Lakaw Ingong Kaubang mga Mamumuo sa Kamatuoran
Mga Pangunang Punto Gikan sa Ikaduha ug Ikatulong Juan
ANG kahibalo sa kamatuoran mao ang timaan sa mga magsisimba ni Jehova. (Juan 8:31, 32; 17:17) Ang paglakaw diha sa balaang kamatuoran kinahanglanon alang sa kaluwasan. Ug kinahanglan nga ang mga alagad sa Diyos mahimong kaubang mga mamumuo sa kamatuoran.
Ang ikaduha ug ikatulong dinasig nga sulat ni Juan naghisgot sa “paglakaw diha sa kamatuoran.” (2 Juan 4; 3 Juan 3, 4) Nagdasig usab ang ikatulong Juan sa pagtinabangay ingong “kaubang mga magbubuhat diha sa kamatuoran.” (3 Juan 5-8) Lagmit, gisulat kining duha ka sulat sa Efeso o sa duol didto sa mga 98 K.P. Apan mapuslanon alang sa katawhan sa Diyos karon ang ilang mga gipamulong.
Gipasiugda sa Ikaduhang Juan ang Kamatuoran
Unang gipasiugda sa Ikaduhang Juan ang kamatuoran ug gugma ug nagpasidaan batok sa “antikristo.” (2Ju Mga bersikulo 1-7) Gipunting ang sulat ngadto sa “pinili nga babaye,” nga tingali usa ka indibiduwal. Apan kon kining sulata gipadala ngadto sa usa ka kongregasyon, ang iyang “mga anak” maoy mga Kristohanon nga gianak sa espiritu ug “pinili” sa Diyos alang sa langitnong kinabuhi. (Roma 8:16, 17; Filipos 3:12-14) Si Juan nalipay nga dihay “nagalakaw diha sa kamatuoran” ug busa gisuklan ang apostasiya. Bisan pa, kinahanglan silang mag-amping batok sa “antikristo,” kinsa wala modawat nga mianhi si Jesus sa unod. Ang mga Saksi ni Jehova karon nagapatalinghog sa maong mga pasidaan batok sa apostasiya.
Sunod mihatag si Juan ug tambag kon unsaon pagtagad ang mga apostata ug unya mitiklop uban ang personal nga panghinaot ug mga pangomosta. (Mga bersikulo 8-13) Pinaagi sa paghago sama sa pagsangyaw, siya ug ang uban pa nakapamungag maayong bunga nga misangpot sa pagkakabig sa mga tawo nga iyang gipadad-an sa iyang sulat. Pinaagi lamang sa ‘pagbantay’ sa ilang kaugalingon sa espirituwal nga ilang “maangkon ang hingpit nga ganti,” nga sa tino nag-apil sa langitnong “purongpurong” nga gikatagana alang sa matinumanong mga dinihogan. (2 Timoteo 4:7, 8) Kon may moanha kanila nga ‘wala magpabilin sa pagtulon-an ni Kristo,’ sila ‘dili gayod magpasaka kaniya sa ilang balay ni pangomostahon siya’ aron dili sila madahig sa iyang “daotang binuhatan.” Human gipahayag ang tinguha nga siya makaduaw ug makigsulti nga inatubangay sa maong mga isigkamagtutuo, gitapos niya ang sulat pinaagig mga pangomosta.
Gipasiugda sa Ikatulong Juan ang Pagtinabangay
Gitumong ang ikatulong Juan ngadto kang Gayo ug gisugdan kini pinaagi sa paghisgot sa iyang gihimo alang sa mga isigkamagtutuo. (3Ju Mga bersikulo 1-8) Si Gayo naglakaw “diha sa kamatuoran” pinaagi sa pagsunod sa tibuok lawas sa Kristohanong mga pagtulon-an. Siya usab “naghimong matinumanong buhat” sa pagtabang sa mga igsoong nagaduaw. Si Juan misulat: “Ato . . . nga katungdanan ang pagdawat sa maong mga tawo sa maabiabihon, aron kita mahimong mga isigka-mamumuo sa kamatuoran.” Ang mga Saksi ni Jehova karon nagapakitag samang pagkamaabiabihon alang sa nagapanawng mga magtatan-aw karong adlawa.
Human gitandi ang daotang gawi ni Diotrefes ug ni Demetrio, gitapos ni Juan ang iyang sulat. (Mga bersikulo 9-14) Ang nagapangitag-himaya nga Diotrefes walay pagtahod kang Juan ug misulay ngani sa pagpalagpot gikan sa kongregasyon ang mga tawo nga maabiabihong midawat sa mga igsoon. Ang usa ka tawo nga ginganlag Demetrio hinunoa, gikutlo ingong maayong panig-ingnan. Si Juan naglaom nga magkita sila ni Gayo sa di-madugay ug gitiklop niya ang sulat pinaagig mga pangomosta ug panghinaot nga makatagamtam unta si Gayo ug kalinaw.
[Kahon/Hulagway sa panid 30]
Pinaagig Papel, Dagang, ug Tinta: Naglaom si Juan sa pagduaw sa “pinili nga babaye” ug sa iyang “mga anak” inay sulatag daghang mga butang “pinaagi sa papel ug tinta.” Inay ipadayon ang pagsulat kang Gayo “pinaagi sa tinta ug dagang,” nagtinguha usab ang apostol nga magkita sila sa dili madugay. (2 Juan 1, 12; 3 Juan 1, 13, 14) Ang Gregong pulong nga gihubad “dagang” (kaʹla·mos) nagpasabot sa usa ka bulos o tangbo ug mahimong hubaron nga “pangsulat nga tangbo.” Taliwala sa mga Grego ug sa mga Romano, ang dagang nga tangbo talinis ug tumoy ug may gilis sa tunga nga sama sa mga dagang nga gigamit sa ulahi nga panahon. Ang Grego nga pulong meʹlan, nga gihubad “tinta” maoy neuter nga porma sa masculine adjective nga meʹlas, nga nagkahulogang “itom.” Itom ang pulog sa karaang tinta tungod sa daghang karbon—mahimong usa kini ka matang sa anuos gikan sa nagsiga nga lana o kahoy, o kaha kristalon nga uling gikan sa utanon o hayop. Kasagarang tipigan ang tinta ingong gipaugang mga barita o pinintol, nga bas-on sa magsusulat ug ipahid sa iyang brutsa o tangbo. Ang papel niadto hinimo sa nipis nga materyal nga gihimong mga palid gikan sa ginilis sa tanom nga papiro. Migamit ang unang mga Kristohanon sa maong mga papel alang sa mga sulat, mga linukot nga basahon, ug mga manuskrito.