Ang Kalibotan Dili Takos Kanila

“Sila gipanagbato, sila gisulayan, . . . ug ang kalibotan dili takos kanila.”—HEBREOHANON 11:37, 38.

ANG mga Saksi ni Jehova sa karaang panahon nagpabilin sa pagkamaunongon diha sa Diyos bisan pa sa daghang mga pagsulay nga gihatag kanila sa dili-matarong tawhanong katilingban. Pananglitan, ang mga alagad sa Diyos gipanagbato ug gipamatay pinaagi sa espada. Ilang giantos ang pagdagmal ug kasakitan. Apan sila nagpabiling malig-on sa pagtuo. Busa, si apostol Pablo miingon: “Ang kalibotan dili takos kanila.”​—Hebreohanon 11:37, 38.

1, 2. Ilalom sa unsang mga kahimtang nga ang mga saksi ni Jehova sa karaang panahon nagpabilin sa pagkamaunongon, ug sa unsang paagi ang ilang mga lihok may epekto sa alagad sa Diyos karon?

² Ang makapukaw ug pagtuong binuhatan sa diyosnong mga tawo sa wala pa ang lunop, sa mga patriarka, ug si Moises nakapukaw sa modernong adlawng mga saksi ni Jehova sa pag-alagad sa Diyos diha sa pagtuo. Apan komusta kadtong uban pa nga gihisgotan sa Hebreohanon kapitulo 11 ug 12? Sa unsang paagi makapahimulos kita sa paghisgot sa mga bahin sa ilang pagtuo?

Pagtuo sa mga Maghuhukom, mga Hari, ug mga Propeta

³ Ang pagtuo dili kay yanong pagtuo lamang; kini kinahanglang pamatud-an pinaagi sa mga binuhatan ug mga lihok. (Basaha ang Hebreohanon 11:30, 31.) Human nga namatay si Moises, ang pagtuo nakahatag sa mga Israelitas ug daghang mga kadaogan diha sa Canaan, apan nagkinahanglan kinig ilang paningkamot. Pananglitan, tungod sa pagtuo ni Josue ug sa uban “ang mga kuta sa Jericho nangatumpag tapos gilibotan nila kini sa pito ka adlaw.” Apan “tungod sa pagtuo si Rahab nga daotang babaye wala malaglag kauban niadtong [walay pagtuong mga molupyo sa Jericho] mga masukihon.” Ngano? “Tungod kay iyang gidawat ang [Israelitas] nga mga espiya sa malinawong paagi,” nga nagpamatuod sa iyang pagtuo pinaagi sa pagtago kanila gikan sa mga Canaanhon. Ang pagtuo ni Rahab adunay malig-ong basehanan gikan sa mga taho nga “gipamala ni Jehova ang mga tubig sa Dagat nga Mapula” diha sa atubangan sa mga Israelitas ug gihatagan silag kadaogan batok sa mga hari nga Amorihanon nga si Sihon ug Og. Si Rahab mihimog tukmang kausaban sa paggawi ug gipanalanginan ang iyang aktibong pagtuo pinaagi sa pagtipig kaniyang buhi uban sa iyang pamilya dihang nahulog ang Jericho ug nahimong kagikan ni Jesu-Kristo.​—Josue 2:1-11; 6:20-23; Mateo 1:1, 5; Santiago 2:24-26.

4. Unsay gipasiugda sa mga eksperyensiya ni Gideon ug Barak mahitungod sa pagpakitag pagtuo sa atubangan sa kapeligrohan?

⁴ Ang pagtuo mapakita pinaagi sa bug-os nga pagsalig kang Jehova bisan atubangan sa kapeligrohan. (Basaha ang Hebreohanon 11:32.) Miingon si Pablo nga kulang siya sa panahon sa paghisgot mahitungod kang “Gideon, Barak, Samson, Jepte, David ug kang Samuel ug sa mga propeta,” kansang mga makuyawng mga buhat nakahatag dakong pamatuod sa pagtuo ug pagsalig diha sa Diyos sa peligrosong mga kahimtang. Busa, pinaagi sa pagtuo ug uban sa 300 lamang ka tawo, si Maghuhukom Gideon gihatagan ug gahom sa Diyos sa pagpilde sa militaryong puwersa sa malupigong mga Midianhon. (Maghuhukom 7:1-25) Gidasig sa propetang babaye nga si Deborah, si Maghuhukom Barak ug ang panon sa 10,000 ka maggugubat nga kulang sa hinagiban midaog batok sa mas gamhanang mga puwersa ni Haring Jabin nga adunay 900 ka armadong karo sa gubat nga gipangunahan ni Sisera.—Maghuhukom 4:1–5:31.

5. Sa unsang mga paagi gipasundayag ni Samson ug Jepte ang pagtuo nga nagpakitag bug-os nga pagsalig kang Jehova?

⁵ Laing pananglitan sa pagtuo gikan sa panahon sa mga maghuhukom sa Israel mao si Samson, ang gamhanang kaaway sa mga Pilistihanon. Tinuod, siya nadakpan nila sa ulahi ug gibutaan. Apan nakapatay si Samson ug daghan kanila dihang iyang gitumba ang mga haligi sa balay nga didto nanagtanyag sila ug dagkong mga halad alang sa ilang bakak nga diyos nga si Dagon. Oo, namatay si Samson uban sa mga Pilistihanon apan dili ingong makasubong paghikog. Tungod sa pagtuo siya misalig kang Jehova ug nangayo kaniyag kusog nga gikinahanglan aron mapakanaog ang panimalos diha sa mga kaaway sa Diyos ug sa Iyang katawhan. (Maghuhukom 16:18-30) Si Jepte, nga gihatagan ni Jehova ug kadaogan batok sa mga Amonihanon, nagpakita usab ug pagtuo nga nakapamatuod sa iyang bug-os nga pagsalig kang Jehova. Pinaagi lamang sa mao nga pagtuo nga natuman niya ang iyang panaad sa Diyos pinaagi sa pagtugyan sa iyang anak nga babaye diha sa pag-alagad kang Jehova sa pagpabiling ulay.​—Maghuhukom 11:29-40.

6. Sa unsang paagi gipakita ni David ang iyang pagtuo?

⁶ Laing dungganan usab tungod sa iyang pagtuo mao si David. Batan-on pa siya dihang nakig-away sa Pilistihanong higanteng si Goliat. ‘Ikaw mianhi kanako uban sa usa ka pinuti, ug uban sa usa ka bangkaw, ug uban sa usa ka salapang,’ miingon si David, ‘apan ako mianhi kanimo sa ngalan ni Jehova sa mga panon.’ Oo, misalig si David sa Diyos, napatay niya ang higanteng Pilistihanon, ug nagpadayon nga nahimong maisogong manggugubat nga hari nga nakiggubat sa intereses sa katawhan sa Diyos. Ug tungod sa pagtuo ni David, tawo siya nga gikahimut-an sa kasingkasing ni Jehova. (1 Samuel 17:4, 45-51; Buhat 13:22) Sa tibuok nga kinabuhi, si Samuel ug ang ubang mga propeta mipakita usab ug dakong pagtuo ug bug-os nga pagsalig sa Diyos. (1 Samuel 1:19-28; 7:15-17) Pagkamaayong mga pananglitan alang sa presenteng adlawng mga alagad ni Jehova, batan-on ug tigulang!

7. (a) Kinsa “tungod sa pagtuo nakapukan ug mga gingharian diha sa panggubatan”? (b) Kinsa tungod sa pagtuo ang “nakahimog pagkamatarong”?

⁷ Pinaagi sa pagtuo kita malamposong makaatubang sa tanang pagsulay sa pagkamaunongon ug makahimo sa bisan unsang butang sumala sa kabubut-on sa Diyos. (Basaha ang Hebreohanon 11:33, 34.) Mikutlo ug dugang mga binuhatan sa pagtuo, tingali anaa sa hunahuna ni Pablo ang Hebreohanong mga maghuhukom, mga hari, ug mga propeta, kay bag-o pa man niyang ginganlan kining mga tawhana. “Tungod sa pagtuo” kining mga maghuhukom sama kang Gideon ug Jepte “nakapukan ug mga gingharian diha sa gubat.” Maingon man si Haring David, diin gipildi ang mga Pilistihanon, mga Moabihanon, mga Siryanhon, ug mga Edomhanon, ug uban pa. (2 Samuel 8:1-14) Dugang pa tungod sa pagtuo, ang matul-id nga mga maghuhukom “nakahimog pagkamatarong,” ug ang maayong nga tambag ni Samuel ug ubang mga propeta nakapukaw sa pipila aron malikayan o talikdan ang pagbuhat ug daotan.​—1 Samuel 12:20-25; Isaias 1:10-20.

8. Unsang saad ang nadawat ni David, ug unsay mitultol niini?

⁸ Usa si David nga tungod sa pagtuo “nakadawat sa mga saad.” Gisaaran siya ni Jehova: “Ang imong trono tukoron ko nga malig-on sa walay kataposan.” (2 Samuel 7:11-16) Ug gituman sa Diyos kanang saara pinaagi sa pagtukod sa Mesiyanikong Gingharian sa 1914.​—Isaias 9:6, 7; Daniel 7:13, 14.

9. Ilalom sa unsang mga kahimtang nga ‘ang mga baba sa leon gitak-oman tungod sa pagtuo’?

⁹ Si propetang Daniel malamposong nakaatubang sa pagsulay sa integridad dihang nagpadayon siya sa pag-ampo sa Diyos sumala sa iyang naandan sa adlaw-adlaw bisan pa sa pagdili sa hari. May pagtuo sa usa ka maghuhupot sa integridad, “gitak-om [ni Daniel] ang baba sa leon” nga tungod niana gitipigan siyang buhi ni Jehova diha sa langob sa mga leon diin didto siya gitambog.​—Daniel 6:4-23.

10. Kinsa ang “nakapalong sa gahom sa kalayo” tungod sa pagtuo, ug mapukaw kita sa paghimog unsa tungod sa samang pagtuo?

¹⁰ Ang kaubang mga Hebreohanong maghuhupot sa integridad nga si Sadrach, Mesach, ug Abednego sa pagkatinuod “nakapalong sa gahom sa kalayo.” Dihang gihulga sa kamatayon sa gipainit pag-ayo nga hudno, ilang gisultihan si Haring Nabucodonosor nga, kon luwason man sila ug dili sa ilang Diyos, dili gayod sila moalagad sa mga diyos sa hari sa Babilonya ni mosimba sa larawan nga iyang gipatindog. Wala palonga ni Jehova ang kalayo sa hudno, apan iyang gitino nga dili masunog diha niini ang tulo ka Hebreohanon. (Daniel 3:1-30) Ang samang pagtuo makahimo kanato sa paghupot sa integridad sa Diyos hangtod sa punto sa hulga sa kamatayon sa mga kamot sa kaaway.​—Pinadayag 2:10.

11. (a) Tungod sa pagtuo, kinsa ang “nakaikyas gikan sa sulab sa espada”? (b) Kinsa ang “gihimong gamhanan” tungod sa pagtuo? (c) Kinsa ang “nahimong makagagahom sa panggubatan” ug ang “gipatibulaag ang kasundalohang langyaw”?

¹¹ Si David “nakaikyas sa sulab sa espada” gikan sa mga sundalo ni Saul. (1 Samuel 19:9-17) Ang mga propetang si Elias ug Eliseo nakaikyas usab gikan sa espada. (1 Hari 19:1-3; 2 Hari 6:11-23) Apan kinsa ‘gikan sa kahuyang gihimong gamhanan tungod sa pagtuo’? Buweno, giisip ni Gideon ang iyang kaugalingon ug ang iyang kasundalohan nga mahuyang kaayo sa pagluwas sa Israel gikan sa mga Midianhon. Apan siya “gihimong gamhanan” sa Diyos, nga mihatag kaniya sa kadaogan​—uban lamang sa 300 ka lalaki! (Maghuhukom 6:14-16; 7:2-7, 22) “Gikan sa kahuyang” dihang giputol ang iyang buhok, si Samson “gihimong gamhanan” ni Jehova ug nakapatayg daghang mga Pilistihanon. (Maghuhukom 16:19-21, 28-30; itandi sa Maghuhukom 15:13-19.) Tingali anaa sa hunahuna ni Pablo si Haring Ezekias ingong usa nga “gihimong gamhanan” tungod sa kahuyang sa militar ug sa pisikal nga paagi. (Isaias 37:1–​38:22) Taliwala sa mga alagad sa Diyos nga “nahimong makagagahom sa panggubatan” mao si Maghuhukom Jepte ug si Haring David. (Maghuhukom 11:32, 33; 2 Samuel 22:1, 2, 30-38) Ug kadtong “nagpatibulaag sa kasundalohang langyaw” naglakip kang Maghuhukom Barak. (Maghuhukom 4:14-16) Kining tanang makuyawng mga buhat nakapakombinsir kanato nga tungod sa pagtuo kita malamposong makasagubang sa tanang pagsulay sa atong integridad ug makahimog bisan unsang butang uyon sa kabubut-on ni Jehova.

Ang Ubang Sulondan sa Pagtuo

12. (a) Kinsa ang “mga babaye nga midawat sa ilang patay gikan sa pagkabanhaw”? (b) Sa unsang paagi ang pagkabanhaw sa pipila ka tawo sa pagtuo “labi pa ka maayo”?

¹² Ang pagtuo naglakip usab sa pagtuo sa pagkabanhaw, usa ka paglaom nga nakatabang kanato sa paghupot sa integridad sa Diyos. (Basaha ang Hebreohanon 11:35.) Tungod sa pagtuo, “ang mga kababayen-an midawat sa ilang mga patay pinaagi sa pagkabanhaw.” Tungod sa pagtuo ug gahom sa Diyos, gibanhaw ni Elias ang anak nga lalaki sa babayeng balo sa Zarephath ug gibanhaw ni Eliseo ang batang lalaki sa babayeng Shunamita. (1 Hari 17:17-24; 2 Hari 4:17-37) “Apan ang uban gipanagsakit [sa literal, “gibunalan sa mga lipak”] hangtod sa kamatayon tungod kay midumili sila sa kagawasan pinaagig lukat, aron ilang makab-ot ang labi pa ka maayong pagkabanhaw.” Hayan kining wala-nganli sa Kasulatan nga mga saksi ni Jehova gipamunalan hangtod sa kamatayon, midumili sa pagdawat sa kaluwasan nga makakompromiso kanila sa ilang pagtuo. Ang ilang pagkabanhaw “labi pa ka maayo” tungod kay dili na kinahanglang mamatay pa pag-usab (sama niadtong gibanhaw ni Elias ug Eliseo) nga mahitabo ilalom sa pagmando sa Gingharian pinaagi ni Jesu-Kristo, ang “Walay Kataposang Amahan” diin ang iyang lukat mohatag higayon alang sa dumalayong kinabuhi sa yuta.​—Isaias 9:6; Juan 5:28, 29.

13. (a) Kinsa ang nag-antos sa “mga pagbiaybiay ug mga paghampak”? (b) Kinsa ang nakaeksperyensiyag “mga talikala ug mga pagkabilanggo”?

¹³ Kon kita may pagtuo, makahimo kita sa paglahutay sa paglutos. (Basaha ang Hebreohanon 11:36-38.) Kon kita lutoson, makatabang ang paghinumdom sa paglaom sa pagkabanhaw ug sa kasayoran nga palig-onon kita sa Diyos sama sa iyang nahimo sa “uban [kinsa] gisulayan [o, nakaagig pagsulay sa pagtuo] pinaagi sa mga pagbiaybiay ug mga paghampak, gani, labaw pa niana, pinaagi sa mga talikala ug mga pagbilanggo.” Ang mga Israelitas “padayong . . . nagbiaybiay sa iyang mga propeta, hangtod ang kasuko ni Jehova midangat batok sa iyang katawhan.” (2 Cronicas 36:15, 16) Tungod sa pagtuo, giantos ni Micheas, Eliseo, ug ubang mga ulipon sa Diyos ang “mga pagbiaybiay.” (1 Hari 22:24; 2 Hari 2:23, 24; Salmo 42:3) “Ang mga paghampak” kaylap sa mga adlaw sa mga hari ug mga propeta sa Israel, ug “gibunalan” sa mga kaaway si Jeremias, dili lang sa pagsagpa ingong pag-insulto kaniya. Ang “mga talikala ug mga pagbilanggo” makapahinumdom kanato sa iyang mga eksperyensiya sama sa mga propetang si Micheas ug Hanani. (Jeremias 20:1, 2; 37:15; 1 Hari 12:11; 22:26, 27; 2 Cronicas 16:7, 10) Tungod kay nakabaton sa samang pagtuo, ang modernong adlawng mga saksi ni Jehova nakalahutay sa samang mga pag-antos “alang sa pagkamatarong.”—1 Pedro 3:14.

14. (a) Kinsa ang lakip niadtong “gipanagbato”? (b) Kinsa ang “giputol pinaagig gabas‘?

¹⁴ “Sila gipanagbato,” miingon si Pablo. Ang usa sa samang tawo sa pagtuo mao si Zacarias, ang anak sa saserdoteng si Jehoiada. Gikunsaran sa balaang espiritu sa Diyos, mipahayag siya batok sa mga apostata sa Juda. Ang resulta? Sumala sa mando ni Haring Jehoas, gibato siya hangtod sa kamatayon sa mga tawong miplanog daotan kaniya diha sa sawang sa balay ni Jehova. (2 Cronicas 24:20-22; Mateo 23:33-35) Si Pablo midugang: “Sila gisulayan, ug gipamutol pinaagi sa gabas.” Tingali ang anaa sa iyang hunahuna mao si propetang Micheas nga usa niadto nga “gisulayan,” ug ang dili-matinong tradisyong Hudiyohanon nag-ingon nga gigabas si Isaias sa panahon sa pagmando ni Haring Manases.​—1 Hari 22:24-28.

15. Kinsa ang nag-antos sa “pagdagmal” ug “nahadiindiin sa mga disyerto”?

¹⁵ Ang uban nga “nangamatay pinaagi sa espada,” sama, pananglitan, sa kauban ni Elias nga propeta sa Diyos “gipatay pinaagi sa espada” sa mga adlaw sa daotang Haring Ahab. (1 Hari 19:9, 10) Lakip si Elias ug Eliseo niadtong mga tawong may pagtuo kinsa “nanaglakaw nga nanagsapot sa mga panit sa karnero, ug mga kanding, nga nanag-antos sa kawalad-on, sa kasakit, mga dinagmalan.” (1 Hari 19:5-8, 19; 2 Hari 1:8; 2:13; itandi sa Jeremias 38:6.) Kadtong “nahadiindiin sa disyerto ug sa mga kabukiran ug sa mga lungib ug sa mga langob sa yuta” ingong mga tumong sa paglutos naglakip dili lang kang Elias ug Eliseo kondili sa 100 ka propeta nga gitago ni Abadias sa tinag-50 diha sa langub, nga naghatag kanilag tinapay ug tubig dihang ang idolatrosong si Reyna Jezebel misugod sa “pagpamatay sa mga propeta ni Jehova.” (1 Hari 18:4, 13; 2 Hari 2:13; 6:13, 30, 31) Unsa ka makapalig-ong mga maghuhupot sa integridad! Dili ikatingalang miingon si Pablo: “Ang kalibotan [dili-matarong tawhanong katilingban] dili takos kanila”!

16. (a) Nganong ang una-Kristohanong mga saksi ni Jehova wala pa makadawat sa “katumanan sa saad”? (b) Alang sa mga Saksi ni Jehova sa una-Kristohanong mga panahon, maylabot sa unsa ang ‘pagkahimong hingpit’?

¹⁶ Ang pagtuo naghatag kanatog pagsalig nga sa tinakdang panahon sa Diyos ang tanang nahigugma kaniya “makadawat sa katumanan sa saad.” (Basaha ang Hebreohanon 11:39, 40.) Ang wala pay Kristohanong panahong mga maghuhupot sa integridad nga “gipanghimatud-an sa ilang pagtuo,” karon nahimong bahin na sa rekord sa Kasulatan. Apan sila wala pa makadawat sa “katumanan sa saad” sa Diyos pinaagi sa yutan-ong pagkabanhaw nga may palaabutong kinabuhing dayon ilalom sa pagmando sa Gingharian. Ngano? “Aron sila dili niya pagahingpiton gawas” sa dinihogang mga sumusunod ni Jesus, nga kanila “nagtagana ang Diyos ug labi pa ka maayong butang”​—walay kamatayon langitnong kinabuhi ug mga pribilehiyo nga mahimong kaubang magmamando uban kang Kristo Jesus. Pinaagi sa ilang pagkabanhaw, human nga natukod ang Gingharian sa 1914, ang dinihogang mga Kristohanon “gihimong hingpit” sa langit sa dili pa banhawon sa yuta ang mga saksi ni Jehova sa una-Kristohanong mga panahon. (1 Corinto 15:50-57; Pinadayag 12:1-5) Alang niadtong unang mga saksi, sila “gihimong hingpit” maylabot sa yutan-ong pagkabanhaw, ang ilang “pagbaton ug kagawasan gikan sa kaulipnan sa pagkadunot” sa ulahi ug sa ilang pagkab-ot sa tawhanong kahingpitan pinaagi sa mga pag-alagad sa Hataas nga Saserdote si Jesu-Kristo ug sa iyang 144,000 ka langitnon kaubang mga saserdote sa panahon sa iyang Milenyal nga Pagmando.​—Roma 8:20, 21; Hebreohanon 7:26; Pinadayag 14:1; 20:4-6.

Ipunting ang Panan-aw Diha sa Maghihingpit sa Atong Pagtuo

17, 18. (a) Aron molampos sa atong lumba sa kinabuhing walay kataposan, unsay atong kinahanglang buhaton? (b) Sa unsang paagi “Maghihingpit sa atong pagtuo” si Jesu-Kristo?

¹⁷ Nakahisgot sa mga binuhatan sa una-Kristohanong mga saksi ni Jehova, gipunting ni Pablo ang pangunang sulondan sa pagtuo. (Basaha ang Hebreohanon 12:1-3.) Pagkadakong tuboran sa pagdasig nga adunay ‘dako kaayong panganod sa mga saksi nga nagalibot kanato’! Kini nakapukaw kanato sa pagwakli sa tanang kabug-at nga makaulang sa atong espirituwal nga kauswagan. Makatabang kini kanato sa paglikay sa kasal-anan sa pagkawala o sa pagkakulang sa pagtuo ug sa pagdalagan nga malahutayon sa Kristohanong lumba alang sa kinabuhing walay kataposan. Apan, aron atong maabot ang tumong, kinahanglang mohimo pa kita ug dugang pa. Apan unsa man kana?

¹⁸ Aron molampos kita sa atong lumba alang sa kinabuhing walay kataposan sa bag-ong sistema sa Diyos, kinahanglan nga kita “magatutok sa Pangunang Ahente [kun Pangunang Lider] ug Maghihingpit sa atong pagtuo, si Jesus.” Ang pagtuo ni Abraham ug sa ubang mga maghuhupot sa integridad nga nagkinabuhi sa wala pa ang yutan-ong ministeryo ni Jesu-Kristo dili-hingpit, dili-bug-os, sa pagkaagi nga sila wala makasabot niadto sa wala matuman nga mga tagna mahitungod sa Mesiyas. (Itandi sa 1 Pedro 1:10-12.) Apan tungod sa pagkatawo, ministeryo, kamatayon, ug pagkabanhaw ni Jesus, daghang Mesiyanikong mga tagna ang nangatuman. Busa ang pagtuo sa hingpit nga diwa “miabot” pinaagi ni Jesu-Kristo. (Galacia 3:24, 25) Dugang pa, gikan sa iyang langitnong kahimtang si Jesus nagapadayon gihapon ingong Maghihingpit sa pagtuo sa iyang mga sumusunod, sama sa pagbubo kanila sa balaang espiritu sa Pentekostes sa 33 K.P. ug pinaagi sa mga pinadayag nga anam-anam nga nakalig-on sa ilang pagtuo. (Buhat 2:32, 33; Roma 10:17; Pinadayag 1:1, 2; 22:16) Pagkadako sa atong pasalamat alang niining “Kasaligang Saksi,” niining “Labawng Pangulo” sa mga Saksi ni Jehova!​—Pinadayag 1:5; Mateo 23:10.

19. Nganong ‘palandongon pag-ayo’ si Jesus?

¹⁹ Sanglit dili masayon ang pag-antos sa mga pagbiaybiay sa mga walay pagtuo, si Pablo miawhag: “Palandonga ninyo siya pag-ayo nga miantos sa maong pagsupak sa mga makasasala batok kaniya, aron dili managkataka ug managtalaw ang inyong mga kalag.” Tinuod, kon ipunting nato ang atong mga mata diha sa “Kasaligang Saksi,” si Jesu-Kristo, dili gayod kita matak-an sa pagbuhat sa kabubut-on sa Diyos.​—Juan 4:34.

20. Unsa ang pipila ka butang nga imong nakat-onan mahitungod sa pagtuo pinaagi sa pagpalandong sa Hebreohanon 11:1–​12:3?

²⁰ Gikan sa ‘dako kaayong panganod sa mga saksi’ daghan kitag nakat-onan mahitungod sa mga bahin sa pagtuo. Pananglitan, ang pagtuo nga sama kang Abel nakalambo sa atong pagpabili sa halad ni Jesus. Ang tinuod nga pagtuo nakahimo kanatong maisogong mga saksi, sama sa maisogong pagwali ni Enoch sa mensahe ni Jehova. Sama kang Noe, ang atong pagtuo nakapalihok kanato sa pagsunod sa mga sugo sa Diyos ug sa pag-alagad ingong mga magwawali sa pagkamatarong. Ang pagtuo ni Abraham nakapasilsil kanato sa panginahanglan sa pagsugot sa Diyos ug sa pagsalig sa Iyang mga saad, bisan pag ang pipila kanila wala pa matuman. Ang pananglitan ni Moises nagpakita nga ang pagtuo nakahimo kanato sa pagpabiling walay buling niining kalibotana ug magabarog nga maunongon uban sa katawhan ni Jehova. Ang mga makuyawng mga buhat sa mga maghuhukom, mga hari, ug mga propeta sa Israel nagpamatuod nga ang pagtuo sa Diyos mopalig-on kanato bisan pa sa paglutos ug sa mga pagsulay. Ug pagkadako sa atong pasalamat nga ang labing dakong pananglitan ni Jesu-Kristo nakahimo sa atong pagtuo nga malig-on ug dili-matarog! Busa, uban kang Jesus nga atong Pangulo ug sa gahom sa atong Diyos, magpadayon kita sa pagpakita sa malahutayong pagtuo ingong mga Saksi ni Jehova.

Unsay Imong mga Tubag?

◻ Unsa ang mga binuhatan sa una-Kristohanong mga Saksi ni Jehova nga nagpamatuod nga ang pagtuo makita pinaagi sa bug-os nga pagsalig sa Diyos bisan pa atubangan sa kapeligrohan?

◻ Nganong ikaingon nga pinaagi sa pagtuo kita malamposong makasagubang sa tanang pagsulay sa atong integridad?

◻ Unsay pamatuod nga tungod sa pagtuo kita makalahutay sa paglutos?

◻ Nganong gitawag si Jesus nga “Maghihingpit sa atong pagtuo”?

◻ Unsa ang pipila ka bahin sa pagtuo?

3. Sa unsang paagi ang mga hitabo maylabot sa Jericho ug kang Rahab nagpakita nga kinahanglang pamatud-an ang pagtuo pinaagig mga binuhatan?

[Hulagway sa panid 16, 17]

Nagpakitag pagtuo si David pinaagi sa bug-os nga pagsalig kang Jehova. Usa ka maayong pananglitan kini sa katawhan ni Jehova karon!

[Hulagway sa panid 18]

“Gidawat sa mga babaye ang ilang patay gikan sa pagkabanhaw.” Ang pagtuo sa pagkabanhaw makatabang kanato sa paghupot sa integridad kang Jehova