtang diin ang mga Kristohanon gawas sa ubang mga ansiano makatambag?
4 Dili. Dili ansiano si Terri, apan ang iyang tambag sa ulahi namungag maayo. Hinumdomi, usab, ang Siryanhong lider sa kasundalohan nga si Naaman. Milihok siya sa maayong impormasyon nga gikan sa usa ka batang babayeng Israelinhon ug sa maayong tambag sa iyang mga ulipon. Naluwas si David sa pagkasad-an sa dugo sa tukma sa panahong tambag ni Abigail, ang asawa ni Nabal. Ang batan-ong lalaking si Elihu may maalamong tambag kang Job ug sa iyang tulo ka “maglilipay.”—1 Samuel 25:23-35; 2 Hari 5:1-4, 13, 14; Job 32:1-6.
5 Sama usab karon, ang pagtambag dili iya lamang sa mga ansiano. Ang mga ginikanan nagatambag sa tanang panahon sa ilang mga anak. Ang mga batan-on sama kang Terri kasagarang malamposon sa pagtambag sa ilang isigkaingon. Ug ang Bibliya espisipikong nagdasig sa hamtong nga mga igsoong babaye nga mahimong “mga magtutudlo sa butang maayo,” ilabina sa mga batan-ong babaye sa kongregasyon. (Tito 2:3-5) Sa pagkatinuod, sa kinatibuk-ang diwa kitang tanan may kaakohan sa pagtabang sa usag usa ning paagiha. Si apostol Pablo miingon: “Padayon kamo sa pagdinasigay sa usag usa ug sa paglinig-onay sa usag usa, ingon sa inyong ginabuhat karon.”—1 Tesalonica 5:11.
Ang mga Tumong sa Kristohanong Pagpanambag
6. Unsa ang pila ka tumong sa Kristohanong pagpanambag?
6 Unsa ang pipila ka mga tumong sa Kristohanong pagpanambag? Kini sila maoy sa pagtabang sa usa aron mouswag ug makapadayon sa tukmang paagi, sa pagsulbad sa mga suliran, sa pagbuntog sa mga kalisdanan, ug tingali sa pagbadlong sa daotang dalan. Naghisgot si Pablo ug pila ka porma sa pagpanambag dihang iyang giawhag si Timoteo sa “pagpamadlong, pagsaway, pagmaymay, diha sa tumang pagkamapailobon ug sa arte sa pagpanudlo.” (2 Timoteo 4:1, 2) Tinuod nga usa arte ang pagpanambag sa paaging makasabot siya nga dili masakit ang buut.
7, 8. (a) Unsa ang pila ka kahimtang diin ang tambag ginapaabot sa Kristohanong kongregasyon? (b) Unsang mga higayon nga wala magpaabot ang Kristohanon ug tambag apan nagkinahanglan niana?
7 Kanus-a ihatag ang tambag? Ang mga ginikanan sa tanang higayon may panahon sa pagtambag sa ilang mga anak, ug gipaabot kini sa mga anak. (Proverbio 6:20; Efeso 6:4) Diha sa kongregasyon, ang estudyante nagapaabot ug tambag dihang nakahatag siyag pakigpulong sa Teokratikong Ministeryong Tunghaan. Ug ang bag-ong magmamantala sa Gingharian nagapaabot ug tabang ug tambag samtang nagapadulong siya sa pagkahamtong ingong Kristohanong ministro. (1 Timoteo 4:15) Usahay ang mga indibiduwal nga mangayog tabang ug tambag moduol sa mga ansiano o sa uban diha sa kongregasyon.
8 Apan, may mga panahon, nga nagkinahanglag tambag kadtong wala magpaabot niini o dili gusto niini. Tingali may usa nga nawad-ag kadasig sa pag-alagad kang Jehova, ‘nagkapadpad’ sama sa higala ni Terri. (Hebreohanon 2:1) Ang tawo tingali may seryosong kasungian sa laing indibiduwal sa kongregasyon. (Filipos 4:2) O tingali adunay nanginahanglag tabang bahin sa tukmang pamostura o pamiste, o sa pagpili sa usa ug mga higala o mga musika.—1 Corinto 15:33; 1 Timoteo 2:9.
9, 10. (a) Nganong ang paghatag Kristohanong tambag nagkinahanglag kaisog? (b) Bisan pa nganong mohatag tambag ang Kristohanon kon gikinahanglan?
9 Dihang mihatag ug tambag si propetang Hanani kang Haring Asa sa Juda, nasuko kaayo si Asa niini nga iyang “gibutang siya sa bartolina”! (2 Cronicas 16:7-10) Ang tawo nagkinahanglag kaisog sa pagtambag ug hari niadtong panahona. Karon, ang mga magtatambag nagkinahanglan usab ug kaisog, sanglit ang paghatag tambag sa sinugdan tingali makapasuko. Ang usa ka eksperyensiyadong Kristohanon nagpugong sa paghatag sa gikinahanglang tambag sa usa ka batan-ong kauban. Ang katarongan? Siya miasoy: “Suod kaming higala karon, ug buot kong magpabilin kami nga ingon niana!” Apan, ang pagpugong sa pagtabang kon gikinahanglan dili timaan sa maayong higala.—Proverbio 27:6; itandi sa Santiago 4:17.
10 Sa pagkatinuod, napamatud-an sa eksperyensiya nga kon hanas ang magtatambag, ang mga kahiubos sa buut mamenosan, ug ang tumong sa tambag makab-ot. Unsay kinahanglan aron mahimong hanas nga magtatambag? Aron matubag kini, atong tagdon ang duha ka panig-ingnan, usa nga maayo ug usa nga daotan.
Si Pablo—Usa ka Hanas nga Magtatambag
11. Nganong ang kadaghanan sa mga taga Corinto midawat sa tambag nga gihatag ni Pablo bisan pag prangka siyang misulti?
11 Daghang higayon nga nakahatag ug tambag si apostol Pablo, ug usahay may kusganong mga butang siya nga isulti. (1 Corinto 1:10-13; 3:1-4; Galacia 1:6; 3:1) Bisan pa, epektibo ang iyang tambag tungod kay kadtong iyang gitambagan nasayod nga gimahal sila ni Pablo. Sumala sa iyang gisulti sa mga taga Corinto: “Gikan sa tuman nga kaguol ug kasakit ako nagsulat kaninyo inubanan sa daghang mga luha, dili aron maguol kamo, kondili aron mahibalo kamo sa kadagaya sa akong gugma kaninyo.” (2 Corinto 2:4) Ang kadaghanan sa mga taga Corinto midawat sa tambag ni Pablo tungod kay sila nasayod nga gihatag kadto nga walay daotang mga motibo, kay ang “gugma . . . dili magatan-aw sa iyang kaugalingong interes.” Dugang pa, masaligon sila nga wala siya magsulti tungod sa iyang kasuko “kay ang gugma . . . dili daling masuko. Dili kini modumot.”—1 Corinto 13:4, 5.
12. Unsang hiyas ang magpasayon sa Kristohanong magtatambag sa pagpatunghag maayong mga resulta? Iilustrar.
12 Karon, usab, mas masayon nga dawaton bisan ang kusganong tambag kon kita nasayod nga ang usa nga nagtambag nagmahal kanato, dili mosulti tungod sa kasuko, ug walay daotang mga motibo. Pananglitan, kon ang panahon lamang nga makigsulti ang ansiano sa mga tin-edyer diha sa kongregasyon mao ang pagpanaway kanila, bation dayon sa mga batan-on nga giigo sila. Apan komusta kon ang mga ansiano adunay maayong relasyon sa mga tin-edyer? Komusta kon ubanan sila sa pag-alagad sa kanataran, daling maduol diha sa Kingdom Hall, ug nagadasig kanila sa pagpakigsulti kaniya bahin sa ilang mga problema, mga paglaom, ug mga pagduhaduha, tingali sa pagdapit kanila (sa pag-uyon sa ginikanan) sa iyang balay sa matag karon ug unya? Nan, kon maghatag siya kanila ug tambag, hayan modawat ang mga tin-edyer niini, kay nahibalo nga gikan kini sa usa ka higala.
Kalumo ug Pagkamapaubsanon
13. (a) Unsa ang basehanan sa Kristohanong tambag? (b) Busa, unsay likayang buhaton niadtong mohatag tambag sa Kristohanong kongregasyon?
13 Dunay laing rason nganong malamposon ang tambag ni Pablo. Misalig siya sa diyosnong kaalam, dili sa iyang kaugalingong mga opinyon. Iyang gipahinumdoman ang magtatambag nga si Timoteo: “Ang tanang Kasulatan dinasig sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, alang sa pagpamatuto sa pagkamatarong.” (2 Timoteo 3:16; itandi sa 1 Corinto 2:1, 2.) Sa ingon ipasukad sa Kristohanong mga magtatambag karon ang ilang tambag sumala sa gipamulong sa Kasulatan. Tinuod nga, diha sa pamilya, ang mga ginikanan dili mokutlo sa Bibliya sa matag panahon nga manambag sila sa ilang mga anak. Bisan pa, kon nagadasig man ang Kristohanong mga ginikanan bahin sa pagkamasinugtanon, pagkahinlo, pagtagad sa uban, sa pag-abot ug sayo, o unsa pa man, kinahanglang dunay Kasulatanhong basehanan ang ilang ipamulong. (Efeso 6:1; 2 Corinto 7:1; Mateo 7:12; Ecclesiastes 3:1-8) Sulod sa kongregasyon, mag-amping gayod kita nga dili nato ipugos ang atong personal nga mga hunahuna o kagustohan sa uban. Ug kinahanglang maglikay ang mga ansiano sa pagpiko sa Kasulatan aron ipakita nga daw nagpaluyo kini sa pipila ka ideya nga gusto nila. (Itandi sa Mateo 4:5, 6.) Kinahanglan may tinuod nga katarongan gikan sa Bibliya ang tanang tambag nga ilang ihatag.—Salmo 119:105.
14, 15. (a) Pagngalan ug laing hiyas nga nagpahimo sa tambag nga mas masayong dawaton. (b) Nganong hinungdanong palamboon kining hiyasa sa magtatambag?
14 Mas epektibo usab ang tambag, kon ihatag kini sa espiritu sa kalumo. Nasayod niini si Pablo. Maoy hinungdan, dihang naghisgot sa usa nga nakahimog sayop nga lakang nga wala makamatikod niana, gidasig ni Pablo ang mga may kuwalipikasyon nga “magpahiuli kaniya uban sa espiritu sa kalumo.” (Galacia 6:1) Iyang gitambagan usab si Tito sa pagpahinumdom sa uban “sa dili pagsultig daotan kang bisan kinsa, dili makiglalison, makataronganon, magpakita sa hingpit nga kalumo sa tanang mga tawo.”—Tito 3:1, 2; 1 Timoteo 6:11.
15 Nganong may panginahanglan sa kalumo? Tungod kay ang dili-mapugngang mga pagbati mananakod. Ang masuk-anong mga pulong mopatunghag masuk-anong mga pulong, ug malisod ang pagpangatarongan kon magbukal na ang kasuko. Bisan ug ang usa nga gitambagan masuko, dili kini katarongan nga masuko usab ang magtatambag. Hinunoa, ang malumong tinamdan sa magtatambag tingali makatabang sa pagpakalma sa situwasyon. “Ang tubag, kon malumo, makapahupay sa kapungot.” (Proverbio 15:1) Matuod kini kon ang magtatambag usa ka ginikanan, ansiano, o bisan kinsa.
16. Nganong kinahanglang magmanggitahoron sa tanang panahon ang usa kon maghatag tambag?
16 Sa kataposan, tagda ang gipamulong ni Pablo sa usa ka batan-ong ansianong si Timoteo: “Ayaw pagkasab-i ang tigulang nga lalaki. Hinunoa, tambagan mo lamang siya ingon nga daw amahan, ug ang mga batan-ong lalaki ingon nga daw mga igsoon, ug ang mga babayeng gulanggulang ingon nga daw mga inahan, ug ang mga batan-ong babaye ingon nga daw mga igsoon sa bug-os nga kaputli.” (1 Timoteo 5:1, 2) Pagkamaayo nga tambag! Handurawa ang bation sa gulanggulang nga babaye kon ang usa ka batan-ong ansiano, nga tingali igo nang mahimong iyang anak, magtambag kaniya sa sobra ka hinawayon o dili matinahurong paagi. Mas maayo kon magpalandong makadiyot ang magtatambag: ‘Tungod sa personalidad ug sa edad ning tawhana, unsa ang labing mahigugmaon ug epektibong paagi sa paghatag niining tambaga? Kon ako pa ang anaa sa iyang lugar, unsay gusto kong paagi nga duolon ako?’—Lucas 6:31; Colosas 4:6.
Ang Tambag sa mga Pariseo
17, 18. Unsa ang usa ka katarongan nganong ang tambag nga gihatag sa mga Pariseo walay kapuslanan?
17 Biyaan nato karon ang maayong panig-ingnan ni Pablo ug tagda ang daotang pananglitan—nianang sa Hudiyohanong mga lider sa relihiyon sa mga adlaw ni Jesus. Mihatag silag daghang tambag, apan wala makabaton ug kaayohan ang nasod niana. Ngano?
18 Dunay daghang mga katarongan. Una, tagda ang panahon dihang gibadlong sa mga Pariseo si Jesus tungod kay ang iyang mga disipulo wala manghunaw sa ilang mga kamot sa wala pa mangaon. Siyempre, tambagan sa mga ginikanan ang ilang mga anak sa paghunaw sa ilang kamot sa dili pa mangaon ug ingong batasan sa kahindikan, daghan ang ikasugyot niini. Apan ang mga Pariseo dili interesado sa kahindikan. Alang kanila, ang paghugas sa kamot maoy usa na ka tradisyon, ug nasuko sila nga wala sunda sa mga disipulo ni Jesus kining tradisyona. Apan, sumala sa gipakita ni Jesus kanila, dunay mas dagkong mga suliran ang Israel nga nagkinahanglan sa ilang pagtagad. Pananglitan, gigamit sa uban ang tradisyon sa Pariseo ingong paagi sa paglikay sa pagsunod sa ikalima sa Napulo ka Sugo: “Tahora ang imong amahan ug ang imong inahan.” (Exodo 20:12; Mateo 15:1-11) Makasubo, ang mga eskriba ug mga Pariseo nabalaka kaayo sa mga detalye nga ilang “napasagdan ang mas hinungdanong mga butang sa Kasugoan, nga mao, hustisya, ug kaluoy ug pagkamatinumanon.”—Mateo 23:23.
19. Sa unsang paagi ang modernong adlawng mga Kristohanon makalikay nga mahulog sa bitik sa hakog nga motibo?
19 Ang mga magtatambag karon kinahanglang mag-amping aron dili makahimo sa samang sayop. Kinahanglang likayan nila ang hakog nga mga motibo, sobra ka matinagdanon sa mga detalye nga ilang makalimtan na hinoon ang “mas hinungdanong mga butang.” Bahin sa gagmayng mga butang, kita gidasig sa “pagpadayon sa pag-inantosay sa usag usa” diha sa gugma. (Colosas 3:12, 13) Ang katakos sa pagsabot kon kanus-a likayan nga himoong isyu ang usa ka butang ug kon kanus-a gikinahanglan ang tambag maoy usa ka bahin sa pagbaton sa usa ka tawo ug “espirituwal nga mga kuwalipikasyon.”—Galacia 6:1.
20. Nganong ang kaugalingong panig-ingnan hinungdanon bahin sa paghatag tambag?
20 Adunay laing butang nga nakapahimo niadtong unang siglong mga magtatambag sa relihiyon nga dili epektibo. Ilang gisunod ang paaging “sunda ang akong isulti, dili ang akong buhat.” Si Jesus miingon bahin kanila: “Alaut usab kamong mga batid sa Kasugoan, kay ang mga tawo inyong gipabug-atan ug mga luwan nga malisod pas-anon, apan kamo dili gani motuhil sa mga luwan pinaagi sa usa sa inyong mga tudlo!” (Lucas 11:46) Pagkadili mahigugmaon! Karon, ang mga ginikanan, ansiano, o ubang mohatag tambag kinahanglang segurado nga sila mismo nagabuhat sa mga butang nga ilang isugo sa uban nga buhaton. Unsaon nato sa pagdasig sa uban nga magmaokupado sa pag-alagad sa kanataran kon dili kita magpakitag maayong panig-ingnan? Ug unsaon nato sa pagpasidaan batok sa materyalismo kon ang materyal nga mga butang maoy nangibabaw sa atong mga kinabuhi?—Roma 2:21, 22; Hebreohanon 13:7.
21. (a) Sa unsang paagi gidaogdaog sa mga Pariseo ang mga tawo? (b) Nganong ang mga taktika sa mga Pariseo nagsilbing pahamatngon sa Kristohanong mga magtatambag?
21 Napakyas usab ang Hudiyohanong mga lider ingong mga magtatambag tungod kay migamit silag maharihariong mga taktika. Sa usa ka okasyon, nagpadala silag mga tawo sa pagdakop kang Jesus. Dihang kining mga tawhana, nga nakadayeg kaayo sa paagi ni Jesus sa pagpanudlo, mibalik nga wala siya madala, gikasab-an sila sa mga Pariseo, nga nag-ingon: “Nagpahisalaag ba diay usab kamo? Duna bay usa sa mga punoan o mga Pariseo nga mituo kaniya? Apan kining panon sa mga tawo nga walay hibangkaagan sa Kasugoan maoy mga tinunglo.” (Juan 7:45-49) Kadto ba maoy tukmang basehanan sa pagpangasaba—sobrang paggamit sa awtoridad ug sa pagpanampalas kanila? Hinaot nga ang Kristohanong mga magtatambag dili mahimong sad-an sa ingon nga pagpanambag! Likayan gayod nila ang paghulga sa uban o magpakitag impresyon: ‘Kinahanglang mamati kamo nako tungod kay ansiano ako!’ O kon makigsulti sa usa ka igsoong babaye, dili gayod sila magpaila: ‘Kinahanglang mamati ka kanako tungod kay lalaki ako.’
22. (a) Sa unsang paagi ug nganong mohatag tambag ang mga Kristohanon? (b) Unsang dugang pangutana ang hisgotan pa?
22 Oo, ang pagpanambag maoy usa ka buhat sa gugma nga nautang natong tanan—ilabina sa tinudlong mga ansiano—sa isigka-Kristohanon sa matag karon ug unya. Ayaw pagpasumangil kon maghatag ug tambag. Apan kon gikinahanglan, ihatag kini nga maisogon. Kinahanglang may espirituwal nga basehanan kini ug ihatag uban ang espiritu sa kalumo. Dugang pa, mas sayon nga dawaton ang tambag nga gikan sa usa nga nagmahal kanato. Apan, usahay, malisod nga makita ang mga pulong kon unsay isulti dihang maghatag ug tambag. Busa sa unsang paagi makahatag kitag tambag sa epektibong paagi? Kini maoy tagdon sa sunod nga artikulo.
Makapatin-aw Ka Ba?
◻ Kinsa ang nakabaton sa pribilehiyo ug responsabilidad sa Kristohanong pagpanambag?
◻ Nganong gikinahanglan ang kaisog sa paghatag tambag?
◻ Nganong ang kamatuorang gimahal ni Pablo ang mga Kristohanong taga Corinto nakapasayon kanila sa pagdawat sa iyang tambag?
◻ Nganong ang Kristohanong magtatambag kinahanglang malumo ug mapaubsanon?
◻ Sa unsang paagi malikayan sa Kristohanon ang iyang tambag nga sobra ka mapig-oton?
[Hulagway sa panid 13]
Gidasig ni Pablo si Tito sa paghinumdom sa uban nga “magmakataronganon, magpakitag kalumo sa tanang mga tawo”