Kahibalo nga Makapasuod Nato sa Diyos
Ang atong Maglalalang dili lang kay basta gamhanan. Duna sab siyay nindot nga mga hiyas. Ug gusto niyang makakat-on ta bahin niya ug masuod kaniya. (Juan 17:3; Santiago 4:8) Maong daghan siyag gipadayag bahin sa iyang kaugalingon.
Ang Atong Maglalalang Dunay Ngalan
“Ang katawhan makaila unta nga ikaw, kansang ngalan maoy Jehova, ikaw lamang ang Labing Hataas ibabaw sa tibuok yuta.”—SALMO 83:18.
Ang Bibliya nagtudlo nga si Jehova mao ang bugtong tinuod nga Diyos. Siya ang Maglalalang sa uniberso ug sa tanang kinabuhi. Siya lang ang angay natong simbahon.—Pinadayag 4:11.
Si Jehova Mahigugmaon nga Diyos
“Ang Diyos gugma.”—1 JUAN 4:8.
Pinaagi sa Bibliya ug sa mga butang nga iyang gilalang, gipadayag ni Jehova ang daghan sa iyang mga hiyas. Gugma ang kinalabwan niana. Ang tanan niyang gihimo maoy tungod sa iyang gugma. Kon mas daghan tag makat-onan bahin kang Jehova, mas higugmaon nato siya.
Si Jehova Mapinasayloon nga Diyos
“Ikaw maoy Diyos nga andam mopasaylo.”—NEHEMIAS 9:17.
Nahibalo si Jehova nga dili ta hingpit. Busa siya “andam mopasaylo” kanato. Dihang mangayo tag pasaylo niya ug maningkamot nga dili na mohimog daotan, pasayloon ta niya ug kalimtan na ang atong nangaging mga sala.—Salmo 103:12, 13.
Gusto ni Jehova nga Moampo Ta Kaniya
“Si Jehova duol sa tanang nagatawag kaniya . . . Iyang dunggon ang ilang pagtuaw.”—SALMO 145:18, 19.
Si Jehova wala magkinahanglag espesyal nga mga rituwal o mga imahen sa atong pagsimba kaniya. Maminaw siya sa atong mga pag-ampo sama sa mahigugmaong ginikanan nga maminaw sa ilang pinalanggang mga anak.