“Ang Ilang Tingog Milanog sa Tibuok Yuta”
SA SALMO 19, si David midayeg sa mga katahom sa pisikal nga kalalangan sa Diyos ug mipahayag sa mainitong pagpabili sa kasugoan, mga pahinumdom, mga mando, mga sugo, ug hudisyal nga mga hukom ni Jehova. Gipakita usab ni apostol Pablo ang pagpabili niining mga butanga. Gikutlo niya kining salmoha ug gipaabot ang pagpadapat niini nganha sa bililhong buluhaton sa matuod nga mga Kristohanon. Bahin niini siya miingon: “Ang ilang tingog milanog sa tibuok yuta, ug ang ilang mga pulong ngadto sa mga kinatumyan sa gipuy-ang yuta.”—Roma 10:18.
Kining “mga pulonga” maoy butang nga naglangkit sa kinabuhi ug kamatayon sa tanang tawo karong adlawa, kay ang hudisyal nga mga hukom ni Jehova hapit nang ipatuman diha sa daotang sistema sa mga butang sa yuta. (Sofonias 2:2, 3; 3:8) Tino nga kinahanglang mahibalo ang katawhan bahin sa maayong balita sa Gingharian ni Jehova. Sa bisan diin ka molantaw karong adlawa, adunay kawalay-panaghiusa, kamalapason, krimen, imoralidad, bungkag nga mga pamilya. Aw, oo, dunay sulusulti bahin sa pakigdait, apan ang dagkong mga gahom nagapadayon sa paggamag mga hinagiban nga labi pang maartihon, samtang ang mga membro sa ‘nukleyar ng klub’ padayong nakaabot sa mas daghang nasod. Ang mga kahimtang sa yuta tin-awng haom sa “kataposang mga adlaw” nga gibatbat ni Pablo sa 2 Timoteo 3:1-5.
Kinsay maluwas gikan niining kagubtanana, ug sa unsang paagi? Si Pablo nagtubag sa yano, nga nagkutlo sa tagna sa Joel 2:32: “Ang tanan nga magatawag sa ngalan ni Jehova mamaluwas.” (Roma 10:13) Apan sa unsang paagi ang mga katawhan sa yuta ‘makatawag sa ngalan ni Jehova’? Aw, daghan kaayo ang wala gani makaila nga ang Jehova mao ang ngalan sa Diyos! Sa unsang paagi matabangan kining mga tawhana? Si Pablo nagtubag nga ang mga magwawali kinahanglang ipadala ngadto kanila.—Roma 10:14-16.
Ikalipay, gipadala ni Jehova ang iyang mga Saksi aron pahibaloon ang katawhan nga ang Gingharian sa Diyos haduol na ug kana magkahulogan sa kaluwasan ngadto sa kinabuhing walay kataposan alang niadtong nakaila sa Diyos ug sa iyang Anak, si Jesu-Kristo. (Isaias 43:10, 12; Lucas 21:25, 26, 31: Juan 17:3) Kining maayong balita ginapalanog “sa tibuok yuta.”
Minilyon nagapamati sa maong pagwali, sumala sa gipamatud-an sa tibuok-kalibotang total nga 9,201,071 nga mitambong sa tigom nga naghandom sa pagkamatay ni Jesus, sa Abril 1, 1988. Niadtong tuiga, ang kinatas-ang ihap nga 3,592,654 magmamantala sa Gingharian nakab-ot alang sa tibuok-kalibotang natad, ug 239,268 bag-ong ministro ang nabawtismohan—3.6-porsientong pag-uswag kay sa miaging tuig. Ang matinumanong mga misyonaryo nagpahimutang sa kinadak-an sa patukoranan sa maong pag-uswag, sumala sa pagabatbaton sa ulahi niining magasina. Apan sa katuigang bag-o pa, ginatos ka libong lokal nga Saksi, kadtong ‘nagtuo sa mga butang nadungog,’ natuhopan usab sa espiritu sa pagpayunir ug matag adlaw ‘nagapahayag sa maayong balita sa maayong mga butang.’ Ang aberids nga 455,561 Saksi nagtaho ingong mga payunir, pag-uswag alang sa tuig nga 4.4 porsiento. Ingong resulta, ang bug-os katibuk-ang gidaghanon nga 785,521,697 oras nagugol sa pagwali, nga kapig doble sa katibuk-ang gidaghanon sa mga oras 6 ka tuig nga miagi.
Ang tsart sa sunod upat ka panid niining magasina nagapakita nga detalyado kon unsa ka bug-os ang pagwali. Gidapit ka namo sa pagtuon niining 1988 nga taho sa tibuok kalibotang Kristohanong buluhaton.
[Chart sa panid 4-7]
1988 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN
(Tan-awa ang tomo)