Hain na ang Atong Patayng mga Minahal Karon?

“HAIN na kaha ang akong anak karon?” Ang naguol nga inahan (gihisgotan sa nag-unang artikulo) nahibulong kon diing dapita miadto ang iyang patayng masuso. Atua ba kaha siya sa langit o sa ubang dapit?

Wala ra magdugay nga gitubag ang pangutana sa inahan ni Andrew. Dihang nakadungog sa nahitabo, ang iyang kamagulangang anak, nga Romano Katoliko usab, mitubag: “Si Andrew atua sa Limbo.” Apan tinuod bang atua siya didto?

Hain o Unsa ang Limbo?

Ang The Concise Oxford Dictionary nag-ingon nga ang Limbo maoy usa ka “dapit nga anaa sa utlanan sa impiyerno, nga ginaingong pinuy-anan sa mga tawong matarong ug wala pay bunyag nga mga batang dili pa Kristiyano; . . . sa kahimtang nga napasagdan o nahikalim-tan.” Mahitungod sa Limbo, ang New Catholic Encyclopedia nag-ingon: “Karon ang termino gigamit sa mga teologo sa pagpaila sa kahimtang ug dapit sa mga kalag nga dili takos sa impiyerno ug sa walay kataposang silot niini apan dili makasulod sa langit nga una pa sa Katubsanan (ang Limbo sa amahan) o niadtong mga kalag nga sa walay kataposan wala maapil sa mahimayaong panan-awon tungod sa orihinal nga sala lamang (ang Limbo sa mga bata).”

Apan, ang mao gihapong ensiklopedia nag-ingon usab: “Ang kapalaran sa mga masuso nga nangamatay nga walay Bunyag sa tinuod maoy usa ka malisod kaayo nga problema. . . . Ang suliran mahitungod sa Limbo maoy usa sa wala-masulbad nga mga gumonhap sa teolohiya. Walay makitang opisyal nga pagtugot sa Iglesya nga adunay Limbo.” Sa paglig-on niini, ang The New Encyclopædia Britannica nag-ingon: “Sanglit wala man gayod sa opisyal nga paagi giendorsar sa Katolikong Iglesya ang doktrina sa limbo ingon nga usa ka naglungtad nga kahimtang o dapit, ang ideya sa limbo nagpabiling usa ka gumonhap nga wala-masulbad.”

Bisan pa, daghang debotadong mga Katoliko midawat sa ideya sa Limbo. Apan palihog tagda pag-ayo kining puntoha: Nganong silotan man ang mga masuso sa paglungtad diha sa usa ka misteryoso, dili-matugkad nga dapit sa walay kataposan tungod lamang kay sila walay bunyag?

Naghisgot ba ang Bibliya ug Limbo? Wala, ang Pulong sa Diyos wala gayod maghisgot niini. Busa mobangon dinhi ang importanteng pangutana: Asa man ang mga tawo, lakip sa mga masuso, moadto dihang sila mamatay?

Asa Moadto ang mga Tawo Dihang Mamatay?

Ang popular nga hunahuna sa mga maninimba sa Kakristiyanohan mao nga ang mga tawo moadto sa langit o sa impiyerno dihang mamatay. Apan unsay gipamulong sa Bibliya bahin niini? Kini nag-ingon: “Kay ang mga buhi nasayod nga sila mangamatay; apan ang mga minatay dili mahibalo sa bisan unsa.” (Ecclesiastes 9:5, The Holy Scriptures, According to the Masoretic Text) Busa ang mga patay walay kahibalo sa bisan unsa. Wala sila magkinabuhi sa usa ka dapit apan sa literal ug sa bug-os sila patay. Sila walay panimuot sa bisan unsa.

Kining kamatuorana niining mga pulonga diha sa basahon sa Bibliya sa mga Salmo: “Ang mga minatay dili magadayeg kang Jah, ni may mausa niadtong mga manganaog ngadto sa hilom.” (Salmo 115:17) “Ayaw pag-ibutang ang imong pagsalig sa mga prinsipe, ni mga anak nga lalaki sa tawo, nga kaniya walay kaluwasan. Mogula ang iyang espiritu, sa yuta siya mobalik; nianang maong adlaw mahanaw ang iyang mga hunahuna.”—Salmo 146:3, 4.

Unsay ikasulti bahin sa kalag? Kini ba dili mamatay? Dili. Sukwahi sa gituohan sa kadaghanan, ang kalag mamatay. Kining kamatuorana tin-awng gipahayag diha sa Bibliya, nga nag-ingon: “Ang kalag nga makasala—kini mamatay.” (Ezekiel 18:4, 20) Dugang kalig-onan niini makita diha sa Buhat 3:23. nga nag-ingon: “Ania karon, ang bisan kinsa nga kalag nga dili magpatalinghog niini nga Propeta [Jesus] pagalaglagon.”

Ang Kamatayon ba Maoy Kataposan sa Tanang Butang?

Ang kamatayon dili kataposan sa tanang butang. Ang pagkahanhaw sa patay tin-awng gitudlo diha sa Kasulatan. Si Jesus miingon: “Ayaw kamo kahibulong niini, kay ang takna nagasingabot na nga ang tanan nga anaa sa mga lubong managpakabati sa iyang tingog managpanggula, ug ang mga nanagbuhat ug maayo managpanggula nga binahaw ngadto sa kinabuhi, ug ang mga nanagbuhat ug mangil-ad managpanggula nga hinanhaw ngadto sa pagkahinukman sa silot.” (Juan 5:28, 29) Dugang pa, aktuwal nga gibanhaw ni Jesus ang pila ka tawo sa panahon sa iyang ministeryo sa yuta. Ang labing katingalahang hitabo mao kadtong sa higala ni Jesus nga si Lazaro. Siya upat na ka adlawng namatay. Apan sa dihang misinggit si Jesus: “Lazaro gula ngari!” ang tawong patay mitubag, nga migula gikan sa lubnganan. Pagkadakong kalipay sa nagtan-awng mga tawo! Ug pagkamalipayong hitabo kini slang sa mga igsoong babaye ni Lazaro, si Maria ug si Marta.—Juan 11:38-45.

Diin man si Lazaro niadtong upat ka adlaw? Sa langit ba? Sa limbo? Wala. Ang Bibliya wala mag-ingon niini o nagpahibalo niini. Kon may panimuot pa si Lazaro sa usa ka dapit, siyempre hisgotan gayod niya kini ngadto sa uban. Apan ang Bibliya nag-ingon: “Ang patay dili mahiba-lo sa bisan unsa.”—Ecclesiastes 9:5. The Jerusalem Bible.

Laing makalipay sa kasingkasing nga hitabo nahitabo sa siyudad sa Nain. Dihang nagsingabot si Jesus sa ganghaan sa siyudad, nakasugat siyag prosesyon sa paglubong. Ang namatay mao ang “bugtong anak sa iyang inahan,” nga usa ka balo. Siyempre, nagdangoyngoy siya pag-ayo. Natandog niini ang maluluton, mahigugmaong kasingkasing ni Jesus. Siya miduol, gipahunong ang prosesyon, ug miingon: “Dong, ingnon ko ikaw, Bangon!” Ug mibangon ang batan-ong lalaki! Imo bang mahanduraw ang kalipay sa inahan ug ang katingala sa mga tumatan-aw?—Lucas 7:11-17.

Kini bang batan-on may gisulti nga nakaadto sa langit, o sa Limbo? Wala. May ikasulti ba siya? “Ang patay dili mahibalo sa bisan unsa.” Gipaamgid usab sa Bibliya ang kamatayon sa usa ka hinanok nga pagkatulog. Si David miingon: “Tubaga ako, O Jehova nga akong Diyos. Hayagan mo ang akong mga mata, tingali unya mahikatulog ako diha sa pagkahitulog sa kamatayon.” (Salmo 13:3) Lain pa, sa wala pa niya banhawa si Lazaro, gipaamgid ni Jesus ang kamatayon sa paghikatulog.—Juan 11:11-14.

Niining puntoha, laing pangutana ang moba-ngon.

May Maayo bang mga Tawo nga Moadto sa Langit?

Oo, dunay pila ka maayong tawo nga moadto sa langit. Ang labing makaikag nga kamatuoran bahin sa maayong mga tawo, o tinuod nga mga Kristohanon, nga wala mahibaloi sa mga maninimba mao nga dunay duha ka grupo. Gamay lamang ang moadto sa langit sa pagmando uban kang Jesu-Kristo, samtang tagamtamon sa kinabag-an ang kinabuhing dayon dinhi sa yuta. Tingali kini nakapahibulong kanimo. Busa, atong tagdon kon unsay ikasulti sa Bibliya bahin ning makaikag nga ulohan.

Unsa ang orihinal nga katuyoan sa Diyos alang sa katawhan? Dihang iyang gilalang si Adan ug si Eva, mao bay iyang tuyo nga ilang tagamtamon ang kinabuhi sa mubong panahon diha sa tanaman sa Eden ug dayon mamatay ug moadto sa langit? Dili. Gihatagan sila sa Diyos ug linain nga buluhaton may labot sa yuta, nga nag-ingon: “Sumanay ug dumaghan kamo ug pun-on ninyo ang yuta ug magagahom kamo niini, ug magbaton kamo sa pagbulot-an sa ibabaw sa mga isda sa dagat, ug sa mga langgam sa kalangitan, ug ibabaw sa tanan nga binuhat nga buhi nga nagalihok sa ibabaw sa yuta.” (Genesis 1:28) Ug si Jehova dili mag-usab sa iyang gimbut-ang katuyoan. Siya miingon, diha sa Salmo 89:34: “Dili ko pagailisdan ang butang nga migula sa akong mga ngabil.” Busa ang Edenikanhong Paraiso gayod ug pagatagamtamon sa matinumanong mga alagad ni Jehova—ang labing daghang grupo nga gihisgotan sa ibabaw.

Ang gamayng grupo hatagan ug linain kaayo nga pribilehiyo, sa pagmando uban ni Kristo sa langit. Sa laing pagkasulti, sila makigbahin kang Jesus sa pagmando niadtong mga buhi sa yuta. Kini man ang kagamhanan sa Gingharian nga giampo sa mga Kristohanon diha sa pag-ampo sa Ginoo. Makaikag, nianang mao gihapong pag-ampo, kita moingon: “Matuman ang imong kabubut-on, sa langit, maingon man dinhi sa yuta.”—Mateo 6:9, 10.

Gipadayag ba sa Bibliya kon pila ang makatagamtam sa dako kaayong pribilehiyo sa pagmando uban ni Kristo sa langit? Oo, nagpadayag kini. Ang Pinadayag kapitulo 14, bersikulo 1 nag-ingon: “Nakita ko, ug tan-awa! ang Kordero nagtindog diha sa Bukid sa Sion, ug uban kaniya ang usa ka gatos ug kap-atan ug upat ka libo nga nanagbaton sa iyang ngalan ug sa ngalan sa iyang Amahan nga nasulat diha se ilang mga agtang.” Hinumdomi nga migamit ang Pinadayag ug daghang mga simbolo, o “mga ilhanan,” sama sa gipahayag sa unang bersikulo, sa Pinadayag 1:1. “Ang Kordero” mao si Jesu-Kristo. (Itandi ang Juan 1:29.) Ug ang Bukid sa Sion nagpasabot dili sa politikanhong kapital sa Israel kondili sa “langitnong Jerusalem.”—Hebreohanon 12:22.

Gihatagan kita sa Pinadayag kapitulo 7 ug impormasyon bahin sa langitnong grupo ug sa yutan-ong grupo nga among gihisgotan. Ang mga bersikulo 4-8 naghisgot sa 144,000 nga “tinimrihan gikan sa tanang banay sa mga anak sa Israel.“ Kini maoy laing kaso sa simbolismo ug kahulogan sa espirituwal nga Israel, o ”sa Israel sa Diyos.” (Galacia 6:16) Ang Roma 2:29 nag-ingon: “Siya usa ka Hudiyo diha sa kinasuloran sa iyang pagkatawo, ug ang iyang sirkumsisyon maoy usa ka butang nga iya sa kasingkasing pinaagi sa espiritu.” Gihubit sunod sa Pinadayag 7:9 ang yutan-ong grupo, nga nag-ingon: “Tan-awa! usa ka dakong panon, nga walay bisan kinsa nga makaihap, gikan sa tanang kanasoran ug kabanayan ug mga katawhan ug mga pinulongan.”

Ang Maayong mgaTawo Mabuhi sa Yuta

Bilyonbilyong maayong mga tawo mabuhi sa paraiso sa yuta. (Lucas 23:43) Buot ka ba nga malakip uban kanila? Siyempre buot ka gayod. Pagkadakong pribilehiyo nga mabuhi diha sa sa ka nahinloang yuta, nga walay polusyon, gutom, krimen, sakit, pag-antos, ug ang makuyaw nga palaabuton sa nukleyar nga gubat! Gitagna ba gayod sa Bibliya kining mga butanga? Oo, kini gitagna. Kini nag-ingon: “Ang mga mamumuhat sa daotan pagalaglagon, apan ang nagahulat kang Jehova magapanunod sa yuta. . . . Ang mga maaghop magapanunod sa yuta, ug sila makabaton ug tumang kalipay tungod sa kadagaya sa pakigdait. Ang mga matarong magapanunod sa yuta, ug sila magapuyo niini sa walay kataposan.”—Salmo 37: 9, 11, 29; itandi ang Mateo 5:5.

Nan, unsa ang ikasulti bahin sa mga masuso nga nangamatay? Sila ba usab makita diha sa Paraiso sa yuta? Sila dili moadto sa Limbo, nga wala maglungtad. Ang ang mga bata nga anaa sa panumdoman sa Diyos mobalik diha sa pagkabanhaw sa mga patay—usa sa katingalahang mga saad sa Pulong sa Diyos, sumala sa amo nang gipahayag. (Juan 5:28, 29; Buhat 24:15) Tingali nawad-an kag mga minahal sa kinabuhi diha sa kamatayon ug nahibulong kon hain na sila karon. Gikan sa Kasulatan tataw nga sila nangatulog, nagahulat sa pagkabanhaw. Buot ka bag dugang impormasyon bahin ning katingalahang paglaom sa kinabuhi diha sa usa ka paraiso sa yuta? Kon mao, nganong dili makighisgot niining mga butanga uban sa mga Saksi ni Jehova dihang moduaw sila kanimo sa imong balay?

[Blurb sa panid 6]

Dunay pila ka maayong mga tawo nga moadto sa langit. Kinsa sila?

[Hulagway sa panid 5]

Diin si Lazaro dihang namatay siya?

[Picture Credit Line sa panid 7]

Hulagway gikuha sa Brooklyn Botanic Garden