PATMOS

Usa ka pulo diin si apostol Juan gidestiyero “tungod sa pagsulti bahin sa Diyos ug sa pagpamatuod bahin kang Jesus.” (Pin 1:9) Samtang didto, iyang nadawat ang Pinadayag. Sumala sa karaang tradisyon, si Juan, nga gihukman ni Domitian nga idestiyero sa pulo sa Patmos, gibuhian human mamatay ang maong magmamando (96 K.P.).​—The Ante-Nicene Fathers, Tomo VIII, p. 562, “Acts of the Holy Apostle and Evangelist John the Theologian.”

Nahimutang diha sa Dagat Icaria (usa ka bahin sa Aegean) nga mga 55 km (34 mi) sa K sa Asia Minor, ang Patmos nahimutang nga mga 60 km (37 mi) sa KHK sa Mileto ug wala pay 240 km (150 mi) gikan sa tanang pito ka kongregasyon nga espesipikong gitumong sa Pinadayag kapitulo 2 ug 3. Kining gamay nga bolkanikong pulo adunay likoliko kaayong kabaybayonan ug medyo umaw ug batoon. Apan karong adlawa ang trigo, mga olibo, ug mga ubas gitanom didto. Lagmit tungod kay kini hilit, ang Patmos, lakip ang ubang mga pulo sa Aegean, nagsilbing bilanggoan nga pulo.