Mga Pangutana Gikan sa mga Magbabasa
Ang 1 Juan 4:18 nag-ingon kanato: “Walay kahadlok diha sa gugma, hinuon ginasalibay sa hingpit nga gugma ang kahadlok ngadto sa gawas.” Apan si Pedro misulat: “Pagbaton ug gugma alang sa tibuok kapunongan sa mga igsoon, magmahadlokon sa Diyos.” (1 Pedro 2:17) Sa unsang paagi mapauyon nato kining duha ka bersikulo?
Si Pedro ug si Juan maoy mga apostol nga direktang nakakat-on gikan ni Jesu-Kristo mismo. Sa ingon makasalig kita nga ang ilang gisulat magkauyon. Mahitungod sa mga bersikulong gikutlo sa itaas, ang sulbad mao nga ang duha ka apostol naghisgot sa lainlaing mga matang sa kahadlok.
Hisgotan nato una ang tambag ni Pedro. Sumala sa gipakita sa konteksto, gihatag ni Pedro sa isigka-Kristohanon ang dinasig nga tambag bahin sa ilang tinamdan ngadto niadtong anaa sa awtoridad. Sa laing mga pulong, nagkomento siya bahin sa tukmang panghunahuna sa pagpasakop sa pila ka natad. Busa, gitambagan niya ang mga Kristohanon nga magpasakop ngadto sa mga tawong naghupot ug mga posisyong may awtoridad diha sa tawhanong mga gobyerno, sama sa mga hari o mga gobernador. (1 Pedro 2:13, 14) Sa pagpadayon, si Pedro misulat: “Pasidunggi ang tanang matang sa tawo, pagbaton ug gugma alang sa tibuok kapunongan sa mga igsoon, magmahadlokon sa Diyos, magmapasidunggon sa hari.”—1 Pedro 2:17.
Sa pagtagad sa konteksto, tin-aw nga sa dihang si Pedro miingon nga ang mga Kristohanon angay nga “magmahadlokon sa Diyos,” siya nagpasabot nga kita angay nga magbaton ug halalom, balaanong pagtahod alang sa Diyos, usa ka kahadlok sa pagpasuko sa kinatas-ang awtoridad.—Itandi ang Hebreohanon 11:7.
Komosta ang komento ni apostol Juan? Sayosayo diha sa 1 Juan kapitulo 4, ang apostol naghisgot sa panginahanglan nga sulayan “ang dinasig nga mga pamulong” sama niadtong naggikan sa bakak nga mga propeta. Ang maong mga ekspresyon tinong wala maggikan ni Jehova nga Diyos; kini naggikan o nagpabanaag sa daotang kalibotan.
Sa kasukwahi, ang dinihogang mga Kristohanon “naggikan sa Diyos.” (1 Juan 4:1-6) Tungod niana, si Juan miawhag: “Mga hinigugma, magpadayon kita sa paghigugmaay sa usag usa, tungod kay ang gugma gikan sa Diyos.” Ang Diyos maoy miuna sa pagpakitag gugma—iyang “gipadala ang iyang Anak ingong usa ka pangpasig-uli nga halad alang sa atong mga sala.” (1 Juan 4:7-10) Sa unsang paagi kita angay mosanong?
Tin-aw, angay nga kita magpabiling nahiusa sa atong mahigugmaong Diyos. Angay nga dili kita malisang kaniya ni mangurog sa palaaboton nga moduol kaniya diha sa pag-ampo. Sayosayo si Juan mitambag: “Kon ang atong mga kasingkasing wala magahusga kanato, aduna kitay kagawasan sa pagsulti ngadto sa Diyos; ug bisan unsay atong pangayoon atong madawat gikan kaniya, tungod kay kita nagasunod sa iyang mga sugo.” (1 Juan 3:21, 22) Oo, ang maayong konsensiya mohatag kanato sa kagawasan nga moduol sa Diyos nga wala ang makapaugnok o makapugong nga kahadlok. Tungod sa gugma, mobati kitang libre sa pagpakigsulti, o pagduol, kang Jehova diha sa pag-ampo. Niining bahina, “walay kahadlok diha sa gugma.”
Nan atong hugpongon ang duha ka pangatarongan bahin sa duha ka matang sa kahadlok. Ang usa ka Kristohanon kinahanglang sa kanunay magbaton ug balaanong kahadlok kang Jehova, nga naggikan sa halalom nga pagtahod alang sa iyang posisyon, gahom, ug hustisya. Apan gihigugma usab nato ang Diyos isip atong Amahan ug mobatig kasuod kaniya ug kagawasan sa pagduol kaniya. Inay nga mapugngan sa kalisang kaniya, kita masaligon nga kita makaduol kaniya, sama sa usa ka bata nga mobating libre sa pagduol sa usa ka mahigugmaong ginikanan.—Santiago 4:8.