Mopayunir Ka ba Karong Ting-init?
1 Misulat si apostol Pablo: “Siya nga magapugas ug dinaghan magaani usab ug daghan. Pasagding ang matag usa magabuhat sumala sa gihukom niya sa iyang kasingkasing.” (2 Cor. 9:6, 7) Kining prinsipyoha matuod gayod sa dihang ang usa “magapugas ug dinaghan” pinaagi sa paggugol ug daghang panahon sa pagsangyaw ingong katabang o regular nga payunir.
2 Ang mga bulan sa ting-init nga Pebrero hangtod Mayo mohatag ug ekselenteng higayon sa paggahin ug daghang panahon sa pagsangyaw pinaagi sa pagpayunir. Imo bang “gihukom sa imong kasingkasing” nga mopayunir karong ting-init?
25,000 KATABANG NGA MGA PAYUNIR SA ABRIL?
3 Sa 1987 usa ka kalipay ang pagkakitag 5,433 katabang nga mga payunir sa Pebrero, 9,611 sa Marso, 21,567 sa Abril, ug 12,285 sa Mayo. Sa Abril kita may total nga 35,424 diha sa buluhatong payunir, nga 35% sa atong total nga mga magmamantala. Daghang nasod ang nagtahog 40% o kapin pa diha sa buluhatong payunir. Dili ba maayo kon makab-ot usab nato kining tumonga sa Abril? Sanglit kita may mga 15,000 regular payunir, kini magpasabot nga atong igataho ang labing menos 25,000 katabang nga mga payunir sa Abril. Ikaw kaha mahimong usa kanila?
4 Kining numeroha makab-ot kon ang matag kongregasyon magbatog labing menos 25% sa total nga mga magmamantala (apil ang regular nga mga payunir) diha sa katabang nga payunir nga buluhaton. Sa miaging tuig daghang kongregasyon ang nagtahog 50% o kapin pa diha sa buluhatong katabang nga payunir. Bisan pag kita mas daghan ug regular nga payunir karon kay sa miaging tuig, apan kita daghan usab ug bag-ong mga magmamantala, nga daghan kanila ang buot makatilaw sa kalipay sa pagpayunir.
5 Giawhag namo ang tanan sa pagtambong sa miting sa Pebrero 21 uban niadtong mag-oksilyare payunir sa Marso, Abril ug Mayo. Kon makita nimong daghan ang magpalista, pihong ikaw madasig usab sa pag-apil.
PAGPAYUNIR INGON NGA KARERA
6 Imo bang namatikdan gikan sa mga numero sa ibabaw nga daghan ang dayag nag-oksilyare payunir sa tulo o upat sunodsunod nga mga bulan sa miaging ting-init? Ang pagbuhat niini mohatag ug dako pang kalipay sa pagbuhat niini sa usa lang ka bulan. Ug daghan kanila sa ulahi ang nagpalistang regular payunir o nagpadayong regular katabang nga payunir, sa ingon naghimo sa pagpayunir nga ilang karera.
7 Busa gidasig namo ang tanan, ilabina ang mga bag-ong nabawtismohan sa distritong kombensiyon, sa pagtilaw sa mga kalipay sa pagpayunir karong ting-init. Kini mopauswag sa imong apresasyon ug mopadali sa imong pag-uswag sa pagkahamtong. Kini makapadasig usab sa imong gana sa buluhatong payunir ingong karera.
8 Mag-ampo kita alang sa panalangin ni Jehova diha sa atong paningkamot nga dugangan ang pagdayeg sa iyang ngalan pinaagi sa pagpayunir sa mga bulan sa ting-init.