Kon Nganong Atong Gikinahanglan ang Pagtuo ug Kaalam
Mga Pangunang Punto Gikan sa Sulat ni Santiago
ANG mga alagad ni Jehova kinahanglang molahutay kon sulayan. Sila kinahanglang maglikay usab sa mga kagawian nga mosangpot sa dili pag-uyon sa Diyos. Ang maong mga punto gipasiugda diha sa sulat ni Santiago, ug ang pagbuhat ug positibong butang nagkinahanglag aktibong pagtuo ug langitnong kaalam. Ang magsusulat niining sulata wala magpaila sa iyang kaugalingon ingong usa sa duha ka apostol ni Jesus nga ginganlag Santiago kondili nagpaila ingong ‘usa ka ulipon sa Diyos ug ni Kristo.’ Sa susama, si Judas nga igsoon ni Jesus sa inahan nag-ingon nga siya maoy “usa ka ulipon ni Jesu-Kristo, ug igsoong lalaki ni Santiago.” (Santiago 1:1; Judas 1; Mateo 10:2, 3) Busa, ang igsoon ni Jesus sa inahan dayag mao ang nagsulat sa sulat nga nagdala sa iyang ngalan.—Marcos 6:3.
Kining sulata wala maghisgot sa kalaglagan sa Jerusalem sa 70 K.P., ug ang manalaysay nga si Josephus nagpaila nga si Santiago sa ulahi gipatay human namatay ang Romanong gobernador nga si Festus sa mga 62 K.P.. Nan, dayag nga ang sulat gisulat sa wala pa ang 62 K.P. Kini gisulat alang sa “napulog-duha ka tribo” sa espirituwal nga Israel, kay kini gipunting ngadto kanila mga adunay “pagtuo sa atong Ginoo nga si Jesu-Kristo.”—Santiago 1:1; 2:1; Galacia 6:16.
Si Santiago migamit ug mga ilustrasyon nga motabang kanato sa paghinumdom sa iyang tambag. Pananglitan, iyang gipakita nga ang usa ka tawo nga nangangyo sa Diyos ug kaalam dili angay magduhaduha, “kay siya nga magduhaduha nahisama sa usa ka balod sa dagat nga ginahandos ug ginakusokuso sa hangin.” (1:5-8) Ang atong dila kinahanglang pugngan tungod kay kini maoy moagak sa atong dalan sama sa usa ka timon nga moagak sa usa ka sakayan. (3:1, 4) Ug aron makaantos sa mga pagsulay, kinahanglang magpakita kita ug mapailobong paglahutay sama sa usa ka mag-uuma nga nagapaabot sa ting-ani.—5:7, 8.
Pagtuo, mga Pagsulay, ug mga Binuhatan
Unang gipakita ni Santiago nga kita mahimong malipayon ingong mga Kristohanon bisan pa sa mga pagsulay. (1:1-18) Ang pipila niini nga mga pagsulay, sama sa balatian, maoy kasagaran sa tanang mga tawo, apan ang mga Kristohanon usab mag-antos tungod sa pagkaulipon sa Diyos ug ni Kristo. Si Jehova mohatag kanato sa kaalam nga gikinahanglan sa paglahutay kon kita magpadayon sa paghangyo niana uban ang pagtuo. Siya dili gayod mosulay kanato sa daotang mga butang, ug makasalig kita kaniya nga motagana sa kon unsay maayo.
Aron madawat ang tabang sa Diyos, kinahanglan mohatag kita kaniya ug pagsimba pinaagi sa binuhatan nga nagapasundayag sa atong pagtuo. (1:19–2:26) Kini nagkinahanglang kita “mga tigbuhat sa pulong,” dili mga tigpaminaw lamang. Kinahanglang pugngan nato ang dila, atimanon ang mga ilo ug mga balo, ug magpabiling walay buling sa kalibotan. Kon atong palabihon ang adunahan ug dili tagdon ang kabos, atong ginalapas “ang harianong kasugoan” sa gugma. Angay natong hinumdoman usab nga ang pagtuo ikapasundayag pinaagig binuhatan, sama sa panig-ingnang gipakita ni Abraham ug Rahab. Sa pagkamatuod, “ang pagtuo nga walay binuhatan patay.”
Langitnong Kaalam ug Pag-ampo
Ang mga magtutudlo nagkinahanglag pagtuo ug kaalam sa pagtuman sa ilang mga katungdanan. (3:1-18) Sila adunay bug-at kaayong kaakohan ingong mga magtutudlo. Sama kanila, angay natong pugngan ang dila—usa ka butang nga ang langitnong kaalam motabang kanato sa pagbuhat.
Ang kaalam motabang usab kanato sa pag-amgo nga ang pagpadaog sa kalibotanong mga hilig makadaot sa atong relasyon sa Diyos. (4:1–5:12) Kon kita nanlimbasog nga makab-ot ang mahakogong mga tinguha o nagahukom sa atong mga igsoon, angay kitang maghinulsol. Ug pagkahinungdanon nga likayan ang pakighigala uban niining kalibotana, tungod kay kini maoy pagpanapaw sa espirituwal! Dili gayod nato kalimtan ang kabubut-on sa Diyos pinaagi sa paglaraw sa materyal, ug hinaot nga kita magbantay batok sa usa ka espiritu sa pagkadili-mapailobon ug manganti batok sa usag usa.
Ang bisan kinsa nga may sakit sa espirituwal angay mangayog tabang sa mga ansiano sa kongregasyon. (5:13-20) Kon may nahimong kasal-anan, ang ilang mga pag-ampo ug maalamong tambag motabang sa pagpasig-uli sa espirituwal nga kahimsog sa usa ka mahinulsolong makasasala. Ngani, “siya nga nakapatalikod sa usa ka makasasala gikan sa pagkamasalaypon sa iyang dalan magaluwas sa kalag sa [makasasala] gikan sa [espirituwal ug walay kataposang] kamatayon.”
[Kahon sa panid 23]
Mga Tigbuhat sa Pulong: Kita kinahanglang “mga tigbuhat sa pulong, ug dili mga tigpaminaw lamang.” (Santiago 1:22-25) Ang usa ka tigpaminaw lamang “nahisama sa usa ka tawong nagsud-ong sa iyang dagway diha sa usa ka salamin.” Human sa makadiyot nga pagtan-aw, siya motalikod “ug dihadiha makalimot kon unsang matanga siya sa pagkatawo.” Apan ang usa ka ‘tigbuhat sa pulong’ maampingong motutok sa hingpit, o bug-os, nga kasugoan sa Diyos, motuman sa tanang gikinahanglan sa usa ka Kristohanon. Siya “nagapadayon niana,” padayong nagausisa niana nga kasugoan uban ang hunahunang mohimo ug mga kausaban aron suod nga mopahiuyon niana. (Salmo 119:16) Sa unsang paagi ang “usa ka tigbuhat sa pulong” lahi gikan sa usa ka tawo kinsa mitan-aw sa salamin ug nakalimot sa gipadayag niana? Aw, ang tigbuhat nagpadapat sa pulong ni Jehova ug nagatagamtam sa Iyang pag-uyon!—Salmo 19:7-11.