Hebreohanon 11:1—“Ang Kahulogan sa Pagtuo mao nga may Kasigurohan Kita sa mga Butang nga Atong Gilaoman”

“Ang pagtuo mao ang lig-ong pagsalig nga matuman ang gilaoman, ang tin-awng ebidensiya nga tinuod ang gituohan bisag dili kini makita.”—Hebreohanon 11:1, Bag-ong Kalibotang Hubad.

“Ang kahulogan sa pagtuo mao nga may kasigurohan kita sa mga butang nga atong gilaoman nga dili makita.”—Hebreo (Hebreohanon) 11:1, Ang Bag-ong Maayong Balita Biblia.

Kahulogan sa Hebreohanon 11:1

Kining bersikuloha naghatag sa kinamub-an nga Kasulatanhong kahulogan sa pagtuo ug nagpakita nga ang pagtuo naglakip ug labaw pa kay sa basta pagtuo lang.

“Ang pagtuo mao ang lig-ong pagsalig nga matuman ang gilaoman.” Sa orihinal nga pinulongan sa Hebreohanon 11:1, ang Gregong pulong nga gihubad ug “pagtuo” naghatag ug ideya sa kompiyansa, pagsalig, o lig-ong kombiksiyon. Ang maong pagtuo dili pangandoy lamang; kini maoy “lig-ong pagsalig.” Ang Gregong termino nga gihubad ug “lig-ong pagsalig”a puwede pong hubaron ug “titulo,” nga nagtumong sa usa ka garantiya nga naghatag ug pasalig, o kompiyansa, sa usa nga nanag-iya niana.

“Ang pagtuo mao . . . ang tin-awng ebidensiya [o, “makapakombinsir nga ebidensiya,” footnote] nga tinuod ang gituohan bisag dili kini makita.” Ang pagtuo gipasukad sa lig-on kaayong ebidensiya, nga makapakombinsir sa usa ka tawo nga tinuod ang usa ka butang bisag dili niya kini makita.

Konteksto sa Hebreohanon 11:1

Ang basahon sa Hebreohanon maoy sulat ni apostol Pablo para sa unang siglong mga Kristohanon nga nagpuyo sa Jerusalem ug sa mga dapit palibot niini. Niining bahina sa sulat, gihisgotan ni apostol Pablo ang kaimportante sa pagtuo. Pananglitan, siya misulat: “Kon walay pagtuo imposible nga mapalipay ang Diyos, kay kadtong moduol sa Diyos kinahanglang motuo nga siya buhi ug nga siya maoy tigganti sa mga sinserong nangita kaniya.” (Hebreohanon 11:6) Human hatagig kahulogan ang Hebreohanon 11:1, si Pablo naghatag ug pananglitan sa mga lalaki ug babaye diha sa Bibliya nga nagpakita niining hiyasa. Gihisgotan niya kon giunsa nila pagpakita ang ilang pagtuo pinaagi sa paglihok uyon sa kabubut-on sa Diyos.—Hebreohanon 11:4-38.