Abota ang mga Kasingkasing Pinaagig Epektibong mga Pagtuon sa Bibliya
1 Si Jesus nagmalipayon sa pagbuhat sa kabubut-on sa iyang Amahan, ug nalipay siya sa pagtabang usab sa uban sa pag-alagad kang Jehova. (Sal. 40:8; Mat. 9:37, 38; 11:28-30) Kita usab buot nga mobulig sa uban sa pag-alagad kang Jehova kon ugaling mabatonan nila ang kinabuhi. Atong mahimo kini nga malamposon pinaagig pag-abot sa mga kasingkasing sa atong mga ginatun-an sa Bibliya. Nagalangkit kini ug mas pa kay sa pagdumalag panaghisgot sa pangutanag tubag sa usa ka basahon. Sa pag-abot sa kasingkasing, gikinahanglan tang mangandam nga anaa sa hunahuna ang atong estudyante.
2 Si Jesus nagbaton ug personal nga interes diha sa uban. Iyang gitagad ang ilang punto de bista. Migamit siyag mga ilustrasyon sa pagpayano sa malisod nga mga ulohan. Kon ang iyang mga tigpaminaw sa sinugdan dili makasabot sa punto sa iyang pagpanudlo, sa mapailobon iyang giilustrar ang buot niyang ipasabot. (Mat. 16:5-12) Ang dulot nga interes ni Jesus diha sa uban kinahanglang magpalihok kanato sa pagbuhat sama niana uban sa atong mga ginatun-an sa Bibliya.
IPASIUGDA ANG BIBLIYA
3 Unsa man kanang nakabulig sa daghan sa daling pagsanong sa pamatuod nga gihatag? Kana tungod sa mensahe nga nadawat nga nagsumikad sa Pulong sa Diyos ang Bibliya. Oo, ang Pulong sa Diyos nagaabot sa mga kasingkasing. (Heb. 4:12) Abagi ang estudyante sa pagkasabot kon nganong ang tinong dalan maoy maalamon o binuang. Pangatarongan uban kaniya kon sa unsang paagi ang pagkamasinundanon sa mga balaod sa Diyos magpabenepisyo kaniya.—Tan-awang The Watchtower, Agosto 1, 1984, mga panid 15-16.
4 Nakaplagan sa daghang magmamantala nga ang paggamit sa librong Nangatarongan epektibo kaayo sa pagpasiugda sa Bibliya. Pananglitan, sa pagtagad sa panid 124, parapo 13 sa basahong Live Forever, ang materyal sa panid 103 sa librong Nangatarongan ubos sa “Ngano ang mga bata mamatay?” mahimong gamiton sa pagpasiugda sa interes ni Jehova sa pagpatunhay sa kahikayan sa pamilya. Ang maong impormasyon hayan magpakombensir sa tawo maylabot sa gugma ni Jehova alang sa katawhan.
MOSUKNAG MGA PANGUTANA
5 Ang epektibong paggamit sa mga pangutana nakabulig kang Jesus sa pagpahunahuna ug pagpangatarongan sa mga tawo. (Mat. 17:24-27) Ang mga tubag sa estudyante basin makatabang kanato sa pagtino kon unsa ang iyang nakat-onan maingon man kon unsang di-kasulatanhong mga tinamdan nga siya nagapabilin pa niana. Hayan ang estudyante nakigbugno sa bisyo sa pagtabako. Ang pagtagad sa materyal sa kapitulo 27 sa librong Live Forever basin makatabang kaniya sa pagkasabot sa panginahanglan nga hunongon ang pagtabako. Apan, siya ba gayod kombensido nga kinahanglan siyang moundang gikan niana? Hayan ikaw makasukna: “Unsa man ang imong pagbati bahin niini? Ibutang ta nga ikaw kinahanglang moundang sa pagkakaron apan ang pipila sa imong mga higala magbiaybiay kanimo. Unsa may imong buhaton?”
6 May pahimangno, hinuon. May mga panahon nga ang maong mga pangutana mopatunghag mga tubag nga magpatingala o magpakyas kanimo. Nan unsa? Kon kana maoy sensitibong ulohan, basin mas maayong dili ipugos ang isyu kondili moingon: “Mopadayon una kita karon. Ato ra nang balikan sa ulahi.” O, “Buweno, butang kana nga pagahunahunaon, di ba no?” Kon ang estudyante mopadayon gayod sa maong punto, ikaw makaandam man ug impormasyon nga makabulig kaniya sa paghimog dugang pag-uswag. Ato gayong panlimbasogan sa pagpalihok sa kasingkasing sa usa ka tawo ug nagaampo nga si Jehova motabang kaniya sa pag-uswag sa espirituwal nga paagi.—1 Cor. 3:5-9.
7 Sa dihang magdumalag usa ka pagtuon sa Bibliya, kanunayng hinumdomi nga mogahin ug igong panahon sa pagpangatarongan uban sa estudyante sa materyal nga ginatagad. Ipahiangay ang imong mga paagi sa pagpanudlo aron mohaom sa tinong mga panginahanglan. Paninguha sa pagpatuhop sa iyang kasingkasing sa dulot nga gugma ug pagtahod kang Jehova, sa Bibliya, ug sa kapunongan ni Jehova.—Buh. 2:41-46.