Pangandam Alang sa Kaluwasan Ngadto sa Usa ka Bag-ong Kalibotan
“Hinumdomi ang asawa ni Lot.”—LUCAS 17:32.
1. Unsang makasaysayanhong panig-ingnan sa balaang kaluwasan ang gipasiugda sa atong leksiyon karon, ug sa unsang paagi kini makahatag kanato ug kaayohan?
HUMAN nga giasoy ang kahibulongang kaluwasan nga gihimo ni Jehova alang kang Noe ug sa iyang pamilya, si apostol Pedro mikutlo ug laing makasaysayanhong panig-ingnan. Siya naghatag ug pagtagad sa kaluwasan sa matarong nga Lot sa dihang ang Sodoma ug Gomorra gihimong abo, sumala sa atong mabasa diha sa 2 Pedro 2:6-8. Ang mga detalye gipreserbar alang sa atong kaayohan. (Roma 15:4) Ang atong pagsilsil niini diha sa kasingkasing sa nahitabo bahin niana nga kaluwasan makatabang kanato nga mahilinya alang sa kaluwasan ngadto sa bag-ong kalibotan sa Diyos.
Unsay Atong Pagsanong sa Kalibotanong Paagi sa Kinabuhi
2. Unsang paggawi sa Sodoma ug Gomorra ang nag-agak sa paglaglag sa Diyos kanila?
2 Nganong gilaglag kadtong mga siyudara ug ang ilang mga pomuluyo? Ang apostol Pedro naghisgot sa pagpatuyang sa “haluag nga paggawi.” (2 Pedro 2:7) Sumala sa gipaila pinaagi sa paggamit sa Gregong termino nga diin gihubad kana nga pulong, ang mga tawo sa Sodoma ug Gomorra nagpatuyang sa kalapasan sa paagi nga nagapadayag ug grabeng pagkawalay-pagtahod, bisan gani pagpasipala, sa balaod ug awtoridad. Ang Judas 7 miingon nga sila ‘nanagpatuyang sa pagpakighilawas ug sa dili kinaiyanhon nga kaulag.’ Ang hilabihan ka daotan sa ilang paggawi napadayag sa dihang ang mga tawo sa Sodoma, “gikan sa mga bata ngadto sa mga tigulang, ang tanan diha sa usa ka panon,” milibot sa balay ni Lot ug nagsugo nga ihatag kanila ang iyang mga bisita alang sa mga kalalakin-an sa Sodoma aron sa pagtagbaw sa ilang hiwi nga kaulag. Ug sila misinggit ug mga paghulga kang Lot tungod kay siya midumili sa ilang mangil-ad nga mga hangyo.—Genesis 13:13; 19:4, 5, 9.
3. (a) Sa unsang paagi si Lot ug ang iyang pamilya midangat sa pagpuyo diha sa daotang palibot sa Sodoma? (b) Unsay reaksiyon ni Lot sa haluag nga paggawi sa katawhan sa Sodoma?
3 Si Lot sa sinugdan mipuyo duol sa Sodoma tungod sa posibilidad niini sa materyal nga kauswagan. Sa wala magdugay, mipuyo na gayod siya sa siyudad. (Genesis 13:8-12; 14:12; 19:1) Apan siya wala mouyon sa malaw-ay nga mga buhat sa mga tawo sa siyudad, ug wala siya lantawa niadtong mga tawhana nga sama kanila, tingali tungod kay si Lot ug ang iyang pamilya wala moduyog sa ilang sosyal nga kinabuhi. Ang 2 Pedro 2:7, 8 miingon: “Si Lot . . . nasubo uyamot tungod sa pagpatuyang sa mga tawong malinapason sa kasugoan sa haluag nga paggawi—kay ang mga nakita ug nadungog sa matarong nga tawo sa nagpuyo siya uban kanila sa adlaw-adlaw nakapasakit sa iyang matarong nga kalag tungod sa ilang daotang mga buhat.” Ang maong kahimtang nahimong usa ka dakong pagsulay alang kang Lot tungod kay, ingong tawong matarong, siya nagdumot sa maong paggawi.
4. (a) Sa unsang paagi ang mga kahimtang karong adlawa sama niadtong sa karaang Sodoma? (b) Kon kita sama sa matarong nga Lot, unsay atong reaksiyon sa daotang mga kahimtang karon?
4 Sa atong mga adlaw usab, ang moral nga sukdanan sa tawhanong katilingban nagakaot-ot. Sa daghang kayutaan, dugang ug dugang ang nakigsekso una pa magminyo o gawas sa kaminyoon nga sekso. Bisan ang mga batan-on sa eskuwelahan nalangkit kaayo niini nga paagi sa kinabuhi, ug tamayon nila kadtong dili moduyog kanila. Ang mga homoseksuwal sa dayag nagpaila sa ilang kaugalingon ug nagaparada sa mga karsada sa dagkong mga siyudad aron sila ilhon. Ang mga klero miduyog sa maong kalihokan. Sa opisyal, dili daghang mga simbahan ang moordinar sa naila nga mga homoseksuwal ug mga makihilawason. Apan, sa aktuwal, ingon sa subsob nga gipakita sa mga taho, dili malisod nga makakitag mga homoseksuwal, mga makighilawason, ug mga mananapaw taliwala sa mga klero. Sa pagkamatuod, ang pipila ka mga pangulo sa relihiyon gibalhin sa ubang mga siyudad o gipugos sa pagluwat tungod sa mga eskandalo sa sekso. Ang mga mahigugmaon sa pagkamatarong dili mosimpatiya uban niana nga pagkadaotan; sila “nagadumot sa daotan.” (Roma 12:9) Ilabinang sila masubo sa dihang ang paggawi sa mga tawong nag-angkong nag-alagad sa Diyos mohatag pasipala sa iyang ngalan ug makapahinabo sa mga tawong walay kahibalo sa pagsalikway sa tanang mga relihiyon sa kayugot.—Roma 2:24.
5. Unsang pangutana sa paglaglag ni Jehova sa Sodoma ug Gomorra ang gitubag alang kanato?
5 Matag tuig ang kahimtang nagakagrabe. May kataposan ba kini? Oo, aduna! Ang gibuhat ni Jehova sa karaang Sodoma ug Gomorra tin-aw nga nagpadayag nga, sa iyang tinudlong panahon, siya mopakanaog ug hukom. Bug-os niya nga laglagon ang daotan, apan iyang luwason ang iyang maunongong mga alagad.
Kinsa o Unsa ang Unahon sa Kinabuhi?
6. (a) Unsa ang tukma sa panahong pagtulon-an ang makuha bahin sa asoy sa batan-ong mga lalaki nga pamanhonon sa mga anak nga babaye ni Lot? (b) Sa unsang paagi ang tinamdan sa ilang umaabot nga mga kapikas nakahatag pagsulay sa mga anak nga babaye ni Lot?
6 Kadto lamang nagapakita sa tinuod nga diyosnong debosyon ang pagaluwason. Bahin niini, palandonga ang gipamulong sa mga manulonda ni Jehova ngadto kang Lot sa wala pa laglaga ang Sodoma ug Gomorra. “May mga kauban pa ba kamo dinhi? Mga umagad nga lalaki ug ang inyong mga anak nga babaye ug ang tanan nga imo sa siyudad, pagulaa niining dapita! Kay among laglagon kining dapita.” Busa si Lot nakigsulti sa batan-ong mga lalaki nga makigminyo sa iyang mga anak nga babaye. Iyang balik-balik nga giagda sila: “Tindog kamo! Pahawa kamo niining dapita, tungod kay laglagon ni Jehova kining siyudara!” Ang ilang relasyon sa panimalay ni Lot naghatag kanila ug linain nga higayon alang sa kaluwasan, apan sila kinahanglang molihok. Sila kinahanglang mohatag makitang ebidensiya sa pagkamasinugtanon kang Jehova. Apan, sa ilang mga mata si Lot “maoy sama sa tawo nga nagtiaw-tiaw lamang.” (Genesis 19:12-14) Imong mahanduraw kon unsay gibati sa mga anak nga babaye ni Lot sa ilang nahibaloan ang nahitabo. Nabutang sa pagsulay ang ilang pagkamaungon sa Diyos.
7, 8. (a) Sa dihang giagda sa mga manulonda si Lot sa pagdala sa iyang pamilya ug sa pagkalagiw, unsay iyang reaksiyon, ug nganong kini dili-maalamon? (b) Aron maluwas, unsay hinungdanon alang kang Lot ug sa iyang pamilya?
7 Sa pagkakaadlawon, nag-apura pa ang mga manulonda kang Lot. Sila miingon: “Bangon! Dalha ang imong asawa ug ang imong duha ka anak nga babaye kinsa ania dinhi, kay tingalig malaglag kamo uban sa pagkadaotan sa siyudad!” Apan “siya naglanganlangan.” (Genesis 19:15, 16) Ngano? Unsay nakalangan kaniya? Ang iya bang materyal nga mga intereses sa Sodoma—nga maoy nakadani kaniya sa pagpuyo didto? Kon siya mohawid niini, siya malaglag uban sa Sodoma.
8 Tungod sa kaluoy, gikuptan sa mga manulonda ang mga kamot sa sakop sa iyang pamilya ug gidali sila sa pagpagula sa siyudad. Sa gawas sa siyudad, ang manulonda ni Jehova misugo: “Ikyas kamo alang sa inyong mga kalag! Ayaw paglingi ug ayaw paghunong sa tibuok nga Distrito! Kumalagiw ngadto sa bukid aron kamo dili malaglag!” Apan si Lot naglanganlangan gihapon. Sa kataposan, human sa gikasabotan nga adto siya sa usa ka dapit nga dili kaayo layo, siya ug ang iyang pamilya mikalagiw. (Genesis 19:17-22) Dili na mahimo nga maglangan pa; ang pagsunod maoy hinungdanon.
9, 10. (a) Nganong ang pagkuyog uban sa iyang bana dili igo nga maseguro ang kaluwasan alang sa asawa ni Lot? (b) Sa dihang namatay ang asawa ni Lot, unsang dugang pagsulay ang midangat kang Lot ug sa iyang mga anak nga babaye?
9 Apan, ang kaluwasan dili pa bug-os sa nahilayo na sa Sodoma. Ang Genesis 19:23-25 nagsugilon kanato: “Misilang na ang adlaw sa diha nga miabot si Lot sa Zoar. Unya gipaulan ni Jehova sa Sodoma ug Gomorra ang asupri ug kalayo nga gikan kang Jehova, didto sa langit, ibabaw sa Sodoma ug Gomorra. Busa iyang gilaglag kining mga siyudara, bisan ang tibuok Distrito ug ang tanang pomuluyo sa siyudad ug ang mga tanom sa yuta.” Apan hain man ang asawa ni Lot?
10 Siya mikalagiw uban sa iyang bana. Apan, bug-os ba gayod nga miuyon siya sa gibuhat sa iyang bana? Walay gipakita nga miuyon siya sa imoralidad sa Sodoma. Apan ang iyang gugma ba alang kang Jehova mas kusganon pa kay sa gugma sa iyang balay ug sa iyang materyal nga mga butang nga iyang nabatonan didto? (Itandi ang Lucas 17:31, 32.) Ilalom sa pagsulay, napadayag kon unsay anaa sa iyang kasingkasing. Malagmit duol na sila niadto sa Zoar, tingali talisulod na gayod sa siyudad, sa dihang siya sa pagkadili-masinugtanon milingi sa likod niya. Ug sumala pa sa rekord sa Bibliya, “siya nahimong haligi sa asin.” (Genesis 19:26) Karon ang lain pang pagsulay sa pagkamaunongon ang giatubang ni Lot ug sa iyang mga anak nga babaye. Ang pagkasuod ba ni Lot sa iyang namatay nga asawa o ang pagbati sa mga anak sa ilang namatay nga inahan mas labaw pa kay sa ilang gugma kang Jehova, nga maoy naghatag niini nga kalaglagan? Padayon ba sila nga mosunod sa Diyos bisan pa nga ang usa nga suod kaayo nila wala magmaunongon kaniya? Uban sa bug-os nga pagsalig kang Jehova, sila wala gayod molingi.
11. Unsay atong nakat-onan dinhi bahin sa kaluwasan nga gitagana ni Jehova?
11 Oo, si Jehova mahibalong moluwas sa mga tawong may diyosnong debosyon gikan sa pagsulay. Siya mahibalong moluwas ug tibuok pamilya nga nagkahiusa sa putli nga pagsimba; mahibalo usab siya nga moluwas ug mga tawo. Kon sila tinuod gayod nga nahigugma kaniya, siya mahibalo usab mohatag ug dakong konsiderasyon sa pagpakiglabot kanila. “Siya nahibalo sa pagkaumol kanato, nga nahinumdom nga kita abog lamang.” (Salmo 103:13, 14) Apan ang iyang pagpangluwas maoy alang lamang sa mga tawong adunay diyosnong debosyon, kadtong matuod ug debosyon, kansang pagsunod maoy pagpadayag sa ilang pagkamaunongon.
Ang Mahigugmaong mga Pagpangandam Alang sa Labi Pang Dakong Kaluwasan
12. Unsang mahigugmaong pagpangandam ang gihimo ni Jehova sa dili pa ipakanaog ang kaluwasan nga mahinamon natong gipaabot?
12 Sa iyang gipahinabo sa mga adlaw ni Noe ug Lot, si Jehova wala magpapha sa tanang daotan sa walay kataposan. Sama sa giingon sa kasulatan, kini naghatag lamang ug panig-ingnan sa mga butang sa umaabot. Sa dili pa moabot kanang mga butanga, anaa sa hunahuna ni Jehova ang labaw pa nga iyang gitinguhang buhaton alang sa kaayohan sa mga tawo nga nahigugma kaniya. Siya nagpadala sa iyang bugtong Anak, si Jesu-Kristo, sa yuta. Dinhi, hinloan ni Jesus ang ngalan sa Diyos sa pasipala pinaagi sa pagpasundayag ug matang sa debosyon nga mahimong ikahatag ni Adan ingon nga hingpit nga tawo ngadto sa Diyos; nga napadayag ni Jesus ilalom sa mas malisod pa nga mga sirkumstansiya. Gitanyag ni Jesus ang iyang hingpit tawhanong kinabuhi ingong halad aron ang mga anak ni Adan nga magpakita ug pagtuo makabaton nianang giwala ni Adan. Dayon, ang usa ka “gamay nga panon” sa maunongong mga tawo pilion sa Diyos nga makauban ni Kristo sa iyang langitnong Gingharian, ug ang “usa ka dakong panon” pagatigomon gikan sa tanang kanasoran aron mahimong patukoranan alang sa usa ka bag-ong tawhanong katilingban. (Lucas 12:32; Pinadayag 7:9) Sa dihang matuman kana, ang Diyos mohimog dakong kaluwasan nga gilandongan sa mga hitabo sa Lunop ug sa kalaglagan sa Sodoma ug Gomorra.
Kon Nganong ang Positibong Paglihok Dinalian Karon
13, 14. Unsay atong makat-onan gikan sa kamatuoran nga si Pedro migamit sa kalaglagan sa mga tawong dili-diyosnon sa mga adlaw ni Lot ug ni Noe ingong mga panig-ingnan?
13 Ang mga estudyante sa Pulong sa Diyos nasayod nga si Jehova sa daghang okasyon nakahimog mga buhat sa kaluwasan alang sa iyang mga alagad. Apan, sa kadaghanang hitabo ang Bibliya wala moingon, ‘Sama niadtong panahona, mao man sa presensiya sa Anak sa tawo.’ Nganong si apostol Pedro, nga dinasig sa balaang espiritu, migamit niining duha lamang ka panig-ingnan? Unsay kalainan bahin sa mga hitabo sa mga adlaw ni Lot ug Noe?
14 Ang tukma nga hinungdan makita diha sa Judas 7, diin atong mabasa nga ang “Sodoma ug Gomorra ug ang mga siyudad nga nagalibot kanila . . . gibutang sa atong atubangan ingong panig-ingnang pasidaan pinaagi sa paghiagom sa silot sa walay kataposang kalayo.” Oo, ang kalaglagan sa banggiitang mga makasasala niadtong mga siyudara maoy sa walay kataposan, maingon man ang kalaglagan sa mga daotan sa kataposan niining presenteng sistema sa mga butang. (Mateo 25:46) Ang Lunop sa mga adlaw ni Noe gihisgotan usab sa konteksto nga naghisgot sa walay kataposang paghukom. (2 Pedro 2:4, 5, 9-12; 3:5-7) Busa pinaagi sa paglaglag sa mga tawong dili-diyosnon sa mga adlaw ni Lot ug Noe, si Jehova nagpadayag nga siya moluwas sa iyang mga alagad pinaagi sa paglaglag sa walay kataposan sa mga tawo nga nagabuhat ug pagkadaotan.—2 Tesalonica 1:6-10.
15. (a) Unsang dinaliang pasidaan ang gihatag alang niadtong nagahimog daotang mga buhat? (b) Nganong ang hustisya ipadapat diha sa tanang magapadayon sa pagkadili-matarong?
15 Ang kalaglagan sa mga daotan wala makapahimuot kang Jehova, ni nakapahimuot kini sa iyang mga alagad. Pinaagi sa iyang mga Saksi, si Jehova nag-agda sa katawhan: “Bumiya, bumiya kamo gikan sa inyong daotang mga dalan, kay ngano man nga kamo magpakamatay?” (Ezekiel 33:11) Bisan pa, kon ang mga tawo dili magpakitag tinguha sa pagpamati niining mahigugmaong hangyo ug magapadayon sa ilang hinakog nga dalan sa kinabuhi, ang pagtahod ni Jehova sa iyang kaugalingong balaang ngalan ug ang iyang gugma alang sa iyang maunongong mga alagad nga nag-antos sa pag-abuso sa mga kamot sa mga tawong dili-diyosnon nagkinahanglan nga siya mopakanaog ug hustisya.
16. (a) Nganong kita makasalig nga ang gitagnang kaluwasan haduol na? (b) Gikan sa unsa ug ngadto sa unsa ang kaluwasan?
16 Ang panahon sa Diyos sa pagdalag kaluwasan haduol na kaayo! Ang mga tinamdan ug ang mga hitabo nga gitagna ni Jesus ingong ilhanan sa iyang presensiya ug sa kataposan sa sistema sa mga butang dayag na kaayo. Ang mga bahin sa maong ilhanan misugod sa pagtungha sa kapin sa 75 ka tuig nga milabay, ug si Jesus miingon nga “kining kaliwatana” dili mahanaw hangtod nga ipakanaog sa Diyos ang paghukom niining dili-diyosnong kalibotan. Sa dihang matino ni Jehova nga ang balita sa Gingharian namantala na sa igong sukod diha sa tanang ginapuy-ang yuta alang sa pagpamatuod sa tanang kanasoran, nan ang kataposan niining daotang kalibotan moabot, ug uban niana moabot ang kaluwasan sa mga tawo nga may diyosnong debosyon. (Mateo 24:3-34; Lucas 21:28:33) Kaluwasan gikan sa unsa? Gikan sa mga pagsulay nga ilang mahiagoman diha sa mga kamot sa daotan, ug gikan sa mga kahimtang nga nakahatag kanila ug kaguol sa adlaw-adlaw ingong mga mahigugmaon sa pagkamatarong. Ug kaluwasan usab kini ngadto sa usa ka bag-ong kalibotan diin ang sakit ug kamatayon maoy mga butang sa nangagi.
Ang Balaang Tabang Uban ang Ginapaabot nga Kaluwasan
17. (a) Unsang makapahinuklog nga pangutana ang angay natong ibangon sa kaugalingon? (b) Unsaon nato sa pagpamatuod nga, sama kang Noe, kita napalihok tungod “diyosnong kahadlok”?
17 Ang pangutana nga angay natong palandongon mao, ‘Ako ba andam alang niana nga kaluwasan sa Diyos?’ Kon kita nagasalig sa atong kaugalingon o sa atong pagsabot bahin sa pagkamatarong, kita dili pa andam. Apan kon, sama kang Noe, kita napukaw tungod sa “diyosnong kahadlok,” nan kita nagasanong sa pagtuo sumala sa gihatag nga pagtultol ni Jehova kanato, ug kini motultol sa atong kaluwasan.—Hebreohanon 11:7.
18. Nganong ang pagkat-on sa matuod nga pagtahod sa teokratikanhong awtoridad maoy usa ka hinungdanong bahin sa atong pagpangandam alang sa kaluwasan ngadto sa bag-ong kalibotan?
18 Matahom nga gihubit kadtong nagatagamtam sa panalipod nga gihatag ni Jehova bisan karon, ang Salmo 91:1, 2 nagaingon: “Siya nga nagpuyo sa tinago nga dapit sa Labing Hataas makabaton ug kapahulayan ilalom sa landong sa Labing Makagagahom. Ako magaingon kang Jehova: ‘Ikaw ang akong dangpanan ug ang akong kuta, ang akong Diyos, kansa ako may pagsalig,’” Aniay grupo sa mga tawo nga gipanalipdan sa Diyos samag mga piso ilalom sa gamhanang mga pako sa usa ka inahang nga langgam. Ang ilang bug-os nga pagsalig anaa kang Jehova. Ilang gidawat nga siya mao ang Labing Hataas, ang Labing Makagagahom. Ingon nga resulta, sila nagtahod sa teokratikanhong awtoridad ug nagpasakop sa ilang kaugalingon niana, kon ang maong awtoridad mao ang ginikanan o ang “matinumanon ug maalamong ulipon.” (Mateo 24:45-47) Matuod ba kana sa usag ug usa kanato? Sama kang Noe, kita ba nakakat-on sa pagbuhat sa ‘tanang gisugo ni Jehova’ kanato ug nagatuman sa mga butang sa iyang paagi? (Genesis 6:22) Kon mao, kita nagasanong sa pagpangandam nga gihatag ni Jehova kanato alang sa atong kaluwasan ngadto sa iyang matarong bag-ong kalibotan.
19. (a) Unsa ang atong malarawanong kasingkasing, ug nganong hinungdanon nga kini atong hatagag pagtagad? (Proverbio 4:23) (b) Sa unsang paagi kita makabaton ug kaayohan gikan sa panig-ingnan ni Lot bahin sa atong pagsanong sa mga pangdani sa kalibotan?
19 Ang mao nga pagpangandam naglakip usab sa paghatag ug pagtagad sa atong malarawanong kasingkasing. “Si Jehova mao ang tigsusi sa atong mga kasingkasing.” (Proverbio 17:3) Siya motabang kanato sa pag-amgo nga dili ang panagway nato sa gawas ang hinungdanon, kondili, ang pagkatawo sa sulod, kon unsa kita sa kasingkasing. Bisan tuod kita wala magbuhat ug kapintasan o imoralidad sama sa kalibotan sa atong palibot, kita kinahanglang magbantay nga dili kita madani o malingaw niining mga butanga. Sama kang Lot, angay mobati kita ug kasubo sa paglungtad niining daotang mga buhat. Kadtong nagadumot sa daotan dili mangitag mga paagi nga mobuhat niana; apan, ang mga tawo nga wala magdumot niana mahimong sa pisikal wala makig-ambit sa kapintasan apan sa hunahuna nangandoy nga makaambit niana. “O kamong nahigugma kang Jehova, dumti ang daotan.”—Salmo 97:10.
20. (a) Sa unsang mga paagi nga ang Bibliya nagpasidaan kanato batok sa materyalistikong paagi sa kinabuhi? (b) Sa unsang paagi matino nato nga ang hinungdanong mga pagtulon-an sa Bibliya bahin sa materyalismo nakagamot sa atong kasingkasing?
20 Si Jehova sa mahigugmaon nagaedukar kanato sa paglikay dili lamang sa imoral nga paggawi kondili sa materyalistikong paagi sa kinabuhi. ‘Magmatagbaw sa pagkaon ug sapot,’ tambag pa sa iyang Pulong. (1 Timoteo 6:8) Si Noe ug ang iyang mga anak nga lalaki mibiya sa ilang puloy-anan sa dihang sila misulod sa arka. Si Lot ug ang iyang pamilya, usab, mibiya sa ilang balay ug mga kabtangan aron maluwas ang ilang kinabuhi. Hain man nasentro ang atong mga pagbati? “Hinumdomi ang asawa ni Lot.” (Lucas 17:32) Si Jesus miagda: “Nan, padayon sa pagpangita pag-una sa gingharian ug ang iyang pagkamatarong.” (Mateo 6:33) Mao ba kanay atong ginabuhat? Kon ang matarong nga mga sukdanan ni Jehova nagagiya kanato ug kon ang pagmantala sa maayong balita sa iyang Gingharian maoy panguna sa atong kinabuhi, nan kita, sa pagkatinuod, nagasanong sa iyang pagpangandam sa katawhan alang sa kaluwasan ngadto sa iyang bag-ong kalibotan.
21. Nganong kita tukmang makapaabot nga ang saad ni Jehova sa kaluwasan sa dili madugay matuman?
21 Alang sa mga tawong may diyosnong debosyon kinsa nakakita sa katumanan sa ilhanan sa iyang presensiya diha sa paggahom sa Gingharian, si Jesus miingon: “Tumindog kamo ug ihangad ninyo ang inyong mga ulo, tungod kay ang inyong kaluwasan haduol na.” (Lucas 21:28) Imo bang nakita ang maong ilhanan nga detalyado nga naugmad? Nan batoni ang pagsalig nga ang katumanan sa mga saad ni Jehova nga kaluwasan haduol na gayod! Bug-osa ang pagtuo nga “si Jehova mahibalong moluwas sa mga tawong may diyosnong debosyon gikan sa pagsulay.”—2 Pedro 2:9.
Unsay Imong Nakat-onan?
◻ Sama kang Lot, unsay angay natong reaksiyon sa kalibotanong paagi sa kinabuhi?
◻ Unsang mga pagsulay ang giatubang ni Lot ug sa iyang pamilya samtang mikalagiw sa Sodoma?
◻ Sa unsang paagi ang mga panig-ingnan nga gigamit ni Pedro nagpasiugda sa pagkadinalian sa pagbarog nga malig-on sa kiliran ni Jehova karon?
◻ Sa pagpangandam sa iyang katawhan alang sa kaluwasan, unsang hinungdanong mga pagtulon-an ang gitudlo ni Jehova?
[Hulagway sa panid 18]
Ang katawhan sa Diyos gipanalipdan niya sama sa mga kuyabog ilalom sa gamhanang mga pako sa ilang inahan