Pagbantay sa mga Apostata!
Mga Pangunang Punto Gikan sa Sulat ni Judas
ANG mga alagad ni Jehova kinahanglang “magdumot sa daotan” ug “gumakos sa maayo.” (Roma 12:9) Ang magsusulat sa Bibliya nga si Judas nagtabang sa uban sa pagbuhat niini diha sa iyang sulat nga gipadala gikan sa Palestina tingali sa mga 65 K.P.
Gitawag ni Judas ang iyang kaugalingon nga “usa ka ulipon ni Jesu-Kristo, ug igsoon ni Santiago.” Kini nga Judas dayag mao ang iladong igsoon ni Jesu-Kristo sa inahan. (Marcos 6:3; Buhat 15:13-21; Galacia 1:19) Busa si Judas mismo mao ang igsoon ni Jesus sa inahan. Ugaling, tingali sa iyang hunahuna nga dili-maayo ang paghisgot sa iyang relasyon sa unod, sanglit si Kristo sa maong panahon nahimaya na man nga espiritu nga persona sa langit. Ang sulat ni Judas prangka kaayo sa paghatag tambag nga makatabang kanatong “gumakos sa maayo” ug sa pagbantay sa mga apostata.
“Pakigbisog”
Bisan pa nga maoy tuyo ni Judas ang pagsulat mahitungod sa gipakig-ambitang kaluwasan sa mga Kristohanon, iyang nakita nga kinahanglang awhagon ang iyang mga magbabasa sa “pakigbisog sa pagpanalipod alang sa pagtuo.” (Mga bersikulo 1-4) Ngano? Tungod kay ang mga tawong dili-diyosnon nakasulod sa kongregasyon ug ‘naghimo sa hiniwi nga pagpadapat sa dili-takos nga kalulot sa Diyos alang sa ilang pagpatuyang.’ Sila sayop nga nagtuo nga sila makalapas sa mga sugo sa Diyos ug sa gihapon makapabilin diha sa iyang katawhan. Hinaot nga dili kita magpadala sa maong daotang nga pangatarongan apan tinguhaon kanunay ang pagkamatarong, mapasalamaton nga pinaagi sa dugo ni Jesus maluloy-ong gihugasan kita sa Diyos sa atong mga sala.—1 Corinto 6:9-11; 1 Juan 1:7.
Mga Pasidaang Gibutang sa Atong Atubangan
Kinahanglang magbantay kita batok sa pipila ka tinamdan, kagawian, ug sa mga tawo. (Mga bersikulo 5-16) Tungod kay ang ubang mga Israelitas nga naluwas gikan sa Ehipto kulang man ug pagtuo, sila gilaglag. Ang mga manulonda nga mibiya sa ilang nahiangay nga puloy-anan iyang “gitagana diha sa talikala nga dayon ilalom sa [espirituwal] nga kangitngit alang sa panudya sa dakong adlaw.” Ang hingaping imoralidad mipatunghag “hudisyal nga silot sa kalayong dayon” diha sa Sodoma ug Gomorra. Busa, kanunay gayod natong pahimut-an ang Diyos ug dili gayod biyaan ang “dalan sa kinabuhi.”—Salmo 16:11.
Dili sama sa arkanghel nga si Miguel, nga dili gani mopakanaog ug hukom batok sa Yawa sa mapasipalahong mga termino, ang mga tawong dili-diyosnon nagapasipala sa “mga halangdon,” dayag kadtong adunay pipila ka himaya nga gihatag kanila sa Diyos ug ni Kristo ingong dinihogang mga ansiano. Dili gayod kita magpakitag pagkawalay-pagtahod sa hinatag sa Diyos nga awtoridad!
Ang daotang mga panig-ingnan ni Cain, Balaam, ug Kore gisunod sa mga tawong dili-diyosnon. Sila maoy usa ka espirituwal nga hulga nga ikatandi sa mga bato nga natago sa ilalom sa tubig ug sama sa mga panganod nga walay dalang ulan ug patay, nangaibot nga mga kahoy nga walay maayong bunga. Kadtong maong mga apostata maoy mga bagolbagolan usab, mga reklamador, ug ‘tigdayeg sa mga personalidad alang sa ilang kaugalingong kaayohan.’
Padayon sa Pagsukol
Si Judas sunod mihatag ug tambag bahin sa pagsukol sa daotang mga impluwensiya. (Mga bersikulo 17-25) Aduna unyay mga mayubiton sa “kataposang panahon,” ug ang mga Kristohanon kinahanglang mag-antos kanila ug sa ilang mayubitong mga pulong karong adlawa. Aron masuklan ang maong daotang mga impluwensiya, kinahanglan atong tukoron ang atong “labing balaan nga pagtuo,” mag-ampo pinaagi sa balaang espiritu, ug magpadayon diha sa gugma sa Diyos, samtang nagahulat nga ikapahayag ang kaluoy ni Jesus.
Dayag diha sa papel sa bakak nga mga magtutudlo, gipahinabo sa mga tawong dili-diyosnon nga magduhaduha ang uban. (Itandi ang 2 Pedro 2:1-3.) Ug unsay gikinahanglan sa mga maduhaduhaon? Aw, ang espirituwal nga tabang aron masakmit gikan sa “kalayo,” sa kalaglagan nga dayon! (Mateo 18:8, 9) Apan ang mga diyosnon dili angay mahadlok sa maong dulnganan, kay si Jehova mopanalipod kanila gikan sa “pagkapandol” sa pagpakasala ug sa kalaglagan nga naghulat sa mga apostata.
[Kahon sa panid 31]
Natagong mga Bato: Nagpasidaan si Judas sa kaubang mga Kristohanon mahitungod sa ‘natagong mga bato sa ilalom sa tubig diha sa ilang mga kombira sa gugma.’ (Judas 12) Nagpakaaron-ingnong nahigugma sa mga magtutuo, ang maong mga apostata maoy sama sa mahait nga mga bato sa ilalom sa tubig nga makalunod ug barko ug makasisi ug makapatay sa mga maglalangoy. Ang mga kombira sa gugma tingali maoy mga salosalo nga niini gidapit sa sapiang mga Kristohanon ang kabos nga kaubang mga magtutuo. Ang Amahan sa Iglesya si Chrysostom (347?-407K.P.) miingon: “Silang tanan magkita diha sa kombira: ang sapian nagdalag mga pagkaon, ug ang kabus ug timawa gidapit, silang tanan dungan nga mangaon.” Kon unsa may kinaiyahan sa unang mga kombira sa gugma, ang pasidaan ni Judas nagatabang sa matinumanon sa pagbantay sa apostata ‘natagong mga bato’ nga mohatag ug espirituwal nga kamatayon. Bisan pa nga wala sugoa ang mga Kristohanon sa pahimog mga kombira sa gugma, ug kini wala usab buhata karong adlawa, ang katawhan ni Jehova motabang sa usag usag sa materyal sa panahon sa panginahanglan ug kita makabaton ug malipayong pag-ubanay.