Ang Hunahuna sa Bibliya

Unsay Buhaton kon ang Usa ka Ministro Makasala?

ANG daotang batasan sa relihiyosong mga pangulo nakadani sa pagtagad sa publiko karong adlawa nga labaw pa kay sukad masukad. Ang mga Protestante naulawan tungod sa mga eskandalo sa mga ministro sa TV. Karong bag-o pa pagkatapos masakpi sa ikaduhang higayon sulod sa tulo ka tuig ang usa ka magwawali sa telebisyon nga may kaubang pampam, iyang gipahibalo sa iyang mga sumusunod nga ang Diyos nagsulti kaniya nga walay labot ang uban sa iyang panggawi kondili kadto iyaha lamang.

Sa pagtaho bahin sa 25-tuig nga pagtuon, ang magasing Time miingon: “Usa ka kanhi monghe sa orden ni Benedikto . . . nagbanabana nga katunga sa 53,000 nga Romano Katolikong mga pari sa T.B. nagsupak sa ilang panumpa sa dili pagpakigsekso.” Usab, usa ka taho sa mantalaan sa 1990 miingon mahitungod sa ubay-ubayng mga pari nga Canadianhon nga namatud-an sa korte nga sad-an sa seksuwal nga pag-abusar sa kabataan: “Ang mga pangulo sa Simbahan wala magbalibali, o wala magtagad o wala mosanong ug maayo sa mga reklamo sa seksuwal nga pag-abusar, bisan tuod sila nakadawat sa maong mga reklamo gikan sa mga biktima, mga tagaparokya, polis, ug sosyal nga mga kawani ug ubang mga pari.”

“Hangtod karong bag-o pa,” matud sa Time, “ang nakasala nga mga pari sa yano ibalhin gikan sa parokya ngadto sa laing parokya.” Apan karon nga ang mga kaso nga gisang-at sa mga biktima mikabat nag $300 milyon sa Tinipong Bansa, ang mga pari sa subsob gihatagan ug sikyatrikong terapiya una pa pabalikon sa relihiyosong pag-alagad.

Unsay angay buhaton kon ang usa ka ministro, pari, o ansiano makasala? Unsang giya ang gihatag sa Bibliya kon unsaon sa pagdumala ang maong mga makasubong law-ay nga panggawi? Atong susihon ang duha ka yawing mga teksto sa Bibliya​—Tito 1:7 ug 1 Timoteo 3:2.

Kinahanglang “Walay Ikasumbong”

Ang Bibliya nagaingon: “Ang magtatan-aw [“obispo,” The New American Bible (hubad sa Katoliko)] kinahanglang walay ikasumbong ingong tinugyanan sa Diyos.” (Tito 1:7) Si Pablo naghatag ning sugoa kang Tito sa dihang gibinlan siya sa pagtudlo ug mga ansiano sa mga kongregasyon sa Creta. Ugaling, unsay buot ipasabot sa apostol?

Ang ekspresyong “walay ikasumbong” gihubad gikan sa Gregong pulong nga a·negʹkle·tos. Sa pagkomento niining pulonga, ang The New International Dictionary of New Testament Theology nagpahayag: “Ang anenklētos nahisakop sa legal nga kahimtang sa pagpasakag sumbong sa korte, ug nagpasabot ug pamatasan nga dili salawayon, nga batok niana walay ikasumbong.” Mao nga, ang rekord sa usa ka tawo kinahanglan nga hinlo una pa siya itudlo nga usa ka ansiano; kinahanglang dili siya ilalom sa pagbadlong, o ilalom sa sumbong. Ug siya arang lamang makapabilin sa iyang katungdanan ingong ansiyano kon siya makapadayon nga libre gikan sa makataronganon nga mga sumbong.​—Itandi ang 1 Timoteo 3:10.

Ang usa ka ansiano dili lang magpanguna sa kongregasyon apan siya usab moalagad sa kongregasyon. Siya manubag sa iyang pagkatinugyanan. Siya ang tinugyanan sa Diyos; iyang gibantayan ang gagmayng mga karnero sa Diyos. Busa, siya may tulobagon una sa tanan sa Tag-iya sa panon, si Jehova, ug unya sa katawhan nga gihatag sa Diyos kaniya nga bantayan.​—1 Pedro 5:2, 3.

Kinahanglang “Dili Badlonganon”

Ang Bibliya nagaingon: “Ang magtatan-aw [“obispo,” NAB] kinahanglang dili badlonganon.” (1 Timoteo 3:2) Ang Gregong pulong a·ne·piʹlem·ptos gihubad ug “dili badlonganon” ug sa literal nagkahulogan “dili magunitan.” Sa laing pagkasulti ang kinabuhi sa magtatan-aw dili kakit-an sa bisan unsa nga ang magsusumbong mahimong makagunit kaniya ug gamiton batok kaniya. Sa pagpalapad sa kahulogan nianang Gregong pulong, ang Theological Dictionary of the New Testament miingon nga ang magtatan-aw “dili mahimong atakehon (bisan pa sa mga dili-Kristohanon) tungod sa iyang hinlo nga moral.”

Ang Diyos nagbutang ug hataas nga sukdanan alang nilang nagatan-aw sa iyang katawhan ug nagatudlo sa iyang Pulong. Si Santiago nag-ingon mahitungod sa iyang kaugalingon ug sa ubang mga ansiano: “Kita magadawat ug mas bug-at nga paghukom.” Ug si Jesus nagpahayag niining nagagiya nga prinsipyo: “Ang bisan kinsa nga gihatagan ug daghan, daghan ang pagapanilngon kaniya.”​—Santiago 3:1; Lucas 12:48.

Busa, kon ang Kristohanong magtatan-aw nakasala ug dako ug naghinulsol, mahimong siya makapabilin ingong sakop sa kongregasyon, apan siya pagatangtangan sa iyang katungdanan sa pagkamagtatan-aw. May ikasaway na kaniya. Lagmit dangtan siyag mga tuig sa pagtukod pag-usab ug maayong reputasyon aron malibre na usab sa mga sumbong. Ang iyang kaso mahimong ikapanag-ing kang Sebna, ang tinugyanan ni Ezekias. Tungod sa iyang malaw-ay nga buhat gibadlong siya ni Jehova pinaagi sa mga pulong: “Papahawaon ko ikaw gikan sa imong katungdanan; ug gikan sa imong opisyal nga buhatan bunloton ko ikaw.” Apan sa ulahi si Sebna nakabawi sa iyang maayong reputasyon tungod kay mabasa nato nga siya nahimo na usab nga sekretaryo sa hari.​—Isaias 22:15-22; 36:3.

Unsa man kon ang Ministro Dili Mahinulsolon?

Daghang relihiyon sa Kakristiyanohan nagtugot sa mga ministro nga nagabatasan sa sala. Niadtong 1459 si cardinal Rodrigo Borgia nahimong bise-kansilyer sa papado, ang kinatas-ang administratibong buhatan sa Katolikong Kuria. Tungod sa iyang grabeng imoralidad, siya gibadlong ni Papa Pio II. Apan, bisan pag siya may upat ka mga anak sa gawas, niadtong 1492 ang pundok sa mga kardinal nagboto kaniya sa papadong trono! Gipadayon niya ang iyang eskandalosong karera ingong Papa Alejandro VI. Ang pagtugot sa dili mahinulsolon, mahilayong mga ministro sa tibuok kasaysayan sa Kakristiyanohan sa walay duhaduha nakaamot sa iyang pagkadunot nga atong makita karong adlawa. Unya, unsa, ang pagabuhaton kon ang ministro dili mahinulsolon?

Ang Kristiyanong ministro nga nagabatasan sa seryosong sala ug napakyas sa pagpakita ug ebidensiya sa pagkamahinulsolon kinahanglang palagpoton gikan sa kongregasyon. Nagsulat si apostol Pablo: “Dili na kamo makighugoy-hugoy kang bisan kinsa nga ginganlang igsoon kon siya makihilawason o hakog nga tawo o tigsimbag diyosdiyos o mapanamastamason o palahubog o tikasan, bisan sa pagkaon dili gayod kamo makigsalo kaniya. . . . ‘Kuhaon ninyo kanang tawong daotan gikan sa taliwala ninyo.’”​—1 Corinto 5:11-13.

Ang lig-on nga baroganan magpanalipod sa reputasyon sa kongregasyon ug magpalain niana gikan kanilang kinsa ‘sa publiko nagpahayag nga nakaila sa Diyos apan nagpanghimakak kaniya pinaagi sa ilang mga buhat.’ Ang paagi sa pagdumala sa usa ka relihiyon sa suliran sa ministro nga nakasala makatabang kanimo sa pag-ila kon kanang relihiyona matuod nga Kristohanon.​—Tito 1:16; Mateo 7:15, 16.

[Hulagway sa panid 26]

Papa Alejandro VI

[Credit Line]

Alinari/Art Resource, N.Y.