Kinabuhi nga Walay Sakit Haduol Na!

ANG komplikadong mga mekanismo sa lawas nga nagapanalipod kanato gikan sa kadaot dayag nga usa ka kahibudnganan. Ang pagtuon niini angayng mopalihok kanato sa pagdayeg sa Maglalalang, sama sa gibuhat sa salmista kinsa misulat: “Ako magadayeg kanimo tungod kay makalilisang ug kahibulongan uyamot ang pagkabuhat kanako.” (Salmo 139:14) Sa pagkatinuod, ang Diyos lamang ang makapaposible sa kinabuhi nga walay sakit! Apan sa unsang paagi kini matuman?

Matikdi nga una pa sa saad nga pagawad-on ang sakit ug mga paghilak, ang Bibliya nagsugilon bahin sa “usa ka bag-ong langit ug usa ka bag-ong yuta; kay ang kanhing langit ug ang kanhing yuta nahanaw na man.” (Pinadayag 21:1, 4) Siyempre, ang Bibliya wala maghisgot sa atong literal nga langit ug yuta nga mahanaw. Hinunoa, kini nag-ingon, sa mubo, nga ang usa ka bug-os bag-ong sistema sa mga butang mopuli unya niining presenteng sistema. Oo, usa ka bag-o, labaw-tawhanong kagamhanan ang magpaposible niini aron matagamtam ang walay sakit nga kinabuhi dinhi mismo sa yuta.

Sa paghubit niini nga kagamhanan, ang Bibliya nag-ingon nga “ang Diyos sa langit magatukod ug usa ka gingharian [o, kagamhanan] nga . . . magadugmok ug magaut-ot niining tanan nga mga gingharian, ug kini mismo molungtad sa walay kataposan.” (Daniel 2:44) Sa dihang si Jesu-Kristo dinhi pa sa yuta, siya nagtudlo kanato sa pag-ampo alang niining maong Gingharian nga kagamhanan sa dihang siya miingon: “Pag-ampo kamo: Amahan namo nga anaa sa langit, Pagabalaanon ang imong ngalan. Moabot na unta ang imong gingharian. Matuman ang imong kabubut-on sa yuta, ingon man sa langit.”​—Mateo 6:9, 10, King James Version.

Apan, sa unsang paagi nga ang katumanan niini nga pag-ampo magkahulogan ug kinabuhi nga walay sakit alang kanimo?

Usa ka Magmamando nga Adunay Labaw-Tawhanong Gahom

Ang yawi nahimutang sa kaalam ug gahom sa usa kinsa gipili sa Diyos aron mangulo sa Iyang kagamhanan. Kanang usa mao si Jesu-Kristo mismo. Bahin kaniya, ang tagna sa Bibliya nag-ingon: “Ang kagamhanan igatungtong sa iyang abaga . . . Sa kauswagan sa iyang kagamhanan ug sa pakigdait walay kataposan.”​—Isaias 9:6, 7, KJ.

Ang kaalam ni Jesus, nga karon atua na sa langit, mas labaw gayod kay sa tanang yutan-ong mga doktor. Siya bug-os nakasabot sa mga obra sa atong pisikal nga lawas, lakip na ang mga sistema niini sa pagpanalipod sa kaugalingon gikan sa kadaot. Sa dihang siya usa pa ka tawo sa yuta kapin sa 1,900 ka tuig sa miagi, walay usa ka sakit o balatian nga dili niya mapaayo. Busa gipasundayag niya ang iyang buhaton unya diha sa mas dakong sukod ingong Magmamando sa Gingharian sa Diyos. Sa usa ka higayon, ang Bibliya nag-ingon:

“Unya dakong mga panon sa katawhan nanuol kaniya, nga may uban kanilang mga tawong bakol, pungkol, buta, amang, ug daghang uban pa, ug gipamutang nila sila sa iyang tiilan, ug iyang giayo sila; mao nga ang panon sa katawhan mibati ug kahibulong sa nakita nila ang mga amang nga nagpanulti ug ang mga bakol nga nagpanglakaw ug ang mga buta nga nagpakakita.” (Mateo 15:30, 31) Lakip sa mga balatian nga ayohon ni Jesus sa pagmando sa iyang Gingharian mao ang makalilisang nga usa, ang dukot nga sakit.

Sa pagkatinuod, pagkadakong panalangin unya kana! Ug kini dili matuman alang lamang sa pipila. Ang saad sa Maglalalang mao: “Walay molupyo ang magaingon: ‘Ako adunay sakit.’” (Isaias 33:24) Unya, ubos sa pagmando sa Gingharian sa Diyos, ang saad matuman unya, “wala na unyay . . . kasakit pa.”​—Pinadayag 21:4.

Ubos sa mahimayaong pagmando sa Gingharian ni Kristo, ang atong daghang mekanismo sa lawas, lakip na kadtong nagapanalipod kanato batok sa kadaot, moobra na unya sa hingpit tungod kay ang napanunod nga sala mahanaw na unya. Ang sistema sa alarma sa atong lawas dili na mahimong tigsakit. Makalilipay, sumala sa mga tagna sa Bibliya nga karon nagakatuman, kita anaa na mismo sa ganghaan nianang bag-ong kalibotan, diin ang sakit dili na unya mopahinabog pag-antos.​—Mateo 24:3-14, 36-39; 2 Timoteo 3:1-5; 2 Pedro 3:11-13.

Imong matagamtam ang kinabuhi ubos sa Gingharian sa Diyos sa dihang ang matang sa sakit nga karon nagahampak sa minilyong tawo dili na magalungtad. Apan kinahanglang aduna kay buhaton. Si Jesu-Kristo nagpunting sa usa ka pasukaranang kinahanglanon sa dihang siya miingon diha sa pag-ampo ngadto sa Diyos: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Ang mga Saksi ni Jehova malipay sa pagtabang kanimo nga makabaton niining hinungdanong kahibalo. Pangutana lang sa usa kanila diha sa inyong dapit, o pagsulat sa mga magpapatik niining magasina, ipadayag ang imong tinguha sa pagtuon sa Bibliya diha sa inyong balay o sa bisan unsang kombenyenteng dapit. Ang mga kahikayan pagahimoon unya alang kanimo aron makakat-on ug dugang bahin sa mga katuyoan sa Diyos alang sa katawhan sa pagtagamtam sa usa ka kinabuhi nga walay sakit.