Gamita ang Bag-ong mga Basahong Giluwatan sa Pagbuhat sa Kabubut-on sa Diyos
1 Sa walay duhaduha, si Jehova nga Diyos ‘nagsangkap kanato sa tanang maayong butang sa pagbuhat sa iyang kabubut-on.’ (Heb. 13:20, 21) Ang modernong kasaysayan sa iyang katawhan nagapakita sa tin-aw nga si Jehova naghatag kanatog direksiyon ug nagsangkap kanato sa mga basahong atong gikinahanglan sa pagtuman sa iyang buluhaton. (Mat. 24:14; 28:19, 20; Pin. 9:17, 19) Si Jehova nagpanalangin sa paggamit niining mga taganaha, ug padayong gipahimuslan sa Kristohanong kongregasyon ang talagsaong pagtubo.
BAG-ONG MGA BASAHONG GILUWATAN
2 Di pa dugay, sa atong “Pagsalig Kang Jehova” Distritong mga Kombensiyon, kita nalipay sa pagkadawat ug bag-ong mga basahon sa pagbulig sa uban nga matukod ang ilang pagsalig sa Diyos. Giluwatan sa tsirman ang bag-ong tract, Kon Nganong Ikaw Makasalig sa Bibliya sa Biyernes sa buntag. Dayon, sa hapon gipakita kanato ang mga demonstrasyon kon unsaon kini paggamit.
3 Gigamit ba ninyo ang maong tract? Ang pipila nga kinahanglang mogamit ug yanong presentasyon makapahimulos ug maayo niini. Ang kadaghanan kanato makagamit niini sa lainlaing paagi—tingali sa pagpailaila sa atong presentasyon, sa pagtanyag kon puliki ang tagbalay, ug pagbilin kon walay tawo ang balay.
4 Gikalipay ang pagkahibalo nga mabatonan karon ang tulo pa ka tract. Kana mao ang Unsay Gituohan sa mga Saksi ni Jehova?, Kinabuhi sa Malinawong Bag-ong Kalibotan, ug Unsay Paglaom Alang sa Namatay nga mga Minahal? Tinoa ang pagpedido dayon niini ug magdalag pipila niini aron magamit sa regular ug di-pormal nga pagsangyaw.
5 Ang usa ka bililhong bag-ong basahong giluwatan sa kombensiyon mao ang debulsang edisyon sa New World Translation of the Holy Scriptures. Karon kita may Bibliya nga ikabutang sa bulsa o gamayng bag. Aniay laing ebidensiya nga si Jehova ‘nagsangkap kanato sa tanang maayong butang sa pagbuhat sa iyang kabubut-on.’ Busa kon kita nagabuhat sa regular nga mga bahin sa pag-alagad o nagasangyaw sa di-pormal nga paagi, kita may kopya sa Pulong sa Diyos nga magamit sa pagpaluyo sa atong ginasulti.
GAMITA KINIG MAAYO
6 Kay nakakat-on gikan sa sambingay ni Jesus sa mga talanton, kita nahibalo nga gidahom ni Jehova nga atong pahimuslag maayo ang tanan nga iyang gihatag kanato. Busa, bug-os natong tumanon ang atong ministeryo pinaagi sa paggamit sa iyang mga tagana, apil kining bag-ong mga basahong giluwatan. Samtang gamiton nato kini sa bug-os, makalaom kitang modako ang atong kalipay tungod sa pag-uyon sa atong Ginoo ug sa maayong mga bunga sa Gingharian nga mosangpot.—Mat. 25:21; Juan 15:8.