Mabinantayong Pagsunod sa mga Mando sa Hari

“Sa imong mga mando ako mamalandong, ug ako molantaw sa imong mga alagianan. Sa imong mga lagda akong ipakita ang kahimuot. Ako dili mahikalimot sa imong pulong.”—SALMO 119:15,16.

1. Nganong ang tanang tawo ug tanang butang ilalom sa mga mando ni Jehova?

ANG tanang tawo ug tanang butang nailalom sa mga mando sa Makagagahom sa Tanan nga Diyos si Jehova, ang Hari hangtod sa kahangtoran. Siya mao ang naglalang sa uniberso. Siya ang Tinubdan sa tanang kinabuhi. Giumol niya ang yuta ug giandam kini aron kapuy-an. Siya mao ang Diyos sa kahusay, ug pinaagi sa pagpatuman sa iyang mga lagda, mapatunhay ang kahusay sa tibuok niyang kalalangan.—Salmo 36:9; Isaias 45:18; Pinadayag 15:3.

2. Kinsay nagagahom sa bituonong kalangitan, ug sa unsang paagi?

² Si Jehova nga Diyos mao ang nagmando sa bituonong kalangitan nga masabwag samag balongbalong ibabaw sa yuta ug dayon midapit sa iyang katawhan: “Iyahat ninyo ang inyong mga mata sa itaas ug tan-awa. Kinsay naglalang niining mga butanga? Siya mao ang Usa nga nagapatungha sa panon kanila nga tinagdaghan, ngatanan sila iyang ginatawag pa sa ngalan.” Si Jehova mao ang nangutana kang Job: “Nahibaloan mo ba ang mga lagda sa kalangitan, o makapahimutang ka ba sa pagbulot-an niini sa yuta?” Ang Iyang mga balaod sa grabitasyon ug mosyon mao ang nagapahiusa sa minilyong galaksiya uban sa binilyon nilang bituon ug nagamando sa mga lihok sa yuta samtang kini nagapanaw latas sa kawanangan.​—Isaias 40:26; Job 38:33.

3. Pinaagi sa kang kansang mga mando ang mga hayop mabuhi, ug unsay mahitabo kon sila dili mosugot?

³ Siya mao ang Usa nga nagapatungha sa lunhawng mga talamnon nga nahimong tabon sa yuta. Pinaagi sa iyang mga mando ang mga liso moturok ug motubo ug mosanay. Dagaya sa yuta ang dili-maihap nga mga klase sa kahayopan​—gikan sa polar nga mga rehiyon ngadto sa tropikanhong kalasangan, gikan sa itaas sa kalangitan ngadto sa kahiladman sa yuta, gikan sa nawong sa dagat ngadto sa labing mangiob nga kahiladman niini. Aron mabuhi, ang matag usa sa dili-maihap nga mga matang kinahanglang magkinabuhi sumala sa gimando ni Jehova. Pinaagi sa kinaiya (instinct), iyang giprograma diha kanila ang iyang mga mando alang sa kinabuhi. “Sila sa kinaiyanhon maalamon.” (Proverbio 30:24) Apan unsa kon ang gamitoyng blackpoll warbler sa Alaska miingon sa kaugalingon, ‘Dili ako molupad ug kaliboan nga milya paingon sa Amerika del Sur. Ngano bang molupad man ako?’ Kanang gamitoyng warbler mamatay sa mga bagyo sa niyebe sa tingtugnaw. Apan dili kana moingon niana. Kini naprograma nga molalin aron mabuhi. Mao usab ang kahayopan. Sila sa kinaiyanhon nagasunod sa mga mando nga gibutang diha kanila ni Jehova nga ilang Maglalalang. Sila dili makapili.

4. Unsang pagpili ang mahimo sa mga tawo, ug uban ang unsang mga sangpotanan?

⁴ Ang mga tawo lahi. Kita gilalang sa dagway sa Diyos, ug kita makapili. Bisan pa niana, bisan tuod wala kita iprograma ni Jehova nga molihok nga maalamon sa kinaiyanhon lamang, kita wala usab niya pasagding walay kabangkaagan. Pinaagi sa iyang Pulong ang Bibliya, kita iyang gihatagan sa iyang mga mando aron makabaton sa kinabuhi. Kon mabinantayon kita sa pagsunod sa maong mga mando sa Hari, kita mabuhi. Kon gamiton nato ang atong kagawasan sa dili pagpanumbaling niana ug subayon ang usa ka dalan nga atong gipili sa kinaugalingon, kita mamatay. “Ang imong pulong maoy lamparahan sa akong tiil, ug kahayag sa akong alagianan,” matud sa salmista. Sa laing bahin, ang lahing “dalan daw matul-id alang sa usa ka tawo, apan mahimong mosangpot sama sa dalan sa kamatayon.” (Salmo 119:105; Proverbio 14:12, The New English Bible) Niining panahon sa kataposan, kinahanglang atong ipahayag nga atong kaugalingon ang mga pulong sa Salmo 119:15, 16, ingon nga gitumong kang Jehova: “Sa imong mga mando ako mamalandong, ug ako molantaw sa imong mga alagianan. Sa imong mga lagda akong ipakita ang kahimuot. Ako dili mahikalimot sa imong pulong.”

Si Jehova ang Organisador sa Iyang Katawhan

5. Sa unsang mga paagi si Jehova mao ang Maghuhukom, Maghahatag-balaod, ug Hari sa Israel?

⁵ Si Jehova nakigsulti kang Moises sa Bukid Sinai, nga mihatag ug mga mando sa paggiya sa Israel. Ilado niini kanila mao ang Napulo ka Sugo, nga gisulat sa mga papan nga bato sa tudlo sa Diyos. (Exodo 20:1-17; 31:18) Dugang pa sa pagka Maghahatag-Balaod sa Israel, si Jehova mao ang ilang Maghuhukom, nga naglihok pinaagi kang Moises ug sa ubang ansiano. Gitambagan ni Moises ang maong mga ansiano sa paghinumdom: “Dili kamo magpili ug tawo sa inyong paghukom. Magpatalinghog kamo sa gagmay sama sa dagko. Dili kamo mahadlok tungod sa usa ka tawo, kay ang paghukom iya sa Diyos.” (Deuteronomio 1:17) Si Jehova mao usab ang ilang Hari, nga nag-organisar sa maong minilyong katawhan alang sa maayong pagdumala sa ilang mga kahikayan. Tungod niining tanan, usa sa iyang mga propeta nakapahayag sa ulahi: “Si Jehova mao ang atong Maghuhukom, si Jehova mao ang atong Maghahatag-lagda, si Jehova mao ang atong Hari.”​—Isaias 33:22.

6. Sa unsang paagi si Jehova mipamatuod nga mao ang Organisador ug Giya sa Israel sa kamingawan?

⁶ Ang nasod sa Israel giorganisar ngadto sa mga tribo, mga pamilya, ug mga panimalay. Samtang sila mipanaw sa kamingawan, gitudlo ni Jehova ang matag tribo sa dapit niana sa pagmartsa. Sa nagkampo sila palibot sa tabernakulo, ang matag tribo may kaugalingong tinudlong dapit. (Numeros 2:1-34; Josue 7:14) Pinaagi sa panganod, si Jehova nagmando sa ilang mga lihok: “Inigpataas sa panganod gikan sa ibabaw sa balongbalong, ang mga anak sa Israel manglakaw human niana, ug sa dapit nga mopuyo ang panganod, didto magkampo ang mga anak sa Israel. Sa mando ni Jehova ang mga anak sa Israel manglakaw, ug sa mando ni Jehova sila magkampo.”​—Numeros 9:17, 18.

7. Kinsa ang makahimo ug mihimog mga kausaban sa organisasyon sa Israel?

⁷ Sa gikinahanglan ang kausaban sa organisasyon, si Jehova ang mihimo niadto. Si Moises mireklamo: “Ako dili makaarang, sa akong kaugalingon, sa pagdala niining tanang tawo, tungod kay sila bug-at kaayo alang kanako.” Si Jehova mitubag: “Tigoma alang kanako ang kapitoan ka lalaki sa mga ansiano sa Israel, si kinsa imong nahibaloan nga sila mga ansiano sa katawhan ug mga pangulo nila, . . . ug sila magatabang kanimo sa pagdala sa lulan sa katawhan aron dili ikaw ang magdala niana, nga ikaw lamang.” (Numeros 11:14, 16, 17) Bisan sa dihang ang katawhan sa ulahi nangayog tawhanong hari, ang dakong Hari nga walay kataposan wala magbiya sa Israel. Ang tawhanong hari nagbatog kopya sa Kasugoan ni Jehova. Ang mga propeta nagpahayag sa mga paghukom ni Jehova. Ang matinumanong mga hari nag-alagad pang mga administrador ilis sa Diyos samtang sila ‘milingkod sa trono ni Jehova.’​—1 Cronicas 29:23; Deuteronomio 17:18; 2 Hari 17:13; Jeremias 7:25.

Ang Hingpit nga Panig-ingnan sa Pagsunod sa mga Mando sa Hari

8. Sa unsang paagi, diin, ug uban ang unsang mga sangpotanan nga gimantala ni Jesus ang pag-abot sa Gingharian ni Jehova?

⁸ Sa pag-abot ni Jesus ingong ang sinaad nga Mesiyas, iyang gisunod ang mga mando sa iyang langitnong Amahan uban sa maut-utong kadasig. Sa pagsugod sa dakong Galileanhong ministeryo, siya “misugod sa pagwali ug pag-ingon: ‘Paghinulsol kamo, kamong katawhan, kay ang gingharian sa mga langit haduol na.’ Dayon siya milibot sa tibuok Galilea, nga mitudlo sa ilang mga sinagoga ug miwali sa maayong balita sa gingharian ug nag-ayo sa tanang matang sa sakit ug tanang matang sa kaluyahon sa taliwala sa katawhan. Busa gisundan siya sa dagkong mga panon gikan sa Galilea ug sa Decapolis ug sa Jerusalem ug sa Judea ug gikan sa pikas nga kiliran sa Jordan.” (Mateo 4:17, 23, 25; Juan 2:17) Ang iyang pagwali wala niya himoa sa mga sinagoga lamang. Siya nagmantala sa maayong balita sa Gingharian sa bisan diin nga may katawhang magpatalinghog: sa templo, sa baybayon, sa kiliran sa bukid, sa hawan nga banika, sa mga siyudad ug mga balangay, ug sa kabalayan sa katawhan. Ang panonpanon mihugop kaniya, “nga nagpatalinghog kaniya nga may kalipay.” Sila “nagpadayon sa pagsunod kaniya aron sa pagpatalinghog kaniya.”​—Marcos 12:37; Lucas 19:48.

9. Unsay gibuhat ni Jesus sa pagpauswag sa buluhatong pagsangyaw, ug unsang mga instruksiyon ang iyang gihatag?

⁹ Iyang gisulti sa iyang mga apostol ang panginahanglan sa dugang magbubuhat, busa “kining napulog-duha gipadala ni Jesus, nga gimandoan sila: ‘Ayaw kamo pag-adto sa dalan sa kanasoran, ug ayaw kamo pagsulod sa usa ka siyudad sa Samarianhon; apan, hinunoa, pangadto kamong mapinadayonon sa nawalang mga karnero sa balay sa Israel. Samtang manglakaw kamo, magwali, nga magaingon, “Ang gingharian sa mga langit haduol na.” Sa bisan unsang siyudad o balangay nga inyong pagasudlan, pangitaa kon kinsa ang takos diha niana, ug magpabilin hangtod sa inyong pagbiya. Inigsulod ninyo sa balay, timbayaa ang panimalay; ug kon ang panimalay takos, ipaabot diha ang inyong kalinaw; apan kon kini dili takos, ipabalik diha kaninyo ang kalinaw.’” (Mateo 10:5-7, 11-13) Sa ulahi iyang gipadala ang 70 pa uban ang susamang mga tugon, ug pinaagi sa mabinantayong pagsunod sa maong mga mando, sila milampos ug may dakong kalipay.​—Lucas 10:1, 17.

10. (a) Tapos sa iyang pagkabanhaw, unsang dugang sugo ang gihimo ni Jesus, ug uban ang unsang resulta? (b) Nganong gikinahanglang itudlo ang pipila ka lalaki, ug unsang mga kinahanglanon ang kinahanglang makab-ot?

¹⁰ Tapos sa iyang pagkamatay ug pagkabanhaw, gipadak-an ni Kristo Jesus ang teritoryo sa iyang mga sumusunod, nga miingon kanila: “Ang tanang pagbulot-an gihatag kanako sa langit ug sa yuta. Busa panlakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang akong gisugo kaninyo.” (Mateo 28:18-20) Sa mikayab siya ngadto sa langit, iyang gihatag ang susamang mando: “Kamo mahimong akong mga saksi sa Jerusalem ug sa tibuok Judea ug sa Samaria ug sa kinalay-ang bahin sa yuta.” (Buhat 1:8) Samtang gisabwag sa iyang mga sumusunod ang mensahe sa Gingharian, libolibo ang mikuyog sa ilang pundok. (Buhat 2:41; 4:4; 5:14; 6:7) Ang mga kongregasyon nanungha bisan diin. Ang mga magtatan-aw ug ministeryal nga mga katabang nga nakakab-ot sa tinong Kasulatanhong mga kuwalipikasyon gitudlo sa pag-atiman sa maong mga panon sa mga lalaki ug mga babaye. Milambo ug midaghan ang mga kongregasyon.​—1 Timoteo 3:2-10, 12, 13; Tito 1:5-9.

11. Unsang matang sa organisasyon ang nabatonan sa mga Saksi ni Jehova karong adlawa, ug nganong ang maayong organisasyon gikinahanglan kaayo karon?

¹¹ Karong adlawa hinungdanon ilabina nga ang mga kongregasyon sa mga Saksi ni Jehova magsunod sa panig-ingnan ni Jesus sa pagsangyaw. Sa pagbuhat nianang maayo, ilang gisagop ang organisasyonal nga gambalay nga natukod sa mga adlaw sa mga apostol. Kita ania sa panahon sa kataposan, ang panahon nga gitagna ni Jesus nga mahitabo ang tibuok-kalibotang pagsangyawng buluhaton: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:14) Tapos sa Gubat sa Kalibotan I ang pila ka libo misugod sa pagmantala niining maayong balita sa Gingharian; karon ang ilang mga gidaghanon misulbong saylo sa tulo ka milyong marka! Karon maoy dinaliang panahon sa pagsunod nga mabinantayon sa mga mando sa dakong Hari sa walay kataposan, si Jehova nga Diyos, ug ang Hari sa mga hari, si Kristo Jesus.

Gikinahanglan sa mga Ansiano ang Inyong Pagtahod ug Pagpaluyo

12. Unsa ang gikinahanglan sa mga ansiano karong adlawa, ug sa unsang paagi ang ilang pag-alagad mahimong malipayon?

¹² Sa pagsunod sa mga mando sa Hari, ang mga ansiano sa kongregasyon dunay pangunang bahin. Kinahanglang sila sulundan: “Atimana ninyo ang panon sa Diyos nga gipaatiman kaninyo, nga dili pinugos, kondili kinabubut-on; dili tungod sa gugma sa dili-matarong nga panapi, kondili maikagon; dili ingong nagaharihari ibabaw niadtong panulondon sa Diyos, kondili mahimong mga panig-ingnan sa panon.” (1 Pedro 5:1-3) Kini maoy panon sa Diyos. Ang mga ansiano may tulubagon, apan ang masinugtanong kooperasyon sa tanan makahimo sa ilang buluhaton nga malipayon: “Magmasinugtanon kamo niadtong nagapanguna sa inyong taliwala ug magmapinasakopon, kay sila nagabantay sa inyong mga kalag ingon nga magahatag ug husay; aron mabuhat kini uban ang kalipay ug dili uban ang panghupaw, kay kini makadaot kaninyo.”​—Hebreohanon 13:17.

13. Nganong ang mga ansiano kinahanglang pakitaag dobleng pasidungog?

¹³ Ang tanan sa kongregasyon angay pakitaag pasidungog, apan ilabina ang makugihong mga ansiano: “Isipa ninyo ang mga ansiano nga nagadumala sa maayong paagi nga takos sa dobleng pasidungog, ilabina kadtong nagabudlay sa pagwali ug pagpanudlo.” (1 Timoteo 5:17; Roma 12:10) Nganong hatagag “dobleng pasidungog” ang mga ansiano? Tungod sa ilang maayong buhat. Kini nahisulat mahitungod kanila: “Ang balaang espiritu nagtudlo kaninyo nga mga magtatan-aw, sa pag-atiman sa kongregasyon sa Diyos.” (Buhat 20:28) Sila nagabudlay sa pag-alagad kaninyo ug sa uban. Tingali ila pang disiplinahon ang pila ka indibiduwal dihang dili motagad o molapas sila sa mga mando sa Hari​—dili nindot nga katungdanan ug nga tingali makapasilo sa uban. Ang tambag bahin sa sinina o kagawian tingali kinahanglang ihatag ug kayugtan. Bisan pa niana kining mga butanga ginabuhat sa espirituwal nga kaayohan sa kongregasyon. Ang mga ansiano angay tahoron ug pakitaag pasidungog.

14. (a) Tungod sa Santiago 4:12, sa unsang paagi ang mga paghukom nga ipahamtang sa mga ansiano mahimong tukma? (b) Kanus-a mahimong matugoton sa paghukom ug kanus-a ang kaluoy mahimong labaw sa paghukom?

¹⁴ Usahay ang mga ansiano kinahanglang mag-alagad sa hudisyal nga mga komite ug mohimog mga hukom​—usahay mga hukom nga dili maangayan. Sa unsang paagi kini nga paghukom mahiuyon sa Santiago 4:12? Kini nagaingon: “Usa ra ang magbabalaod ug maghuhukom, siya nga arang makaluwas ug makalaglag. Apan ikaw, si kinsa ka man nga magahukom sa imong silingan?” Oo, ang mga indibiduwal dili angay magahukom sa usag usa. Dugang pa, ang mga paghukom nga himoon sa mga ansiano angay dili sumala sa ilang kaugalingong opinyon apan sumala sa Pulong ni Jehova. Matikdi giunsa ni Haring Josapat pagpasidaan ang mga maghuhukom nga iyang gitudlo: “Kamo dili magahukom alang sa tawo kondili alang kang Jehova; . . . pasagding ang pagkahadlok kang Jehova mahaanha ibabaw kaninyo. Magmabinantayon ug molihok, kay uban kang Jehova nga atong Diyos walay pagkadaotan o pagpalabilabi o pagdawat ug hiphip.” (2 Cronicas 19:6, 7) Ang organisasyon kinahanglang huptang hinlo. Apan ang mga ansiano angay dili isog, ‘mga tigpanukmag.’ Ikapakita ang kaluoy ug pagpasaylo dihang ang pagbasol dulot ug tiunay ang paghinulsol. Unya, ‘ang kaluoy magmadaogon sa paghukom, ingong labaw kay sa paghukom.’​—1 Timoteo 3:3; Santiago 2:13; tan-awa ang mga potnot sa Reference Bible.

15. Unsang mga pag-alagad sa mga ansiano ang magpatakos nga sila tahoron ug pasidunggan?

¹⁵ Busa ang mga buluhaton sa mga ansiano kadaghanan lisod ug mapugsanon, apan ang mga ansiano nga matinumanon ug mahigugmaong nagaatiman niining maong mga responsabilidad mahimong tinubdan sa espirituwal nga kahayahay ug panalipod. “Ang matag usa kinahanglang mahisamag tagoanang dapit gikan sa hangin ug usa ka salipod gikan sa bagyo, sama sa mga sapa sa tubig sa dapit nga walay tubig, sama sa landong sa usa ka dakong bato sa yuta nga nahago.” (Isaias 32:2) Ang maluluton ug mahigugmaong tigpanalipod​—dili ang madalidalion nga tig-akusar o ang isog nga tigdisiplina​—ang mopatunghag kalipay sa tanan, moanig pagtahod ug pasidungog, ug makaangkon sa pag-uyon ni Jehova.

Magmapailobon sa Usag Usa

16. (a) Unsay pagsanong sa pipila ngadto sa mga sayop sa uban, ug unsay mohimo tingali kanilang dili kaayo hinawayon ug labi pang masinabtanon? (b) Unsay pag-isip ni Jehova sa matinumanong mga alagad nga makahimog mga sayop?

¹⁶ Dihang ang katawhan magbuhat nga dug-ol, lagmit motungha ang mga problema. Mahimo ang mga sayop. Kon mahitabo kini, ang pipila mapikal pag-ayo. Gamiton pa sa pipila ang mga sayop sa uban ingong mga pasangil sa paghimo sa kinadak-ang sayop sa tanan​—sila moundang sa pag-alagad kang Jehova! Bisan pa niana, kon ilang susihon ang kaugalingon nilang mga sayop nga makutihon sama sa ilang pagsusi sa iya sa uban, lagmit sila dili kaayo manaway ug mahimong labi pang masinabtanon. Si Moises nakahimog mga sayop. Mao usab si David. Mao usab si Pedro. Mao usab kitang tanan. Apan gipadayon ni Jehova ang paggamit sa maong matinumanong mga lalaki sa kakaraanan, ug siya nagapadayon sa paggamit kanato. Busa, “si kinsa ka man nga magahukom sa sulugoon sa lain? Sa iyang agalon siya mobarog o mapukan. Sa pagkamatuod, siya pabarogon, kay si Jehova makapabarog kaniya.”​—Roma 14:4.

17. Mahitungod sa paghimog mga sayop ug pagkamahukmanon sa uban, unsang dugang mga punto ang atong pagahinumdoman?

¹⁷ Hinumdoman usab nato: Dinhi sa yuta, gigamit ni Jehova ang mga tawong dili hingpit​—kana lamang ang iyang nabatonan sa pagkakaron. Sa pagkamatuod, nagahatag kinig pagdayeg kang Jehova. Dako kaayo ang iyang mahimo pinaagi sa diyutay kaayo! Ang atong kahuyang nagapadako sa iyang gahom: “Igo na kanimo ang akong dili-takos nga kalulot; kay ang akong gahom ginahingpit sa kahuyangan.” (2 Corinto 12:9) Ang tibuok-kalibotang pagsangyaw nagamauswagon tungod sa hinungdang ginahatag ni Jehova mismo: “Dili pinaagi sa kusog sa kasundalohan, ni sa gahom, kondili pinaagi sa akong espiritu.” (Zacarias 4:6) Busa magmapinasayloon kita sa mga sayop ug mga pagkadili-hingpit sa uban aron ang atong kaugalingong mga sayop pasayloon. Hinumdomi: ‘kon ang mga tawo pasayloon ninyo sa ilang mga kalapasan, pasayloon usab kamo sa inyong langitnong Amahan.”​—Mateo 6:14, 15.

Organisado sa Pagsunod sa Mando sa Hari sa Pagsangyaw

18. Sa paghatag ug nahiusang pagdumala sa pagsangyaw sa mga kongregasyon, unsang kahikayan ang naglungtad sa mga adlaw sa mga apostol ug nagalungtad karon sa atong adlaw?

¹⁸ Ang mga apostol ug mga ansiano nga didto sa Jerusalem nahimong usa ka nagmandong lawas nga mihimog mga desisyon nga naghatag ug nahiusang pagtultol sa unang Kristohanong mga kongregasyon. (Buhat 15:1-31; 16:1-5) Karong adlawa ang dinihogang mga saksi ni Jehova, ang “matinumanon ug maalamong ulipon,” dunay usa ka Nagamandong Lawas sa ilang hedkuwarter sa Brooklyn, New York. (Mateo 24:45-47) Kini nagadumala sa dako kaayo tibuok-kalibotang buluhaton sa pagwali sa Gingharian nga karon ginabuhat sa tibuok yuta ingong katumanan sa mando nga ipahayag ang Gingharian ni Jehova. (Mateo 24:14) Kining buluhatona dili gayod mahimo kon walay usa ka organisasyon. Ang usa ka tawo dili makahimo niini sa iyang kaugalingon.

19. Unsang buluhaton nga dili gayod mahimo sa mga indibiduwal lamang ang malamposong ginabuhat sa mga Saksi ni Jehova pinaagi sa mabinantayong pagsunod sa mga mando sa Hari?

¹⁹ Walay usa ka tawo ug walay dili-organisado, nakatag nga mga pundok sa mga tawo ang makawali diha sa kapin ug 190 ka pinulongan ug diha sa 205 ka kayutaan, makadumalang regular sa kapin sa dos-kuwartong milyon nga pagtuon sa Bibliya sa balay, ug nagabawtismo matag tuig sa mga 190,000 ka bag-ong ministro sa maayong balita sa Gingharian. Wala, gigugol sa kapin ug tulo ka milyong Saksi ang halos unom ka gatos ka milyong oras sa pagsangyaw sa pagbuhat nianang gidak-on sa buluhaton sa usa ka tuig nga 1985. Kana ila lamang nahimo tungod kay sila maayong pagkaorganisar ngadto sa halos 50,000 ka kongregasyon, ang tanan ilalom sa makitang pagdumala sa ilang usa ka Nagamandong Lawas. Bisan pa niana, kini nahimo lamang tungod kay ang Nagamandong Lawas, ang 94 ka sanga, ang 50,000 ka kongregasyon, ug ang 3,000,000 ka indibiduwal nga Saksi tanan nahiusa sa mabinantayong pagsunod sa mga mando sa Hari.

Makahinumdom Ka Ba?

◻ Giunsa pag-organisar ni Jehova ang nasod sa Israel?

◻ Unsang hingpit nga panig-ingnan ang gibilin ni Jesus aron sa paghimo sa buluhatong pagpahayag sa Gingharian ni Jehova?

◻ Unsang daghang pag-alagad nga gihimo sa mga ansiano ang takos sa atong pagpakita kanila sa pasidungog?

◻ Nganong ang independenteng mga pundok o mga indibiduwal dili makahimo sa buluhatong pagsangyaw?

[Hulagway sa panid 23]

Ang Maglalalang nagaprograma sa tanang hayop aron mabuhi

Ang mga tawo kinahanglang magprograma sa ilang kaugalingon aron mabuhi pinaagi sa pagtuon sa mga mando ni Jehova